#حين يستبد أدم
همس ليل
البارت الثاني عشر
ظليت نايمة لثاني يوم...ماردت اواجه احد ولا احجي الصار...
صح جنت ماخذة موقف من كرم...
بس ماتوقعت ممكن يتهمني هيج...
لا ....ويكملها بضرب...
من كعدت شفت سما نايمة علة الجرباية الثانية...
والمغذي مرفوع ...بس الكانونة بعدهي بايدي
يمكن جانت الساعة ٦ الصبح
كمت اريد اروح للحمام...بس فتت من يم المراية
شغلت الضوة...وباوعت لنفسي...
تفاجات بشعري...تلمسته بأيدي
كامت ادموعي تنزل شوي شوي...
ليش هيج تخبلت...صار سنين اطوله...
حتة احرك كلبه...منو يكول ينقهر...
اني حركت كلبي هسة...خليت ايدي على حلكي...اريد اكتم صوت بجيتي...
ماكدرت بدت شهكاتي تطلع...نزلت للكاع
واني استند بيدي على الميز...وصوت بجيي يعلى
فزت سما واجت تركض
_ذرى شبيج حبيبتي...ليش هيج تبجين
ماكدرت اجاوب ...مخنوكة بشهكتي
شبكتني...وهية تبجي وياي...
ومن شافت بجيي زاد...عافتني وطلعت
اتجيت براسي على الميز الكدامي...
ابجي بحركة اطلع كل قهري الفات ...
دخلت امي...وابوي براها وسما
كعدت يمي امي...وشبكتني
_اصملله يمة شبيج حبيبتي...شجاج ماما
خلت ايده على شعري...
يمة هاي شنو وين شعرج...
زاد بجيي بحجايتها..حسيت بابا دنك يمنا
_بابا شبيج...ليش هيج...
ريم...هاي ردة فعل متاخرة...خلي نكومها اضربها ابرة مسكنة ...ومن تكعد نشوف شصار وياها
كوموني للفراش...وما اقبل اعوف حضن امي
مثل الطفل من يخاف ياخذونه من امه...
ضربتني ريم...ورجعت للسبات مالتي
ام ريم...جواد خابر كرم خلي نشوف شصاير
ابو ريم...خلي افهم منها اول...حتة اعرف شنو احجي وياه...
كومي روحي لدوامج...وانتي هم ريم وسما
اني باقي هنا...
طلعوا...واني كل شوي اصعد اباوع لبنتي
شنو الي صار...بنتي جانت مثل الورد...
اجت ذبلانة ودمعتها على خدها...
مدري جنيت على بنتي ومادري...
بس جان ابالي مصلحتهن...
سويت جاي وكعدت على الميز واني افكر...
خلصت عمري اسمع لابوية....كلشي يكوله انفذه
صح ماميز بيني وبين اخوتي...لان اصلا ماجان عنده وكت لنا...
جان ملتهي يشتري كيعان....مايعرف مرته شلون جان تعاملنا ...
حتة من وكفت وياي علمود اكمل دراستي...
جانت لمصلحة ولدها مو لمصلحتي
المرة الوحيدة الي ردت اخالفه من راد ازوج بنت الشيخ واني ردت بسمة...
بسمة الي جانت بحياتي مثل نسمة هوى بليل صيف تموز....
حتة هالحلم اخذوا مني....
هجيت...ويوم حسيت بغربة وردت هلي ورجعت له...
لكيت الغربة كدامي ...بأبوية الي باعني...واخوتي الي نكروني
عشت حياتي اشطب ايام...حتة من ازوجت
حسنة اختارتلي....
ومن اجن البنات تغيرت حياتي....
ملن علية الدنيا واني اشوفهن يربن ويكبرن
صح ماخلفت ولد...وما اكول ما تمنيت يصير عندي
اجذب...بس من شفت ينحلف براسهن ...من وحدة صارت صيدلانية...وثانية بطريقها تصير مهندسة
وثالث بعد اشطر...
رفعت راسي بيهن....
اقربهن لي ذرى...جنت اشوف بيها الولد الي ماخلفته...
مو دائما بس الولد ياخذ عزة النفس والكبرياء من اهله...
لا ...ذرى جنت اشوف بيها جدها ...بس بطيبة كلب امي...
وشكد جنت اضوج من استبداد ابوية...
بس سويت نفس الشي بأبنتي...
هسة فهمت ابوية...مرات احنة نسوي الشي الي نشوف بيه مصلحة ولدنا...
ونغض النظر عن الي يريدوه...
غايتي جانت اخليها بحما رجال يصونها...
رجال اخو خيته ويعتمد عليه...
بناتي مالهن احد...وردت يوم اموت يلكن اهل يوكفولهن اذا ضامهن الزمن وية ازواجهن
كرم شفته خوش ولد وميزته عن باقي ولد عمه
اكثر واحد مناسب لذرى هو...بس اعرف بنتي ماطخ راس...
خلي انتظر واشوف شصار...
من وعيت مرة ثانية جان بابا كاعد يمي..
_ها بنتي شلون صرتي
_الحمد لله
يلا كومي نتريك سوة...ونلحك نغسل المواعين قبل ماتجي امج
نزلت ورة ابوية...بعد ما غسلت وبدلت ...
جنت اخاف اوكف كدام المراية واشوف شعري..
لكيت بابا مسوي جاي ودينتظرني..
حيل تغير من طلع تقاعد...
_الساعة ب١٢ هسة اطب امي وتكول اكو ريوك يبقى لهلوكت
_تعالي اكعدي ...فوك ما دطلع وهية مامسوية ريوكنا...
اكلت شي قليل...ماعندي شهية
_بوية احجيلي شنو الصار
_صارلك ٣٠ سنة من عفت قريتك بس كلمة بوية ما راحت منك
حجيتله كلشي من شغلة احمد للاسقاط الصار...
شفته بقة صافن وماعلق...
_ما كلت شي بابا
_شكلج ....احمد انتي غلطانة...اذا رجلج مانعج ...فاكيد عنده سبب...وسعاد جان ممكن تحجين وية كرم ونفس الي سواه من خطبها حامد جان صار بدون ما تحشرين نفسج...
واني اكول عليج عقلج جبير...شلون تسوين هيج
_بابا احمد مو ابن عمي...ليش عادي همة ناس تحجي وية ناس
_بنتي كتلج اكيد رجلج عنده سبب....
لا تصرين على الغلط
والاسقاط...اثنينكم غلطانين...هو المفروض يحاول يفهم منج...
وانتي غلطانة لان تجاوزتي...مو هيج ربيتج
دنكت واني احس ابوية دائما يوكف بصف كرم
_شعرج منو كصه ...كرم
رفعت ايدي لا اردي اتلمس اطراف شعري
_لا اني
_ليش
سكتت ماكدرت اجاوبه
كام ابوية ...على كل اني ما اخابر كرم...وهذا بيت ابوج حتة لو غلطانة...هو هم غلطان يوم الي طردج قبل مايشوف انتي بريئة لو لا
انتظر واشوف شراح يسوي...وذيج الساعة نتصرف وياه...
من رجعت امي لحت تعرف الي صار...
من حجيت ...
_شنو شلون يمد ايده عليج...هذا مخبل ماعندج اهل شنو...
سكتت ماجاوبتهة...
_فوكاها يتهمها كتلت ابنها...اني من البداية كتلج لا توافقين عليه....
انتي مشيتي ورة ابوج...
_انتو مو ردتو ازوج واحد من ولد عمي
_اي بس كتلج كرم لا ...كتلج ما يناسبج
امي شكد جانت تدفع بينا حتة نزوج واحد منهم
علمود الكاع والفلوس...بس من عرفت كرم ما قبلت..
واني تعجبت بوقتها ...ليش هو لا
وصارت مشكلة جبيرة ببنها وبين ابوية
ورفضت ومن وافقت زعلت مني واعتبرتني خالفتها
مر اسبوع من اجيت لسة...صحتي بدت احسن على الابر والمقويات...
وامي كالت اوديج للدكتورة تجيك وضعج...
من ردنا نطلع ...
ابو ريم...بابا هسة ايهاب يجي يوديج لدكتورتج...
حاجزيلج يمها
ذرى...ماكو داعي...اكو دكتورات هواي
ابو ريم...بنتي بدون عناد...هاي دكتورتج متابعتج...عود غيريها بعدين
بقينا ننتظر ايهاب...اجة ودانا...
الدكتورة كالت...ابقي ٦اشهر الى سنة يلا تسوين طفل....
لان رحمج تعب...الاسقاط جان قوي لان مو طبيعي...
رجعنا وامي تسولف وية ايهاب على دوامه
اني بعالم ثاني...شنو الخطوة الجاية...ومنو حجز الدكتورة...ومنو خابر ابوية على الحجز...
بس ما سألت...يمكن ما جنت اريد اقتنع هو ديفكر بية ومانسى موعد الدكتورة
وصلنا ايهاب تعذر ايطب وراح...
ام ريم....الله ينتقم من الي سواها
ابو ريم...لا تدعين على احد
ام ريم...انتة شو ساكت عليه...لا خابرته لا كلتله ليش هيج تسوي
ابو ريم...خلي نشوف هو شراح يسوي
ام ريم...يسوي ما يسوي...بعد ماترجع وياه..لو يصوغها ذهب
جانوا يتناقشون واني اتفرج عليهم...
خليهم براحتهم...هالمرة القرار قراري..
********
كرم...ما نسيت حجزت لذرى...حتى تجيك
ودزيت ايهاب يوديهم...
وبالليل خابرت الدكتورة...
عرفت منها لازم مانسوي طفل حاليا...
بعدها بيوم خابرني حامد...جان ماعندي خلك لاحد
بس اصر اجيه...رحتله...وبداخلي جبل هموم
ومن حجيت وياه ارتاحيت...بلكت نكدر نوصل لنتيجة....
وهاي صار اسبوعين ...بدون فايدة...
اليوم حامد يمي...وهو داخ وياي...
حامد...خوية كرم عندي حجاية وياك بس ما اريدك تزعل مني
كرم...وسفة عليك...انطيتك سر بيتي...شلون ازعل
حامد...اذا انتة متأكد من مرتك ماتسويها...ما اكو غير احد من بيتك هو الي خله الحب بمجرها..
صفنت على حجايته...لا خوية قابل اكو واحد ممكن يأذيني من أهلي..
_خلص لعد صدك مرتك الي سوتها
سكتني بحجايته...
حامد....الي سواها مو يريد يأذيك...يجوز يريد يأذي مرتك...او يريد يفرقكم
كرم....وشنو الغاية
حامد...غيرة ...حسد...وحدة تحبك
راح واني ابالي هواي امور ادور...
صرت اكره اصعد لغرفتي وهية ماكو...
اشتاق اشم نسمة هوى من عطرها...
شكد جانت عنيدة ...وتعبني راسها اليابس
بس حسيت فراكهة صعب حيل علية
حامد...اريد اكول لكرم الي سوها هيج يجوز
واحد عينه على مرتك...
بس اتردد....احسها صعبة يسمعها من احد
الي صاير وياه ...وحدة من أثنين
لو غيرة مرة...لو غيرة رجال
خلي اخابر الحلو مالتي
_ها ياالكبد شلونج
_هلو حامد شلونك
_هسة ماكو فديوم هلة بالقلب...هلت بالكلية..عمي بالامعاء هم ميخالف...
اسمع صوت ضحكها
_ادري عفية جهاز لو مجهز قصر جان خلصته
_شبيك حامد...خلي تفض شغلة كرم
_يعني ناس تتعارك وناس تبتلي
_مو صاحبك...اصبر شوية
_غير من اصبر لان اكو تصبيرة...بوسة ..لزمة...حضنة...شو كلشي ماكو...
_عفية حامد شنو هالحجي
_عمي حتة الحجي ممنوع...الله وكيلج داحس مو عاقد عليج...
عاقد على ابوج واخوتج...كلما اجي مكابليني...
رجعت بس تضحك
يمة فدوة رحت لهلضحكة الحلوة
*********
موج....
من يوم ادخلت ذرى بيتنا.. الامور تغيرت
علاقتنا ابيت عمي جاسم خفت وتوترت...
واني محجوزة لابن عمي سامر...
سامر وسيم وكلية صيدلة وهواي بنات ويانة حاطات عينهن عليه
كمت اخاف لا يبطل عمي ما ياخذني لابنه
ضجت من ذرى حسيتها السبب
ولا والنوب كرم جان شكد مدللني ...
من يوم طبت لحياته...انشغل بيها...
ومن وراها...كام نادرا مايجي للبيت
امي وابوية وايهاب تعلقوا بيها...وداىما شقة وضحك وياها
خوب سعاد اختي...عمرها ماجانت صديقتي
ولا فديوم كعدت تحجيلي او تسالني
بس من اجت هالحية ...صاحبتهة وكامت تعرف عنها كل صغيرة وجبيرة
وماعافتني بحالي...كامت تراقبني وتهددني تكول لكرم
شكد اكرهها ...ماعرف من شفتها لسة ما اطيقها
وزاد كرهي من خلت سعاد تنخطب لحامد...
بعدت المسافة عن بيت عمي جاسم
اني متعلقة كلش بسامر واحبه...فتحت عيني
اسمع حجاية هو الي...مستحيل اخلي وحدة تاخذه غيري...
لازم كرم يرجع لفرح...بس شلون
جنت احب دائما احب اسمع شيصير بالغرف..
وانتبه للاشياء الي محد منتبه عليها
بس لازمة وضع السكوت
لذلك عرفت شي خلاني استغله ضد ذرى
وبديتها ...من شفت احمد لزم ذرى من تخربطت
كلتها بشكل عفوي كدام كرم...بس مقصودة
ويوم احمد انطى رقمه ...
عباله محد انتبه...بس اني شفته
ويوم الجى وكف بالحديقة...بس شلون اوصلها لكرم
بيوم مهر سعاد...دزيت طفلة على ذرى حتة تجي للمطبخ...
ودزيت طفل لاحمد يكول ذرى تريدك
من اجت وشفتها وكفت وياه...
جان اسهل منها ماكو..بس انطينا خبر لكرم يجي للمطبخ
الليل من مشت الناس...وهية صعدت اجة كرم يم امي...
شافته امي ضايج...سالته شبيك
كرم...مابية شي ...تحتاجين شي
ام كرم...لا يمة الله يرضى عليك
موج...كرم صدك خوية ترة احمد ذاك اليوم اجى...وماعرفت شراد...لان عفته يم ذرى واكف وطبيت...جان سالته
شفت كرم طفرت عيونه...
ام كرم...يجوز هيج مر
موج...اي هو مدري شبيه هالايام...حتة رقم تلفونه مغيره...لان بالعزومة شفته انطى الجديد لذرى...
هالشي كان كافي حتة كرم يوجر...
خربت علاقته بذرى...وكام مايحاجيها حتى كدامنا
بس من عرفت حامل بولد...طلعت روحي
هية خبر حملها صدمني قبل فترة...
النوب حامل بولد...اوووف شلون ما ارتبها تخرب
بس رب صدفة خير من الف ميعاد...
الطفل وكع....وكرم دزها لاهلها...
اليوم.رجعت من المدرسة وبالطريق شفت سامر
اشري...
كلت يلا هسة الكل ملتهي...اروح دقايق وارجع
وصلت...وهسة سامر لزم ايدي...
وديكولي اشتاقيتلج...وشفت وجهه صفر..
لج كرم اجة ...عافني ونهزم...التفت
واني ميتة بدمي...شفته جاي على حصانه
********
كرم...طلعت اتفقد الزرع...ومالي واهس ارجع للبيت...
مايوم عصى علية شي...بس هالمشكلة
لا كلبي يريد يصدك ذرى مسويتهة...
وعقلي ما يشيل واحد من اهلي ممكن يسويها...
جنت راكب حصاني...والمحت من بعيد بنية لابسة
لبس مدرسة واكفة وية احد وراة حقول الدواجن...
طار عقلي...من وصلت قريب عليهم...توضحت الصورة...
البنية موج...بس الولد طفر...جيتت من الحصان مو نزلت طبيعي...
من وصلت يمها جريتها من ايديها...
_لج كدامي للبيت...اليوم حسابج عسير
جريتها للبيت.....صاير المصايب ترف على راسي
دخلتها للبيت ادفع بيها...
تلكتنا امي وسعاد...شكو شبيكم
ماجاوبت...دخلتها للغرفة...
_لحد يدك الباب...تعرفون شيصير اذا سمعت صوت
جريت العكال ودخلت عليها وقفلت الباب
جانت حاظنة جنطتها ولازكة نفسها على الكنتور
_احجي ولج...لا اخلي جسمج مشطب اليوم
ماجاوبتني....صحت بيها...احجي
_شنو...صوتها جان يرجف من الخوف
_منو هذا...شوداج هناك
ظلت ساكتة...بس وية اول راشدي...وكعت على ايدي تبوسها...دفرتها
_لج جلبة ...تريدين تجيبيلنا الحجاية
الناس تحلف براسنا...وتجي زعطوطة تنزل راسنا...
اليوم موتج على ايدي...كولي هذا ياعار...
الا اكتله....
رجعت ادنت تبوس ايدي...والله ما سويت شي
خوية ما نزلت راسكم...والله
جريتها من حجابها...منو هذا...تريدين تموتين احجي
_سامر
_ولج ياسامر
_ابن عمي
ضربتها راشدي واني احس اعصابي تغلي
_لج ليش...بعدج صغيرة شقصرنة وياج
_مو كلتوا هو بمثابة خطيبي..
جريتها من شعرها...لج بمثابة شي والخطوبة شي ثاني...
شوفي اختج شكد بقت محجوزة لابن عمها...تالي مو عافها...
غير تتعضين منها...
_عافها بسبب مرتك...
_شنو قصدج ولج
_صوجك...عفت فرح...واحمد عاف سعاد علمود مرتك...
فقدت وبديت اضربها بعكال وهية تصيح...لحد ما كسر الباب ايهاب وطب علينا...
جرني منها
_شبيك كرم...شجرالك...
طبت امي وسعاد يحظنن بموج
وابوية.....دخل...عوفوها...اكيد تحتاج تأديب واخوها يأدبها...
_باعي لج مدرسة ماكو بعد...واذا شفتج خطيتي باب البيت...رجلج اكسرها
طلعت....واعصابي متحطمة...
مين الكاها اني....لحكني ايهاب...
_كرم شكو...احجي ليش شايل الهم وحدك...شسوت موج
_عوفني وارجع ايهاب...
رحت لبيت عمي ردت افرغ ناري بهذا العار..بس طلعت امه كالت ما موجود...والولد ادري بيهم مو هنا...
رجعت افتر بالزرع...واني دايخ...كعدت جوة نخلات...
ماجان ابالي هيج يطلع من موج...جنت اعتبرها بنتي مو اختي...
حجاية تجي وحجاية تروح براسي...
بس فجاة طخت براسي حجاية موج من كالت صوج مرتك...
ورجعت حجاية ذرى من كالت مو اني مو شريفة...
رجعت للبيت على السريع...
جان ابوية كاعد برة وايده على راسه وامي يمه
من شافوني
_ها يمة...شبيك وليدي شجرالك
_ماكو شي
دخلت على موج للغرفة ...جانت سعاد يمها
موج تبجي....من شافتن فزت وكمزت على حيلها
_سعاد اطلعي...وسدي الباب
موج جلبت بسعاد تريد تحتمي بيها
_خير خوية...كول كلشي ادكوله تم بس كافي الله عليك
_سعاد اطلعي ...وهية تفهم من احجي بهدوء شنو يعني
طلعت وسدت الباب...
_هسة احجيلي كلشي...ماراح اسويلج شي
جانت ترجف...شنو
_ذرى تدري بيج...
هزت راسها..
_شلون عرفت ...
ظلت ساكتة...تقدمت عليهة وصحت ...
_شافتني مرة
_شلون
_لحكتني
_وشصار
_كالت اكول لكرم بالمرة الجاية
حز بكلبي ما اجت وكالت لي
_وهالشي...خلاج تخلين الحب لها....منو انطاجياه..سامر
_ياحب...
تقربت وجريتهة من ايدها...هية رفعت ايده الثانية تريد تحمي وجهه
_ما اضربج..احجيلي...
_ماعرف شنو تقصد...
_شنو دخل احمد...هو انطاج الحب لو سامر
_خيي ماعرف ياحب...والله
_مال اسقاط ذرى
_لا صخام..والله معلية ولا ادري...
_احلفي...
_جيب القران...صح كرهتها وردتك تعوفها...بس ما اسويها والله
عفتها وطلعت...
*******
سعاد....كرم دخل علينة يجر بموج...
عرفته عرف بسالفتها...شكد حذرتها...
ركضت خابرت ايهاب...عرفت كرم ماراح يعديها لها على خير
سمعنا بس صياح موج...
اجى وشكد حاول يخلي كرم يفتح الباب مافتحه
اخر شي كسر الباب وفات
خلص موج من ايده...امي تبجي عليها وتحجي
واني ما اكدر اكول لها شسوت...
بس كلت لايهاب يلحكه...كلت بس لا يروح على سامر...
بس يلزمه يكتله...
بقت موج تبجي...ودكول كله منها...من طبت لنا
والفكر اجة وياها...
واعرف تقصد على ذرى...لان ادري جانت تغار منها...
بس من رجع كرم...تفاجأت كعد وياها حجى وطلع
دخلت عليها...
_شراد منج
جانت تبجي وترجف...
_سالني اني خليت لذرى حب مال اسقاط
_وج اصخام...بس لا صدك انتي
_لا والله...شلون اسويها بلة ماتت...
_مو يوم تعاركوا علمود احمد انتي كلتي...حتة تبطل تنطخ بية
_سعاد عفية لا تحجين له ترة يموتني والله
_احجيلي شنو السالفة...اني ما حجيت لان ما اريد المشاكل تكبر...وهم اصورت اتشمتي بيها
حجتلي كلش
_عزة بعينج...شلون هيج تسوين...لج هاي سمعة...لو لازمها اموتها...جان شسويتي
_قابل شافها نايمة وية واحد ...هية بس حجايات تنغز
_لج ادب سيز ...ربج ستر والبنية لا اطب ولا تطلع....واخوج يعرفهة...لو غير واحد وعصبي..جان الله يعلم شسوة
الله الساتر من الجاي....
وللحكاية تكملة
