طوق الياسمين
البارت السادس
ثاني يوم گعدنا الصبح تريگنا وبدلنا ورحنا للدوام حصلنا خط بنفس شارعنا ويوصلنا كلنا لكلياتنا دخلت للكليه عالم غير العالم اني وين وين عايشه وين كنت وين صرت كلشي يختلف عبالك مسافره للخارج شي عجيب المكان يخبل والبنات ولبسهم وشقاهم ويه الشباب والضحك كلشي غير بقيت صافنه تالي رحت للقسم مالتي وتعرفت على البنات وگعدنا نسولف سوينا گروب بس بنات وندرس ونسولف ونتشاقى كلش عجبتني الحياة هناك غير كلشي غير المهم بقيت هيج بين دراستي وبين القسم من ارجع من الكليه الگه البنات جايات همين نگعد ونسولف عن يومنا وعن حياتنا وتقربنا لبعض كلش صرنا مثل الاخوات هيج مرت الايام بين الكليه والدار وبقيت بين دراستي وحياتي الجديده وتعدى تقريبا شهرين لحد ما فد يوم اني كاعده بكافتريا الكليه ويه صديقتي سلوى وتقدم علينا ولد هي من شافته گامت وتركتنا اني بقيت اباوع متفاجئه اجه گعد گبالي كان اسمه فهد
فهد
السلام عليكم
ياسمين
وعليكم السلام تفضل اخي رايد شي
فهد
ممكن احجي وياج بموضوع
ياسمين
ما اعتقد اعرفك او تعرفني حتى تكون بينا مواضيع
فهد
بصراحه هو موضوع خاص بس انطيني فرصه اتكلم
ياسمين
تفضل اسمعك
فهد
بدون مقدمات وبدون لف ودوران اني فهد كليه علوم سنه ثالثه وبصراحه حيل معجب بيج وصارلي شهر مراقبج واعرف كل تحركاتج وقصدي شريف لا نيتي العب عليج ولا شي نيتي اتزوج والله الشاهد بس انتضر اتخرج بقالي سنه وحده اتمنى تنطيني فرصه اثبتلج نفسي
ياسمين
اخويه اني جايه هنا ادرس مو جايه احب وانحب بعدين اعذرني ما أگدر اخون ثقة اهلي من رخصتك
فهد
لحضه فهميني بس اشرحلج
ياسمين
اعتذر عندي محاضره
عفته وطلعت يمه منه شعرف عنه اجه وفرض نفسه عليه واني ألها سلوى اله اموتها شلون من شافته عافتني وراحت جنها تعرف شي بس خلي اشوفها اله اموتها دادخل القاعه وشفت سلوى درت وجهي عنها هي شافتني وضحكت واجتي عليه
سلوى
شبيج ياسمينه ليش زعلانه عليه
ياسمين
انتي شفتيه لفهد وتعرفينه ليش عفتيني وطلعتي
سلوى
بصراحه هو طلب مني هالشي واني ما رفضت گلت خلي يجرب حضه وشنو ردت فعلج
ياسمين
طبعا رفضت وما سمعته وعفته وطلعت
سلوى
مو اني گتله هذه معقده لا تتورط وياها تعبك
ياسمين
يعني جنتي تعرفيه شنو يريد
سلوى
اي بلي وگالي وحجه وياي واني گتله مالي دخل انت احجي وياها
ياسمين
عوفينا من هالسوالف التعبانه خلينا نكمل دراستنا احسن واذا شفتيه وحجالج عني گوليله نجوم السما اقربلك
وفعلا كملنا محاضراتنا ورجعنا للدار لگيت البنات مسويات غدى وينتضرني حتى ناكل غيرت ملابسي وغسلت وکعدنا كلنا ناكل ونسولف ونضحك وسولفتلهم على فهد وگالوا زين تسوين الي يريدج يجيلج من الباب مو من الشباك مثل الحراميه وكعدنا ناكل ونسولف
زينب
اووف كل وحده منا قصه وروايه الله يعينك يا عراق ماكو واحد بيك مرتاح
ياسمين
اي والله قصه اكبر من قصه صدگ زينب شنو قصتج سولفينا
زينب
يمعوده عايزه نكد خلينا مرتاحين
شهد
لا حبابه سولفي الله عليج گاعدين ما عدنا شي والليل طويل خلينا نغير جو
فاطمه
لج زنوبه الي يشوفج تضحكين ليل ونهار يگول نيالج گلبج فارغ
زينب
ههههههه هو الضيم والقهر بلي يضحك هواي اسأليني اني خلوني اسولفلكم قصتي وشوفوا ضيمي
لحكايتي بقيه تصويت بنات حته اكمل واذا ماتردون اكمل لاتشجعوني وكلولي بالتعليقات اكمل لولا
أنت تقرأ
طوق الياسمين
Romanceعندما تجمع ورود الياسمين وتصنع منها طوقا يكون غاية في الروعه ابيض كنقاء قلوبنا ومترابط يد بيد مثل ابطال قصتي مجموعة نساء ولكل منها حكايه فاجتمعن ليكونن طوق من الياسمين لكل منهن عطرها الخاص.........
