#طفولة_ضائعة
البارت الأخير
#ام_مصطفى من سمعته هيج تعاركت وياه
انت شبيك تخبلت خوما تخبلت
شجاك كلي
الله عليك اكو واحد عاقل يعارك مرته ويطلكها بله سبب
زين هسه من خابرت ع اهلي
مراح يسئلوك شنو سبب الطلاك
شدكللهم اني اشرب
وأريد منها الراتب حتى اشرب بي
كال بكيفي راتب جهالي وبكيفي
مااريدج أريد ازوج
واحب وحده
كتله منو أم رجل تحبها متستحي انت
شكو ازوجتني اذا تحب وحده
وبعدين هي مو زوجت مديرك شلون تحبها ماتخاف الله ماعدك غيره شرف
عود ابن عشاير هاي انت وهيج تتصرف
كال ابن عشاير وغصبن عليج سمعتي لولا
وجهالي ورواتبهم من حقي زين لولا
كتله لو تطلع نخله براسك
جهالي ماتطول اضفرهم
وحجايه وحده هسه اصرخ والم الدنيا عليك
واكول يضربني
مااعرف شلون اجتني القوه ومنين هيج وكفت بوجها
كال كايمه تعليم صوتج وتوكفين بوجهي
بسيطه ولج اني سويتج
اني كبرتج علي
اله ارجعج لسعاد تصيرين خدامه جوه رجليها
طب مدري شيسوي للغرفه
اني جريت جهالي
وطلعت يم ماريا
مااعرف شسوي وشصرف
هي كلشي تعرف
دكيت الباب وطبيت
شافتني شنو شبيج
كتلها اذا اجه علي كريم كولي موهنا
وهسه احجيلج الصار
اندكت الباب حيل طلع زوجها جوو
اسمعه يحجي وياه
مفتهمت هواي لأن لسه ماضابطه اللغه زين
كم كلمه أعرفها
شويه وراح
كالت ماريا كناله مااجت
باوعت ماريا عليه من الشباك
شافته طلع بالشارع
يدور
اني هم لزمت المبايل وخابرت اهلي اول شي خابرت سعد وكلشي حجيتله
ماكو ربع ساعه اخوي كاضم خابر
وحسين هم
وراها ابوي رايح لهله للبيت ومهددهم
حجيت لماريا وجوو
الي يريده مني فهمتهم يريد الراتب مال جهالي
يشرب بي جوو فهمني انو هنا القانون وياي
ومايسمحله يمد ايده علي
ولا يسمحله يأخذ الأطفال منج ولا راتبهم وحضانتهم تبقى عندج حتى لو اطلكتوا
وتكدرين تشتكين عليه إذا تعرضلج
كال ارجعي لشقتج وأي تصرف يسوي وياج كوليله راح اشتكي عليك
هو يعرف كلش زين هاي القوانين
بس مستغفلج
ويريدج تتنازلين عن الراتب اله بدل جهالج اكيد عنده وحده
لأن هنا محد تزوج واحد ماعنده راتب
من سمعت حجي جوو اتقويت أكثر واهلي هالمره وياي ماخذلوني
رجعت لشقتي بس كلت لماريا اذا سمعتي صريخي اتصل ع الشرطه
طبيت لكيته يورث جكاره
اول ماطبت اجه علي
كال وين جنتي
كتله جنت يم محامي
ردت اعرف قوانين السويد
وفهمني الحمد لله
كال ها خير
وشفهمج كتله فهمني هسه تليفون واحد مني يذبوك سجن
احجي هيج وخابروا أهله عليه
اسمع ابوه يصيح ويحجي
ماافتهم شيكول
بس عرفت اهلي علكوها هناك
أخذ المبايل وطلع
رجع طب من خلص مكالمته
خابره سعد
هدده وغلط عليه وكله اله اسويها عشاير
ولا خاف عبالك السويد بعيده
عد الازم اجيك بساعه سده منه وبقى يغلط علي
كتله حجايه وحده زايده اخابر الشرطه واشتكي عليك وشتريد سوي الحضانة الي
رفعت السماعه واجه سده
كال خ لي نتفق
اني هسه بس اسحب منج الإقامه
يرجعوج للعراق
وكلشي ماتحصلين لاراتب وإلى شي
ولادكولين مااسويها تره اسويها
كتله بس كلي فهمني ليش هيج تسوي ويانه اني وجهالك
اذيته بشي
قصرت وياك بشي
كال اي مسمعين كلامي. كتله شلون ماسمع كلامك وبشنو ماسمعت
كال الراتب ماخذته عندج وتصرفين بي بكيفج
كله من هاي الحيه ماريا هيه تحرضج علي
من الأخير كريم لا تلف وادور كلي
ليش تريد الراتب شعندك
احجيلها الصراحه خلي نصارح
انت تعرف ضروفي بالعراق
وكاعد تستغلني تعرف
مااكدر ارجع بجهالي
هناك منين اعيشهم
تعرف راح احتار بعيشتهم
وصدووك اني ليش ساكته وجارعه المر وياه اعرف هناك مالي سند
اني بوحدي جنت حايره بعيشتي
وبكعدتي ويوميه من بيت مطروده
هنوب ارجع وياي اثنين جهال
منو يلفيني
وهناك عشاير مراح يقبلون أعيش ابيت وحدي مطلقه
ولا يقبلون اشتغل
للأسف تقاليد وعادات ضالمه للمره بمجتمعنا .. ......
كتله كول شعندك من الأخير
كال من الأخير لونا اطلكت من زوجها ع مودي
كتله لونا منو كال هي زوجة المدير مالتي
كتله اي والمطلوب
كال لازم اطلكج يله ازوجها
ولازم عندي راتب كون بقيت اضحك علي مدري ع حضي الماكعد فد يوم
لعد شبيه اني مو مره ويركض وره ذيج وبايعني اني وجهالي ع مودها
هذا أمن جهالي يمه
قررت اصير قويه واعتمد ع نفسي
ومااخلي جهالي بعازه ولا يشوفون الي شفته
كتله كريم مختصر
انطيك راتب واحد مال علاوي
تجي كل شهر تأخذه مني
وتروح بعد تعيش بغير مكان مااتقبلك يمي
كال اني اصلا بس اطلكج وأخذ الراتب بعد مشوفيني
كتله اذا اطلكني اهلي راح يرجعوني للعراق
طلاك ماكوو
وإلا ماتنازل ع الراتب واشتكي عليك وكلشي متحصل بعد
بقينا نجادل هواي آخر شي اقترح علي يطلكني بس طلاك سويدي
بورقه من الحكومه السويديه مطلقه
وتشوفها لونا اني طلقتج
كتله اوكي بس هم بشرط
مااريد أحد يعرف من العراق احنه مطلقين
كال هو اصلا مانعتبر مطلقين محكمة وسيد مزوجين
كتله زين لعد
ثاني يوم رحنا للمحكمة السويديه
اطلكنا وانطيته راتب علاوي وراح
مدري افرح تخلصت منا مدري ابجي ع حضي
مكتوب علي التعب والعذاب
مكتوب علي القهر
بس رم كول هاي ولا عيشة سعاد
ميخالف أعيش ابيتي هنا معززة مكرمه
ولا انذل وارجع رجوع لهلي وذلتهم كلشي يهون لخاطر جهالي مااريدهم يشوفون الي شفته
اذا عفتهم واذا رجعت بيهم للعراق
راح يضيع مستقبلهم ويتبهذلون
..
قررت اعتمد على نفسي بكلشي
بعد ماعافني كريم وأخذ ملابسه وراح
وره اسبوع جوو وماريا كالوا
مدام اطلقتي وماعدج شغل
الج راتب من الدوله
روحي قدمي ورقة طلاقج
وفعلا رحت وبسرعه شدولي راتب
يعني صار عندي راتبين
كدرت والف الحمد لله أعيش جهالي بيه
ودافع فواتير وايجار الشقه
جهالي خليتهم حضانه
واروح ادرس
