البارت الخامس
...ماكال شي
...هاعبالي كلج شي لان كميل من ينفعل بعد ميسكت
.....ليش اكوشي
...لا بس عبالي كلج شي
بس لزعلين من كميل
انتي تعرفين كميل عصبي لضوجين منه
.....مازعلانه وهو ماقصر ويانه وانت همين مااعرف شلون اشكركم بس هسه لازم اعتمد على نفسي
لحد مايجي سعد بعد خلص لشوكت اظلون تتحملون مسؤليتنا
...بعدج تنتظري
.....انتو ليش تريدون تكرهوني بي انت صديقه وكميل ابن عمه وتشتغلون سوا ليش هيج تحجون عليه
ها
....لان ياذيج ولان عندة هوايه تصرفات منحبها ولانرصى عليها ولان عافج وتخلى عن ابنه ومسوي مصايب
...راح يرجع لان احنا عائلته
.....اتمنى متندمين من ورا هذا عنادج
كمشت يد يوسف وجريته وبديت امشي
وطلعت من المطعم وكلت لروحي ياريت لو مارايحه
ولاشايفه كميل لان بعده مكروة مثل مجان وقوي لدرجه تخوف احس ورا هاي القوة شي موطبيعي
كميل ذكرني بشي مرة بيبتي كالته
كالت اكو ناس مثل الجبل الي من صخر
مايهزهم شي حتى الهوى ميكدر يحرك شي منهم بس بين
صخرات هذا الجبل اسرار اشياء
بس ارجع واكول
شنو الي اكدر اكوله وهو كلامه صحيح ومحمد الي ديكوله هم صحيح
سمعت
صوت محمد يصيحني
...بان
بقيت امشى ماوكفت
....بان اوكفي
....ها محمد
....تعاي اني اوصلج
....لاماكو داعي اني اروح
....لضوجين احنا نخاف عليج انتي ويوسف ودنحس انتي ملزومه منه مانكدر نعوفج او مانصحج
بان لتبقين بهذا عنادج ترة تخسرين راح ارد واكلج. افتهمي
...اشكركم بس بعد لهنا كافي
.....خلي اوصلج
...اني اروح
....بان
...لا
...زين يوصلج السايق
وجاءا
... زين
انتظري هنا راح ورجع وشويه وكفت السيارة مال السايق الي جابني
...يله صعدو
...مع السلامه محمد
...الله وياج
صعدت وبقيت ساكته وكلبي يدك بخوف وبقلق
لان وصلت لمرحله من العجز لاتحتمل
وداحس بذل من الي سوا سعد ويايه وتعبت اتحمل فوك طاقتي وانتظره وهو ماكو
وبعد الكلام الي دار بيني وبين كميل ومحمد بقيت فترة صافنه على حالي وعلى وضعي الي
مديتغير بس قررت اشتغل
وكمت اطلع الصبح ادور شغل مجان مهم وين
بس المهم اشتغل وذكرت مكان وكفني يمه سعد مرة او مرتين نزل يحجي وياصاحب المحل
وبوقتها كلي هذا محل يشغل خدامات وجديد مصارله فترة من فاتحه
وجان المكان قريب من يم بيتنا لهذا السبب بقى بالي
تمشيت اني ويوسف على كيفنا
لحد ماوصلت للشارع مالته وبقيت اباوع على اسامي المحلات لحد ماشفته جان ديريد يطلع من المحل
ركضت عليه
كتله
....السلام وعليكم
..وعليكم السلام
...اني اريد اشتغل
....تفضلي
استغربت لهجته اول شي لان ماحجى بس كلمتين
دخلت وكعدت وكعد بصفي يوسف
....كلي تفضلي
يحجي عراقي مااعرف ليش ارتاحيت وحسيته راح يلكيلي شغل
كلت الدم يحن وهذا عراقي مثلي
....اني اريد اشتغل بس ياريت لو ناس محترمين
...تشتغلين خدامه
....اي
....العفو بس اني شايفج من قبل
....مااعتقد
....اني متاكد شايفج وياشخص اعرفه
وجهي نخطف
....مااعتقد
...عالعموم انطيني رقمج واني اشوف واخابرجً
بس اكيد تعرفين اذا اشتغلتي لازم مجيبين طفل وياج لمكان العمل
...اي اعرف اشوف شلون
...انطيني رقمج
....اني راح انطيك رقم البيت
....مومشكله
كتبت الرقم بورقه هو انطانياها
ومن خلصت انطيته الورقه وكفت وخليت ايدي على ظهر يوسف واشرتله يله
وكفت وباوعت على الرجال
وكلتله
...اشكرك بس اني محتاجه الشغل
...راح اتصل بيج ان شاء
ابتسمت
وكتله
...مع السلامه
طلعت منه واني عرفت بي متردد يمكن شايفني وياسعد لان هو قريب من بيتنا
او يجوز يعرف يوسف لان بقى يباوع عليه
بس شسوي اني اريد اشتغل ومااندل
وهو الوحيد الي اندليته واجيت عليه
...ماما
....ها حبيبي
... أكل
...هههه فدوة لبطنه هذا الجوعي الي بس ياكل هسه راح نرجع للبيت ونسوي اكل يله امشي بسرعه
وكمت امشي اني وياه بسرعه ونضحك
وصلت للبيت ودخلت وفتحت الباب وشفت ورقه جوة الباب دخلت وسديت الباب ورايه
وشلت الورقه ونزعت جاكيتي وخليت المفاتيح على الكوميدي ويوسف دخل جوة يركض
فتحت الورقه مكتوب بيها انو لازم اطلع من البيت خلال
شهر
زين ليش هيج خاف علمود الايجار بقيت ساكته لان اني حتى الايجار مااعرف شوكت لان جان سعد يدفعه وبعدها كميل او محمد
هسه شلون راح اضطر اخابر محمد واخذ رقم ابو الايجار
بقيت مترددة وبعدها خابرت
على تلفونه ميجاوب بقى يدك يدك وماكو جواب
سديت التلفون وسمعت صوت شي انكسر بالمطبخ
رحت ركض وكلبي ينفض من الخوف
واصيح يوسف
شفت يوسف فاتح الثلاجه وموكع الماعون بس من شافني انهزم وكام يبجي
رحت عليه مالكيته كمت اصيحه ميجاوبني الباب من جوة مسدودة
...يوسف وين تعال امي حبيبي اعرف بيك جوعان هسه اسويلك اكل
بقيت اباوع بالكاع شفته خاتل ورا البردة
رحت جريته شفت وجه اجمر وماادري شبي
...يوسف ماما شبيك
ميجاوب يوسف حبييي ليش ترجف
اباوع جسمه يختض مثل السعفه كلبي كام يدك
وهو مرة صارت بي هيج حاله بس شويه وكام يلعب
ويتحرك
بس هسه كمشته مصكك جسمه عبالك خشب صاير
ومن جريته داخلي بحضني جان يوكع بالكاع
وبقى يرجف ماعرفت شسوي كمت ادك والطم
والتلفون دك ركضت عليه
...الو بان داكه عليه
....الحكني محمد يوسف
...شبي
...الله يخليك تعال
....يله هسه جاي
شلت يوسف وبقيت ابجي
واضرب على رجليه
وهو ماكام يرجف بس بقى نايم ومغمض عينه
ماطول واجى محمد ودك الباب وشاله ركض واني ورا
ورحنا للمستشفى
فحصه الدكتور
....كل مابي شي لايظل بالج
.محمد كله
......لعد شنو هاي الحاله
.......هو عنده حاله مثل الخوف لمن يحس انو احد راح يأذي او يخاف من شي ما جسمه ياخذ وضعيه الدفاع
ويبدي يخاف وهو طفل صعب يشنج نفسه بهاي الطريقه لهذا السبب يصير بي هيجي يعني مرضه نفسي
اظاهر انو اكو شي جان يخوفه
او احد ياذي
...لا ماعدنه احد يأذي ابدا
......حافظي عليه وجنبي الاصوات العاليه واي نوع من انواع الاشياء التخوف لان هو بمرور الوقت لمن يكبر
تروح منه هاي الحاله بس حافظي عليه لان يجوز قبل كاسر شي او محطم حاجه وانتو معاقبي بطريقه قاسيه
.....ان شاءالله
كلت لنفسي معقوله سعد مخوفه بس هو يحبه
كمشت يوسف وحصنته قوي وخفت عليه من روحي
ياربي سبحانك الي تنطينا هيجي حب بمجرد مانصير امهات
خفت على يوسف وللحظات عبالي مات يوسف اني ماعندي غيره هو هذا الوحيد الي طلعت بي من الدنيا
جان محمد بعدة ديحجي ويا الدكتور
وسمعته يكلي
......يله بان
كمت وجنت احس حيلي كله نهد ورجلي ثكلانه و كل وحدة من خطواتي يرادلها دهر
شافني محمد هيج
وكلي
...بيح شي
...لا مابيه
باوعت محمد التاف وصوته يكول
......ها جيت
......اي ظل بالي علي يوسف
باوعت جان كميل تمنيت هذا يكون سعد
وكون القلق والخوف يحسه على ابنه مثل مااني حسيته
وكف كميل كدامي
وكال
.......محمد شكال الدكتور
......ماكو شي مجرد مرض نفسي لااكثر ولااقل هو ديتحسس من الاصوات العاليه ومن يخاف يشنج نفسه اظاهر عباله من كسر الماعون امه راح اضربه لذالك خاف
باوع عليه ورفع حاجبه
.....وانتي ليش ضربي هو هذا هم ينضرب هذا طفل
انتي وهذاك الغبي متستحقون فعلا تكونون ام واب
وجر يوسف من يدي وشاله واخذ قمصلته خلاها على ظهره
وكام يمشي
محمد كلي
......ترة ماافتهم شنو الموضوع لاتهتمين اني هسه اكله
.......اني ابد مااضرب يوسف ولاحتى ارفضله حاجه لان ماعندي غيرة هو كل الي املكه
....اعرف واني متاكد من هذا الشي بس هو حساس
وكميل كلش عصبي وانتي اكيد تعرفين
بهذا الشي وصدكي كميل كلش يحب يوسف
وكمش يدي
....شكلج راح توكعين وجهج اصفر
....اي هبطت من شفت يوسف هيج عبالي مات
...ياساتر الله يحفظه
خله يدي جوة يده
وكمنا نتمشى
...لضوجين
وابتسم كتله
...مضايجه الحمدلله يوسف بخير
...ترة يوسف احنا نحبه كلش وكميل يحبه هوايه
صراحه يكول سعد موجدير بأنو يكون أب
....سعد يحب يوسف وهوايه بس كل انسان تحكمه ظروفه
....دتبررين اله المفروض هسه هو وياج
سكتت لان جان كلامه صحيح المفروض سعد ويايه
طلعنا برة المستشفى
واشرلي محمد
على سيارة سودة رحنا يمها شفت كميل خال
يوسف على المقعد الخلفي ومغطي بجاكيته
وهو كاعد ليكدام
محمد فتح الباب
كله ....
....ها انت توصلهم
...اي اني
......يله بان صعدي ويا كميل
......اي
صعدت ليكدام وسلمت على محمد وشكرت منه
وكل شويه واباوع على يوسف
كام يسوق كميل بس على كيفه
وكلي
....اول شي هذا طفل مينضرب تعلمو شلون تربون الاطفال اذا موكد الخلفة ليش تخلفون
....صدك اني ماضربته ولافديوم ضربته انت تعرف اني ماعندي بس يوسف وهو كل دنيتي
كل الي صار هو فتح الثلاجه وكع الماعون ولمن ركضت عليه هو صار بي هيج وهو قبل صار هيج بس مومثل هالمرة
.....دربالج عليه
...ان شاءالله
...المفروض ابو وياكم عينه عليكم من يصير هيج شي هو موجود بس شنكدر نحجي بعد
...يرجع ان شاءالله اكيد باله يمنا
....هههههه اي يرجع
...اكيد يرجع يجوز عندة شغل شي
...متصورت انو وحدة مثلج جانت تشتغل بالسوك
وتعيش ابوها وامها وتعينهم راح تكون عديمه الشخصيه
وضعيفه بهذا الشكل
للاسف سعد حولج من انسانه الى ورقه يكتب عليها الي يريدة وانتي بغبائج وضعفج صدكتي وخليتي
يتحكم بيج
....اني احبه وهو هم يحبني ويحب ابنه وماكو بيت مابي
مشاكل
باوعني ولتاف
...الحب موغباء وحاولي لتصيرين مثل الزجاجه شفافه بهذا الشكل
الدنيا بيها ذيابه دربالج
وكفت السيارة وصار هدوء بس كلماته جانت ترن براسي
وصداها يتردد الحب مو غباء
الحب موغباء،،،،،،
.....وصلنا
باوعت احنا جنا واكفين باب البيت فتحت الباب مالتي ونزلت وشفته هو هم فتح بابه ونزل. وفتح الباب الخلفي وشال يوسف
وغطه راسه
ومشى ورايه بقيت مرتبكه من وجودة وخايفه منه
هذا الشعور محاسته ابد انو اخاف من
احد بهذا الشكل
خفت من نظراته خفت من حركاته الي مابيها غلطه
من كلامه الموزون الي كل كلمه وراها الف معنى والف قصد
وخفت من كال الدنيا بيه ذيابه
تخيلته هو الذيب مااعرف ليش توقعت انو هو ديحجي عن نفسه
....ها مراح تفتحين الباب
...لاشلون ماافتح
...بسرعه لعد
صارت رجفه بكلبي خليت المفتاح بالقفل ويااول
طكه كلبي نفض اكثر خليت ايدي على كلبي
ودفعت الباب ودخلت جوة وفتحت الضوه
وهو ورايه
يمشي وجنت اسمع صوت الحذاء مالته
دخل بدون ميباوعني
وخله يوسف على التخم وندار ومشى
ولمن وصل يمي وكف وباوع بعيوني
....دربالج عليه
...ميخالف
وصل للباب وكمشها ودار وجه بااتجاهي
وكلي
....سعد راح يرجع
ضحكت وفرحت وكتله
....صدك
....اي
...الحمدلله
....بان
...ها
....انتي تريدي
اختف ابتسامتي ومرت كدام عيني هوايه اشياء جان يسويها سعد ويايه وفعلا هاي المرة الوحيدة
الي افكر بيها انو اني فعلا اريدة
اولا
....اكيد اريدة ابو ابني
....اتصورت بقى بيج شي من بدريه
الي اجتي لبغداد قبل كم سنه الي لابسه عبايه مال راس وتحجي بطريقه مختلفه وكلامها بعض المرات يضحك
واكثر المرات يدل على وحدة قويه
محد يكدر يوكف بوجهها تتحدى الكل
وتتحدى الظروف
بس اليوم اكتشفت انو مابقى الها وجود بداخلج
وطلع وسد الباب على كيفه
بقيت واكفه بمكاني وكلامه خلاني اذكر بدريه الي تخبز وشبعت جويات من نار التنور
ورفعت ردن قميصي وشفت اثار الجويات وذكرت بدريه الى تحوش الخضرة اول ماتطلع الشمس
وتنطي اكل للعصافير الي مجانت تريدهم بس جان ابوها يحبهم ولهذا السبب جانت داريهم حتى ابوها لاينقهر
وذكرت الزلابيه الي امي تحبها وجنه يوميه نتعارك
علمودها
اذكرت انسانه بداخلي دفنتها
ذكرت روحي الي ماتت وكمت ابجي
وصاحني يوسف ورحت عليه وكعدت على التخم وشلت يوسف وخليته بحضني وبقيت
ابجي
وحسيت بالرخص
وحسيت بالضعف بس المشكله بحبي لسعد
المشكله مااكدر ازعله ومااكدر مااسامحه وماأكدر
مااشتاقله
استجمعت قوتي ومسحت دمعي
وشلت يوسف وصعدت
فوك وخليته على فراشه وغطيته وبقيت افتر منا ومنا
مثل المخبله لحد ماحسيت بلجوع
وذكرت انو يوسف جان جوعان
بس ماردت اكعدة
رحت نمت بصفه وبقيت اباوع بوجه
لحد مانمت وحسيت عليه يلعب بشعري
جانت عيونه بيها دموع
...شبيك حبيبي
مجاوبني
...جوعان
هز براسه كمت كعدت وشلته ونزلت جوة للمطبخ
باوعت الكزاز بعدة بالكاع
جبت المكنسه ولميته وخليت يوسف يكعد على الكاونتر
وطلعت طماطه هو يحب الطماطه وياها لحم
بديت اسويله
وبعدها رحنا كعدنا على الميز
وكمت اوكله
ومر يكم يوم ويوسف صار احسن ورجع يلعب ويكمز واليوم اني بالمطبخ داوكل يوسف
وسمعت صوت الباب تندك رحت باوعت بالعين مال باب مجان اكو احد
بقيت خايفه افتح ردت ارجع للمطبخ اندك الجرس مرة ثانيه
رحت وكفت يم الباب وصحت
...منو
...اني
عكدت حواجبي كلت هذا منو
...منو انت
...شبيج اني سعد
فتحت عيني وفتحت الباب بسرعه وبلهفه والضحكه
بعيوني وبنظراني قبل ماتكون على شفايفي
باوعت سعد واكف كدامي
ضحكتله
..حمدلله على السلامه
...الله يسلمج
وتخطاني ودخل جوة
وراح على يوسف وشاله وباسه وكام يسئله انت شلونك
وراح كعد على التخم وبقى يوسف كاعد بحضنه
اجيت كعدت كدامه وجان يتهرب من عيوني
كتله
....شلونك سعد اشتاقيتلك
...الحمدلله زين
...اكيد تعبان اجاي من سفر ادخل ارتاح
لحد ما اسويلك فد لكمه
...مااريد مجوعان
نزل يوسف من حضنه وكفه على الكاع
وكلهً
...روح يم امك
.....بيك شي سعد
......مابيه شي
...تريد تصعد تنام
بلا ميجاوبني كام وكف وبدا يتمشى على كيفه
واخذ الجنطه مالته وصعد الدرج
وصل للغرفه وسمعت صوت الباب تنسد قوي
بحيث صداها هز البيت كله
بلعت الحسرة
وكلت
هو هذا اشتياقه النا
صارله فوك السنه مشايفنا
كتله ليوسف
..... يله حبيبي تعال نكمل اكل
رجعت اوكل يوسف بس ماكدرت اخلي لكمه وحدة
بحلكي نهضمت كلش وراسي كام يوجعني
ولمن كملنا اكل غسلت ليوسف وشلت الاماعين من كدامنا وصعدت فوك وديت يوسف للغرفة
مالته وحاولت انومه بس مجان نعسان بس بقيت لحد مانومته وبعدها رحت للحمام وغسلت وخليت عطر ورحت ولبست الروب وطلعت رحت للغرفه دخلت على كيفي
شفت سعد نايم وداير وجه
وابتسمت لان برغم كل الي ديسوي مداكدر مااحبه
ومداكدر اخلي كلبي ميريده
دخلت وسديت الباب بدون صوت ورحت نمت ورا وحضنته بقى ساكن ميتحرك ولا حتى ندار عليه
كتله
....سعد كل هاي الفترة وين جنت ومشتاقيتلي
....اشتاقيت ليوسف
ضحكت اصورته ديريد يضوجني
....مشتاقيتلي الي
....شتريدين
......كلت اجي اشوفك خاف محتاج حاجه
....ماااريد شي
سحبت نفسي من الجربايه وكفت وباوعت على ظهره
المديور عليه وكلت حتى هاي النومه الي بيها احتقار الي اشتاقيت الها
كم ليله مرت عليه وانت دير ظهرك وتنام واني ابقى
ادكلب وينكطع النفس عندي
وعيوني تبقى تنتظر حركه وحدة منك
.......براحتك هذا الشي العادي منك
دار وجه وكلي
.......تعرفين هي موبالغصب هاي الاشياء تجي بلااحساس بالرغبه واني مالي رغبه بيج عًود من اريدج اكلج
....ماااريد شي اني منك بس صارلي اكثر من سنه مشايفتك اشتاقيتلك
....اي هذا الشي يخصج
....انت ليش هيج تسوي ويايه موكافي ليش تستغل حبي
....انتي غبيه
.....دربالك دكلي انتي غبيه
......هههههه واذا كلت شراح تسوين راح ضربيني
.....انت مريض
....ها اظاهر الكتب حولتج لوحدة تحجي اشياء ماتعرف معناتها اني كتلج اقري كتب حتى بلكي تتثقفين بس ماكلتلج اقري كتب لحد مدكومين تخرفين
...اني ماااخرف اني احجي الصدك
.......راح اكوم اطيح حظج
......عندي من يحميني منك
اني كلتله هيج وجان يكوم بسرعه وكمشني من يدي وجرني
وكلي
......منو يحميج احجي لج منو يحميج
قصدج كميل مو
اني ماجنت اقصد كميل جنت اقصد انو اني عندي رب العالمين يحميني منه ومن اي شخص بس ليش راح على كميل
.....عوفني
....احجي منو يحميج تاجر الدم
.....منو تاجر الدم
...احجي طلعتي هم ملعبه عبالي فقيرة
مواني جنت اشك بيج اكول هاي ليش هيج
تسوي وتتعامل ويايه بهيج اسلوب وتتمسكن
طلعتي من جوة ليجوة
ام الخصرة يالخبازة
.....الخبازة اشرف من الي تعرفهن
جرني من شعري ولطني حيل بالكنتور بحيث حسيت شي بظهري طك
وكمت اصيح
.....شوفي لج عدلي لسانج لااكصه انتي خلك خبازة
واني جبتج وسويت براسج خير غصبن ماعنج
تسوين الي اريدة وصوتج مااسمعه واذا عرفت بينج وبين
كميل شي لو تحجين وياه الا اقتلج وادفنج بيدي
سمعتي وابنج اشيله انطي دار الأيتام
طلع من الغرفه وعافني نايمه بالكاع وابجي
بكوة جريت نفسي وصعدت على الجربايه
وبقيت اون من الوجع
وجع كلبي جان اكبر من كلشي
بقيت احجي ويا نفسي
لحد ما الوجع هدني وردت انام بلكي يخف ألمي
ونمت وطول منايمه واشوف كوابيس واشوف نفسي اركض من شي بس ماااعرف شنو
لحد ماحسيت احد اجى يمي فتحت عيني شفته
يوسف اجى ونام على يدي
وكام يباوع بوجهي
كتله
....انت كعدت حبيبي
.....وين بابا
....جوة
وكامت دموعي تنزل وهو عيونه عليه وكام يمسح دمعاتي بااصابيعه الصغيرونه
وكمشته حيل وضميته لكلبي
هو الاوكسجين الوحيدبحياتي اني طلعت من الحياة بهذا الطفل
اني لاحصلت شهادة لااب لاام لارجال براسه خير
وبراسه حظ
لاااقارب طلعت بس بيوسف وغيره ماحصلت
واني حاضنه يوسف ومغمضه عيني
وسمعت صوت الجرس
وبعدها صوت الباب نسدت
وصار صوت عياط وشبهت على صوت
وكأنما اعرفه لهذا الصوت
اني اعرف يوسف يخاف
فباوعت عليه
وكتله
.......ابقى هنا وابد لدكوم
وكمت جبتله باكيت جان غادي من الجربايه بي المكعبات مالته
وخليتها على الجربايه
...ماما يوسف لتنزل جوة اكعد العب هسه شويه واجي العب وياك
وكمت لبست دشداشه طويله ونزلت
بسرعه شفت محمد وسعد ديصايحون
نزلت بسرعه
وشافني محمد
كلي
...روحي يم ابنج
....شنو الي صار
سعد صاح بيه
....صعدي لج يله
بس اني نزلت لان شفت محمد كامش سعد من ياخته ويكله
...انت واحد حيوان وماتسوة فلس واسهل من قتلك ماكو
وسعد يكله
.....امشي ولي يله لتخليني امد يدي عليك
.......موانت مو رجال جان سويتها
لو رجال جان مااذيت
الرجال الي هو صاحب فضل عليك
ولك كميل ناويلك نيه سودة
....اي دتخوفني بعصابتكم
بهتت من سمعت هيج
كله محمد
..... جذاب انت تعرف ماكو هيج شي وصملله عليك عود انت تاجر فستق ولك انت اقذر منك ماشفت
.....ولا اراح اشوف حبيبي ابوجاسم
محمد جر سعد قوي وكله
.....والله والله اذا كميل عرف بيك راجع لايقتلك بدون مايرفله رمش
اني هسه اجيت احذرك لان مااريد ابنك يتيتم
منا لليل اذا مانفذت ولحكت نفسك اني بعد معليه
وراح اكله انت هنا وبعد بكيفك
....اي كله
....لسوي نفسك رجال وعود متخاف
ودار وجه وجان ديريد يطلع وجان سعد يكله
.....يله اطلع من بيتي انت جلب مال كميل
هو كله هيجي ومحمد اجى ركض وضرب سعد بوكس
خلاه يدكلب بالكاع
وباوعلي محمد
وكلي
.....انتي حسابج بعدين
بقيت صافنه واني شسويت حتى حسابي بعدين
شنو هذا العالم الي دخلته شنو الي ديصير شنو الي عايشته شنو هذا العالم الي زرعوني بي
واحد يكول
تاجر دم واحد يهدد ويتوعد
اني عايشه بنص هذوله لعد وين
حجيهم انو هما تجار مرمر
وانو كميل اهله اصلا حالتهم زينه
واظاهر
هذا الي جان ميخلي سعد ينام والسلاح دائما يمه
وخلاه يقرر نسافر وكميل اجى ورانه
زين كل الي عشته
جان كذب وشنو الي سوا سعد وليش كميل يريد يقتله
شنو الي ديصير شنو كل هذا الي اني بي خيالات لو اني فعلا عايشه بنص عصابه
يتبع......
#الكاتبه #روجمان
