درستها فعلمتني الحب للكاتبه ام رحيل ..ع م

درستها....فعلمتني الحب بارت 22💕

للكاتبه ام رحيل ...ع م
-هاي منو جاينه ابهل الليل.. اكو بعد احد ما جاي من اخوتك ونسوانهم سناء اجتي... اي بويه اجتي.. لعد منو الجاي... هسه.... اشوف بويه...
وفتح اسلام الباب... وما جان متفاجئ لان حنين فهمته كلشي.. وسهيله فهمت امير.. وسمير افتهم السالفه بلتشمشم مالته چنه بزون...
-اهلا.   اهلا. .اتفظلوا  اتفظلوا
-منو بويه اسلام...
ودخلوا للبيت كلهم والمفاجئه الچبيره... ابو امير گاملهم والفرحه تارسه وجهه... شي، ماچان يتوقعوا
كلهم والتخطيط والكلام الچانو ايام ايخططوله 
صار ماله داعي.. لان مثل ما يگلون الجواب ايبان من عنوانه... يعني ابو امير قابل... ومنتظر، هاي الخطوه من زمان...
-يااهلا وسهلا حچي ...ابوسليم اشلون صحتك... هله عمي كيان هله خالي كرار  اشلون انجمعت ويه الجماعه..
وهنا دنگ كرار على ايد، خاله وباسه... لان صار سنتين ما شايفه... ها خالي مو اني خطبت كوثر اخت كيان... هااا خالي عل خير حبابه وبت ناس طيبين... اتفظلوا..  العشه صاير يله ابوجهكم هل مقسوم. 
-لا ابو امير  عشاك ما انظوگه حتى لو تذبحلنه طليان
بس اذا جبرت خاطرنه هاي المره راح ناكل بصلكم وخبزكم وهي احلى من العسل ابحلگنه..
-ابو سليم ...الحليم والراضع حليب امه وابن عرب ما ايكرر الغلط مرتين  لان هيچ ربك ما ايفرقه عن الحيوان ابشي،
-لا حشاك ابو امير.. انت شيخ عشيرتك وماتطلع منك الغلطه بس الانسان ايعيش ويتعلم من تجاربه منا لمن ايموت اشما اتعلم وشما عاش.ايظل ...ما يعرف من هاي الدنيا شي...
-لا عاب حلگك ابو سليم... انت حق وابو الحق والي اتريده وتگوله سيف على رگبتي...
-يسلم رگبتك ابو امير... ما انريد انطول الحچي والوگفه لان الاكل ريحته فتحت نفسي..
-ههههههه ههههههه شنسوي غير انت امصمم ما تگعد ولا تاكل الا اتخلص الحچي..
-ابو امير.. ايمان النه ...لو.. ما اريد اگوله
-لو الكم.. والكم.. والكم.. بعد شتريد ابو سليم
وصاح جد كيان ابعلو صوته من الفرحه وحتى يسمع
كل الحاضرين ...
-الفاتحه. ..وقره الكل الفاتحه على نية الموافقه
والضحك والفرح صار بين الموجودين مثل ريحة الاكل الطيب الطاش بلعماره..... وام امير ترگض اطگطگ الحرمل.... كيلو حرمل... هاي ايمان ابنيته المكسورة الخاطر... اتشوف البنات كله عرست وجهالهن ترست حظنهن وهي صافنه وحاطه وجهه بلكتاب. وتشوفه ام امير وتتحصر عليه.. وتگول ابگلبه... حلوه ييمه واحله البنات كله بس حضچ اقل منهن.... الله ايجابرچ ييمه  ابگد طيبة گلبچ... وگبت ريحة الحرمل والبخور.. 
-اي والله داده ام، امير خوش اتسوين هاي الفرحه ننحسد عليه مو يوم واحد ننحسد عليه اسنين.. 
-لعد اشعدنه ابهاي الدنيه غير اوليداتنه داده ام كيان
الله ايتمم ابخير وسلامه ..
وچان الاكل اكثر من .اهواي لان البنات طبخن
وتحظرن الهاي العزيمه ال هنه دبرنه. ابيناتهن..
وصارت لمه حلوه والفرحه اكبر واتفقوا العرس ايصير
بعد اسبوع حتى اتصير عطلة الكليات وايمان مخلصه امتحان.. وتبقى سنه وحده اتگضيه ويه كيان وتتدرب بلمكتب ويه كوثر وجدو كامل ابو سليم ....
-ها كيان تره عرسنه عليك لان انت شلعت گلبنه لمن صارت خطبتك واحنه مساكين منتضرين وساكتين.. 
-يابه الحفله والمخاسير مالت عرسك وعرس سمير عليه... يله عرس واحد وخساره وحده ونفضه ونرتاح ونريح الناس مشاكلنه تعبتهم..
-قصدك مشاكلك انت استاد كيان
-عيني كرار وانت ابو المشاكل.ومرتك ام المشاكل
صدگ لا گالو الطيور على اشكالها تقع..
هههههههههه.... هههههههههه
-لا وانت الصادگ كيان.. الاسود على، اشكالها تقع..
-اشدعوه حظرة المحاميه كوثر  بله عرفنه كرار اسد
وانتي همين اسد..
-اي لعد ليش انت ما شايفني من اترافع بلمحكمه كله اتكوم ترجف مني...
-اي لان راح، اتجيبيلهم اعدام مو برائه.  ههههههه.😂😂 ههههههههه😂..
-كيان.. مو مرتك راح اتصير ابأديه بلمكتب وراح اعصره عصر مثل الليمونه... وارجعه للبيت ناشفه
-انقيم عليچ دعوه ونگسم التركه ومحامينه حجي كامل.وقضيتنه رابحه من اول جلسه.
-خويه كيان انسوي تسويه من هسه وعليمن النزاع
  ابيناتنه احنه اخوه وحبايب..
-انسحبت كوثر مشاكل ..ههههههه. هههههه.
-عمي كلشي ما انريد منكم استاد كيان مرتي افتح اله اكبر مكتب من الصبح ونخليكم حايرين بلقضايه مالت المكتب انت ومرتك...
-حجي كامل موجود ايطولنه ابعمره ايعلم مرتي مثل ما علم مرتك.. كوثر مشاكل..
-ها وتصير مرتك ايمان مشاكل وچماله ينطبق عليه گضت عمره بلمشاكل...
-انشاله هاي اخر المشاكل عمه كرار بس تعالو اشربو جاي
-اي عمه جايين... يله نشرب چاي گبل ما عمتي ام امير اتشبعنه بسط، لان اشوف وجه ما راضي ابحچينه... حتى لو بلشقه... يله...
وانتهت الگعده الحلوه.. وچان هذا احلى يوم ابحيات
ايمان وكيان... وثاني يوم كيان ابسرعه جاب النيشان
ال ايمان ولبسو الحلقات.... وصارت الخطبه صدگ واكيده... والهلاهل ترست العماره..
. وسمير لبس عبير الحلقه..
وكرار لبس كوثر.