.....البارت السادس.....
كابوس عايشه بي
اني بكابوس ودوامه شلون راح اطلع منها مأدري
وشنو الي جان يصير داير مدايري واني محاسه
صدك اني مثل ميكول سعد غبيه
ورنت بأذني كلمات كميل من حذرني من سعد قبل الزواج
ومن كلي هو راح يرجع وراح يستغلج
وهم راح يتركجً شنو الي يعرفه كميل
زين كميل هم نفس سعد اني كمت اخاف على ابني
معقوله هذوله يقتلون الناس يجوز يقتلوني اني وابني
ومحد يعرف ترابنا ويروح دمّنا
فكري يابدريه شنو الي لازم سوي
كل هذا التفكير واني كاعدة اباوع على الباب ورا ماسدها محمد والدنيا ودتني وجابتني
والي صار خلاني مذهوله ومصدومه
مصورت اكو ناس يملكون هالوجه الطيب
وبداخلهم شيطان
مصورت محمد الي مافد يوم حجى ويايه كلمه محلوة لو كلمه تجرح هو نفسه يأذي الناس وعندة مصايب
حتى كميل مجنت اتوقع عنده شي بشع بحياته
التافيت وشفت سعد جان ديمشي وراح للمطبخ
وجاب بطل مال مي بس جان جامد وشمره بالكاع قوي
وصار الثلج مثل الكزاز المكسور والمطشر وفتحه واخذ وصله من المطبخ وخله الثلج بيها وخلاها
على وجه
واجى كعد على الكرسي
وجان دايخ وباله بغير مكان ومبين عليه جان
خايف من الكلام الي كاله
محمد لان هو حذرة اذا كميل عرف بسعد.
راجع راح يقتله
كلبي نكسر عليه
كلبي طيب موبيدي وبالذات وياة
رحت يمه وكعدت بالكاع كدامه
واخذت الثلج من يده وكمت اخلي على مكان الضربه
باوعلي ونزل راسه
كتله
....يوجع
...لا
.....احجيلي شنو الي صار اني مرتك اوكف وياك مهما جان
...مو وكته بعدين
....زين روح قبل مايجي كميل خاف يسويلك شي
.....انتي تشوفين كميل يكدر يأذيني
استغربت لان سئلني اول مرة يحجي ويايه هيج بدون مايكلي لتدخلين لو يعيط عليه لو ينتقدني
....بس كلماته خلتني اصفن
واذكر كلمات كميل وحركاته ونظراته الي تخوف مرات احس عيونه بيها تهديد حتى بدون مايحجي
كتله
.....يكدر لان عيونه بيها شي يخوف واحس بيها شر
ضحك
....زين يوسف موجود وانتي هم
....شنو يعني
....يعني اني دائما جنت احميكم واصرف عليكم واداريكم
هسه اجى الوكت الي انتو تحموني
...احنا نحميك اني وابنك الطفل
...اي
....يعني شنو الي تريدة سعد لتخلينه احنا بالوجة
وبالذات ابنك فدوة لدخله بينكم
.....اني محتاجج
....الي
....ااي
....بشنو
مجاوب
وكف وكال اني راح اصعد انام واذا ندكت الباب لتفتحيها ابدا لالكميل ولا لمحمد وتجين دكوليلي
مرديت عليه
وكتله
.....اروح على يوسف
صعدت بسرعه وشفته كاعد يلعب بالحمر مالاتي وموسخ الكاع كلها
....هاي شمسوي يوسف ليش هيج
اجى سعد وشاف الكاع راد يعيط عليه
كتله
.....دربالك تعيط عليه لان يتخربط
.....شنو يعني
....من يخاف من شي تجي مثل الحاله ويشنج
ويبقى يرجف وحجيتله على الي صار ويايه
وعلى الي كاله الدكتور
بقى ساكت وماعلق على الكلام بس كلي
.....اخذي وروحي داريد انام
شلت يوسف ونزلته جوة ورجعت نظفت الكاع
ولمن داطلع صاحني سعد كلي
....تعاي فركيلي يدي
رحت كعدت على الجربايه وخليت يده على رجلي وكمت افركها
كال
...يدي كامت تخدر ودورات بالليل مااكدر انام من وراها
وكام يفتح ويسد بيها
وشويه وتركته ونزلت جوة
بقى هو نايم وبقيت اني كاعدة على اعصابي وكامشه كلبي
وعقلي يكلي اخذي ابنج ونهزمي
وكلبي يكلي شلون تعوفين سعد وهو مريض وضعه هيج
واني بين حانه ومانه
وللمغرب نزل سعد وكال اريد اكل
...سويتله اكل وكعد ياكل
وكلي
....صعدي نومي يوسف من وكت وطلعتلج دشداشه مال نوم خليتها على الجربايه اريدج
تغسلين وتبدلين وتخلين مكياج
وتنزلين هنا يمي
استغربت لدرجه كتله
....ليش
بدون ميباوعلي وهو ياكل
....ليش انتي مو مرتي
....اي بس هاي اول مرة تطلب مني
....مزاجي راد هيج
لو بغير ظرف جان فرحت وطرت هم من الفرح بس هسه
ماحسيت براحة
كتله
....ميخالف
لمن كمل اكله شلت الماعين من كدامه وسويتله جاي
وشلت يوسف وصعدنه فوك ولمن دخلت للحمام مال الغرفه
اسبح يوسف جان كاعد يلعب بالغرفه وكملت وطلعت
بدلت ملابسي ولبست الدشداشه مال نوم الي كال عليها
جانت كلش فاضحه ومكشوفه ولونها اسود بس كلت هاي مومالتي
هاي اكيد ممطلعها من الكنتور لان مافد يوم مشتريه هيج
ولمن لبستها
جانت طويله بس مكشوفه من الظهر وبيها جاكه من النص وبيها مثل الشريط الي ينشد بالركبه واحد ينشد بالظهر
بقيت اباوع على روحي بالمرايا
ومااقتنعت بلي لابسته ردت انزعها
بس صراحه خفت لايسويلي شي
لازم اكون حذرة وياه بتصرفاتي
باوعت يوسف بدا ينعس نومته على الجربايه وغطيته
وظل مفتح عينه بس يلعب بالسيارة الصغيرة هو نايم
ويحجي وماادري شيلغي
وكعدت على الطابوريه وخليت مكياج ولو بعدني مااعرف هلكد اخلي مكياج
وخليت حمرة جان لونها وردي
بقيت كاعدة بصف يوسف لحد منام
سمعته يصيحني من الدرج رحت وكفت يم الدرج
كتله
....هاسعد
....لبسي حذاء عالي عندج مو
...بس اني بالبيت ليش البس
....لان اني عاجبني
...زين
رجعت للغرفه وفتحت الكومدي وطلعت حذاء عالي
ولبسته
ونزلت جوة جنت انزل واسمع صوت الطكطك
مال الكعب وصوته يدوي بالبيت لان البيت هادئ
جان كاعد يباوع تلفزيون بس كاتم الصوت مالته
من سمع الصوت اندار
كلي
....اي هسه صرتي ست بان طالعه حلوة
داسمع اني لو الصدمه اليوم اثرت عليه
سعد يكلي حلوة شنو الدنيا نكلبت لو اني نايمه
وداحلم
مد يده الي
واني كمشت يده وجرني وكعدني بصفه
وبدا يكلب بالتلفزيون بس ماحجى شي ولاكلي شي ولاحتى لمسني مجرد كاعدة يمه
وهي صارت ب11وشويه
الباب كامت تندك قوي ومو تندك انما دتنهجم
يمكن الجوارين سمعو الصوت
كتله
....هاي منووو خاف كميل
....عادي
...خلي اصعد ابدل
....لا مصعدين وراح اظلين هيجي اعتبري نفسج
بحفله بس شلون هيج اكعد كدامهم الله يخليك
داكوم وجرني كعدني اذا تحركتي اكسر رجلج لطلعين خبالي
بقيت كاعدة وهو كام فتح الباب واول مافتح الباب
وجان يدخل كميل وكمشه حيل ودفعه
على الحايط
كميل جان لابس.بنطرون نيلي وسترة طويله
وعيونه جانت ذب شر
اني كمت ارجف
ودخل محمد
وسد الباب
التاف محمد وشافني
وبقى جامد
....كلي
....بان
كمت اتحركت ورحت يم سعد
وكميل باوعني وفتح عينه بعصبيه
كمش سعد وجرة اقوى
وكله
.....اياقذر هاي الخطه مالتك تستخدمها شنو عبالك تغريني
انت شنو لخاطر الله شنو من بشر
وكام يضرب بي وسعد ميدافع عن نفسه مااعرف ليش بس يخلي يدة كدام وجه معقوله هيج جبان
ومحمد بقى يتفرج
وكلي .
....صعدي لبسي هدومج
سعد يكلي
...لصعدين
...كلب تعال
وكام يسحله يريد يطلعه من الباب
ركضت عليه كتله
لكميل
....كافي عد عوفه راح يموت بيدك
عافه واجى وكف بوجهي
....انتي منو وانتي شنو حتى تحجين
ولتدخلين احسلج ورحي غطي نفسج
.....عوفه الله يخليك
....معليج
كمشت سعد
وكتله لكميل
....شسوه بس كلي
....معليج انتي لتخلين غضبي يطولج
روحي كمشي ابنج وكعدي
وبقيت ابجي واتوسل بي
.....لج بابا انتي شنو لج ديستغلح انتي وابنج مسويكم درع
اله
محمد كمشني
وجرني وداني يم الدرج
....صعدي فوك وخلص لظلين تحجين
....ساعده محمد راح يموته
...يستاهل مومتعرفين شسوه
صعدي ستري على روحج
....مااصعد
...لج يابه صعدي
.....موراح يموت
....موتتهم هو دفع نفع يستاهل
....الله يخليك محمد
وركضت مرة ثانيه وكفت كدام كميل
مرفع عينه بس كلي
....روحي صعدي
...عوفه
رجع كميل خطوة ليورة وراح جر جرجف جان مشرور على الدرج وخلاه عليه انتبهت انو اني
كل هذا واني ممنتبه على لبسي لان الي صار
مثل الدوامه ناس تحجي على ناس وناس جر بناس
وكميل يغلط وسعد يجاوبه ومحمد يحجي على سعد ويجر كميل
وكميل يدفع محمد ويكله معليك
عوفني اقتله
يعني مااعرف شلون جان لازم اصرف ويامنو احجي
المن اراضي عليمن ادافع
لان اني بينهم مثل الاطرش بالزفه
بس لمن كميل خله الجرجف عليه
باوعت على ملابسي وخجلت من نفسي وصعدت ركض وبسرعه
لبست جاكيت طويل ونزلت
وجان كميل يكله
....رجع الي اخذته
.....يكله ماعندي شي وماعندك شي يمي
....اياحقير
باوع على محمد كله
.... جيبه ويانه
وسعد كام وكف بكوة ورجع صار قريب مني
وكال
....هنا اكو قانون وشرطه هنا مومثل بغداد
.....القانون مايمشي عليه لاهنا ولابااي مكان
كتله لكميل
....كافي عد شوف شسويت بي
...انتي لتفتحين حلكج ياثوله ولج هذا ديستغلح
لان راجع ماعندة ولادرهم رجع حتى يزايد عليج
شلون هسه خلاج كدامنا لابسه
هيج بس انتي ماعندج عقل
باوعت على سعد
كتله
...هذا الكلام صدك
....لا موصدك ديحرضج عليه وديعلمج لان عندة غير غايات
كله كميل
....وين جوازها وجواز يوسف
....ماادري
باوع عليه وكلي
...وين جوازاتكم
...مويمي هو اخذها وبعد ماشفتها
صاح على محمد وكله
...روح جيب يوسف
وكلي
...صعدي لبسي وجيبي ملابسكم بسرعه
.....ليش
....روحي كتلج
سعد كام يصيح ويكول
...انت باي حق تاخذها
....صم حلكك احسلك اني راح اعرف شوكت اموتك من ارجع الي اخذته بس يوسف وبان مايبقون يمك
ياقذر زايد على مرتك ماعندك غيرة هيج فد مرة صرت
.....انت معليك مرتي اشتكي عليك بس تطلع منا اخابر الشرطه
...اذا زلمه سويها وشوف
كتله
.....اني ماااريد اجي وياك ابقى هنا
صاح بيه
....صعدي لبسي هدومج وجيبي الطفل واني راح ارجعج من وين ماجابح روحي عيشي حياةطبيعيه
بقيت ساكته ومترددة
اروح ويا لو ابقى
هسه اني وصلت لمرحله مااثق بيهم كلهم
وخايفه منهم كلهم
لااكدر ابقى يم سعد الي عرضني وسواني مثل الي يبيعن نفسهن ولااكدر
اروح ويا كميل الي يكول سعد عنه تاجر الدم
بس وجودي ويا سعد خطير كلش
وكميل كلي ارجعج
اخذ ابني وارجع اكعد بيت ابويه
صعدت بسرعه وصعد محمد
ورايه
وكلي
.....وين يوسف
....هنا
شفته دخل ولمن طلعن جان شايل يوسف ركضت عليه
وغطيت يوسف خفت لاياخذ برد
وهو جان نايم دفيان
ورجعت للغرفه طلعت جنطه جبيرة ولميت بيها كم حاجه الي وكم حاجه ضروريه
ليوسف
وبدلت ملابسي
ونزلت
سعد باوع عليه وكلي
....راح تروحين وياهم
مجاوبته
.....بدريه راح تروحين وياهم راح تعوفيني علمود هذا وأشر على كميل
كتله
....اني راح ارجع من وين مااخذتني راح اروح لبيت ابويه الله يرحمه هناك مكاني
وجرني محمد من يدي
وطلعني برة وصعدني بالسيارة
وهو صعد بمكان السايق واجى كميل
صعد ليكدام
وكله
....يله اطلع
سمعت محمد يكله
.....خفت لاتقتله
....موهسه وماردت افتح العين عليه واسويلي هنا مشكله
....خلي يولي لتهتمله الفلوس راحت فدوة تتعوض
....وابويه شلون
....الله كريم كميل
وبعدها سكتو لحد ماوصلنا البيت
جان بابه عاليه وبيضه.
دخلنا جوة
ونزل كميل ومحمد اجى فتحلي الباب
وكلي
....اذا تريدين انزله اني
قصدة على يوسف لان نايم
بقيت مترددة انزل
وحايرة وخايفه
لان مااعرف شنو المخبي بعد وشنو الي راح يفاجئوني بي
بس شو بيه شعور مخليني اطمن ويا محمد وكميل اكثر
من وجودي وياسعد
لان الي سوا اليوم
وخلاني ابدل واكعد هيج واصير فرجه هذا شي
كلش جبير ومعناته هو مايهمه يبيع لحمي
نزلت ودخلنا جوا
وكميل دخل قبلنا جان البيت يدل على واحد عندةفلوس
هوايه ذكرت
من اول مرة رحت لبغداد وشفت بيت كميل نبهرت بي
وكلت بالعافيه على اصحابه
بس جان بي روح
وهسه لمن دخلت برغم انو بيتهم بغداد ميجي شي يم هذا البيت بس هذا البيت
عبالك ميت
من اول ماشفته ماحبيته والاضويه الصفر الي من الثريات خنكتني وكربت كلبي
باوعت محمد اجاوزني ومشى كدامي
وكله ل كميل
....اني راح اصعدهم فوك للغرفه
.....لاخليهم ينامون جوةاليوم وباجر عود الله كريم
بقيت واكفه على على اعصابي واني اسمع كلامهم
وخايفه من المضموم والي ممكن يصير
بس كلت ياغافل الك الله
الله هو الي يحميني اني وابني
منهم
شفت محمد راح دخل لغرفه بعيدا عني
وكميل نزع جاكيته وشمره على الكرسي بس وكعت بالكاع
وراح كعد على ميز صغير بي كراسي ثنين كبار
بقى كاعد
وساكت وعبالك فوك راسه طنون من هم
رجع محمد وكلي
تعاي
مشيت بصفه وداني قريب من كميل
وكعد على تخم جانبي واني هم كعدت
شفت كميل كام وراح على ثلاجه صغيرة
عبالي كومدي لان شكلها خشب
بس طلعت ثلاجه واخذ بطل صغير منها ورجع كعد
وأشر لمحمد
مااعرف شيريد منه بس محمد افتهمه
لان
كله
.....كميل انت مو تركت هالسم لان دياذيك
....مجاوبه بس مد يدة اله
كام محمد راح جاب كلاص ولمن اجى جان كميل بعدة ماد
يدة
بس محمد محطه
بيده حطه كدامه وضربه بقوة على هذا الميز الصغير
باوع عليه كميل ورجع خله عينه على الميز وعلى الكلاص وسحبه سحب
وفتح البطل ودار بي شرب
كميل طلع يشرب مثل سعد
وباوع البطل جان بي هوايه حطته على الكاع
محمد باوع عليه وكأنما خجل من الي عرفته عنهم
سمعت كميل يكول
....تعرفين هذا الكلب شسوة
...منو
....رجلج القذر
....قصدك ابن عمك
...للاسف
...شسوى
....باك ابويه باك فلوسه وهسه ابويه مريض
واتفق ويا الي جنت خاطبها وباكوني الي وشوه سمعتي
وخله ابويه يتبره مني
وامي تقاطعني شفتي شسوه برأيج يستاهل اقتله لو
لا
ماكدرت اجاوبه
اخذ الكلاص وشرب منه
.....اني مامهتم للفلوس عندي هوايه فلوس بس كلبي صار اسود
والتاف على محمد
وكله
.....جيبها محمد جيبها الي
....كميل ترة بان خايفه من عدنا داحسها بدون متحجي
...مشكلتها
وكف وكام يسوي مثل الي يمسح حاجه بيده وهو كام يجر يده على الميز لحد ماوصل على الكلاص الي ماشرب
منه بس شويه وجان يدفعه وكعه
.....راح اتركه هسه لسعد لان اذا يموت يرتاح
اني مرح اخلي يموت
......كميل كافي خلي يولي لتهتم اله
هو صار مثل الحشرة ماعندة فلوس
وماعندة اي شي
...تريدني اسكت من كل عقلك تحجي وانسى كل الي سوا
....احنا غلطه كميل والغلط مردود
رفع اصبعه وكام يأشر بوجه محمد
.....اني ماغلطت سمعت زين
واشر بااصبعه عليه
وكله
.....اخذها رجعها لمحافظتها زين خلي نخلص اني الف سالفه وسالفه براسي احير بمنو ولا بمنو
وكام يمشي بعصبيه وطلع
محمد كلي
...كومي بان نامي والصبح نحجي عود زين
هزيت راسي ومشيت وياة وصلني لباب الغرفه
...تصبحين على خير
...تصبح على خير
دخلت للغرفه وعبالك عايشه بحلم بكتاب
بقصه مااعرف بشنو عايشه
شنو خطيبته شنو هذا العالم القذر
بس مومهم شنو بينهم اني راح ارجع
لبيت ابويه وخلص
مااريد بعد سعد اريد بس ابني
واريد اروح قبل مايصير شي يضرنا اني وابني
اريد اطمن عليه
وعلى نفسي شلي بدوخت هالراس
وهاي الليله راحت واني ماغمضتلي عين وكل شويه
واذكر الي سوا سعد واكمش كلبي
ويصير عندي شعور بالقرف وقررت
ماارجع لسعد بعد لو تصير روحي بي
ولاابقى هنا ابدا ارجع لبيت ابويه
والي يصير يصير
بقيت افتر بالغرفه رايحه جايه
وخفت انام
وطلع الصبح واني كاعدة
وكمت اسمع اصوات بالبيت اظاهر كعدو
بقيت بمكاني وحس يوسف وراد يروح للحمام والغرفه مجان بيها حمام كومته وفتحت الباب على كيفي
وكمشت يد يوسف وكمت ادور على الحمام شفت
رجال جبير
باوعلي بااستغراب وباوع على يوسف
كلي
....انتي منو
...اني بان
....بان منو
سمعت صوت محمد يكوله
....فيصل عوفها
....اي مثل متريد
وراح هذا الرجال
باوعت جان محمد واكف يم باب الصاله الي البارحه جنا كاعدين بيها
كلتله واني بمكاني وبصوت عالي
....وين الحمام
كلي
...هذيج الباب الي كدامج
....شكرا
تمشيت بسرعه اني ويوسف ودخلت للحمام وغسلتله وجه
واني هم غسلت وجهي
كلت بلكي شويه اصحصح لان بديت انعس كلش
لمن طلعت من الحمام صار بوجهي كميل
باوع على يوسف ودنك وضحك بوجه
ومد يده
ويوسف راح وكادة من يده واخذه وياه
واني رحت للغرفه بس كلبي يطكطك على يوسف
كلت خاف يسويله شي
مشطت شعري
وطلعتلي من الجنطه تنورة وقميص ابيض لبسته
وطلعت اباوع ماشفت احد ولاسمعت صوت
بقيت ادور مالكيتهم
البيت جان جبير
كمت اصيح يوسف بصوت عالي
وشويه واجاني ركض
...ماما
اشرلي تعاي ورد ركض تبعته بسرعه
طلعو كاعدين بالمطبخ
ودياكلون
محمد من شافني كلي
....تعاي تريكي
كعدت بدون مااحجي
وجان يكلي كميل
...سمعتج دصيحين على يوسف
عبالج اخذته
...لابس ظل بالي عليه
....لتخافين احنا نبيع اسلحه منقتل احد مو مثل ميكول رجلج تجار دم
وضحك باستهزاء وعالعموم لتقلقين
.....كميل شنو هذا الكلام
....اي شنو هاي الحقيقة
كتله لمحمد
.....رجاءا اني اريد ارجع للعراق اخذ ابني واروح
شوكت اساقر
....جوازج يم سعد شلون
كله كميل
....طلعلهم جوازات جديدة
....بس موسهله هاي السالفه
...ماكو شي صعب محمد
....هسه اشوف شلون
...اني راح اطلع عندي شغل
وباوعلي وكلي
....اذا تريدين ترجعين لهذاك رجعي بس حسابج مثل احسابه او تنتظرين منا لااسبوع
يطلع جوازج وترجعين للعراق
ودفع الكرسي وكام وكف واخذ مفتاح سيارته
واوراق جانت على حافه الميز محطوطه
هم اخذهن وراح
بقى محمد كاعد وساكت
كتله
....محمد
...هاعيني
...تسلم عينك بس اني اريد افتهم شنو الي ديصير
...هوايه اشياء صارت يابان
...سولفلي
....راح اسولفلج الي لازم تعرفي
..... تذكرين من جنى بيتكم وصارت مشكله بينج وبين
سعد
بهذاك اليوم كميل كلش ضاج من سعد
وبنفس اليوم اجى سعد هنا لبيت كميل وبقى كم يوم
وراح على اساس عندة شغل وراح يروح لبغداد
...بس هو كلي لمصر
....اكيد مراح يكلج بس كال لكميل اروح لبغداد
وراح لبغداد
بس قبل ميروح سعد بفترة كميل تعرف على وحدة
وجانت عن طريق سعد
وكال انو هي بت عائله اعرفهم ويصيرون اصدقائي وفعلا التقينا برجال وامراة
وشكلهم محترمين
ومبين عليهم مستوى والبنيه شي مختلف حلوة
ومتكلمه وراقيه كميل نعجب بيها
وبعد كم شهر خطبها
بس ربطتهم الخطوبه
وبقت فترة تحاول تتهرب منه كلما يكللها شوكت نزوج
بس الحجي بيننا هو يكول عجبتني بس
وهو من النوع الي ميعترف بمشاعرة بس هو حبها
من نظراته الها من كلامه عنها
المهم ابوها طلب من كميل فلوس كله محتاج
منا لكم يوم ارجعها اخذو الفلوس وبعدها
فص ملح وذاب بنفس الوقت الي سعد سافر بي
كميل كوم الدنيا ماكعدها
سئلنا
وكشفنا انوهاي لعبه من سعد
سواها لان كميل كام يسحب الشغل من يد سعدً
لان سعد انسان مستهتر وكام يشتغل شغل مشبوه
فسوة هيجي حتى يضرب عصفورين بحجر هم يستفاد من الفلوس
وهم يأذي كميل لان عرف بي هو حبها
كميل استجمع نفسه من بعد هاي الضربه
بس الضربه الثانيه جانت اقوى
سعد رجع لبغداد وراح لاابو كميل الى هو عمه
وكله ابنك يتاجر بالسلاح ويتاجر بناس وعنده عصابه
وكام يشوه صورت كميل. كدام ابو
ابو كميل كله لكميل ارجع لبغداد لان سعد كايله
اذا طلبت من كميل يرجع لبغداد ميرجع وهذا اثبات على صحت كلامي
كميل جانت عندة مشكله بغداد ومجان يكدر يجي
لمن طلب منه ابو يرجع ومارجع
كميل ابو كله لاانت ابني ولااريد اشوفك
واتبره منك
والضربه الثالثه سعد نصب على ابو كميل انتي تعرفين ابو كميل
تاجر مال ابهارات ومواد غذائيه
سعد كله لعمه نفتح محل جبير كلش واني اشتريلك بضاعه من واحد صديقي تاجر وكام الرجال انطاه
الي ورا والي كدامه
واخذ سعد الفلوس ونهزم بيها
وعلى اثرها ابو كميل ضربته جلطه
فلتستغربين من كميل لان حقه
اصلا استغرب شلون ماقتله
لحد الان
....كل هذا واني مثل الاطرش بالزفه
واني عايشه وياهيج انسان ليش ماكلتولي
ليش عفتوني على عمه عيني
...لان ماقبلتي رفضتي سمعين اصورتي احنا
دنحرضج على سعد
....بس جان لازم دكولولي
....جان لازم بس هذ. الي صار
...زين وين راحت الي يحبها كميل
....مانعرف
....البارحه جان ديكلك جيبها
....اي
...البارحه جان ديشرب استغربت
...اي وللعلم الشرب خطر عليه لان هو دائما
الاوكسجين الي بجسمه يقل فيختنك
فلازم ميشرب نهائيا
....لعد ليش يشرب
...من القهر غير
....محمد
....نعم
....انتو شنو شغلكم
ابتسم
....بعدين اكلج ههههه
...ليش بعدين
...احسن
....زين
كمت وكمت اشيل الاماعين
...عوفيهن هسه فيصل يشيلهن
...حياتكم مريبه وتخوف
.....ههههه لتخافين احنا مستحيل نأذيج
...لعد ليش كلتلي احسابج بعدين
.....جنت عصبي
....هاااا
..اي بان تعاي نطلع برا الجو حلوو
....ميخالف
طلعت بالحديقه وجان يوسف يلعب ويركض
...محمد راح تسويلي الجوازات
....اكيد
....شوكت اني اريد اسافر
...منا لااسبوع ان شاءالله
....هوايه
....تريدين تخلصين منه
...صراحه اريد اخلص من هاي الحياة الي عايشتها
دار وجه عني وكام يباوع ليكدام وكلي
....بديتي تصحين لنفسج
....يمكن اي
...مويمكن اكيد يله من رخصتج راح اطلع لتخافين
سعد ميكدر يوصلج وبالليل راح اوديج للشقه مالتي راح تبقين هناك لحد مسافرين
....اي مومشكله
ودار وجه وراح
بقيت شويه كاعدة اباوع على يوسف
وبعدين دخلت للغرفه اني ويوسف وبقيت لحد مارجع محمد
وصاح على يوسف وعليه وكال تعاي اكلي
يوسف كعد يم كميل وكام يصبله وانطاه خاشوكه
وكله
.....يله اكل انت كبرت صرت رجال ميصير امك توكلك
باوعت على نظراته ليوسف
وكلت لويش احسة هوايه يحب يوسف مثل الي
عبالك ابنه
غريب هذا الشي. ولو كل الي عايشته غريب
مابقت على هاي
...بدريه
جان هذا صوت كميل
.....انتي راح تبقين هنا احسن الج
...محمد كلي اوديج للشقه مالتي
....لا هنا احسن
....بس اني مامرتاحه ومااريد اقلق راحتكم
واضوجكم
ترك الخاشوكه من يده
...اني كلت هنا خلص بعد لتحجين
كلت لنفسي كافي كل واحد يجي ويحجي عليه واني
اسكت
....احجي ويايه عدل
.....شنو
...احجي ويايه عدل
....ها من شوكت
....من هسه
.....ههههههه ههههه
ضحكته تخوف وصوتها خلة جسمي يرجف
....شنو رأيج ارجعج لسعد وطلعي لسانج عليه
لان اني مالي قابليه اخذ وانطي وماعندي وكت الج
....اي رجعني قابل تهددني
....اي موتي نفسج على الرجعه لان انتي اصلا
وحدة بلاكرامه يضربج ويهينج وانتي تبقين يمه
.....انت مالك دخل بحياتي
.....والله صدك دتحجين اني شنو الي دخل بيج ليش داشيل همح وجايبج لبيتي
لويش انتي منو
حتى اهتم اي فعلا كلامج صحيح لهذا السبب راح ارجعج يم هذا القذر
محمد كال
.....كميل شبيك انت ياهو الي تشوفه اطلع عصبيتك عليه
....رجعها بلا اي كلمه خليها باب بيتها وروح
....ماارجعها وكافي عد كميل ترة انت دمرتنا
...اي زين
جر الكرسي مالته ودفعه ليورة وجان يوكع الكرسي
كال
...يله كومي راح ارجعج
كمت ارجف وخفت ارجع لسعد بس
شلون اتراجع هسه واكله مااريد ارجع
كمشت يوسف ويدي جانت ترجف
دخلت للغرفه وجانت الملابس
بالجنطه بعدها جريت الجنطه
وطلعت واني خطواتي ثكيله عبالك ديودوني للمذبح
وشفته طلع ومحمد ورا
ومن طلعت من باب البيت وشافني
صاح بصوت عالي
....صعدي
صعدت ليكدام ويوسف بحضني
وكام يمشي بسرعه
والطريق صار عبالك ثواني
وكفت السيارة وللحظه كلبي وكف وياها وبعدها دك
...رجعتج مو ماحسيتي بلأمان بيتي
خلي هو يحسسج بلأمان نزلي
.....اني حسيت بأمان وياك
جنت اقصد بيته
رديت كتله اني حسيت بأمان واني بيتك
عالعموم ماكو داعي تعب نفسك
بالكلام وتشيل همي
خليت يدي على اليده مال باب وفتحتها واول مانزلت رجلي وحطيتها على الكاع سمعته يكلي
.....بان
يتبع....
#الكاتبه #روجمان
