#طفولة_ضائعة
البارت السادس
#ام_مصطفى
كمنا انة وياهه نبشنه البيت نبش
ماخلينة مجان يعتب علينه مادورنة بي
كلنا بلكت شامرتهن بمكان منا منا
تعبنا ومامش فايده
سوسن اعاعين عليها عيونها صارن جمر وجها صار جنه طماطه
وجفن عينها ورم
وانوب سعاد أكلت وجها خراميش
ورم وجها كله
لاتغدينه ولا كعدنه بس ندور
العصر اجت مرت عمي أم سعد
عود جاي تأخذ سوسن
تحفها من شافت وجه سوسن لطمت
ياع ولج شصاير بيج
ليش خارطه خدودج وعيونج مورمة بجي
سولفنالها السالفة
كامت من عدنا وراحت لسعاد صاحت عليها خايبة انت ماتخافين الله
كلش تراتج مصختيها جا عليش هيج مسوية بوجه البت
كالت سعاد طبها مرض
هاي خاف عبالج فقيره هاي تسوي مصايب
وأنه متسترة عليها
لا تخليني احجي واطلع زواع بطني
خليني ساكته احسن
اخاف احجي ويخرب العرس
خيبة ماتحجين شني جا احنه مانعرف بنيتنه شني
تره نعرفها ونعرفج جذابة ومتخافين الله
الذهب وين وديتي
يا ذهب هذا
تعرفين كلش زين عليمن احجي
والله مااعرف
وتلكينها سويسن اطته لصاحبها
حتى تسد حلكه
بعد ما جسحت اخوي وملت منه
شافتلها صاحب
واطتة الذهب
خيبة اكلي وحل ترحين فدوه الها
هاي اليتيمة تحركج بنار جهنم
شوفي سعيدة باجر حضري نفسج
اخذج احلفج بالعباس أبو راس الحار
وانت تعرفين شارتة شني
وتعرفين التحلف جذب بي
وحلال الذهب عليج
وانة باجر مشترية ذهب غيره الها
وراح اخلي الزلم يتصرفون
خوش
يله سوسن البسي عباتج
اخذج احفج ولا تبجين خير الله جثير عدنه اشتريلج ذهب بكد وزنج
عمتي أم سعد تصير بت عم امي يعني خالتي وماخذة عمي بس احنه نكللها عمة مثل كل نسوان عمنا
جانت كلش تحبنة
طلعت عمتي أم سعد أخذت سوسن
ضلت سعاد تعد وتسب وتفشر
ماتت من الحركة والقهر
تصيح حضها شكبره بت حسنة
أم الولد بسيطة انه اعلمجن
خلت لبست عبايتها وراحت لهلها
اجت عمتي وسوسن
وهي هم ردت
كالت عمتي الها حضري روحج الفجر نطلع لكربلاء اخلي سعد ياخذنه بسيارتة
هي انخطف لونها وضلت اطكطك بصابعها
بس طب ابوي من الشغل كامت تبجي الحكلي بناتك بوكني مدري وين شمر الذهب
ويكولن بكتي وهاي كريمة تريد تحلفني تقصد ع عمتي أم سعد
تريد تاخذني للعباس احلف
ترضاها يحلفون مرتك
ابوي كالها عليش تبجين وخايفه
مادام موش انت البايكتهن
روحي احلفي وزوري وتونسي وتعاي
هي نطت منها
ابوي جنه عرف هي ماخذتهن
وكالها هيج
نمنا باليل للفجر دك الهورن مال سعد
ابوي فتح الباب الهم
كعدت سوسن وكعدتني
كالت أميرة أميرة كومي
اضنهم اجو وراح يأخذون سعاد للعباس يحلفونها
كعدت شغلت الكلوب
وسوسن فتحت كنتورها اطلع ربطتها وي فك الكنتور كام الذهب يتطايح منه
كالت اميره تعاي شوفي خيبة الذهب لكيته
كتلها جا شعبالج العباس شوية كامت ترجف سعاد وطاحت وردته تلكينها قبل لا تروح تحلف
عمتي طبت قبل لا نكللها
كالت ها رجعت الذهب
كنالها اي شون عرفتي
كالت اسم أبو فاضل يرعب
انة ادري بيها هسه تردة
وين لكيتنة
بالكنتور مشمور
خوش
دكومي يم سلمي ع رجلج وسويلنه ريوك
كامت سوسن سلمت ع سعد
كالها شني شبي وجهج
استحت ماحجت شي اله
كالتلة نورة اختي الصغيره خرمشتني
هز رأسه
