Sa bawat pag-ikot ng mga kamay ng orasan
At paglipas ng mga oras sa mundong ating kinagagalawan
Nararamdaman ko ang isang hindi maipaliwanag na kasiyahan
Kasiyahang ikaw lamang ang natatanging dahilan
Ikaw, ang natatanging dahilan ng mga ngiti at sayang aking nararamdaman
Na nagiging dahilan kung bakit minsa'y nawawalan na 'ko ng pakialam
Dahil pakiramdam ko tayong dalawa ay lihim na nagmamahalan
Ngunit unti-unti nalamang mapapalitan ng mga salitang, kaibigan ka lamang
Ngunit sa bawat sandaling tayo lamang ang nagmimistulang tao sa mundo ko
Mga hindi maipaliwanag na saya ang tanging makikita mo sa mga mata ko
Sayang hindi mapapalitan ng kahit na anumang bagay o halagang naisin ko
Dahil ikaw lamang ang nag-iisang talang makikita ko, dito sa harapan ko
Mistulang isang telenovelang kinakikiligan ng buong mundo
Na ako ang inatasang magliligtas sa nag-iisang bidang katulad mo
Ang haharap sa bawat problemang darating sa mundo
At sa huli ay magsasaya dahil sa nagtagumpay ako
Masasabi ko ng napakasarap talaga ang mabuhay
Lalo kung ikaw ang makakasama habang-buhay
Na harapin ang mga dumarating na lumbay
Malalagpasan natin 'to lahat ng sabay
Maniniwala na sana ako ngunit naalala ko na sa istoryang isinulat ko
Ay hindi mababasa ang mga pantasyang nakasaad sa mga sinabi ko
Wala nga palang tayo sa mundo, wala akong papel sa mundo mo
Dahil ang katotohanan, isang 'di hamak na kaibigan mo lamang ako
Kaibigan na magsisilbing iyong kandungan sa tuwing kayo ay nagkakatampuhan
Ang magsisilbing panyo na pupunas ng mga luha sa tuwing siya ay iyong iniiyakan
Ako ang magpaparamdam sa'yo na sa mundong ito, may taong hindi ka bibitawan
May nag-iisang taong hindi magsasawang ikaw ay samahan at mahalin bilang kaibigan
BINABASA MO ANG
Anatomy of a Broken Heart
PoezjaAng librong ito ay isang kompilasyon ng iba't-ibang makadamdaming mga tula tungkol sa kasawian, kasiyahan at kalungkutan sa pag-ibig. Makakabasa ka rin dito ng mga maiikling kwento at mga babasahin (love advice) na magpaparamdam sa iyong hindi ka na...
