الغوغاء ......1....
..-ليلان العطواني ....
الدنيا حلوه ومره ...حلوه للتحبه وتريده تزهاله والتكرهه يبقى منحوس متعوس متصيرله جاره....
واني من جماعة المنحوسين الي كلما اكوم اوكع وتكركح بالكاع ....كلما اتنفس الكي نفسي اوكع اكثر واكثر ..
اسمي سنيه مواليد 1965...من محافظة الديوانيه عايشه بقريه اسمها قرية سيد طالب بعيده عن المدينه اكثر او اقل من عشرين كيلو....
اهلي ناس بسطاء فقره حالهم حال اغلب سكان القريه عائلتي مو جبيره ابوي وامي واني ......اني جنت وحيدتهم ماخلفوا غيري ....
لا ولد ولا تلد ...ابوي جان يشتغل فلاح ببستان حجي رايح...
يفلح من الصبح لليل ويحصل هالقاسمه الله ....
حجي رايج جان خوش زلمه خايف الله مايقصر ويه الفلح
مداريهم وهمه هم جانوا يحبوا .....
امي مرات تروح ويه ابوي للبستان تفلح لو تلم المحصول اي شي شلب حنطه شعير سمسم كطن اي شي ...
تحب تعاون ابوي بس مرات خطيه جانت تتمرض خاصه بالشته مفاصلها تأذيها وتبقى ترجف ما تدفه ابد ...
الشاهد الله ابوي ممقصر وياها يركض بيها للطببه بس هي
ما صحت ابد .....
بيتنا جان عباره عن غرفه وحده نام بيها كل احنه وجمالي زغيره مسوينه مطبخ وقاسمينه بالنص مخلين برده من كواني جنفاص مسوينه حمام ....
وساحه جبيره .....جيرانه من الجهه اليمنى بيت ام حمزه
ناس مكروهين خص نص امهم وحده ام سحوره
ومكركشه ...جانت امي تكرهم ....ومن الصفحه اليسرى
هيكل مبني ومسكوف ومسيج امي باعت الذهبات واشترته
وبصف الهيكل بيت خالتي العوده ام حاكم مره جبيره ومن اهل الله صايمه مصليه خيره .....
عدها حاكم وحكمه وحسن وفطيمه ....ابنها حاكم مزوج وعنده اثنين جهال وبتها حكمه هم معرسه وعدها بنيه
وحسن جان بعمري وفطيمه ازغر مني بس جانت مخبله
خالتي ام حاكم ما تقبل اطلعها بالشارع تخاف عليها ....
اني جنت يوميه العصر اروح اني وحسن وبنات واولاد المنطقه نملي مي من الشريعه لليل لان ماكان اكو مي اساله
علمود نكعد الصبح نغسل ونتوضى بي ...
الصبح اروح للمدرسه اني وحسن وزعاطيط القريه كلهم
بس ماجان اكو مدرسه بقريتنا جانت بالناحيه البصفنه
واهلنا ما يخلونه نمشي مشي ....
يوميه الصبح يجي حجي صويح بالكاروبه مالته يجمعنا
كلنا والظهر هم يرجعنا ....جنت بالابتدائيه اكيف اصعد بالكاروبه ....ويه الحلال لو الخرفان لو الهويشات ...
لو مرات ياخذ نسوان القريه للولايه يتسوكن
ومن تعطل الكاروبه نسحكها مشي للناحيه بس نوصل متأخريه عن الدرس الاول بس المعلم والمدير ميحاسبونه
يكولون ميخالف دربكم بعيد .....
ومن ارجع للبيت الكي امي مسويه غده ومنتظرتني وابوي لو يصلي لو يسف الحصير من الجريد مال النخل ....
من نكمل غده اكعد اكمل دروسي افتح جنطتي جانت من جنفاص واخلي بيها هدوم المدرسه وجواريبي ...وحذاء
ماكو ابن امه وابوه الي عنده حذاء لو نعال لو نص نعال لو
النعال فرده وفرده .....
