#حين يستبد أدم
همس ليل
البارت الثالث
رجعت بأفكاري لبابا وحجايته عن اهله واسباب خلافه
_بابا شنو جان هدية الشيخ لابوك...
_هداله وحدة من بناته...
_صدك تحجي ...ليش هية المرة تنهدي...وبعدين هو هم عنده بنات مامزوجات...لو هاي جبيرة وراد يمشوها
_على كيفج وحدة وحدة...اولا اي عد اهلنا وبالارياف للرجال السبع والي يعتزون بنسبه يهدوله مرة...وهذا التقليد موجود لغاية الان...
اما اذا عنده بنات...الشيخ مزوج ٣ نسوان..
واغلب خلفته بنات....
والبنية جانت بعده ماصايرة ٢٠ سنة يعني ابوية اكبر منها يمكن ب١٥ سنة ....
_وجدي قبل
_طبعا قبل...هو ماعنده بس اني وعمتج...
النوب راح يناسب الشيخ
_هذا جدي مو بس عصامي...بس انتهازي..ههههه
اسفة بابا مو قصدي بس ابوك يدور جاه ومال
_هو هم طغى من صار كلشي بيده...كام يريد يحرك الاخرين مثل مايريد...
عموما...ابوية تزوج خولة بنت الشيخ...جانت مرة كوية وصاحبة شخصية...وكفت وياه...
وفرضت سيطرتها على كل البيت...هو جان ملتهي بشغله طول اليوم ...وهية قادت البيت...
جانت قاسية والي تريده تسوي...بس جان ابوية يكدر عليها...
_زين وبيبتي ...اقصد امك..
_امي جانت مرة من اهل الله...يعني فقيرة ماتكدر على شي... وابوية هم محى شخصيتها من تسلطه
ولا تنسين اخذها صغيرة...وكبرت على طاعته ..ومالها راي
_زين خولة خلفت لابوك اطفال اكيد
_اي جابت ٣ عمامج...جاسم وباسم وقاسم...
بس ربتهم على القوة والعنفوان...الي يريدوه لازم يسووه....جان اقل واحد بيهم وافقر هو عمج الصغير قاسم..
_وانتو تاذيتوا منها...وجدي هم فرق بينكم
_هو الكل جان تحت سيطرتها...وابوية جان همه نكون مثل مايريد ونمشي حسب طلبه
_هسة لهنا ماكو مشكلة بينكم تستدعي الانقطاع
_لا مو هنا المشكلة...احنة ربينا وكبرنا سوة...بس اول خلاف بيني وبين والدي من خلصت ثالث وردت ادرس معهد معلمين...بوقتها كبت بينا المشاكل...جان يريدني الزم الشغل وياه...
ورفض اقدم ....بس خولة قنعته..
_شعجب معقولة رادت مصلحتك
_اني هم جنت عبالي...بس بعدين افتهمت جان تريد تفرغ المكان لولدها...حتى من يكبرون يعتمد عليهم...
وبدت تكبر المشاكل وية ابوية...لان تفرغت للدراسة وبعدها تعينت...
جان فرغ بيني وبين جاسم اخوية ٨ سنوات تقريبا....
من صار عمري ٢٤ جانت بنت اخو خولة طالبة بالمدرسة الي يمنا...عجبتني حيل...وبديت اراقبها...
وبهالوكت ابوية كام يحاول يقنعني ازوج اخت خولة...يعني بنت الشيخ الصغيرة
حتى يتقرب اكثر لهم واني رفضت...
وبقيت اراقب بسمة ..كل ماتجي لدوامها..جانت بنية رشيقة حلوة مشيتها جنها غزال تتهادي بيها
صفن بابا وراح لغير عالم...عرفته بدة يذكر ايامه السابقة...
عفته وكمت اسوي جاي ..حتى نكدر نكمل حديثنا...
نقطعت افكاري لان نعست نمت واني كاعدة بمكاني على الكرسي ....
من كعدت لكيت نفسي على الجرباية...واحد مغطيني...
ظليت صافنة ...اريد اذكر شوكت كمت من مكاني ونمت على الجرباية...
بس من البارحة واليوم شكد نمت.
كمت فتحت بردة الشباك الي اطل على البيت من الخلف...بس شفتها الدنيا المغرب...
والمظهر كلش حلو البيت يطل على حديقة جبيرة....وبعد السور بستان وحقول...
وبيوت زجاجية...وهواي امور ماميزتها لان بدة الظلام...سديت البردة...وقررت اسوي جولة
بكل الانحاء...بس يصير مجال...توضيت وصليت
بدلت ملابسي بنطلون قماش اسود وقميص طويل مخطط اسود وماروني...ولبست حجابي
نزلت واني على الدرج سمعت اصوات مختلفة...
بقيت مترددة اروح عليهم لو اروح للمطبخ...
بس قطع ترددي ...صوت
_السلام عليكم...شكلج مال واحد متيه
التفت شفت ولد شاب يطلع عمره بالعشرينات ... شكله اسمر مملوح...
_اي والله ...ما اندل بس المطبخ والدرج
ضحك....طبعا اذا عبالك ماخذة فاليوم ...كلما نسال عليج نلكاج نايمة...
_والله جوكم بيه فاليوم ...اصلا اني قليلة النوم...
_يلا صفي وياي لعد...خلي اعرفج بنفسي...
احمد ...ابن عمج جاسم...مهندس ميكانيك
مد ايده ...سالمته
_صدك هسة صنف واحد لان اني هم هندسة بس مدني...مع ايقاف التنفيذ
_ليش
_صف ثاني وتوقفت
بهاللحظة شفت كرم وكف يمنا...ويباوع على ايدي الي بيد احمد بخزرة...
احمد راسا سحب ايده...وحسيته ارتبك
_شعندك هنا احمد
_جنت يم عماتي..ومن طلعت صارت ذرى بوجهي حبيت ابارك لها
_الله يبارك بيك...يصيحوك جوة
احمد ترخص وراح.....نظرات كرم تتبعته
_احرجت الولد ليش هيج
التفت علية...انتي بعدين حسابج
_ما اعتقد سويت شي
باوع من فوك لجوة...ومو كلت ممنوع هاللبس
_انتة كلت بس اني ماوافقت على حجيك
تقدم باتجاهي...بس وكف من سمع صوت
_هاي العروسة نزلت...تقدم رجل اربعيني
الله يساعدج يابة...اني عمج قاسم..
تبسمت بوجه...شلونك عمو
تقدم باسني من كصتي...مبارك عليج بنتي
تعاي حتى تسلمين على جدج وباقي عمامج
اخيرا راح التقي بالرجل المستبد...
التفت على كرم بقى واكف امكانه واحسه نار صار
من التفت عليه تبسمت له بمعنى هالمرة ماكدرت تسوي شي
دخلت صالة كلش جبيرة يسموها ديوان...وهاي خاصة للضيوف الرجال حسب مافهمت بعدين
بس حسيت بالارتباك ...اكو هواي زلم..
_تعاي عمو ماكو احد غريب كلهم عمامج ولدهم
مشيت وراه ولاحظت براس الديوان كاعد رجال جبير بالسن يطلع عمره الثمانينات...
بس مابين عليه...بعده بهيبته وعنفوانه...
جان يباوع بنظرات تشبه نظرات الصقر...
من وصلنا له...حجى عمي قاسم
_بوية بوسي ايد جدج
لو علية ماتقرب منه....بس ماردت يسجلون نقطة علية...على ان جواد ماعرف يربي
دنكت بست ايده الي خالها على عوجية..
_شلونك جدو
_هلا بوية...مبارك عليج...وين رجلج
_نعم جدي هياني....جاوبه كرم
_تعال بوية ...
من اجى كرم اني وكفت بصف جدي
_بوية هاي القوطية(يقصد علبة ذهب صغيرة)
صباحية مريتك لبسها لها
فتح العلبة كرم جان بيه كلادة ذهب ضخمة...تقرب مني ولبسنياها فوك الشال...بس من رفع ايده
وحاوط ركبتي اثناء مايلبسني...تغلغل عطره وية انفاسي...
همس بأذني....تدبيرج وياي بعدين
من خلص جرني عمي قاسم يعرفني على عمامي
جاسم الجبير...وهذا عمره بداية الخمسينات...ولان ازوج من وكت ابنه علي بالثلاثينات...
عنده ثلاث ولد وبنية...علي واحمد وسامر...وفرح
علي شفته من شخصية جدي وكرم...واكثر اثنين من الاحفاد يشبهون جدي
عمي باسم...عنده كرم وايهاب وسعاد وموج
وقاسم...البنات هن الكبار ٣ والولد اثنين الصغار
من خلص تعريف ...كال عمي قاسم
_تعاي عمي اكعدي بصفي
جاوبه كرم...عمي خلي تروح يم البنات
_اي حقك عمي...روحي يابة ....الايام ان شاء الله الجاية طويلة ونتعارف زين
طلعت واني اجر نفس....ما ركزت على الكل لان جانت اكو نظرات ماحبيتها من البعض...
طلع وراي كرم ...وسحبني من ايدي...
_تعاي اوديج على النسوان....
بس جان يضغط حيل على ايدي...
ومن دخلت...الي يشوفنا يكول فعلا عرسان...هو كايدني...وهم عرفني على باقي نسوان عمي...
بس عيني جانت ادور على شخص معين ...
من كعدت ظليت اتنصت لحجيهن...لان ماكو موضوع مشترك وياهن...
بس كل ما اباوع باتجاه فرح اشوفها تخزرني بنظراتها
ما اكدر الومها...اجيت جاهز واخذت الانسان الي تحبه...
وجانت متأملة هو لها...
زين شمعنى كرم تقدملي...جان ممكن يزوجها...واكو ٣ خيارات غيره ممكن يتقدمون لي...
اخوه ايهاب صف ثالث تربية...
احمد ابن عمي جاسم مهندس
وسامر ابن عمي جاسم هم رابع صيدلة..
ليش مو واحد منهم رشحوه...
طبعا بيهم بس علي مزوج بنت خاله الشيخ...اسمها نسمة...وحبابة كلش
خلص العشى واني تعبت من المجاملة ودخت من العدد الموجود...ترخصت وصعدت لغرفتي
بين ماغسلت وبدلت ....اجيت انام ماكدرت لان هواي نايمة...
انفتحت الباب....ودخل كرم...
_ها شو بدلتي...
_قابل انام بلبسي...
_هذا لبسج ماريد ترجعين تلبسيه....
جان واكف من جهة الجرباية واني من الجهة الثانية
_اني هذا لبسي ومتعودة عليه...
_تغيريه وتتعودين على اللبس الجديد...هاي اولا
ثانيا....ولد عمي ماتتشاقين وياهم...وسلام باليد ماريد....
_ذولة هم ولد عمي ...مو بس انتة ...لو نسيت هالشي...
وبعدين مابيها شي اذا سلمت قابل بستهم...
بلحظة شفت طفر يمي...بس اني جنت اسرع منه...
طفرت على الجرباية وكفت بالنص...
يعني مين مايصعدلي انزل من الجهة الثاني...
وكف وهو ياشر باصبعه بعصبية....
_شوفي لج...لا تتمادين بالحجي ...الي اكوله.
ينسمع بدون مناقشة...
_ليش شنو جارية عندك
_ورب الكعبة لما عيب منة الناس بعدهم مامشوا...جان راويتج...
واريد اشوق المرة الي تخالف ....
نزع دشداشته...واخذ منشفته وطلع...
تربعت على الجرباية بنفس مكاني...واني اعصابي تلفانة...
ماعرف ليش المواجهة وياه تتعبني....
شوي ورجع لاف المنشفة على خصره وشعره ينكط مي...
من شفته شهكت بصدمة ودرت وجهي...
هو ضحك....وجنت اسمع حركاته وهو يفتح المجرات والكنتور حتى يطلع ملابسه...
حسيته كعد على الجرباية...التفت شفت باقي بالداخليات .......
هذا شلون بيه...ما يستحي ابد...
نزلت من جهتي...
_وين رايحة...
التفت عليه بتساؤل....
_رجعي هنا
_كتلك سابقا....
_شكلتي
_لا تمد ايدك عليه وتلمسني
ارفع ايديه...وباوع عليهن
_ايدي ذني ماعتقد لمستج....
وجان يضحك....خلي يكون بعلمج...اني ما اريدج
وراح اخليج انتي تجيني ومو اني اجيج
_هههههه....ضحكتني والله ...هاي بتخيلاتك...
_خلي نشوف ....هذا وعد علية...اذا ما انتي اجيتيني وطلبتي ...ما اطلع ابن ابوية...
_عادي....الاحلام ابلاش ...احلم براحتك
ابتسم....نشوف...
عدل نومته وانطاني ظهره ونام...
كعدت على الكرسي....لحد ما حسيته غفى ...
كمت ادور فراش انام عليه مالكيت...
تقربت منه...شفته مستغرق بالنوم
رحت من الجهة الثانية للجرباية ...ونمت على الحافة كلش....
كعدت الصبح على صوت الديج...صوته حيل عالي..
بس حسيت وجهي مدحوس بشي....فتحت عيني زين...
شفت نفسي مدحوسه بظهر كرم...راسا سحبت نفسي...
لذلك ردت انام بالكاع...اني بطبعي من انام اندحس بظهر اختي لو تلكين مصفوطة وية الحايط
ماعرف ليش....همزين هو غافي...
شكد عيب هسة عباله اتحارش بيه
غفيت واني الوم بنفسي ومجلبة بطارف الجرباية...
مرة الثانية من كعدت جان كرم ماموجود...كمت من فراشي
ورحت للبردة...فتحت...وشفت منظر يجننن
خضار..على مد البصر...شكد حلو فتحت الشباك اشتم هوى...
رحت للكنتور فتحته اريد اطلع ملابس...باوعت اكو شي غريب...شنو
ظليت صافنة اكو فراغ هواي بملابسي المعلكة...من كلبتهن...شفت كل بناطيري ماكو
رجعت كلبت زين وبسرعة ..
ماكو...رجعت على الملابس المصفطة...هم ماكو
_ادورين شي
التفت على صوته...
_صباح الخير ياحلو...مضيع شي
كزيت اسنوني على حجايته
_وين بناطيري...
جان مجتف ايديه ومرتجي على حافة الباب
_بح...بناطيرج ماكو بح
_يعني شنو
_يعني ذبيته بالتنور من خبزوا الصبح
_انتة صدك تحجي
_اصور ما عندي وقت اشاقة وياج
كمت افور...اريد اضربه بشي...
_ها البزونة اكلت لسانج
_لا بس ما لكيت الكلمات المناسبة
_ههههه...هذا من حظج ...بدلي وانزلي تريكي...
وحظري نفسج اليوم راح نتغدة ابيت عمي جاسم
عافني وطلع
كعدت على حافة الجرباية...واني اعصابي تغلي
بس اذكرت اليوم راح التقي بالشخصية الي من جيت لسة ادور عليها وماشفتها...
ورجعت افكاري لكعدتي وية ابوية...
وللحكاية تكملة
