ارواح خائفة 🔞

بارت 2 👉👇👇👇

رحت ويه بان للصاله بس بداخلي جنت خايفه من انو اتعرف ع بنات جدد خايفه لانو ما اعرفهن ولا اعرف طبعها و اخلاقهن بيوم و ليله انجمعنه بمكان واحد و انفرض علينه نتعامل ويه بعض . طبعا اول مدخلت الانظار صارت كولهه عليه حسيت نفسي مدا اعرف امشي بعد توترت جانت الصاله مليانه بنات و شفت بنات كبار مبينات مراحل متقدمه مو اولى اتقربت لبان و كلتلهه
رفل : اكولج بان لويش هيج كولهن ديباوعن عليه 😕😕 .
بان : اي غير حلوه و يباوعن عليج يا عيني .
رفل : ههههههههههه  هم صدك .
اتعرفت ع بنات مرحله اولى و بنات مرحله ثانيه و ثالثه و من اقسام مختلفه صيدله و طب و تحليلات و هندسه و انكليزي و اداره حسيت البنات حبوني و مجان دمي ثكيل عليهن رجعنه بعدين للغرفه اتعشينه بالفطائر و كعدت بان و ريم يدرسن محاضراتهن و من خلصن كعدنه نحضر ملابسنا لباجر كوينه و كملنه و بعدين اقترحت ريم انو نطلع نسهر شويه ويه البنات بالصاله اليوم اكو فلم حلو حينعرض و حيسهرن عليه
رفل : اني نمت هوايه اعتقد محتاجه اسهر لانو ما اعتقد حيجيني نوم اليوم .
بان : اوك لعد خلي نطلع يم البنات .
رفل : لحظه جايبه مكسرات خلي اخذهم نتسلى بيهم .
ريم : و اني جايبه جبس همات ناخذه نتسلى بي .
بان : و اني جايبه بطني تتسلى بالمكسرات و الجبس 😂😂 .
طلعنا رحنا بالصاله و الفلم لكينا مبلش كعدنه و بدينا نتابع ويه البنات طبعا جانن مضلمات الصاله و عايشات الاجواء . حسيت محتاجه اروح للحمامات كمت و سألتني بان
بان : وين ؟؟
رفل : للحمامات .
بان : اوك لتتأخرين تفوتج الاحداث .
رفل : اوك .
كمت و طلعت من الصاله و طلعت للممر طبعا جانت تقريبا الساعه ب2 الفجر و اني و امشي بالممر حسيت اكو شي غريب كأنو احد ديمشي وياي بحيث صوت خطوتي اسمعهه تتكرر و من اوكف يروح الصوت كلت يمكن هذا صدى لا اكثر كملت طريقي طبعا الحمامات صايره بنهاية الممر بحيث تصير لوفه بالممر و بعدين يجي باب الحمامات دخلت للحمام و اني امشي حسيت اكو شي خطفني من وره انداريت بسع باوعت ماكو شي كلت يمكن هذا شعري اتحرك و يتهيألي جبتشعري خليته ع جتفي صفح دخلت للحمام دا اقضي حاجتي و سمعت صوت غريب الصوت كان بعيد حيل بس كان مجرد سماعه كافي انو يدخل ع جسمي رعشة خوف مو طبيعيه طلعت بسع و اني اصيح
رفل : منو هنا ؟؟ اذا عبالج بحركاتج هذي دتخففين دم فانتي غلطانه الموضوع صار ماصخ .
محد رد و لا جان اكو جواب
خفت حيل و طلعت ركض و ملتفتت ابد ورايه .
من وصلت للصاله كعدت يم بان و جسمي كوله جان يرجف و اتنفس بصعوبه
بان : رفل شبيج ؟؟ شكو لويش دترجفين ؟؟
رفل : ها لا ماكو شي بس اجيت ركض حتى الحك ع الفلم .
بان : بس جسمج دا يرجف .
رفل : اي هيج لج من البروده الشتاء دخل و اني بعدني بالبرموده .
مردت احجي شي حتى لا ابين خبله للكل جنت متوقعه انو كول الي ديصير وياي تهيأت و توتر بسبب بعدي عن الاهلي و جيتي لمكان غريب و جبير حيل فمحجيت و بقيت ساكته .
بالليل حاولت انام مكدرت ضليت كاعده بفراشي و اتكلب و الصوت ابد مراح من اذني و الخوف ياكل بجسمي فتحت فوني و خليت الهيدفون باذني و طلعت قرآن سورة يوسف حيل احبهه و من اسمعهه حيل ارتاح غفيت ع صوت القرآن و مكعدت الا ع صوت ريم و هي تكعدني .
بدلت و كملت و كشخت و تعطرت و اخذت صدريتي البيضه مال المختبر و سجلي و طلعت ويه ريم و بان للكليه . من وصلنه دلني ع كليتي و هن كول وحده راحت لكليتهه . دخلت للكليه و اني مرتبكه احس الكل يباوعلي ما اعرف قاعتي وين ولا وين اروح توجهت لوحة الاعلانات اخذت جدولي و سألت ع قاعتي و رحت كعدت بيهه منتظره المحاضره و اني كاعده اجتي بنيه سلمت عليه و كعدت يمي من قسمي وياي بنفس القاعه بس هي من اهل هالمحافظه اسمهه وداد حبابه حيل و ساعدتني حتى اعوض المحاضرات الي فاتتني و نطتني محاضراتهه نسختهم . خلصت محاضرات و اتصلت ع ريم كالت اني خلصت بس بان بعدهه كلتلهه لعد حروح قبلكم احضر الغده لبين متجون . طبعا غرفتي بالقسم بالطابق الثالث ؛ من وصلت للقسم صعدت و بالطابق الثاني لكيت بنات جديدات جايات و جنطهم بره و مبين عليهن حيل مخنوكات من الجيه و محابات يبقن و وحده منهن تريد تبجي بس من باوعت زين عرفت البنات من نفس محافظتي و جانن ويايه بالمدرسه نفسهه بس بغير شعبه فعلاقتي بيهن جانت مجرد سلام بس هن جانن مثل الخوات صداقتهن حيل قويه مجنت اعرف حتى اسمائهن بس من تكون بمكان غريب و تحس نفسك لوحدك تصير تجلب باي احد من نفس محافظتك او من نفس بلدك لانو الغربه حيل صعبه و من فتره للثانيه محتاج احد تحجي وياه عن ذكرياتك بمنطقتك و بمحافظتك و محد يكدر يشاركك هالذكريات غير ابن محافظتك او ابن بلدك اذا جنت بغربه
اقتربت منهن و سلمت عليهن
رفل : مرحبا بنات شلونكم .
مريم : هلو بيج حبيبتي .
زهراء : اهلا بيج حبي .
مريم : انت مو رفل ؟؟
رفل : بلي رفل همزين طلعتي تعرفين اسمي عذريني اعرف انو انتن من نفس مدرستي بس مصارت الفرصه و اتعرفنا من قبل .
زهراء : اي بس احنه نعرفج جنتي فد شي مشهور بالمدرسه الكل جان يحجي بجمالج حتى المدرسات .
رفل : هههههه حبيبتي انتي شفتكم واكفين و شفتج حيل مخنوكه كلت اجي اسلم عليكم و اشوف خاف محتاجين شي .
مريم : حبيبتي تسلمين متقصرين ؛ بس حيل مطايقين القسم حاولنا ننقل بكول طريقه بس كالو ميصير الا تكملون المرحله الاولى هنا .
رفل : صحيح اني مثلكم همات ردت انقل و نفس الحجي كالو الي .
مريم : العفو حبيبتي معرفتج بنفسي اسمي مريم و هذي زهراء .
رفل : اهلا و سهلا بيجن حبيباتي فرصه جدا سعيده اني غرفتي بالطابق الثالث رقمهه 113 اي شي تحتاجو اني موجوده .
زهراء : تسلمين حبيبتي متقصرين .
رفل : تدرن شنو راح اصعد ابدل و احضر الغده و انتو رتبو غراضكم بالغرفه و من يخلص الغده انزل اصيحكم تتغدون ويانه و بالمره اعرفجن ع صديقاتي بالغرفه حيل حبابات .
مريم : لا حبيبتي منريد انتعبج احنه ندبر نفسنه نسوي اي شي و نتغده .
رفل : لج عيب شهالحجي انتو بنات ولايتي يله خلصو و اني حصعد احضر الغده .
صعدت غيرت ملابسي و طلعت الغده و حميته و سويت سلطه و حضرت المواعين اجوي بان و ريم و كلتلهم انو اني عازمه صديقاتي ع الغده و البنات معارضن ابد و رحبن بالفكره . حضرت السفره و صبيت و نزلت صحت مريم و زهراء و ع الغده من خلال الحديث عرفت انو هن مقبولات قسم صيدله كعدنه سولفنه هواي و وره الغده نزلن لغرفتهن و اني نمت لانو حيل تعبانه البارحه منمت عدل و بان همات نامت بس ريم جانت عدهه علاقه بشخص من محافظتهه فكعدت تحجي وياه بالفون . كعدت من النوم و رحت للحمامات حتى اغسل لكيت هناك بنات ديغسلون ملابس و جان الحمام هوسه و بي حركه و هالشي ريحني غسلت و طلعت رجعت للغرفه طلعت محاضراتي و كعدت ادرس و احاول اعوض الي فاتني من حسيت نفسي تعبت تركت المحاضرات و اتصلت ع اهلي حجيت وياهم و اتطمنت عليهم و طمنتهم عني و بالليل بوقت العشى اندك باب غرفتنا دخلت مريم و زهراء و بيدهم بيتزا و كنتاكي
زهراء : عمو جابلنا عشا من برا يله تعالو ناكل مدام حار .
رفل : يممممي قلبي الصغير لا يحتمل الريحه ذبحتني 😵😵 .
بان : اذا انتي قلبج الصغير لا يحتمل فاني قلبي الفطير انسمط ابو ابو 😭😭 .
تعشينا و كملنا و اتفقت ويه مريم و زهراء ينتظرني باجر نطلع سويه للكليه و اخذت ارقامهن . طلبت مني زهراء انزل وياهن للغرفه اساعدهن بذوقي علمود يحضرن ملابس باجر نزلت و ساعدتهن و تعرفت ع البنتين الي وياهن بالغرفه و سولفنه و اخذنه الوقت سلمت عليهن و صعدت لغرفتي حرضت ملابسي و كويتهم باوعت ع الساعه جانت 11:30 بالليل دخلت لفراشي و نمت .
بالليل اسمع صوت صياح و صريخ حسيت كانو بحلم اني و بلحظه حسيت باب غرفتي تفلش بالدك و احد وره الباب يصرخ باسمي رفل رفل رفل لحكيلنه . كمت بسع فتحت الباب الغرفه جانت ظلمه و من فتحت الباب ضوه الممر صار بعيني فغمضت عيني بس عرفت انو الي بالباب مريم جانت حالتهه ترعب لونهه مخطوف و دموعهه تصب
مريم : رفل لحكيلنا زهراء مدري شبيهه رفل فدوه لعينج .
رفل : شبيهه زهراء مريم شكو .
منتظرتهه تجاوب طلعت من الغرفه اركض و بدون ما البس شي برجلي طلعت حافيه اركض لكيت زهراء واكعه بنص الدرج و تريد تتنفس متكدر و وجهه صاير اززززرك و تفتح بحلكهه كانو تريد تحجي شي بس متكدر ركضت عليهه و شلتهه صعدتهه الدرج و خليتهه بالكاع . طبعا بان و ريم ومريم اجن ورايه يركضن و القسم كوله كعد ع صوتنا . خليت زهراء بحظني و احاول اهديهه صرخت بمريم جيبيلي قرآني جوه راسي و جيبولي مي بسرعه بسررررعه . جابت مريم القرآن فتحته بوجهه و طبكته حيل 3 مرات اخذت المي و شربتهه بس مفاد زاد صراخهه و هي مخليه ايدهه ع كبتهه كانو احد ديخنكهه حسيتهه مجاي تكدر تتنفس و صارت حيل زركه صرخت بيهن وين المشرفه
مريم : دكيت الباب عليهه كومه و محد طلع .
زهراء جانت لابسه تراك و اني تراك مجان بيهه مجال نغير ملابسنا لانو جانت تختنك بايدي صرخت بمريم جيبي كوت و شال لزهراء و صرخت بريم جيبي كوتي و شال بسسسرعه . شلت زهراء بين اديه و نزلتهه و البنات شايلاتهه ويايه من وصلنه للطابق الارضي اخذت الكوت و لبست زهراء و مريم لفت الشال ع شعرهه و اني لبست كوتي و لفيت الشال و اخذت النعال الي برجل مريم لانو جنت حافيه ملابسه شي و بان لبست لزهراء نعالهه كلتلهن كمشنهه لحظه ركظت ع باب القسم الرئيسي فلشته بالدك .

،،،،،،،،،،،،،،،،،،،،،،،،،يتبع،،،،،،،،،،،،،،،،،،،،،،،،،،