#حين يستبد أدم
همس ليل
البارت السابع
طول طريق الرجعة اني مجلبة بالكرسي مال السيارة من الخوف….
سرعته عالية...ويتخاطف بين السيارات...
صح جان متمكن من السياقة...بس مع ذلك
هيج سرعة ترهب...
بساعتها اني ختمت القرأن لحد ماوصلنا...
ونسيت تهديده ....كل تفكيري جان نوصل بالسلامة…
من وصلنا...جريت نفس...
_نزلي وبوجهج للغرفة فوك...
نزل وطبك باب السيارة حيل.
اني بقيت لحظات اريد استعيد انفاسي...
عبالك جنت اتسابق...نزلت ودخلت سلمت على بيت عمي…تاخرت شوي لان ظلوا يسألون على اهلي...
توجهت للغرفة ...وكل باية اصعدها اقوي نفسي..
اول مافتت للغرفة...جان كاعد على الجرباية..
طفر منها وتقدم باتجاهي ...
لزمني من زندي...
_انتي تتعمدين تعانديني...لو شنو ...من يا طينة الله خالقج...
_اخ ايدي ...شبيك شسويت...
حاولت اخلص ايده….بس عبالك كلباشة جلبت بايدي
_مو كتلج بوجهج للغرفة ليش ماصعدي وراي
_ابوك جان يحجي وياي قابل اعوفه
_ابوية ينكاله عمي اولا...ثانيا انتي جنتي متفقة وية اختج على مبيت ....وحرجتيني كلت ميخالف...بس مال تطلعين تفرفرين بالاسواك وحدج وحتة بدون ماتأخذين أذن...هاي ماعوفها لج.
جان وية كل كلمة يزيد ضغطه على زندي
_اولا مو اني الي طلبت ابات...ومع ذلك بتت بموافقتك...
وبعدين ماطلعت وحدي اخواتي وياي...
واني مو صغيرة حتة احتاج اذن احد
قبل ما اكمل جملتي...جرني وكمشني بأثنين ايديه
_ليش مزوجة طرطور حتة بكيفج تمشين...
اذا ابوج مسيبج...ماعندي هيج شي ..سمعتي...
_ما اسمحلك تحجي على ابوية...
_اش اش ما اسمعلج صوت...لسانج بطولج ...حجايتي ماتثنى...الظاهر انتي مو مثل الاودام واحد يعاملج
وبعدين مو كتلج ماتلبسين هيج بعد...
تتقصدين من وراي تلبسيه...
وقبل ماعرف شيريد يسوي خله ايده على القميص من فوك وشكه...
شهكت وظليت مدنكة اباوع على القميص
_هاي شسويت...
جان واكف مقابيلي...كل ماتلبسين اشكه عليج
_ شنو هالاستبداد...انت مو طبيعي
رجع لزمني من جتفي..انتي ماينفع وياج الحجي..
اخذ شفيت الجوة وجرهه بين ابهامه وسبابته
وظل يضغط عليه...
اني بلحظتها جنت كامشة قميصي...اريد اغطي جسمي من فوك
_هاي حتة المرة الثانية تفكرين قبل ما تحجين...
عافني وطلع...اتجهت للمراية باوعت على شفتي
المدماية...جريت كلينس وخليته عليها...
نزلت نظراتي على القميص المشكوك..
كعدت على جرباية...ونزلت دمعتي...
جرح الكبرياء صعب....
نزعت القميص ولفيته بحظني...
شراح اكول لريم عليه...هذا قميص عشقها
جانت ماتخلي احد يتقربله ويلبسه...
جان اول هدية من علي ....ومعتزة بيه...
وهالمرة رادت تعبر عن اشتياقها لي...
طلعته وكالت البسيه......
كمت بدلت ورحت نمت بفراشي...
ماكدر انزل وشفتي بدت تورم....
بسيطة كرم...الايام بينا....
من صحيت من النوم...رحت غسلت واني احس شفتي عالية
رجعت للمراية اباوع شفتي شلون ورامة...
هسة شلون راح انزل... لو اكو ثلج يمي...
رجعت كعدت يم الشباك الي يطل على خلف البيت..
لميت رجلي لصدري وخليت حنجي على ايدي وظليت اتفرج ورحت لعالم ثاني....
**************
_ذرى هسة شلون شراح نسوي
_ماعرف ريم...
_هسة لو مامخلية ابوية يروح...جان هسة مزوجة وخلصانة
_هو كله صوج الفندي مالتج...الا يريد اصلج وفصلج عبالك راح يزوج العشيرة
_هو شعليه غير اهله...عفية ذرى احجي وية بابا
_ابوج محد يعرفه الي اباله
مر اسبوع محد جاب سيرة....ولا انفتح الموضوع
واني هم ملتهية عندي امتحانات ...ريم التقي بيها بالليل ونكون اثنينة تعبانات...
لان هية الصبح بالمستشفى والعصر تشتغل بصيدلية....
نهاية الاسبوع...اليوم الجمعة ...طلعت وية سما للسوك رادت شغلات للمدرسة ...واني هم كان عندي كم حاجة...
من رجعنا...هم شفت سيارة واكفة ابابنا...
دخلت للبيت واني اعرف منو جاي...
سما...ذرى لمن هاي السيارة
ذرى...اكو غيرهم ...اكيد عمامج
جنا نمشي بالممر الي يوصل للمطبخ...
سمعت صوت على فجأة...جان نبرته قوية
توقفت ردت اعرف شديحجي...
مو من عوايدي اتصنط ...بس نبرة الصوت استوقفتني..
_عمي ...شنو مالك حجاية على بناتك…
جاوبه ابوية بس بالهدوء المعتاد بحيث مافهمت شكال..لان صوته ناصي
_انتة ابوهم المفروض من دكول حجاية ماتصير اثنين...
ترة احنة ماعدنا بنات يمشن بكيفهن...
احنة اعرف بمصلحتهن...
هذا صوت اخر مو نفس الاول...توترت اعصابي...
فتحت الباب ودخلت...شفت العيون توجهت لي
جان كاعدين اثنين وية ابوية.واحد معكل يطلع عمره بالثلاثينات...والثاني لابس بنطلون وقميص ...يطلع عمره بالعشرينات
_يعني شلون بلازحمة انتو اعرف بمصلحتنا...من شوكت عرفتونا وكمت تعرفون شنو يفيدنا...اصلا اني لو اشوفكم بالشارع ماعرفكم...
جاوبني المعكل...وهذا صوجمن...والتفت على ابوية...حقك ماتكدر عليهن...
كام وكف نترخص منك عمي....طلعوا وبابا طلع وراهم..
امي اجت....لج سويتي ...شدخلج عليهم..
ذولة بابة عرب ماعدهم النسوان تحشر نفسها وياهم...
ذرى...يمعودة تلكيهم اغلبهم النسوان تقودهم بس بالسر..
رجع ابوية....هو هيج ربيتج...وانتي من دون اخواتج.
ذرى...اعذرني بابا...ماتحملت كلامه
ابو ريم...وانتي شكو واكفة تتنصطين
ذرى...ما جنت اتنصط ...بس صوتهم عالي .
ام ريم...خلي ابوج هو يتفاهم وياهم
ذرى...ما داشوف اذبحوها على قبلة وياهم...
جان ابوية ضايج من تصرفي...ماجاوبني عافني وراح لغرفته...
بس بقى يومين مايحجي وياي...وهذا جان اقوى عقاب منه..
بس خلال هاليومين ابوية جان كلش مهموم...
بثالث ليلة...سمعت صوت امي....نزلت اركض اني وريم وسما...
شفنا ابوية مختنك ويريد يجر نفس مايكدر...
ريم ركضت عليه...صح هية صيدلانية بس هم عدها معلومات اسعافات اولية...
اني ركضت على جيرانة بعد لبست عباية راس ...هالكيته كدامي...
ادري ماكو سيارات هسة كان بداية ٢٠٠٨ ..وحضر تجوال بالليل يصير...
كوة يلا طلع ابوهم...وخطية اجى هو ابنه..
ونقلوا بابا واني وامي وياه...
ريم ظلت ترجف وسما تبجي...
بس اني بهيج مواقف ما ارتبك..
من وصلنا ظلينا نركض اني وابن جيرانة على دكتور خفر...هاي وية السيطرة الي وكفتنا بالطريق....
الحمد لله...جان الدكتور زين وراسا دخله للعناية المركزة وسواله الازم...
وبقينا احنة بالباب مال غرفته ننتظر واحد يطمنا...
تشكرت من جيرانة ...بس ماقبلوا يعوفنا...
لذلك خابرت زوج عمتي حسنة وهو هم خالي
واجانا يلا راحوا...
خالي عنده بنيتين وولد بالمتوسطة...اسمه ياسر
ابو ياسر...شلون صار هيج ام ريم
ام ريم...والله ماعرف...هو صار فترة يكول نفسي يضيق....حاولت وياه يروح للدكتور مايقبل
ريم...كله صوجهم...شبعوه قهر
ابو ياسر...منو قصدج خالو.
ريم...اخوانه...
خالي صح حباب...بس من النوع الفاهي...
لحد ماطلع الصبح...طلعت عينه...
النوب الدكتور الاختصاص للتسعة يلا اجى
ومن فحصه كتبله تحاليل وتخطيط قلب..
كال عنده ذبحة صدرية...
امي ظلت تبجي...واني شبه انهاريت...احنة ماعدنا غير ابوية...
خالي رجعني حتى اجيب ملابس لابوية وابدل ملابسي...
تلكتني ريم وسما...ومن عرفوا ...ريم كامت تبجي
ريم ...ذرى بس خلي يكوم بالسلامة...واني ازوج الي يختاره...بس يصير زين
ذرى...شبيج تخبلتي
ريم...لعد شلون ابوية يروح بيها من القهر...لج ماعدنا غيره نضيع بلاياه
اخذت الاغراض...واني طول الطريق افكر بكلام ريم...
من وصلت لكيت اكو زلم يمه...بقيت انتظر اباب الغرفة...
طلع واحد طويل اسمر بس فاتح...ولحية خفيفة محددها...
وعيون سود واسعة...ماعرف ليش ظليت اتأمل..
بس شبهت عليه...شايفته بس وين
_السلام عليكم...ليش جاية هنا احنة موجودين
_العفو مافهمت عليك...اصلا ماعرفك
_ليش نسيتي من دخلتي علينا...اني كرم ابن عمج
_اها....وليش ما اجي...غير ابوية ولازم اتابع وياه..
_مو كتلج خيتي احنة موجودين...وعود نطمنكم...حتة الوالدة ترجع وياج
_وليش نرجع....شلون نعوف بابا
صفن علية...جنت كاعدة وهو واكف مقابيلي
_ياحجاية مافهمتيها من حجيي...مو كتلج احنة وياه...ماعدنا نسوان يبقن بالمستشفى...
اني جنت مفولة منهم...احسهم السبب بالصار لابوية...
من يوم دخلوا حياتنا...المشاكل بالبيت ماتخلص
_نسوانكم شي يخصكم مايخصني...واني راح ابقى وية ابوية...ومحد يكدر يمنع هالشي
هو فتح عينه بقوة...حسيته تعصب حيل بينت من نضرت عينه...ويده الي جانت يسده ويرجع يفتحهة.... ...
حسيته بوده يضربني ....بس ماجنت خايفة
نفتح بابا غرفة بابا جان خالي وامي طلعوا
مشيت لهم...شلون صار بابا
ابو ياسر...الحمد لله...عمامج راح ينقلوه لمستشفى اهلي...
ذرى...اريد اشوفه
ام ريم...ماما الدكتور يمه...وراح يسوون تحاليل وتخطيط يشوفون يكدرون ينقلوه لو مو زين عليه
ذرى ...راح ابقى انتظر هنا لحد ما يخلص الدكتور...
جان كرم واكف على صفحة من سمع كلامي اتقدم
كرم ....شسوين باقية...بس التعب...روحي للبيت واني اطمنكم
ام ريم...اي ماما حتة ابوج مايقبل تبقين ...موجودين عمامج
ذرى...من شوكت صاروا عمامي..
ابو ياسر...مو وكتها خالو امشي روحي للبيت..
كرم...امشوا اني اوصلكم..
ذرى...ماكو حاجة ناخذ تاكسي
كرم...وليش تاكسي وغريب يوصلكم
التفت عليه...وهزيت كتفي…حاله حالك...انتة بالنسبة لي هم غريب...
امي جرتني قبل مايجاوب...ومشينا قبله
ام ريم...الزمي لسانج ...احنة بياحال هسة وكتها.
اجى ورانا....
وصلنا ...امي كعدت يمه بالصدر واني وراها
طول الطريق دايرة وجهي للجامة...
من وكف يم بيتنا...اني راسا نزلت...بدون ما اسلم
ومن دخلت لكيت ريم وسما كاعدات ينتظرن خبر
صاحتني امي...ليش ما سلمتي على الولد
ذرى...شو انتو كلش النتو وياهم...هو شنو سبب الي بابا بيه ...غير من وراهم...
ام ريم …خلي يطلع ابوج وهو يتفاهم وياج
بوقتها محد منة وصل المستشفى بس امي...واني رجعت اداوم..جانت امي اطمني
جنت اشوفها هية وريم وسما...كاعدين يحجون بعمامي وولدهم شلون وية بابا....
بس اني نعزلت...حسيت مثل الي غدروا بية
وهم احس اخذوا مكاني...جانت روحة بابا للدكتور كلها اني وياه
الحمد لله الذبحة جانت خفيفة...وطلعوه للبيت...
اول ايام من جنت من ارجع من الكليةاصعد للغرفتي ...لان الكه عمامي او ولدهم يمنا...ما اريد اشوفهم...
العصر من يروحون انزل يم ابوية اداريه...
مر على الموضوع شهر ...بابا نوعا ما تحسن وخلصت اجازته...
وقرر يقدم تقاعد لاسباب صحية...
بس الراتب بهالشكل مايكفي...
ريم جانت تساعد بالبيت بس اذا ازوجت شلون...
مرة بالليل...كعدت ...ردت انزل اشرب مي فتت من باب غرفة ريم سمعتها تبجي وتحجي...جانت ريم وحدها بغرفة...
واني وسما بغرفة...
ردت اكمل طريقي..بس ماعرف شنو الي وكفني بمكاني....
سمعتها تكول...والله اسفة علي...مو بيدي
قابل اخلي ابوية يموت علمودي...
ادري انتة انتظرت هواي بس ...شنو اكدر اسوي
كملت بدون ما اسمع باقي الحجي...
بس بيومها ماكدرت انام...
بعدها بكم يوم رجعت من الكلية ...لكيت بابا ماكو
وجانت ريم راجعة من وكت من المستشفى...وتبجي وتحجي لامي...
ريم...ماما والله داحاول ...بس ماكدر...
ذرى..هو شنو ماتكدرين
ريم...ماكدر ازوج غير علي...ذرى بس بيدج الحل
ذرى...اني شلون بلة ...
ريم...انتي ازوجي واحد منهم...بلكت يقتنعون
ذرى...شنو ...شنو…همة يقتنعون...بعدين ليش هيج مستسلمين للامر انتو
ام ريم...ماما احنة ما داخلين حرب...اعتبريه ولد تقدم لخطبتج بشكل تقليدي
ذرى... بذيج الحالة يكون عندي حق الاختيار...بس انتو دافرضون علينا فرض
ام ريم ....يمة بطلي فلسفة ...وخليج عايشة بالواقع
ذرى...وين بابا
ام ريم…. اخذه كرم تجيك
اني كلش ضجت...ليش مو اني اوديه..
من نزلت العصر جان اكو احد يمنا...وامي دسوي جاي...
ذرى ..بابا رجع...
ام ريم...اي جوة وية عمج
ذرى...هم عمي...شنو طلعونا بالبخت ذولة...
رجعت صعدت...بقت اسبوع ريم تقنع بية...
واني ما اقبل ....
لحد يوم جان جمعة...وجنت اغسل بالطرمة هية مو جبيرة...
ومرات اغسلها بدون مالبس حجابي...
سمعت دكت باب...منو
_اني كرم...
رحت جبت حجابي...ولبسته وفتحت الباب...
_ليش تغسلين بالطرمة بدون حجاب
_ما اعتقد لك علاقة
_لج انتي ليش ماتحترمين...
_من تدخل في ما لايعنيه وجد ما لا يرضيه
تقدم باتجاهي بعصبية ...وجر ايدي..
_قسم برب الكعبة ...لو انولج الا اربيج من جديد
دفعت ايده بقوة....بعيد عن شاربك ...لو تبقى اخر رجال
_لا تتحديني...اذا اريد ماتصيرين لغيري
_باحلامك...
_زين لعد ...اذا ماكسرت خشمج واخذتج...باجر تشوفين...
**********
سمعت دك على الباب....ادخل
دخلت سعاد...شلونج ذرى...من رفعت راسي وشافتني ...شهكت
_هاي شبيها شفتج...
استحيت اكول كرم...مو دفاع عنه...بس عزة نفسي منعتني...
_نضربت بالباب..مادري فتحته فجاة
_غير ديرين بالج...خلي اجيبلج ثلج...
راحت ورجعت جايبة ثلج بجيس...خليته على شفتي...وهية كعدت مقابيلي على الجرباية
_اهلي سالوا عليج...كالو من اجت لسة مانزلت..
_جنت تعبانة ونمت ...وكعدت لكيت هيج شفتي استحيت انزل
سكتت...وظلت تحرك برجلها
_شبيج سعاد...احجي
_لا ماكو شي
_لا اكو مبين من توترج...بس اذا ماواثقة بية براحتج
_لا بالعكس...بس
_بس شنو
_قبل كم يوم ...اجى احمد...واني دخبز...وسالني ليش ما اكمل دراسة
_اي...
_حسيت بنبرة سوته اكو اهتمام...وكال اني اساعدج...اذا احتاجيتي شي
_هذا مايعني شي...مهتم بيج لان بنت عمه...لا تبنين امال على هالموضوع
_شلون ابقى معلكة
_باعي سعاد...اذا احمد جان رايدج تكملين علموده…تكملين
_ولو مالي واهس بالدراسة ...بس اكمل
_واذا انتي مو اباله
تنهدت ....ماعرف
_لا مو ماتعرفين...شوفي نفسج وقرري...
_اعتقد راح افكر ازوج واستقر
_خلاص...راح اشوف طريقة خليج تعرفين بيها شنو نيته من ناحيتج...
_شلون عفية
_مو هسة بعدين تعرفين
_زين انزلي اتغدي لا ينزل ضغطج...
_عفية ولو اكلفج اريد لفة وجاي...لان متت جوع
_هههههه....هسة اسويلج...
جنت مخلية رصيد...سحبت انترنيت عليه...وبقيت اتفرج على الفيس والاخبار...
دخلت على كروب الكلية...وظليت احجي وياهم
من كملت وياهم حجي…
ظليت افكر بحجاية احمد...زين شلون ادبر فلوس القسط....
وشلون بامتحانات الاشهر...
كلت خلي ادبر القسط وبعدين افكر شلون اداوم
كرم ما رجع للبيت...لليل نمت بجهتي من الجرباية
بس ما غفيت...سمعت صوت خطواته على الدرج..
سويت نفسي نايمة....
بس شو من دخل للغرفة مانام بجهته اجى بأتجاهي...تلبكت...شيريد...
وكف يمي...دقايق...رجع راح...
غسل...ونام بجهته..
وكالعادة طلع قبل ما اكعد...غسلت ونزلت...
وخلصنة اليوم بالروتين...
بس الصبح...من خبزت سعاد...رحت يمها...
_تعاي نتمشى...
_عدنا شغل...
_بعد وكت على الشغل...بس شوية مادام الجو طيب
تمشينا واخذتها باتجاه الحقول..وشفت ماكو شي...بس بستان بعدها...
رجعنا واني عيني تتفحص المكان...
بقينا اسبوع مانتحاجى اني وكرم ...
يرجع وكت الغدة...يغسل فوك...واني جوة اصب غدة...
وكت الغدة يلتهي يحجي لابوه على المحصول...
يصعد للغرفة حتى اينام..
اني ابقى اغسل مواعين الغدة...
من اصعد الكاه نايم او يصطنع النوم ...اروح نفس مكاني المعتاد ابدل ملابسي...
واشوفه يباوع بالمراية...
احسه بعدها ماينام...يبقى شوية ويطلع..
اضحك...واني ادري سالبة راحته...
بس والله عنده ارادة...
هالايام...بقيت افكر شلون اشوف احمد...وشلون ارتب شغلة سعاد وية احمد....
اجت الفرصة من عزمونا بيت عمي قاسم...
رحنا بيومها صار عشى الزلم بالحديقة...والنسوان جوة...
ولان عمي ولده صغار بالمتوسطة مو مال يعتمد عليهم...كان لازم الولد هم يجون ياخذون المواعين...
وبدوا ينقلون الاكل...ومرة احمد هو دياخذ المواعين مني...
_شلونج ذرى...شو محد يشوفج...
_الحمد لله انتة شلونك...
_بخير...قرب الدوام فكرتي بالموضوع
_اي...بس ماشفتك
_انطيني رقمج...واخابرج
بس دخل ايهاب قطعت الحجاية..جان ماكو احد يمي...لان دينقلون المواعين للنسوان
اني ماعرف ليش ترددت انطيه الرقم...
شعور بالخوف تغلغل بداخلي...
من رجع ياخذ وجبة جديدة...انطاني ورقة بيدي رقم تلفون...بدون مايشوفون البنات...
بس برجعتي للبيت قررت ما اخابر...احسن شي احاول وية كرم علمود الكلية ...
واذا ماقبل عود ذيج الساعة ...ادور طريقة ثانية.
ومسالة سعاد سهلة...اني راح ادبر لها طريقة...
اعرف بيها نية احمد تجاهها
وصلنا للبيت واني احس نظرات عيون كرم غريبة
بس ماعرف شبيا...احس روحي مايعة...
ومابية حيل...
صعدت لغرفتي ...وكرم كعد وية ابوه...
ردت ابدل قبل مايصعد...اليوم مالي رغبة حتة باي شي...
هسة نزعت التنورة والقميص واريد البس الدشداشة ودخل كرم...
تلبكت حيل جنت بس بالداخليات..خليت الدشداشة على جسمي...
_غير ادك الباب قبل ماتفوت
_فايت بغرفتي مو مكان اخر...شنو اليوم مستحية
جان يحجي ويتقرب مني واني ارجع ليورة
_شنو قصدك
_قصدي انتي يومية تتعمدين تبدلين كدام المراية...واليوم راح اقدملج الي ترغبين بيه
شهكت بقوة...وقبل ما اجاوبه...جر الدشداشة
تمنيت اختفي بلحظتها واني اشوف عيونه تتأمل بجسمي...
بس مابينت له...مو وعدت ماتقترب مني الا اني اجيك...
جنت اريد ابعده باي وسيلة
_وفيت بالوعد...لان انتي لمحتي
هنا نثارت كرامتي...تخوصرت ونسيت وضعي
_هاي شوكت يابة اني لمحت لهشي
هو جحظت عينه لحركتي...وبلمحة عين جرني لحظنه...
وتناول شفايفي بقوة وايده برة راسي يثبته..
جانت لمسة ايده قاسية...وشفايفه اقسى
خليت ايدي على صدره احاول ادفعه...بدون فائدة
واصلا اني جنت احس مجهدة...
بس حسيت نفسي نكطع ...بعد شفايفه ونزل على ركبتي يبوس بيها...
حسيت نفسي تغب بعالم ثاني...كرم..جان صوتي ضعيف من اصيحه ...كرم..
بعد ماحسيت بس صوته من صاحني...
وللحكاية تكملة
