حين يستبد أدم

البارت التاسع

#حين يستبد أدم
همس ليل
البارت التاسع
طلعت فستاني من الكنتور...جان لونه ماروني وقصير لحد الركبة ومن جوة كلوش...
ومن ناحية الصدر لفة ونص ردن...
بقيت اتفرج عليه وجنت خايفة لا كرم مايقبل البسه...
اذا شكه مثل قميص ريم يمكن ابتلي بيه...
رجعت للكنتور طلعت قميص ريم...لسة ما كلت لها على قميصها....
بعد عزومة اهلي...رحتلهم قليل...ويكون كرم وياي...نروح نص نهار او اقل...
وبالفترة الاخيرة المسافة البعيدة تتعبني واظل اتقئ...لذلك بس نتخابر...
وكل مرة اكول لريم نسيت اجيب قميصج...
هية ملتهية بتجهيز بيتها....
جريت نفس قوي واني ارفع شعري...كعدت مقابل المراية...بقيت اباوع على نفسي...
تبسمت امي تكلي فد يوم تتخبلين من كد ماتحاجين نفسج بالمراية...
بلشت اخلي مكياج ...اليوم مهر سعاد ...
جنت فرحانة لها...خطية تستاهل ...يارب تكدر تنسى وتبدي حياة جديدة وية حامد
وكفت ايدي واني ارسم عيني...بديت استرجع
التلاث الاسابيع الفاتت
بعد وعكة سعاد...البيت كله ركز وياها خاصة كرم...
حسوا بقيمتها وشلون جانت شايلة البيت...
خلال هالفترة...سعاد مريضة واني ماكدر اشتغل هواي...وعمتي تقوم بالخبز والغدة وموج شغلها كلاوات...
كرم....كال راح اجيب وحدة من العرب تساعدكم.
جاب مرة عمرها نهاية الثلاثينات...بس شاطرة بالشغل...اسمها ام خضير
بعد اسبوع من مرض سعاد اجى صديقه حامد زيارة وياه امه...
طبعا هو وحيد امه وعنده خوات مزوجات ...
ام حامد...والله من كال اليوم اتغدى يم كرم...اني كتله لازم اروح وياك...حبيت كعدتكم من اجيت بالمرة السابقة
ام كرم...هلا بيج دادة...اذا ماتشيلج الكاع...عيونة تشيلج
ام حامد...بالمهلي...والله والنعم منكم...يمة ذرى مبارك عليج...يكومج الله بالسلامة
ذرى...اشكرج خالة
بس ام حامد ظلت عينها على سعاد من دكوم وتكعد...
حسيتها بعيونها كلام...اخر شي من راحت سعاد
ام حامد....ام كرم ...خيتي اني ماعندي بس حامد..وانتو وتعرفونه...اخواته مزوجات كل وحدة بديرة...ووليدي حباب وماعنده لا زايدة ولا ناقصة...
اريدله بنية حبابة وبنت اوادم...وخية مالكيت احسن من بنتكم سعاد...
انة ماكتله راح احجي...كلت اشوف رأيكم يلا
عمتي ظلت ادير بعيونها...
ام كرم...خية ماعرف شكولج...بس سعاد
اني قاطعت حجي عمتي...خالة من رخصت عمتي..خلي انكول لعمي وكرم والرأي لهم
ام حامد...فدوة لطولج يمة...وانتو شنو رايكم
عمتي وجهت نظرها لي...بمعنى شلون حجيتي
ذرى...خالة وين نلكه احسن من حامد....بس تعرفين عدها ولد عم ولازم نشوف يلا
ام حامد...ربي يقدم الخير
بيومها بالليل بعد العشى...جان عمي وكرم وايهاب كاعدين
واني وسعاد نسويلهم جاي...ام خضير المغرب تروح لبيتها...
سمعت صوت كرم صاح علية
ذرى ...ياستار...شكو
سعاد...ههههه...شوفي شمسوية انتي
رحت عليهم وديت الجاي...وكعدت
كرم...انتي شلون تنطين امل للمرة
ذرى...يامرة مافهمت...
طبعا فهمت بس احب احرك اعصابه
كرم...ام حامد
ذرى...انتة نفسك تحمد بيه...وتكول خوش ولد
عمي...اي بوية صح...بس البنية محجوزة لابن عمها
ذرى...على راسي...بس عمي سعاد عمرها ١٩ سنة وكاعدة من المدرسة...
وابن عمها خلص وتوظف شينتظر حتة يتقدم...
مو دكول ماعنده امكانية...ولا ينتظرها تخلص دراسة
ايهاب...صح حجي ذرى...اذا يريد يجي يفضها
عمي صفن...وكرم سكت اول مرة ...
ذرى...عمي من رخصتك خامة تبقى البنية معلكة..
عمي....بوية قابل نكله تعال اخطبها
ذرى...لا عمي...قابل هية ظالة...بس نصيب اجاها...وانتو اعرف تكدر تكول لعمي جاسم
اذا لهم نية...راح يكولون...واذا لا خلي البنية تشوف نصيبها...
كرم...ترخص من ابوه وصعد...
واني لحكته...ردت اقنعه...
دخلت لكيته يبدل ...رحت للميز التواليت وبديت انزع شالي
_شو ما حجيت شي
جنت اباوع عليه بالمراية
_لا تحشرين نفسج...موضوع مايخصج...
التفت عليه..ليش مايخصني...سعاد بنت عمي وحماتي
_هاي من شوكت
تقربت منه..من جبرتني ادخل بحياتكم...
_رجعنا لنفس الموال....بابا لا تكونين السبب بالخراب بين عمامج
_ليش خراب...هذا زواج...يعني عشرة عمر ماينبني على المصالح....
وبعدين من يكول احمد مخليها اباله...اساله انتة وشوف...
_انتي ناوية على خراب العائلتين...
جان يرفع الغطى وهستوة كعد على الجرباية دينام
_هاي غير اخوة تربطهم..اذا تخرب من هالاشياء...
لو تخاف تخرب علاقتك انتة بيهم...ومايبقى لك خط رجعة
كمز من فراشه...وصل يمي ولزمني من زندي
_شوفي لج...اني ما اخاف من احد...واذا اريد اسوي شي...لا انتي ولا الاكبر منج يمنعني
هد ايدي ورجع نام
بس الغريب...ثاني يوم بعد الغدة...انفرد بعمي..
وبعدين صاحوا لسعاد...
ومن طلعت عرفت كرم حاجي وية احمد...
اسبوعين بعدها التهينا ندور فستان لسعاد...
وطرأت على علاقتي بكرم تطورات...
مرة جنت بالغرفة ارتب بملابسي بالكنتور...ادور شنو عندي ممكن البسه بالمهر...
صح طلعت وية سعاد...بس الفساتين جانت غالية واني ماعندي فلوس...
وسعاد من كالت اخذي فستان كتلها عندي
بس اغلب ملابسي ضيقات علية..بطني شوي بدت تبرز...وكفت كدام الكنتور حايرة
دخل كرم...شدسوين
التفت عليه...ارتب ماكو شي
_عندج شي تلبسيه للمهر
سكتت...ماعرف شاكول...
_داشوف شنو المناسب
اتقدم وكف وراي...شوفيني...
سديت الكنتور...ومشيت...من الكه شي مناسب
لزم ايدي ووكفني...شنو تستنكفين اطلبين فلوس مني
جاوبيني...
_مامحتاجة
_مامحتاجة...ترة اني زوجج واجب علية هالشي...ولا تصورين متعمد ما انطيج...بس صراحة فاتتني...
البنات اخواتي من يريدون شي يكولون...
ماعرفت شنو اجاوبه....لان صدك بداخلي اصورت تعمد...حتة انزل نفسي واطلب..
_وين لسانج....
_شوف انتة تتحارش بية...اسكت مايعجب...احجي مايعجب
ضحك بقوة...اي هسة عرفتج..
بس اثناء مايضحك...جرني باتجاهه...
ورفع وجهي له...وفجأة ظل صافن بوجهي...وبطل ضحك..
_تعرفين انتي حلوة
تبسمت...اعرف
_مغرورة...
كالها وصوته نبرته تغيرت للهمس..
رفع ابهامها وبدة يمشيه على شفتي السفلة
ماعرف شنو الي خلاني واكفة بمكاني...
جانت عيني بعينه...ونزلت عينه لشفايفي...
ايده تركت ايدي ولفها على خصري...
قربني له..واني جنت مثل الانسان المسلوب الارادة...
انحنى براسه بأتجاهي...والتقط شفايفي بشفايفه...
ماعرف شكد بقى متمسك بشفايفي...
بس من ابتعد حسيت جان الهوة مكطوع عني...
رفعت ايدي اريد استند لشي...وجان صدره هو السند...
نزلت شفايفه لركبتي...وايديه بدت تتحرك على ظهري....
من سحبني للجرباية...ماحسيت ...
وبدت ايديه تستكشف جسمي  ...جانت تفتحلي ابواب ماطارقتها قبل...
نفسه تغير وبدة يهمس بكلمات مافهمتها لان جنت احس بدوامة من المشاعر..مااكدر اسيطر عليها ولا اتعامل وياها...
_لا تخافين مو نفس اول مرة ...
جانت كلماته يهدي بية من تصلبت وخفت من راد يوصل للنهاية...وفعلا كان عالم اخر اخذني له ورجعني...
حسيت بتعب بعدها راسا نمت....
كعدت على ايد تتلمس وجهي...فتحت عيني...شفته متجي على ايده ورافع راسه ويده الثانية تمشي على وجهي...
_ماطالع اليوم...
تبسم...بعد وكت....الدنيا الفجر..
_ليش كاعد لعد
_انتي فززتيني
_شنو هالاتهام...اصلا جنت نايمة
_لازم ماتدرين بنفسج...من بداية زواجنا تنحشكين بظهري...
كعدت فجاة ...صدك..
عيونه توجهت للغطى الي نسحبت عن جسمي
سحبت الغطى راسا...مد ايده ولزم ايدي
وعينه تباوع بعيوني...سحبني باتجاهه...
وبدت شفايفه ترسم لوحة خاصة على انحاء جسمي....
ثاني يوم كرم طلع ...ورجع من وكت
جنة ملتهين انظف عكب باجر الكعدة مال مهر
_ذرى...تعاي
صعدت وراه...
_بدلي خلي اخذج تشترين فستان...
بين ما بدلت...ونزلت لكيته يحجي بالتلفون...
من خلص
_اجتني شغلة ...هاج هاي الفلوس وراح ادز ايهاب وياج...
صدك رحت وياه...وظلينة فترة نفتر...
يلا حصلت شي...بس تعبت واصلا الصبح مخلصته تنظيف...
بالرجعة خلصته كل شوي اوكف ايهاب واتقيء
...وبس وصلت صعدت لغرفتي...
_شلونج ذرى...
فتحت عيني على كرم كاعد يمي...
_الحمد لله
_اخذج للدكتورة...ايهاب يكول هواي تقياتي
_عادي فترة وحام...وهم صايرة ادوخ من اروح مسافات...
بس اريد انام...حتة باجر اكدر اروح وية سعاد
_ماتاكلين شي
_لا عفية
عافني نايمة...اكثر شي رغبتله بحملي النوم...لو  اظل يوم كامل نايمة ...ما اشبع
الصبح اخذت سعاد لصالون اعرفه ابغداد....حتى تصبغ وتحف قبل الحفلة مال باجر....
بس قبل ما نطلع...كرم كال امانة عليج لا تكصين شعرج...
_ههههه....اصلا لو اموت ما اوصل مكص عليه...
صار سنين اطول بيه....
_اذا تريدين تقهريني كصيه
بالصالون يشتغلون لسعاد واني شوية يمهم...وشوية اطلع برة ما اتحمل ريحة الصبغ
وصلنا ايهاب...وبالرجعة كرم اجى علينا...
بس صعدت بالسيارة خليت راسي على الكشن
كرم_شنو حامل...لو شاربة فاليوم
ذرى_لا دايخة
سعاد...لو ادري هيجي اتعبين جان ما جبتج وياي
ذرى....انتي ماميتة علية تخافين على كعدتج باجر
لا تخافين احظر حتة لو شايليني
كرم...عاد بالعناد هية عد يمناج
ذرى ...عفية كرم اوكف
طبك على صفحة ونزلت ركض...فرغت شكو ابطني
لحكني هو وسعاد ابطل مي غسلوا وجهي...
ذكرت هالاحداث ...رجعت كملت مكياجي...
وبدلت ملابسي...فتحت شعري كلت مالازم اسويه شي هو هيج حلو
طلعت جبة وشال احتياط...
بقيت كاعدة انتظر كرم ...لان سال اكثر من مرة على الفستان...بس جنت تعبانة كتله باجر من البسه اتشوفه...
اليوم ما رحت وية سعاد للصالون خفت لا هم اتخربط
فتح الباب...ودخل كرم...
جنت كاعدة على الجرباية والفستان يرفع بالكعدة...
جتف ايديه...وعيونه لاحت بيها نضرة غضب
_كل عقلج تنزلين هيج...صوجي كان المفروض اروح وياج..
وكفت...وافتريت كدامه...
_حلو شبيه...وهاي جبة اذا دخل احد
_غيريه..
_ماعندي شي ثاني...
_ماعرف دبري حالج....
_خلص...مانزل
_ذرى لا تعاندين...شدكول الناس اذا مانزلتي
_شيريدون يكولون خلي يكولون...مايهمني...
_خوش لعد ابقي هنا
طلع وسد الباب....
رجعت كعدت على الجرباية مقابل الباب...
يعني اريد عرف حفلة بس نسوان...واصلا عدهم صالة معزولة...منو راح يشوفني...
اهلي ما اجوي لان جانوا عازمين اهل علي وتضاربت المواعيد...فعتذروا
مرت نص ساعة...وسمعت هلاهل عرفت سعاد اجت من الصالون...
كمت افتر بالغرفة ...سمعت صوت خطواته
ركضت للجرباية من الجهة الثانية...مددت رجلية
وخليت مخدة ورة ظهري...ولزمت تلفوني ..
على اساس مامهتمة...
طب للغرفة...وكف من جهة الجرباية الثانية..
ظل يباوع علية...بس ماحجاني...بدل دشداشته...ولبس غترة وعكال...وكف كدام المراية تعطر...وعدل ملابسه...
جنت اتبع خطواته....بطارف عيني
من خلص ...شال الساعة...ديلبسها
_يعني بعدج معندة...واذا شكيت الثوب عليج هسة
كمزت على الجرباية بسرعة ...وكفت بالنص
_لج مخبلة ...اكو حامل هيج تكمز
_بس تقترب مني اكلب الدنيا
_صوتج لوما الناس جوة ...جان راويتج تالي عنادج وين
تخوصرت...وهزيت جتفي...
_مايهمني
شفت نظرة عينه لانت وتغيرت
_تعاي هنا
_شنو...ليش مخبلة اجي يمك
_ليش انتي عاقلة....انزلي عن الجرباية
_ما انزل ....ماعندي غير هالفستان..
جنت احجي ومامنتبهة عليه من تحرك وصعد بلمحة عين يمي...
ردت انهزم لزمني من خصري ...وجرني له
_شنو عبالج ماكدر الوحج
_اذا اتشكه ...والله العظيم ما انزل اليوم
_لا تهدديني...تعرفين شنو تالي تهديدج
ظليت اباوع عليه...شلون..اعرف بيه مستعد كلشي يسوي...
واني ما اريد اكون اقل من الجوة...
قررت اغير طريقتي لبعض الوقت...
خليت ايدي على صدره..ونعمت صوتي..
_كرم حباب...ماعندي شي والله...بعد البسه
_مو تدرين اني ما اقبل على هيج لبس  ..ليش اشتريتيه
اقتربت اكثر بحيث صرت بحظنه كلش...رفعت وجهي له....وجانت ايدي تلعب بدكم دشداشته
_حفلة بنات...ما اعتقد اكو رجال يفوت
شفته صفن بوجهي...ونظرته جانت ذابلة
ايد جانت حول خصري والثانية رفعهة ولزم شعري من يم ركبتي وقرب راسي...
واخذ شفايفي بين شفايفه....من انسحب....
جان يتنفس بعمق...الناس جوة ...
نزلي وياج جبة وشال...اياج اشوفج بدونه اذا دخل الولد...
نزل من الجرباية..واني ابتسم بانتصار...
التفت...مد ايده حتى انزل...
_عدلي شعرج...
_اوكف وين رايح....جريت كلينس...وتقربت امسح حلكه....
_والله دوختيني....
خليت الكلينس بيده..ورحت مقابل المراية...امشط شعري...
جانت الحفلة حلوة وبسيطة حاولت ما اطلع من الصالة....جنت ملتهية مامركزة وية الباقين
رغم هذا ثالث شهر هنا...بس ماصار عندي علاقة بيهم قوية...
عقدوا العرسان...وكالوا راح يجي العريس يلبسها الذهب...
لبست جبتي وشالي...اجت طفلة كالت يريدوج بالمطبخ...
رحت مالكيت احد....شوي اندك باب المطبخ...
فتحته لكيت احمد....ها احمد محتاج شي
_لا مو انتي دزيتي علية
_اني لا شعندي...
_اني توقعت شفتيها فرصة
اجى صوت كرم يقطع حديثه
_فرصة لشنو....
التفتنا اثنينا بنفس الوقت..
كرم...احمد شعندك هنا
احمد تلبك.....ردت فرح
كرم...روح هسة...
جانت عيون كرم اطك شرار...
سد الباب برة احمد....ما راح احجي وياج هسة...بس يمشون اهل الولد بوجهج للغرفة...حسابي وياج بعدين
عافني وطلع....هذا شبي ...شنو الي صار...جنت واثقة من نفسي مامسوية شي
بس بقيت على اعصابي...واني استعد للمواجهة
حتة ما انتبهت ابد على الي صار ...
بعد ماطلعوا اهل العريس...وبدوا اعمامي يرحون
صعدت للغرفة وخليت ام خضير تنظف...
لان اني هم تعبت من الوكفة
نزعت جبتي...وشالي...دك موبايلي مسج فتحته
شفت احمد دازلي...
_خوما صار شي وية كرم
سديت الموبايل وخليته على ميز التواليت...
بلحظتها فتح كرم الباب وطب
وبنفس وقت توجه لي ولزمني من زندي بيديه وجرني يمه
_مو كتلج مالج علاقة بولد عمي
_ترة همة هم ولد عمي ...مو غربة
_وشمعنة احمد من دونهم
جان يكز على سنونه من يحجي
_كرم...مدافهم شنو تقصد
_انتي فهميني...شطلعج يمه
_كالوا رايديج بالمطبخ...وهو دك الباب
_سبحان الله...وشنو جانت الفرص  المناسبة
صفنت عليه شنو اجاوبه
ضغط حيل على زندي ...وجرني له
_جاوبيني...
_بشنو داتتهمني...مادافهم...
_وليش تصورين داتهمج
_طريقتك بالكلام...ترة كلشي ولا سمعتي
_سمعتج...مافكرت بيها من وكفتي وياه وحدك من الصبح بالحديقة تحجون ساعة
لو هسة من وحدكم بالمطبخ والبيت مليان ناس
يحجي ويزيد ضغط على ايدي
_اخ كرم ايدي...شتدحجي
بيده الثانية جر تلفوني  فتحه...جان بدون رمز...فتح الرسايل وشايف رسايل احمد
_هاي شنو...مو تتواعدين وياه....وليش خايف لا اسويلج شي
_اكيد انتة تخبلت...لك اني اشرف من ...
وسكتت...
هد ايدي وجلب بشعري وجرني منه...
_الشريفة ما تتواعد من ورة رجلها
جان يجر بشعري وأذاني حيل واني خليت ايدي على ايده احاول اخلص شعري
_احجي شعندج جان وياه
_عوفني...لو تموت اليوم مابقة لحظة يمك...
دفعني حيل على الجرباية...واني هم ما اريدج بعد
لوما الطفل الي ابطنج... من تجيبين....تنكشرين لاهلج...مو هسة
_وهذا الطفل اني ما اريده لانه منك
جان صوتنا يرتفع كل شوي...
بقة يباوع علية شوية...وعافني وطلع
بلحظتها انهاريت ابجي...شلون هيج يتهمني...
نزلت للكاع وخليت راسي علة الجرباية ...
ليش بابا ...ليش هيج شمرتني...
اذكر ذاك اليوم الاكشر الي دز بيه علية ابوية
*******
_بابا تعاي احجي وياج
_نعم بابا تفضل
كعدت يمه...
_شوفي بنتي...انتو ماعدكم اخ وخالج مثل ماتشوفين ولده اصغار وهو رغم حباب ...
بس مايعتمد عليه...
يعني ماعدجن سند...
_بابا انتة سندنا
_بابا اني ما دايم..وكتلج سابقا ...
بهذا الوكت الواحد لازم يدور اهله ويتواصل وياهم
سكت...وجنت خايفة من كلماته الجاية
_بابا ثقي بالله اني ماتهمني الكاع بكد مايهني..
اخلي لج ولاخواتج...احد تلجئون له وكت الشدة
_بابا الله يطيك طول العمر...قابل كل الناس عدها اهل ...هواي بطرك نفسهم....وترة مو كل الاعمام
يعتمد عليهم
_اعرف بنتي...بس ما اريد هالشي لكم...عمامجن وولد عمامجن سندكم...واعرفهم زين
احنة تربيت عرب...مانعوف لحمنا مهما صار
_بابا...هسة مافهمت الي تريده
_بنتي ...ريم اني انطيت كلمة للولد...ما اكدر اكسر بيها...
وعمامج ماراح يفكون ياخة لحد ماياخذون وحدة
يعني بقيتي انتي...لان سما صغيرة
_بابا صدك تحجي...ليش اكون الضحية
_لا بابا...تتوقعين اقدمج ضحية...
ترة الولد خوش ولد...شهادة وشخصية ومركز..
وصاحب كلمة...
اعتبري غريب وتقدملج....اذا تقدملج على هيج مواصفات ماتقبلين...
_بابا  اني اريد اكمل دراستي...مامفكرة هسة بالزواج
_بابا برضاتي عليج...
_اني حتة ماعرفهم
_لا تعرفيه...كرم
وكفت ....لا بابا مستحيل...هذا انسان شايف نفسه
_خوش ولد بابا...فكري ورجعي جواب
جنت مقررة مستحيل اوافق...
لحد يوم...امي كالت ليش ماتوافقين ...
شناقصه الولد....
وصار مجادلة بالحجي...كتلها انتي علمود الفلوس ومستعدة تقدمين اي وحدة بينة
زعلت مني....والبيت كله صار ضدي...
حسيت كلهم كام يحسسوني اني انانية افكر بس بنفسي
اخر المطاف رجع دز بابا علية ..من كتله ماموافقة
_عاد هسة مو بكيفج....لازم توافقين هذا خياري
فكري بكل شي...
اولها ...مراح يخلون وحدة بيكم تتزوج
بابا انطاهم كلمة بدون موافقتي...وتفاجات حدد موعد لكرم يجي يعقد مهر....ماكان بيدي شي شسوي...
بيوم عقدنا ...كرم دنك شاورني...مو كتلج اذا ردتج انولج
زواج غصب ...مصلحة...وتحدي...خوف..شراح يكون نتيجته
*******
حسيت ايد على جتفي
_ذرى شصار...كرم نزل عصبي وابوية حاجاه كب عليه
رفعت راسي من الجرباية...شفت سعاد كاعدة يمي
_ليش تبجين ....شنو شبيكم
حجيت الي صار...
_ صدك تحجين...احنة عادي نحجي وية ولد عمي
وبعدين هو شمدريه عندج رقم احمد
_ما اعرف
_انتي هم غلطانة ليش اخذتي الرقم...
_ماسجلته والله ...ذبيته...بس هو ماعرف مين جابه...
_ذرى زين جيته صدفة من جنة بالحديقة ...
_حتة انتي سعاد
_فهميني ذرى...ليش راسلج احمد
_هو من عرف كرم مايقبل اداوم اقترح اكمل باهلية وما اداوم بس وكت الامتحانات ومتبرع يسال...
من انطاني الرقم وماجاوبته...دزلي مسج...اذكرت شغلتج...
كلت خلي افضها....من شفته حجيت وياه على موضوعج..
_ليش ماكلتي لكرم هالحجي
_قابل اكله ردت اشوفه يحب اخته لو لا
_صوجي خليتج بهالموقف...ذرى الله عليج جنتي ناوية تكملين من ورة كرم
باوعت عليها...وكفت...شنو شايفتني ...مين جاية
...تعبانة سعاد...اريد انام
سعاد...
باوعت لذرى وهية واكفة بانفة...هاي مشكلتها وية كرم...
اثنينهم كبرياء وعنفوان...وعناد....والحياة ماتمشي هيج...
نزلت..واني افكر ليش هيج يسوون...
كرم طول عمره متعلم على الاوامر...طبعه مثل جدي ...يحب الكل ينفذ ومايناقشون ...
وذرى...ماخذة المسالة تحدي لان غصبوها
بس ماتفهم هنا الرجل لازم يطاع...لازم المرة تسمع كلامه...ماكو خيارات لنا...
ضجت عليهم...المفروض اليوم افرح بخطوبتي...
بس نكلبت الفرحة صخام ولطام...
ذرى....
متت قهر من كلمات كرم ...والنوب كملتها سعاد
نمت وثاني يوم شفت العائلة كلها ماخذة موقف مني
معقولة حجالهم...
لا ما اعتقد ...كرم مو من هالنوع...
موج جان بعينها نظرة شماتة ...اني موضوعها اجلته لان التهيت وية سعاد
كرم حتة كدام اهله كام مايحاجيني...
وطبعا محد يكدر يكوله ليش حتة ابوه...
وداىما يرجع متاخر..اكون نمت...بعد كم يوم تعمد يطلع صوت من الصبح...
كعدت...شفته واكف...انتبهت اني مكشفة...ودشداشتي مرفوعة...
_النوب من تنامين ..الزمي جهتج..والبسي شي مستور...
كال هالكلمات وطلع...يمكن بغير وكت جنت اكيف احرك دمه...
بس حاليا اجتني حالة من لا مبالاة...
واصلا...صرت انفرد بنفسي بالغرفة...اضوج من اسلوبهم ...لان بدوا يتجنبوني...
كم مرة انجمعوا ابيت واحد من عمامي..وما اروح..
وهو ما يكلف نفسه يكول تعاي...
موبايلي طبعا اخذه...ينطيه لي بس من يخابر احد من اهلي...
بالليل صارت صعبة انام على الجرباية...
استحيت اطلب من احد فراش...ما اريد شماتة احد...
جنت اباقى صاحية بس اتصنع النوم...لحد مايجي وينام...امد جرجف بالكاع من الجهة الثانية وانزل انام عليه...
واوقت المنبه...بس رجاج...قبل ما يكعد اصعد على الجرباية...
سعاد التهت بخطيبها ودتجهز....وجابلها تلفون...
دخلت بالرابع...وكرم كال اوديج للدكتورة...
هاي من المرات القليلة الي حجة وياي بيها...
بس هالمرة اخذ امه ويانة
الدكتورة...كالت وضع الطفل كل زين ...وبيح ولد
عمتي كيفت....هو ما حجى شي
بعدها بيومين...جانت عزومة العشى يمنا...
عمتي كالت للكل...شفت فرح تنظرلي بغضب
وموج هم....
تعشوا واني تعبت صعدت قبل مايروحون...
انتظرت كرم يصعد ينام...بس شو بطني كامت توجعني...
كلت يجوز من التعب....ومثل كل يوم
من نام كرم نزلت بالكاع...جنت اتكلب ...
بس الوجع زاد...كعدت بمكاني...
بس الالام صار قوي...وحسيت عبالك سجينة داخل بطني...اجتني مغصة وياها صحت بصوت
...كرم الحكني....
للحكاية تكملة...