اعذروني ع التأخير بس جنت شوية مريضة
هسة انكمل
طبعااا نمنا ذيج الليلة، ،،،
كعدنة الصبح ع صوت مرت عمي بس اي صبح جانت دنيا ظلام يادوب تشوف شي رفعت راسي كعدن نسرين وسمر
مرت عمي: وج نسرين خايبة كومي وج بعد ماللحك وج اليوم شعندج لسة نايمة وكعدي ذني من يمج ولو المسعدات معودات ع النومة للظهر
سمر ; لاخالة لامسعدات ولاشي اصلا متعودين هم عدنة دووامات وشغل بس انتو ماخذين فكرة غلط عمي احنة مو بزر دلال السامعينة غلط
نسرين: اي يمة كايمة يلة سمر انتي وياي خلي نخبز ونحضر الريوك لان ابوي واخوتي يطلعون للكاع من وكت
سمر: فطوم رجعي نايمي
بس اني عندي فضول قاتل كمت وراهن اريد اشوف هاي كعدت الفجر ع شنو كمت من فراشي عفت حوري وسارة نايمات
مرت عمي طلعت للحقل مالت الحلال تحلب الهوايش لان جان حلالهم حيل اهواي وكالت لنسرين خلي اختج تطلع حتئ تاخذ الطليان للزرع وتكعد يمهن يعني(تسرح بيهن) والله خوش دلال مدللين بناتهم ههه
طبعا تنور طين اتلم حطب وتحطة بالتنور وتنتضرة يحمة ماكو اي سبل راحة مدري شلون عايشين
طبعاا اهنا مدري اضحك ع سمر مدري انقهر عليهه وهية مثولة بس تروح وترجع هيج متعرف بس مسوية نفسهه قوية والمصيبة كاع تلم حطب
ركضت ع سارة كومي ولج بسرعة
سارة اكعدي ولج
سارة: شكو ولج جاية موكالت سمر نامن روحي يلة
اي وانتي ماصدكتي كالت نامن ولج كومي سمر وحدهه واحنة نايمات كومي خلي نساعدهه
سارة: عزة غير تكولين من وكت راحت سارة تغسل وجهه ورجعت تضرب سن بسن، ، ولج ولج الماي مالتهم تكول سجاسين من ورة البرد
هههه لعد غير تسأليني وج عدهم ماي ذاك خالينة ع النار تاخذين وتغسلين منة
سارة: بعد وكت هسة تحجين ولج جمدت المهم يلة خلي انروح ورة سمر
طلعنة ورة سمر نلم حطب وياهه وكلشي منعرف انلم عودان ازغار ونسرين تضحك علينة
نسرين: منا الباجر ع هاذة حجيجن الا نخبز هههه وراح نترزل احلة رزالة من امي
لا انوب كملنة شعلنة التنور وخبزت نسرين واحنة صافنين عليهه وشوية ورجعت امهه وبيدهه سطل ماشاء الله كولة حليب
مرت عمي: يلة ولجن كملتن يااا ذني شبيهن فاكات حلكهن
نسرين: يمةوين شايفات هيج حقهن
مرت عمي: انوب منا وهيج راح يشوفن
طبعااا هية متحجي ويانة مباشر بس تنطي التعليمات لنسرين وتروح كانوو اتحسسنة انو هية مالهه دخل بالصار كولة
خبزنة ورجعنة للبيت حضرت نسرين ريوك بس تدرون حياتهم صح تعب بس الهه قيمة وكولشي يسوه بيدهم يعني الريوك بيضات من جوة الدجاجة وروبة من الهايشة مالتهم
اجتمعو ع السفرة وابوهم وياهم، ،، واني بكلبي لعد ابوي اشبيه ويانة
انطوني خبزة وروبة بطاسة، ،، اني كبل جبت شكر خليته ع الروبة وكعدت اكل بس الطعم خيال شكد طيبة بقو صافنين علية
عمي: ولكم هاي اسوت وانوب تاكل بشهية شكر وروبة والله مخبلة البنت هاية
واني ولايمي خلصنة ريوك الولد راحو وعمي للزرع
مرت عمي: فاطمة تروح وية بنتي يسرحن بالطليان. وانتن كملن شغل البيت
سمر: لا وين تروح فطوم كولشي متعرف سارة تروح اشوية اكبر وافهم
مرت عمي: ع كيفج وين موديهه احنا هو الزرعات بالباب وبس يكعدن يم الطليان كولشي ميسون، ،، ويلة خلي اي وحدة تروح مو شغلتي بس المهم اطلعن للشغل
راحت سارة وي بنت عمي واحنة بقينة بالبيت راحن خطية سمر ونسرين يكملن باقي الشغل حطب وكنس وشغل يهلك البشر ومن رجعن كالت نسرين خلي نجيب مي من الشط ع مود يبقة قريب ونشتغل بيهه رحت وياهن جان اذا تريد مي تسبح او تسوي اي شي لازم تجيب مي وتشعل نار وتخلي المي يفور الا تستعملة ع مود يتعقم
ورجعنة ع البيت، ،،، وفجا
طبت بنت عمي الزغيرة وهية تعيط وتبجي وراهه سارة صافنة
منعرررررف اشبيهن
التكملة غير وقت انشالله
