#حين يستبد أدم
همس ليل
البارت السادس عشر
موج....
تفاجأت بسامر يطلب شغلات غريبة...
ويريد افتح كاميرا وياه...
واسمعه حجي مامؤدب...
موج...سامر شنو داتحجي...شبيك
جان صوته متغير...ماعرف شبيه
سامر...موج حبيبتي انتي بمثابة زوجتي...
اول وتالي بس اتخرج نزوج..
يعني بس مسالة وقت...
موج...حتة لو مااسمحلك تحجي هيج وياي
سامر...لا تبيعين شرفيات براسي...
نسيتي لو اذكرج
موج...راح اسد التلفون...الظاهر انتة شارب
ثاني يوم رجع يعتذر...ويكول ماجان قصدي
موج...سامر شوكت تبطل شرب...والله اذا عمي لو علي دروا بيك...يلعبون بيك فلك
سامر...معليج انتي اني اعرف اصرف وياهم
موج...وكرم...والله لو تطلع نخلة براسك...
مايقبل بعد يزوجنا
سامر....اي مو على اساس راح ازوج الاميرة ديانا
دروحي بابا
تعودت على حجيه هيج بس احبه مو بيدي
ومثل ما توقعت...عرف عمي وعلي...
ومنعوا عنه الفلوس...
موج...مو كتلك دير بالك لا يعرفون
سامر...اكولج لا تسطرين راسي...هية كم يوم ويرجع ابوية ينطيني
وبعد كم يوم خابرني...موج حبي...محتاج فلوس
موج...واني مين اجيبلك...تعرف لا اطب ولا اطلع
شكولهم من اخذ فلوس
سامر ...دبريها...حبيبتي...ابوية ما دينطيني
مايخليه علي....
موج...مين ادبرها...وانتة شتريد بيها
سامر...معزوم وية اصدقائي ومامتعلم اطلع بدون فلوس...
موج....ماعندي سامر مين اجيبلك
سامر...اخذي من امج ...ابوج...من غير مايعرفون
موج...لو اموت ما اسويها
سامر...هاي بعدنا ما مزوجين وماتوكفين وياي من احتاجيتج....لعد شراح تسوين من نزوج...
موج...حتة لوكدرت ادبر فلوس ...شلون اوصلها لك
سامر...معليج ادز بنت علي الصغيرة تاخذهن
جانت عندي كم فلس من مصروفي...دزيتهن بيد بنت علي
بس بعد يومين رجع طلب...واني اخاف امد يدي
اذا عرف هالمرة كرم...كتلي يصير حلال
ظل يلح واني ارفض...اخر شي
كام يهددني....خفت بس لا يكول لكرم...
والله يكتلني..زاد ضغطه وتهديده...اخذت مرة فلوس ودزيتها له
بس مابطل...عبالك استسهل الشغلة ...واني خفت
ليظل هيج...
واذا بقيت اسحب فلوس من اهلي راح يحسون
ولا النوب رجع يطلب افتح كامرا
وهدد كال ادز كلشي لاخوجك...
وانطاني مهلة...والمبلغ جبير هالمرة...
زين شسوي...ظليت افكر شلون ورطت نفسي
لمن اتوجه....
زين خلي انطي هالمرة...واذا حاول مرة ثانية اتصرغ
بس ما اكدر اخذ من اهلي...
راح يحس ابوية بسرعة...
مابقى بس كرم...راح يسافر...واكدر اسحب من غرفته...
...بس شلون
بعد سفر كرم بيوم...ايهاب اخذ ذرى تشتري ملابس لعرس اختها...
واجتني الفرصة....وصعدت الظهر على نومة امي...
ظليت اكلب...لكيت فلوس بس مو هواي...
بس لكيت علبة ذهب ذرى...
شلتها..وية ما دافتحها ...انفتح الباب
*******
ذرى....
رحت اني وايهاب...وصلني للسوك حتة اشتري شي لحنة ريم...
وماطولت راسا لكيت ...واحنة طلعنا من الصبح
وعلى اساس نروح لاهلي...ونتغدة يمهم ونرجع العصر
بعدين كلت لايهاب خلي نرجع...
عندي هواي شغل...والحنة بعد اسبوع...
سعاد....اي كملي
ذرى...ايهاب وصلني ومانزل...كال عندي شغلة اسويها وارجع
دخلت البيت ..جان سنطة كلش...
صعدت لغرفتي واول مافتحت الباب...
تفاجأت بموج وشايلة علبة الذهب مالتي...
سعاد....صخام ...شسوي بيها
ذرى...هو هذا جان سؤالي...
وهية ظلت متفاجأة...وبعدين دخلت بعيني
دكولي...شكو بيها اذا شفته قابل حبكوج
اني سديت الباب...
_باعي موج...مو عبالج تاخذيني بلسانج...
تكولين شعندج بالذهب....
ومن تقربت شفت الفلوس هم...
وهاي الفلوس شسوين بيها
ظلت ساكتة...
ذرى...باعي ترة ادري قبل كم يوم راحت فلوس من عمي...
وسدوا الموضوع...فاحجي وكولي شسوين بالفلوس تاخذيها...لا اروح اكول لابوج منو اخذ الفلوس
موج...اني بنته...وماصار يوم ونباك بيتنا...
بس من اجيتي انتي
يعني الشبهة عليج...
ذرى....لا حبيبتي...عبالج اسكت...اكو شرطة تاخذ بصمات كنتور اهلج...
وتعرف منو باك...
ظلت تتبلع...صح هية وكحة...بس مهما يكون بعدها صغيرة ...بسهولة تخاف
جنت انتظر شراح ادكول...واني خايفة
مية فكرة اجت ابالي....شسوي بالفلوس
ذرى...باعي موج اني بنت عمج...وانتي مثل اختي
الصغيرة ...
احجيلي...بلكت اكدر اساعدج...
كعدت على الجرباية وهية صافنة...
جانت مثل التوازن الامور ابالها...
كعدت يمها...احجيلي لا تخافين
موج...منو يكول ما تكولين لكرم
ذرى ...تخافين منه
موج...غير يكتلني فوات
من كالت هيج خفت اكثر.....وعرفت براهة مصيبة
ذرى...ليش انتي بهالطريقة راح تتجنبين يعرف
لازم اكو نهاية لطريقج
موج.....لا اذا تصرفت ما يصير شي
ذرى...خلص ما اكوله لكرم...احجي
موج...احلفي
حلفت لها...جانت سعاد خالة ايدها على كلبها
سعاد...خايفة من الي راح تحجي هسة
ذرى...طلع سامر عنده صور لها...وديهددها بيها
سعاد...صخام الصخمني...شكد رعنة هاي...وهذا العار ابن عمي...شكد ماعنده غيرة
زين يهددها ليش ...خاف يريد شي منها
ذرى...لا يروح بالج لبعيد...هذا جبان يخاف مايسوي هيج...يدري اذا مو كرم يكتله علي
سعاد...لعد شراد
ذرى...الي افتهمته...هو يشرب...وصايع وية اصدقاءه
ومن داري علي...كاطع عنه الفلوس...
وكايله الا تبطل يلا ارجع انطيك...
وتعرفين هو متعود...وعنده شلة فاسدة مثله...
ماكادر ...كايم يسحب فلوس منها...
سعاد...هذا عليمن طالع هيج دايح
ذرى...مو شرط على احد...ليش موج اختج هم طالعة على احد
سكتت...وظلت مدنكة
ذرى...مو قصدي والله سعاد....بس كل المصايب اجت
من ورة اختج
سعاد...والله شكولج...هاي ليش طلعت هيج
المهم انتي سويتي
ذرى...ظليت حايرة...ساعة اكول يطبها مرض تستاهل
وساعة افكر بكرم...اذا عرف يكتلها...ادري بيه
عصبي ومايتفاهم...
والفضيحة شلون...كل الناس راح تأول الموضوع وتكبره...
سعاد...بس لا انطيتي فلوس...
ذرى...لا طبعا...هاي تصير فرصة له ...يرجع يسحب فلوس منه
حتة لو مسحها كدامي ...يجوز ضام نسخة منها
سعاد ....لعد شسويت...
ذرى ...هو شفت الحل الوسط...اكول لعلي يصرف
وبعدين نشوف من يجي كرم
سعاد...صخام...نفضحنة ...وعلي اكيد يكول لكرم
ذرى...لا لعد ماتعرفين علي
******
علي.....
من خابرت ذرى لسة ظل بالي....شنو صاير
بحيث تريد تحجي من ورة عيالها
وصلها ايهاب...سلمت وطبت يم بناتنا ...
لحد ما ايهاب كعد شوية وترخص...
دخلت للبيت صحت ام محمد مرتي
علي...ام محمد ترخصيلي من مرت كرم تجيني بالحديقة
ام محمد...خيرك ابو محمد ...شتريد منها
علي....عندي حجاية وياها ...عود سويلنا جاي
عدنا بالحديقة ميز وكراسي...لان ليليلا نتعلل
احنة ولد عمنا وصحبانة ...
اجتي هية وام محمد
علي...ام محمد الجاي وين صار....
استريحي خوية
ذرى...تسلم....
علي...كولي خوية
ذرى...والله خيي ماعرف شكول...لان الشغلة ما تنحجي...
بس حتة ماتكبر....واعرفك ابو محمد انتة واعي
وكرم يأمن بيك حيل...
سكتت..وجرت نفس...
علي...كولي خوية خليتي بالي
ذرى...والله مستصعبتها حيل...بس مابيدي شي
موضوع يخص سامر وموج
علي...شسوة هالارعن النوب
ذرى...قبل ما احجي...اريدك تحل الموضوع بسكوت
ما اريد احد يدري ولا تفضح احد
علي...شسالفة خوية ...قابل تحجين وية صغير
ذرى...لا حشاك ابو محمد...بس
علي...خوية احجي ولا تحملين هم
حجت على الصور وعلى تهديد سامر...
واني اعصابي تغلي غلي...
ضربت يد الكرسي المتجي عليها بجف ايدي
علي...لا باطل...هذا العار اليوم اني علمه
ذرى...خيي ...الله يخليك على كيفك...ما نريد فضيحة...لخاطر كرم...تعرف اذا درى يكتلها
علي...وهاي السكط مال اسحلها سحل...لا والله كتلها حلال....
ذرى...ابو محمد اني لجأت لك حتة تحلها...مو تعقدها...
صح غلطوا...بس مو نفضح نفسنا بين العالم
انتو لكم سمعتكم وصيتكم....
واكو هواي اكيد ما يصدكون يشمتون بيكم
سكتت...حجايتها صدك...بس الواحد تاخذه
الغيرة والعصبية
علي...عد عينج بنت عمي...حجيج على راسي...
مايكون خاطرج الا طيب
كامت من مكانها...اترخص اني...
علي...خلي اوصلج...وبطريقنا اوصل ام محمد لاهلها
صحت لام محمد...
وصلناها...شكد كبرت بعيني...
حقه كرم من استقتل عليهة....ونعم منها مرة
*********
سامر.....
اني اصغر اخوتي...بس فرح اصغر مني...
لحد ما دخلت كلية جان همي دراستي...
وحدود الناس الي التقي بيهم من ولد عمي ...واصدقائي من العرب حولنا
بس من دخلت كلية شفت عالم ثاني...
بنات اشكال والوان...وشباب متونس
ومن دخلت صيدلة ابوية اشترالي سيارة
هدية نجاحي ....
اني هم ماقاصر ...طول بشكل وسيم..
وصرف بالكلية...فالبنات كامن يتقربلي
وتعرفت على شلة...مرتاحين من ناحية الصرف
وبدوا يعزموني على حفلات وطلعات
بالبداية جانت حدودنا ...بنات وحفلات وبس
بعدين بدوا يشربون واني ما قبلت....
مرة ظلوا يكولون جرب شوية....ويلحون
كلت خلي اجرب...جربت...ومرة جرت مرة
وصار تلث سنوات...كل خميس نلتقي بشقة ولد صاحبنا...شرب ونسوان للصبح...
وابوية من يسال اكوله نقرا يم صاحبي...
وبالعطلة...الاسبوع اخلصه اساعد علي ونهاية الاسبوع...
يخليني انزل لبغداد وابات.....
بس السنة التهيت حيل...ورسبت وعدت
فعلي ركز وياي...خاصة بعد مالكفنا كرم وية موج
جانت طبعا بس تكضية وكت ...
لان هنا جفاف ماكو شي...وهاي اخذها على كد عقلها
بعدها علي حاصرني كلش...
حتة مصرفي قلله...وكمت ادين من جماعتي...
لحد ما ثكل الدين...
ومرة جنة بالشقة وخابرني علي اجي...
اجيت واني مو صاحي كلش...وكشفني شارب
وخله ابوية يمنع المصرف عني....
اصدقائي كام يطالبوني بالدين...
ومايقبلون اذا مادفع حصتي من الشقة...
واني تعودت على الشرب...
مرة اخذت من موج...ومن شفتهة سهل الموضوع
سحبت مرة ثانية
وصديقي شافني اصرف عادي طالبني بدينه..
يوميا اتحجج بشي
وقلت جياتي لهم...خابرني وانطاني مهلة
اذا ما جبت الفلوس يجي لابوية لو لعلي
حرت شسوي...اذا عرفوا اهلي بعد ...
ماكو غير موج...خلي ادفع هذا الدين هسة وبعدين نشوف شنسوي
بس هاي الثولة لازمتها مرت اخوها الحية...
واجت لعلي...
واخوية ما قصر هالمرة...حتة العكال لعبه على ظهري
اني الي عمري محد مد يده عليه...
بهيج عمر انضرب...اني لج موج...لا اني لج ذرى...
بسيطة...
انتي اندكيتي بية...
*******
سعاد...وبعد ما رحتي لعلي شسوو
ذرى...خابرني بعد يومين وكال اذا تكدرين تعاي علينا
سعاد...ليش ما اجة هو
ذرى...شيكول كدام عمي وايهاب...اريد احجي وية ذرى....
هم يكولون شعنده...
المهم...رحت...مثل اول مرة نزلني ايهاب بس هالمرة ما كعد...
واني ما دخلت...جنت اريد ارجع لان براي تحضير
ثاني يوم حنة ريم...وبقيت علمود شغلة موج
وبالحديقة قبل ما يجي علي..شفت احمد سلم...
وبدة يسولف حجي عام...وسالني على الكلية
واكيد سامر جان موجود اخذ لنا صورة...
سعاد...واذا.. ابن عمج وواكفين تسوولفون
ذرى...انتي دكولين هيج...بس كرم محذرني من احمد اكثر من مرة...واحنة بحديقتهم وكرم يعرف اني مارايحة لبيت عمي بس مرة وياه بالعزومة
واكو مسبقا مشكلة على موضوع احمد
عموما مو هذا موضوعنا...
سعاد....بس جزء من المشكلة..
ذرى...اجيج بالتدريج اصبري.....
اجة علي...وكال خوية هذا تلفونه...وهذا الرام
امانة الله ورسوله كدامج راح اكسره...وهاج بيدج امسحي التلفون ....
والسيم كارت...هم طلعه وكسره...
اخذت الموبايل راسا فرمته...
سعاد...كدام احمد هالحجي
علي...لا علي طلب من احمد...يوصيهم على كهوة
سعاد....هسة ما فهمت...علي حلها...شوصل الحجي لكرم..وليش هيج اصرف وياج ...
بالعكس انتي سترتي على موج...
ذرى...علي من سوة هيج...كال حجاية ما فهمتها
لان جنت مستعجلة...اريد ارجع
سعاد....شكال
ذرى...كال خوية للامانة...ترة كلبت الموبايل جزء جزء..مالكيت صور لموج...
سعاد...يعني شنو ما فهمت
ذرى...اني هم بس بعدين فهمت الي كاله...
وطلعت اختج مو حية...لا عكرب اسود
*******
كرم....
حياتي من يوم رجعت من السفر لسة...
مكلوبة...
نهاري اكضي بالشغل....ابد ما اتوقف
بس اوكف ...الهم يكتلني
اعصابي دائما فايرة...احس الكل ضاج من عصبيتي
وبالليل...اوووف يالليل....
شطوله يصير ما يخلص...كل الافكار تجيني
مرات احاسب نفسي...
يستاهل الموضوع ...صور عادية...
بس...من ارجع واذكر اني محذرها من احمد
من ارجع واسال نفسي...ليش طلعت وياه
ليش راحت لبيتهم...
صح بيت عمي...بس واكفين وحدهم
وهية ابد ماواصلة من اني موجود لهناك
وارجع واكول...ليش ما سمعت منها
حتة لو سمعت....بالمرة السابقة سمعت لها
وشنو النتيجة...ماعرفت منو حط الحب
يعني يرجع الموضوع عليها...
زين معقولة سوت كل هذا تنتقم...
لان جبرتها على الزواج...
وهواي افكار تجيني....
بس هالافكار بجفة....
وبجفة ثانية...الشوك
الشوك لها الي يكتلني....ويزيد من اشوف دشداشتهة
من اتخيلها من جانت تتعمد تبدل كدامي
مرات اختنك بالغرفة...
ونص الليل انزل بالحديقة افتر...لو اكعد وعيني للسما
صدك كرم......كل عقلك مسهرك العشك...
لو بيدي اطلع كلبي من مكانه...
ما اريد شي يضعفني...
ما اريد شي يكسرني....
احس راسي يريد يطك....
وصاير يلزمني صداع ....مايفكني...
جنت اكول من السهر....
اليوم...رجعت من وكت ...راسي خيل يأذيني
ردت انام ارتاح...بس مثل كل ليلة
النوم جافاني...
كعدت اكلب بالموبايل...واجت صورهة مال حنة اختها كدامي
اذكرت من خابرتها ...
كرم...ذرى من تبدلين صوري نفسج
ذرى...ليش
كرم...اشوف شلابسة
ذرى...هسة عايف جماعتك...والشركة الماخذتكم
وادور شلابسة
كرم...ذرى لا تزيدين بالحجي بدلي وخلي اشوف
بعد ساعة واني الوب ...واذكر شجانت لابسة بحنة سعاد...
وخايف لا نفس الفستان لابسة...
دك الفايبر ...فتحته شفتها دازة صور مالتها
جانت لابسة فستان وردي طويل...وردن
كرم...اريد صورة للظهر...
دزتلي مغبط من ورة...
كرم...مابي فتحة.
ذرى...والله العظيم مابي اي فتحة...بعد
كرم...اي بس ضيك...
ماجاوبت...بس الفستان صدك مفصل على جسمها وطالع يخبل عليها...
اويلي شلبسها بعد....
ذرى...كرم لبسي مابي شي..بقى بس البس خيمة..وبعدين ترة الحنة بس بنات
ذكرت حجيها واني اكلب بالصور...
قربت وحدة من الصور على وجههة...وبديت اتلمس ملامحها بالصورة
شكد مشتاقلج...
******
سعاد...
بعده ذرى داتحجيلي...واجة حامد...
وماعرفت منها موج شطلعت مسوية...
رجعت للبيت وطول الطريق.. بالي مشغول
ما اصدك اختي هيج تسوي...
حيل نقهرت ومااعرف لمن احجي...
مثل كل مرة...اول ما دخلت تلكتني عمتي...
_ها يمة تونستي...
_الحمد لله
وبكلبي اكول قصدج شبعتي قهر
_والله احنة جنة مانعوف الرجال ونطلع...هو بس الجمعة كاعد...تعوفيه وتفرفرين
عمري ماجاوبتهة...بس اليوم جنت على اعصابي...
مامتحملة حجاية من احد....
سعاد....يعني شنو ماتعرفين اذا ماتذبيلج حجاية مسمومة
حامد...سعاد...شنو هالحجي...مو عيب عليج
هو جان بعده ديقفل السيارة وطب وية حجايتي
امه بس شافته ظلت تبجي...وتنعي
اني عفتهم وصعدت..صعد حامد وراي
حامد...ليش اطولين لسانج على امي
سعاد...انت ماسمعتهة شكالت
حامد...وان يكن مرة جبيرة...وكم مرة كتلج اتحملي واحسبيها امج
سكتت ما جاوبته...هو مايدري شكد تسمعني حجي وشسوي بية
حامد...هاي اخر مرة مسموحلج تردين...المرة الثانية يكون غير تصرف لي وياج
اخذ بطانيته ومخدته ونزل جوة ...
اذكرت من كال يوم نتعارك...اجة هاليوم
ثاني يوم كعدت لكيت امه مسويتله ريوك وطالع
_اي مسعدة...هسة يلا كاعدة...
سكتت ماجاوبت...اني اصلا كاتلني القهر
ومن رجع تجاهلني ...وكعد اتغدة وراح بالصالة ينام الظهر..
اني خلصت شغلي..وصعدت...بس بعد ماتحملت
ظليت ابجي...منة مصايب اختي...
ومنة عمتي...وهو كمل علية
نمت والدمعة بعيني...بس من كعدت حسيت لويات ابطني...
نزلت جوة...كلت هسة تخف...بس بعدين زادت..
وصار عندي وجع قوي...
اجيت اخابره...بس كابرت...
دكيت على ذرى...كتلها لحكيني الم موتني...
خطية نص ساعة وهية يمي وياها امها...
عمتي من شافتهم تخبلت...
ظلت شكو....وين رايحين...وغير يعرف رجلها
اني ماجاوبت....
ذرى...خالة البنية بطنهة توجعها راح نوديها للدكتورة...
اخذوني...والدكتورة كالت عدها تقلصات...ولازم تنام على ظهرها...
لان حملها مهدد بالاسقاط....
من طلعت من الدكتورة لكيت حامد بوجهي...
جان مبين ضايج...
حاجته ذرى...من رخصتك خوية ...سعاد لازم تنام على ظهرها ...ناخذها ويانة كم يوم
حامد...هية شعدها بالبيت...امي موجودة
ذرى...براحتك بس غرفتهة فوك ولازم ماتصعد وتنزل
حامد...تنام بغرفة امي...
اني ماحجيت...
اخذ الوصفة ديجيبهة
سعاد...منو خابره
ذرى..اني لان اكيد امه تخابره...كلت احاجي اول
وصلهم للبيت...ورجعنا...
وهم تلكتني...شلون نسوان تطلع بكيفها.
ماعندج رجال..لو تعلمتي على الفرفرة .
اي مو جنتي ابيت اهلج مامخلين مكان ماموديج.
التفت على حامد الي دخل وراي.
ومجاوبتها...صعدت....كعدت على الجرباية
_ليش مخابرة بنت عمج..ليش ماخابرتيني
حاجاني اول مادخل
_ماردت ازعجك
_شنو هالحجي...وبعدين شلون اطلعين من غير ماتكولين
_يعني شلون اموت....
_اي جان خابرتي...وباوعي علية من احاجيج
صار عصبي...رفعت راسي له...
_شتريد حامد....لو تريد تكمل موال امك
_سعاد احجي عدل
اني جانت نار بكلبي...ماعرف شلون اطفيها
كمت الطم على وجهي بدون احساس
_شتريد....اكتل نفسي حتة ترتاح....
خلص وديني لاهلي وخلصني...ما اريد ابقى بعد هنا
جر ايدي من على وجهي....
شفته متفاجأ..شبيج تخبلتي
_اي اني مخبلة...اهلي غشوك...انطوك مخبلة ماتدري
ظل يباوع علية...
عافني ونزل...تمددت على الجرباية....واني ابجي...
غفيت....كعدت لكيت حامد متمدد يمي
من شافني...جرني لحظنه...
_شبيج سعاد...صاير شي...
جريت نفسي منه....وكمت اريد ابدل...
شفته كعد على حيله....ابقي لاتبدلين
خلي اوديج يم ذرى ....
وصلني وماحجى شي ...بس من نزلت...
_من تشوفين نفسج زينة خابريني..
فتح الباب عمي....
وتلكتني سما وذرى...حتة مرت عمي خطية
وذرى اخذتني لغرفتها...
ذرى...خوما صارت مشكلة وية حامد
حجيتلها...الي صار
ذرى...حبيبتي مو كتلج لا تركزين وياها...وبعدين انتي بعدج بداية حملج....
ولذلك تشوفين نفسج اعصاب....
وكان المفروض ما احجيلج عن موج...
_لا ذرى بالعكس اني اريد اعرف الصار...هو هم تراكمات ما كل الاشهر
بس عفية خاف عيب اجيت يمكم...
اني ماردت اروح لاهلي...
بهيج وكت....
_لا تحجين هيج...هذا بيت عمج...يعني بيتج...واحنة اخواتج
_كمليلي عن موج...
_نامي ارتاحي وبعدين نحجي
_جنت نايمة...راح اتمدد واحجيلي
_شكولج...اختج طلعت بلوة سودة....
وللحكاية تكملة
