الرؤيا من القلب

بارت 10

بعد رجوع فطومه تركت الكليه وترقن قيدي عمار وسراج جانو يجون من الباب يسئلون ويطمئنون بعد فتره انقطعو اما جمال كل خميس يجيب خواته مرت اشهر العده اني انشغلت بفطومه جنت خايفه تتكرر مأساة خطفها الله لايشوف مسلم تجربة فقدان ابنه كلش صعبه بدت فطومه تكبر صار عمرها سنه وشهرين تمشي واني فرحانه بيها بس بداخلي احن لعمار بيوم اخذت رقمه من والدتي  بس خايفه اتصل بيه ترددت هوايه استجمعت قوتي واتصلت بحجة اتشكر منه على وكفاته ويايه
جان الوقت صبح هو جان عنده دوام اتصلت
جاوبتني بنيه من رقمه سئلتها هذا مو رقم استاذ عمار جاوبتني تفضلي كتلها اني اريد استاذ عمار انتي منو الصراحه كلش غرت جاوبتني اني خطيبته من كالت هيج انهاريت وغلقت الخط بقيت ابجي اجتي امي تريد تهديني متعرف السبب بس ابجي حسيت خسرت عمار للابد ليش هيج ظلمني معقوله هيج الناس بس مو عمار عمار حنين وطيب ليش ساعدني من جنت مهزومه ومن خطفو فاطمه لان شافني محتاجه بس  مشاف انوثتي ولاحس بحبي مسمع التسجيل على اللاب توب مفهم شنو مشاعري
..
عمار بعد مرجعنا فاطمه لسجى حاولت التقي بسجى على انفراد افهم منها سبب رجوعها حاولت اصارحها مكدرت  لحد مايوم جمال اجاني فرحان
جمال..باركلي صديقي
عمار..الف مبروك على شنو
جمال..وافقت سجى على الخطوبه
عمار..شوكت شلون
جمال..شنو شبيك عمار اشو ضجت الضاهر متحبلي الخير
عمار..لا اسف بس لاحجيت لاكلت من ورانا رحت خطبت
جمال..هم رادوها بهدوء تعرف ضروفها هي توها خلصت العده ويخافون من حجي الناس
عمار..اهلها يخافون بس انت ليش خايف منو هنا راح  يحجي على العموم شايف خير تستاهلها انت طيب
جمال..مشكور صديقي وانت شوكت نفرح بيك وبسراب الكل يحجي بعلاقتكم
عمار..يمعود يا علاقه تره هي مجرد طالبه وصديقه مو اكثر
جمال..بس انتو 24 ساعه سوه
عمار..اسئلها اذا اجذب
جمال..المهم بالزفه لازم تجي مو متجي
عمار..الله يتمملك بالخير
طلع جمال واني نار بصدري من سمعت الخبر اكيد وافقت لان جمال مابيه نقص همزين محجيت ورفضتني اكيد اتاذى اكثر اكيد اتفضله عليا لهوايه امور اولها هو يشوف واني كفيف معقوله راح تتزوج متحملت حسيت مخنوك خابرت سراج يجي ياخذني
اجتي سراب بقت كاعده يمي اجه سراج طلعت وياه ونسيت جهازي من القهر بالقاعه بعد ماخلص الدوام اتذكرت موبايلي اتصلت جاوبتني سراب ماخذته وياها للبيت اتفقنا ثاني يوم تجيبه وياها للدوام ثاني يوم اخذته من سراب سئلتها اكو اتصال اجاني كالت لا من فتحت تسجيل المكالمات لكيت مكالمة سراب سراب حاذفتها من من سجل المكالمات بس ناسيه تحذفها من برنامج تسجيل المكالمات من شغلتها وسمعت كلام سراب تعصبت دزيت على سراب رزلتها
عمار..انتي باي حق تحجين هيج شوكت اني خاطبج وليس حاذفه المكالمه من السجل
سراب. عمار اني احبك وغرت عليك هاي شنو تتصل بيك حتى مو طالبه بقسمك
عمار..مو من حقج تدخلين بخصوصياتي ارجوج هاي اخر مره نحجي بيها
سراب..عمار اني احبك ارجوك افهمني
عمار ..ياحب تحجين بيه بابا ماكو غير صداقه بينا افهمي
نهيت الكلام ويا سراب حاولت اتصل بسجى افهم سبب اتصالها تنطيني رفض بعدها فكرت هي مخطوبه لجمال عيب اخاف تعتبرها تحرش مني بطلت اتصال ضليت افكر بيها وبكلام جمال معقوله مخطوبين لو نفس كذبة سراب بقيت الوب اتصلت بسراج احجيله الي صار كله بلكي يساعدني
..
سجى كلش تعبت من كالت سراب اني خطيبته وراها اتصلت بنص ساعه هم هي جاوبت ونفس الكلام صار عندي يقين هي خطيبته بقيت الوب معقوله خسرت عمار المن احجي يارب لزمت فاطمه وحضنتها بقوه وابجي اتذكر فاطمه بحضن عمار من رجعت تضحك لعمار وكانه فعلا ابوها هو شلون حاضنها ويبوس بيها يارب معرفت الحب ولا بيوم حجيت مع شاب خليت عمار بطريقي وتعلقت بيه وهسه راح اتخبل معقوله يتزوج سراب هاي راح تلعب بمشاعره وتاذيه خطيه
...
اجه سراج عليا لكاني كلش تعبان نفسيا
عمار..سراج من نسيت موبايلي البارحه واخذته سراب متصله سجى ومجاوبتها من سائلتها كايلتلها اني خطيبته هسه اتصل بسجى متجاوب ترفض المكالمه
سراج ..شلون عرفت بالمكالمه
عمار..من برنامج تسجيل المكالمات تحب تسمعها سمعها سراج
سراج..لازم نروح لسجى ونفهمها
عمار..وجمال شلون كال وافقت على الخطوبه
سراج..بعصبيه كتلك الف مره نروح نفهم تصرفها انت رفضت اكيد توافق على جمال
عمار..اني تعبت سراج اخوتي يتوسلون اهاجر اللهم لامريكا يوميه يكولون تعال يمنا بعد سجى ماتزوج ماكدر ابقى هنا بيتي تحول جحيم وين ماروح اسمع ضحكت فاطمه وسجى واتذكر سوالفها
سراج .. الخميس تعال نروح لسجى ونفهم ليش تستعجل
عمار..واذا طلعت فعلا موافقه راح اخسر نفسي النوب سراج مشتاق لفاطمه كلش شفتها من رجعناها شلون عرفتني وتضحكلي
سراج ..اي والله فدوه كبل سكتت وكامت تضحكلك
..
امي تلح جمال محاجيها وكايللها الخميس اجي ويا خواتي نخطب رسمي جانت امي تاجل بالموضوع بسبب العده يوم الاربعاء وصلنا خبر وفاة عباس ابو فاطمه بنتي الصراحه حزنت مهما كان ابو بنتي
ام سجى..الحمدلله خلصنا من عباس نهائي
سجى..لا مخلصنا نسيتي اهله وفاطمه راح تورث منه النوب اهله ورث اني ماريد من فلوسهم كلها حرام جمعها من دم الفقره
ام سجى ..اي والله بنتي تنازلي
سجى..لا مااتنازل اخذهن وارجعهن للناس خطيه
ام سجى..شنو تريدين النوب دخلينا بمشاكل اهل عباس ناس طماعين وكلشي يسوون
سجى..ميكدرون الله عزوجل ويانا ماريد يطلع بنتي فلوس الحرام اريد الله يباركلي بيها
ام سجى..يمه بنيتي بنتج مالها ذنب ابوها موزين
سجى..ماما خطيه هوايه ناس اتاذو من عباس اولهم احنا بس ربك اخذلي حقي
ام سجى..الله كريم بنتي باجر يجون اهل جمال علمود الخطوبه خوما تبقين مكابلتني وشرطت على جمال يربي فطومه وتكملين كليتج
سجى..يمه منو كلج اريد اتزوج
ام سجى..موبكيفج يمه اني مدايمه الج وجمال خوش ولد واستاذ وحالته زينه ومثقف شتريدين بعد انتي بنت منو حتى ترفضيه نسيتي انتي مطلقه ومجتمعنا ميرحم
سجى..يمه شنو تضايقتي مني ابوس ايدج خليني ماريد اتزوج اريد اربي بنتي
ام سجى..اني انطيت كلمه لجمال مو بكيفج غصب ماعليج اريد اطمئن عليج كلشي يصير على الاقل اذا متزوجه تلمين اخوتج يمج
سجى..الله كريم ماما فطومه كامت تبجي خلي ارضعها
ام سجى..اليوم اسئل السيد عن فلوس عباس يصير تاخذين منهن لولا خوما توزعيهن كلهن هم حرام
..
بالليل كل شويا تندك الباب من سمعو عباس ميت صرت مرغوبه حتى السيد خطبني وهو بكد ابويا طلع عد عباس اكثر من بيت بمنطقتنا منغير الفرن
مع الاسف مجتمعنا المطلقه الفقيره محد يدك بابها بس لو عرفو عدها فلوس هوايه يطمعون بيها اني ماتمنى غير عمار وعمار خطب بعد حتى لو يتزوج ويخطبني اوافق ماشفت بحنانه وطيبه انسان مثقف وانيق ورومانسي وكريم كل الصفات الي تتمناه المراه بعمار جايز لان حبيته اشوفه هيج حاولت انام طول الليل افكر بعمار قررت اتصل والي يصير يصير اتصلت جانت الساعه ب2 دك اول مره وثاني مره خفت كطعت الاتصال وغلقته اكيد نايم وقلقته شراح يكول عليا شبيها ماعدها اخلاق تتصل برجل ب2 بالليل كلش خجلت  من نفسي وطفيت جهازي حاولت انام ماكدر بس اتكلب الزم جهازي اريد افتحه ماكدر كعدت فاطمه بدلتلها وشربتها حليب ورجعت نامت واني افكر بعمار اباوع لفاطمه اتذكر من جانت تضحك لعمار واتالم معقوله راح يتزوج
..
جان يوم الاربعاء مكدرت انام قررت اتشجع الخميس ونروح اني وسراج ونحجي ويا سجى ب2 بالليل دك موبايل علما تلمسته فوك الكومدي انكطع الاتصال اني مسوي برنامج ناطق باسم المتصل من نطق باسم سجى فرحت اريد بس الزم جهازي ماكو انكطع الخط اتصلت الرقم مغلق بقيت للفجر اتصل وماكو كول الليل اتكلب اتذكر سجى وفاطمه اصواتهن ضحكهن وسوالف سجى طفوليه جانت معدت صليت وغسلت وحلقت لحيتي وبدلت طلعت للكليه وصلت اجتي سراب مره ثانيه ايضا طردتها اني بالمحاضره اجه مسج انفتح رقم سجى انتضرت تخلص المحاضره واتصل بيها اول مخلصت اتصلت
عمار..الوو
سجى ..ساكته
عمار..احجي سجى صاير شي قلقتيني
سجى..ساكته
عمار..سجى جاوبي
انكطع الاتصال
..
اجه اتصال عمار مكدرت اجاوب انعكد لساني اول مره احب ماعرف شكول ليش اتصلت ب2 بالليل خجلت سديت الموبايل وارجف الي يحب شيكول ليش ماعجب عمار شنو سامع عليا ليش يساعدني اعرف من لهفته على فاطمه يحب فطومه زين اني يحبني لولا اتصل بيه لولا هوايه اسئله براسي ادك رقمه اوصل اضغط اتصال اتراجع شكول اذا اتصل اكله مشتاقتلك اي هيج اكوله وخلي الي يصير بس اخاف ياخذ غير نضره
رن موبايل عمار المتصل سجى
عمار..الو
سجى..بصوت مخنوك مشتاقتلك وينكطع الاتصال
عمار..الو الو
يتصل متجاوب
عمار معقوله لو غلطان شنو مشتاقتلي معقوله تحبني
وجمال ليش وافقت عليه خلي اتصل افهم
يرن موبايل سجى ترجف من الخجل اجاوب لولا سمعني اكيد اي اجاوب
عمار..الووو
سجى..سكوت
عمار..جاوبي ارجوج
سجى..ساكته
عمار..سجى ارجوج احجي
ينكطع الاتصال
عمار مخبله والله ب2 بالليل تتصل وتغلق موبايلها اتصل تسكت تتصل تكول كلمه وتسده ياربي
..
سجى هسه شيكول عليا ليش اتصرف برعونه خلي اتصل اكوله فاطمه مشتاقتلك مو اني تتصل بيه
عمار..الو
سجى..فاطمه مشتاقتلك
عمار..اني هم مشتاقلها يعني انتي متصله علمود فاطمه اليوم اجي واشوفها
سجى..ها اي علمود فاطمه بس
عمار..جمال صدك خا ينكطع الاتصال
مكملت جملتي انكطع الاتصال
حاولت اتصل متجاوب دوختني شنو مشتاقتلي شنو فاطمه مشتاقتلك معقوله تحبني وجمال ليش وافقت اليوم اروح وافهم
..
مر سراج عليا اتفقنا العصر نروح لبيت سجى ونحجي وياها حجيت لسراج كلشي صار
سراج..عمار سجى تحبك
عمار..ليش لعد رجعت لعباس ليش مكالتلي
سراج ..عمار انت عمرك ممار بعلاقه الرجل هو يصارح المراه مو ينتضر المراه تصارحه صدك وين اخر مسرحيه
عمار..مو كتلك كسرت اللاب توب وراحت
سراج..حبي جيب اطلع الهارد محتاجين المسرحيه
عمار..هسه من نوصل انطيك اللاب توب طلع الهارد واخذ السيناريو
سراج ..لاخليه من اجيك العصر ونروح لبيت سجى اخذه اوديه لصديقي علمود اطلع السيناريو
عمار..اوك مثل ماتحب ب5 العصر تعال علمود اخصمها ويا سجى
..
سجى من كال اجيكم الصراحه كلش فرحت شلبس ياربي والبس فاطمه طلعت الكنتور كله اختاريت ماعندي شي لو تراكات لو جبب لو دشاديش مال بيت اختاريت دشداشه مالبستها جديده وحضرت ملابس لفاطمه ودخلتها سبحنا اني وياها فاطمه تكمز بالمي وجنت حيل فرحانه لبست فاطمه وخليتلها بودره وعطر بنوتي علمود اكيد راح يشيلها ويبوسها ولو هي ريحتها حلوه لان كل شويا اغسللها وابدللها واني هم مشطت شعري ولبست الدشداشه وربطه جديده صارة ب5 ونص اني بالمرجوحه وفاطمه بحضني اندكت الباب طرت من الفرحه من فتحتها مبتسمه تلكني خوات جمال يحضنن بيا ويبوسني ويهللهلن اني اتفاجات لعد وين سراج طلعت امي تلكتهن وتبوسهن دخلو
...
عمار من وصلنا سراج كال هذوله  جمال وخواته كدامنا دكو الباب طلعت سجى مبتسمه ويتباوسون وهلاهل كلت لسراج رجعني اتاكدت فعلا سجى مخطوبه لجمال وكاعده تلعب بمشاعري
...
للحديث تتمه