ارواح خائفة 🔞

متابعه او ارسال طلب صداقه ولكم شكر
#ارواح_خائفه
البارت 1

تبدي أحداث قصتنا بسنه 2014  بمحافظه جنوبيه من محافظات العراق .
جانت بدايه سنه دراسيه جديده و كول الطالبات جانن متحمسات للرجوع للقسم الداخلي و طالبات المرحله الاولى جان عدهن تلهف حتى يجربون عيشه القسم الداخلي و الحياة الخاصه بعيد عن الاهل و بدايه الاسبوع الاول من الدوام بدأت الطالبات توصل ع القسم من كول المحافظات بحيث كان القسم عباره عن مجتمع عراقي مصغر يحوي كول المحافظات و كول الديانات و الطوائف . طبعا طالبات المراحل المتقدمه و الي عايشين بالقسم من قبل استقبلو طالبات المرحله الاولى و حاولن يعودنهن ع الاجواء و يفهمنهن قوانين العيشه بالقسم من شغل و تنظيف و مواعيد طبه و طلعه .
طبعا ما اكولكم ع صدمة طالبات المرحله الاولى من عرفن انو الموضوع بي تنظيف و شغل 😂😂😂😂 لانو اي وحده تجي للقسم متخيله انو حتبقى بدلال امهه متعرف انو حتنسحل سحل😏😏 بالشغل و الاعتماد ع النفس و غسل ملابس و تعديل غرفه و طبخ و نفخ بس هذا كوله ميمنع انو العيشه حلوه حتكون لانو تحسين نفسج مستقله عن اهلج و دتبنين نفسج و شخصيتج .
طبعا القسم عباره عن بنايه حيل جبيره من 4 طوابق و كول طابق بي قواطع يعني مقسم جانت عدد الغرف بي حيل جبير و كول غرفه جان بيهه 3 او 4 طالبات .
اليوم مو اني الي ححجي حنطي القلم لبطلة قصتنا هي الي تحجيلكم عن قصتهه ....
يله رفوله حبيبتي 😘أتفضلي أحجي لقرائنا عن قصتج .
شكرا سجاوي حبيبتي تسلمين 😘 هاي شلونكم طبعا اعرفكم بنفسي اني رفل عمري حاليا 22 سنه اني طالبة كلية تقنية تحليلات مرضيه حاليا مرحله رابعه . راح احجيلكم قصتي و الي ع اثرهه امرت بأزمه نفسيه قويه و اضطريت اترك الدراسه فتره بسببهه خلونا نرجع ليوره اربع سنوات لسنه 2014 اول سنه الي بالكليه كليتي طلعت مو بنفس محافظتي فأضطريت أعيش بالقسم الداخلي للمحافظه الي طلعت بيهه كليتي اول موصلت للقسم اهلي دخلو غراضي وياي للقسم و ماما ساعدتني اعدلهن بغرفتي بعد ما مسؤلة القسم دلتني ع الغرفه الي حعيش بيهه . طبعا عائلتي متكونه من ماما و بابا و اختي جنا اصغر مني بسنتين و اخويه قصي الجبير و هو مهندس نفط و متزوج و عنده ولد و بنوته علي و ملاك . الي وصلني للقسم ماما و بابا و اخويه قصي من رادو يرحون و ودعوني حيل بجيت هذي اول مره حعيش بعيده عنهم حسيت نفسي مشتاقتلهم قبل ليرحون و ويه مراحو حسيت روحي راحت وياهم اني صح دلوعه و مدلله عند ماما و بابا و اخويه قصي عمري مطلبت شي و مسوو الي بس بنفس الوقت جنت قويه عندي قدره اعتمد ع نفسي و اذا احد احتاج مساعدتي مهما كانت حقدمهه اله بدون تردد طبعا اكتشفت كول هالقوه من خلال عيشتي بالقسم . من رجعت لغرفتي لكيت البنات الي وياي بالغرفه جايات هن جانن واصلات قبلي بيوم بس من اجيت و عدلت غراضي بالغرفه هن جانن بالكليه و من رجعت لكيتهن راجعات من دخلت سلمت عليهن .
رفل : مرحبا .
ريم : مراحب يا هلا حبيبتي
بان : هلو بيج حبيبتي .
طبعا ريم جانت قسم هندسه و بان قسم انكليزي و هن صديقات و من نفس المحافظه يعني وحده تعرف اللاخ من قبل ليجون للكليه .
رفل : اني اسمي رفل و المسؤله كالت انو حصير وياكم بالغرفه .
ريم : هلو بيج حبيبتي اتشرفنا بمعرفتج اني ريم و هذي بان .
رفل : الي الشرف تسلمين اهلا بيكم .
ريم : شنو قسمج انتي .
رفل : تقنية طبيه تحليلات مرضيه .
ريم : حلو اني هندسه و بان انكليزي طبعا احنا مرحله اولى و انتي همات مبين عليج اولى مثلنه .
رفل : بلي أولى .
بان : اهلا بيج حبيبتي يله بدلي و ارتاحي حتى نسوي غدا و نتغده انتي اكيد تعبانه من السفر .
ريم : يله حبي بدلي و اذا تردين اخذي شاور قبل الغده .
راحو ريم و بان يسوون الغده و اني أخذت ملابسي و رحت للحمامات حتى اخذ شور بالبدايه مجنت اندل بس طلعت من الغرفه و كلت أسأل البنات و يدلوني و طلعت و اني امشي لكيت بنات واكفات بالممر و ديسولفن سألتهن ع مكان الحمامات و دلني دخلت الحمامات جانن كبار حيل و من تحجي بيهن يصير صدا لصوتك و جان اكو بيهن مرايات كبار حيل ع طول الجسم و باماكن مختلفه من الحمامات فتحت واحد من الحمامات و دخلت و خليت ملابسي و سحبت و اني دا اسبح سمعت صوت بس مكدرت اميزه بسبب صوت المي بالبدايه مهتميت كلت خاف وحده دخلت و دتحجي و هذا صوتهه كملت سبح عادي رجع الصوت اتكرر بس المشكله انو الصوت جان غريب للحظه شكيت انو صوت صراخ مو صوت احد يحجي سديت الدوش و حاولت اسمع الصوت بس مجان اكو شي غير الهدوء مجان اكو اي صوت صحت
رفل : مرحبا اكو احد هنا .
محد رد مجان اكو جواب رجعت صحت
رفل : الو دا احجي وياج اكو احد هنا .
همات ماكو جواب فكرت انو اني مشتبهه فتحت الدوش و كملت سبح خلصت و لبست ملابسي و طلعت من طلعت باوعت بالحمامات افتريت بيهم عسى انو الكه مصدر الصوت بس ملكيت احد الحمامات جانت فارغه اخذت بعضي و طلعت رحت للغرفه لكيت البنات محضرات الغده مشطت و كعدت تغديت و من خلصنه ردت اساعدهم بغسل المواعين مخلوني
بان : رفوله حبيبتي انتي واصله من سفر اكيد تعبانه ملج علاقه بالمواعين روحي نامي و ارتاحي اني اغسلهم .
رفل : زين بس ع العشا احسبن حسابجن اني الي حسوي ماما مسويه فطائر حيل طيبه اطلعهه و نتعشى بيهه و هذا المايكرويف جبته حتى نحمي بي الاكل و منستخدم الطباخ الا اذا ردنه نطبخ بس اذا نحمي نستخدم النايكرويف اسرع .
بان : اوك حبي و عاشت ايدج المايكرويف حيسهل علينه و يختصرلنه الوقت .
كمت رحت لفراشي و تمددت بي طبعا الجو جان بداية شتاء و الجو بعده مبارد حيل ضليت بفراشي اتكلب ممتعوده اغير سريري و انام بغير مكان ضليت افكر باهلي و اتذكرت انو اني متصلت بيهم حتى اشوف اذا وصلو او لا و اتذكرت همات انو اني حتى فوني ما اعرف بي وين لانو التهيت ارتب اشيائي و نسيت كولشي من التعب فتحت جنطتي و دورت لكيت الفون و لكيت كذا مكالمه من بابا و ماما و من قصي اتصلت رأسا بماما
رفل : هلو ماما شلونج .
الام : لج ماما ضل بالي عليج هاي انتي وين اني و ابوج و اخوج نتصل و انتي ماكو .
رفل : اسفه ماما والله اعرف قلقتكم بس والله مسمعت
،،،،،،،،،،،،،،،،،،،،،،،،،يتبع،،،،،،،،،،،،،،،،،،،،،،،،،،،،،،