ارواح خائفة 🔞

أرواح خائفه 🔞

👇👇👇👇👇

بارت 7

من كد مجنت مرعوبه من الي صار حسيت كلبي يرجف اكثر من جسمي و الضجه الي صارت بالقسم جانت كولش جبيره و بدأ الخوف يزيد عند البنات حسيت انو عمري مراح اطلع من هالمكان و انو نهايتي حتكون بي باوعت للمسؤله و هي تسأل بريم و بان
المسؤله : أكو احد غيرجن دخل الغرفه او حسيتن و انتن نايمات انو احد دخل لغرفتجن .
باوعتلهه و عرفت شنو تقصد و عرفت بشنو تريد تسد الموضوع عصبت حيل و حسيتهه تستهزء بينه و بأرواحنا و بعقولنا
رفل : محد دخل لا احنه كاعدين و لا احنه نايمين و اصلن ريم جانت طول الوقت كاعده منامت يعني هذا مو مقلب من بنيه من بنات القسم مثل ما حضرتج دتلمحين هذا شي شيطاني شي محد يكدر يسوي هذا دم تعرفين شنو دم منو بينه عدهه هيج الجرأه انو تتشاقه ويايه بالدم و بعدين فالنفرض هيج منين جابت الدم ..خلص كافي كافي تشوشون ع الموضوع انتي و اني و الكول هنا يعرف شنو ديصير .
وكعت بالكاع و انهاريت بالبجي و اجتي ريم و امال كعدو يمي بالكاع و اني ابجي حسيت المسؤله عجزت انو ترد عليه و بقت ساكته ، شوي و اشوف المره الجبيره ام عمار اقتربت ع المسؤله و حاجتهه بهمس و كالتلهه
ام عمار : الاشارت دتتكرر لازم نسوي شي السكوت مو حل ست .
من سمعت ام عمار تحجي هيج فتحت عيوني حيل و زاد الخوف بكلبي بس قبل ما اكدر احجي سبقتني المسؤله و ردت عليهه و عاطت بيهه
المسؤله : انتي يا عجوز يا مخرفه اني شكم مره كتلج لتحشرين انفج بشغلات متخصج بعدين انتي شنو دخلج هنا يله رجعي ع شغلج تره ارفع بيج تقرير اخلي العماده تفصلج و اكطع رزقج يله .
خافت ام عمار من تهديد المسؤله و محجت كلمه زياده و خذت بعضهه و
طلعت من الغرفهكمت من الكاع و وكفت كبال المسؤله و صيحت بوجهه و اني ابجي و كلتلهه
رفل : شنو تقصد ام عمار شنو قصدهه الاشارات دتتكرر معناهه اكو شي بعد غير كول هالبلاوي الي شفناهه و انتي ضامه علينه شنو انتي احد دافعلج حتى تسوين بينه هيج ، اها اتذكرت العماده دتدفعلج حتى تخلينه محبوسات هنا احنه و هالشياطين و الاشباح .
حسيتهه تنرفزت حيل بس بقت مسيطره ع اعصابهه شخصيتهه جانت عجيبه عدهه قدرت تحمل مو طبيعيه يمكن لذلك اختاروهه و جابوهه للقسم لانو تكدر تتحمل كول هالبلاوي و عيونهه جانن غريبات حيل من اباوع بيهن جنت احس بخوف جنت احس عدهه قوه غريبه بعيونهه
السؤله : رفل مراح احاسبج ع كلامج هذا تقديرن للموقف الي انتي بي بس بعد خلص انسي هالخزعبلات و التهيئات القسم مبي شي و كولنه عايشين بي صار سنين اتأقلمي و لتضيعين مستقبلج بسبب التهيئات و القال و القيل .
و باوعت ع طالبات المرحله المتقدمه الي جانن واكفات و كالت
المسؤله : و انتو حسابكم ويايه بعدين .
اخذت بعضهه و طلعت و أمرت الطالبات كولوحده تروح لغرفتهه ، و اني خذني بان و مريم للحمامات غسلت ايديه و سبحت و من رجعت للغرفه جان السجل ع فراشي طبكته مريم و شالته و ذبته بالزبل مال الغرفه . صحت بيهه و كلتلهه
رفل : مريم لا .
مريم : هاي شبيج رفل شنو كول عقلج تبقين هالسجل عندج .
رفل : مدام اهلنا مديصدكونه راح نبقه هنا لازم نسوي شي و نحصل ع دليل يثبت الي احنه بيه و بهالطريقه اهلنا حيصدكونه و ينسد هالقسم الجحيمي .
بان : و برأيج هالسجل هو الي حيخلي اهلنه يصدكونه حيسوون مثل المشرفه و يكولون مقلب من البنات .
رفل : و انتي منو كلج السجل هو الدليل ؟
بان : شنو قصدج رفل !!؟
رفل : السجل بداية الخيط الي حيوصلنه للدليل .
ضلن ريم و مريم و بان وحده تباوع ع اللاخ و بوجهن الف سؤال و ديحاولن يصدكن الي سمعنه مني
ريم : رفل شنو قصدج ليكون تردين اتدخلين نفسج بهالسالفه ؟؟
رفل : اني بيهه اصلا و مو بس اني كولنه بيهه .
ريم : بس رفل انتي و احنه مو كد هالشي الي تردينه نواجهه هذا مو بشر و تعرفين و تتوقعين تصرفاته هذا جن رفل تعرفين شنو جن ؟؟!!
رفل : و منو كلج حنتعامل ويه الجن !!
ريم : شنو قصدج لعد ويه منو حتتعاملين ؟؟!!
رفل : ويه رهف .
صارن وحده تباوع للاخ و ردت عليه مريم
مريم : رفل انتي اكيد تخبلتي شلون تتعاملين ويه رهف و هي ميته .
رفل : اني متاكده انو الي سوه هيج بسجلي مو الجن لانو الجن اقوه من البشر و مستحيل يطلب مساعدته بالعكس احنه البشر الي نلجئ للجن و نطلب منه يساعدنا مثل ميسوون السحره و المشعوذين و يسخرون جن لخدمتهم ، لذلك اني متاكده انو الي يريد المساعده هي رهف و روحه الي محبوسه هنا اكيد هي الي تحتاج نساعدهه .
مريم : رفل انتي اكيد تخبلتي لو صار لعقلج شي انتي دتسمعين نفسج شلون تحجين لج رفل هذي ارواح و جن و بلاوي حمره احنه مو كدهه
رفل : هذي البلاوي الحمره الي تحجين عنهه اذا مرحنالهه هي حتجينه برجليهه .
وكفنه بالغرفع وحده تباوع لوجه اللاخ و كول وحده تريد تستوعب الي ديصير حتى اني كنت احاول استوعب الي كلته جنت افكر انو معقوله عندي قوه حتى اواجه جن و ارواح زين منين ابدي و شلون ؟؟ ضليت افكر و افكر لحد متعبت و نمت كعدنا ثاني يوم جان يوم خميس رحت للكليه كملت محاضراتي و رجعت و اهلي قررت ما اتصل بيهم بعد و من يتصلون ما ارد لانو مصدكوني و بقوني هنا عبالهم اتدلع و اكذب عليهم حتى ارجع للبيت ، الضهر طلعت بره الغرفه و افتريت بالقسم و اني افكر من وين ابلش و شلون ابلش و اني امشي جوه بالحديقه الداخليه مال القسم شفت ام عمار دتنظف بالحديقه كلت اكيد هي تعرف شي و لازم اعرفه شنو اتقربت منهه و سلمت عليهه
رفل : خاله ام عمار شلونج .
ام عمار : هلا بيج خلاه مية هلا بالحلوه .
ابتسمتلهه و رديت
رفل : فدوه لكلبج خاله ، طاك كلبي ع امي و شفتج من بعيد كلت اجي اسولف شوي وياج .
ام عمار : فدوه لعيونج خاله سوده عليه ادري الغربه صعبه و فراك الام مو هين عليجن الله يعينجن خاله .
رفل : خاله ابنج عمار شيشتغل .
جنت احاول افتح وياهه مواضيع حتى تأمن بيه و تحجي ويايه و اجرجر منهه الحجي
ام عمار : يمه عمار جاي يدرس مثلجن طالب بالكليه يدرس يمه محاسبه .
استغربت من ردهه جنت متوقعه تكولي عامل او حارس مجنت متوقعه هيج واصل
رفل : الله يحمي الج ما شاء الله واصل مبين تعبانه عليه خاله .
ام عمار : اي خاله اني جهالي كولهم تعبت عليهم و وصلتهم بناتي ثنينهن معلمات و متزوجات و ولدي عمار بالكليه يدرس محاسبه و احمد الكعده مالتي السنه دخل للسادس العلمي .
رفل : فدوه خاله يعني لازم اكوم اخذلج تحيه انتي مثال للام المثاليه ، الله يحفظهم الج و يرزقج ع عينهم كول خير .
ام عمار : فدوه لعيونج يمه الله يحرسج و يحميج لشبابج و يحميج من كول شر .
عرفت هذا الوقت المناسب حتى أسألهه
رفل : خاله انتي صارلج شكد بالقسم .
ام عمار : اهوووو يمه صارلي اول ما انفتح القسم هنا .
رفل : يعني خاله معناهه انتي تعرفين بكول الشغلات الي صارت بالقسم و منهن سالفة رهف قبل 3 سنوات .
حسيت ام عمار ارتبكت و خافت متريد تحجي شي خفت لتنهزم مني حاولت اطمنهه حتى تحجيلي
رفل : خاله اني مثل بنتج و اوعدج الحديث الي حيدور بينه محد حيعرف بي غير الله و اني و انتي ارجوج احجيلي لازم اعرف ويه شنو دا اتعامل حتى اخذ حذري منه .
حسيت المره ترددت و ارتبكت بس بعدين أمنت و بقت تحجيلي
أم عمار : بس يمه اذا احد عرف اني حاجيتلج شي رزقي راح ينكطع .
رفل : لج خاله وعيون امي محد راح يعرف .
ام عمار : خاله رهف جانت حليوه مثلج الله يرحمهه و جانت مدلعه و مغروره بجمالهه حيل و يا يمه مو بس بنادم نفسه دنيا الجمال كول النفوس تدنا عليه .
باوعتلهه و سألتهه
رفل : الجن قصدج خاله مو ؟
ام عمار : يمه الله انطه لكل مخلوق من مخلوقاته شهوه حتى الجن و رهف بحلاتهه محد ميكدر ميحبهه .
رفل : خاله فدوه لعينج سولفيلي شنو الي ديصير هنا احنه شدنواجه خاله احنه بنات عالم و اهلنه تعبو علينه حتى وصلنا حرام تضيع اعمارنا و مستقبلنا بسبب غباء و انانية العماده خاله فدوه لعمرج احجيلي .
ام عمار : يمه السالفه بدت اول ما رادو يبنون هالقسم قبل 10 سنوات لان قسمجن انبنه بسنة 2004 هذي الارض الي بانين عليهه القسم جانت لواحد من أزلام النظام الفاسق الله يلعنه هذا الرجال جان فاسق و منحل و جان يهوى البنات جان مسوي ع هالارض قصر حيييل جبير يجيب بي البنات الي يهواهن كلبه و يكولون بيوم شافله بنيه مثل الغزال رادهه بس جانت بنت عالم و ناس و ما قبلت بكل فلوسه و اغرائاته و لان هو ما متعود ع الرفض و ماكو وحده رادهه مصارت طوعة ايده انهضم و اتخبل من استعصت عليه هالبنيه مثل مجان يوصفوهه الناس جانت جميله حيل يا يمه جمالهه يسحر كل زلمه يمر من يمهه و هذا الرجال كتل روحه عليهه بس ما قبلت ترضخله و من مل من الحسنى قرر ياخذهه غصب وده أزلامه عليهه و دخلو لبيت اهلهه جروهه جر و جابوهه لحضنه بهالقصر هذا الي جان مبني هنا قبل محد يندك بأزلام صدام يخاله و الكل تخاف منه سكتو اهلهه لانو هددوهم اذا حجو يقتلونهم اخذهه للبنيه و بالقصر اخذ منهه شرفهه و شرف اهلهه سلبهه أغلى شي تملكه كول بنيه و تالي شمرهه بالشارع و هو يضحك و يلعب و فرحان بالنصر الي حققه رجعت البنيه لاهلهه مكسوره جان عبالهه من يشوفوهه راجعه يفرحون و يداوون جرحه بس صار الي مجانت محسبتله حساب اهلهه طردوهه لانو صارت عار بالنسبه الهم شمروهه بالشارع و ما عرفت وين تروح و وين تنطي وجهه ، قررت تنتقم من النذل و الي سواه بيهه و من اهلهه الي شمروهه و هم يعرفون مالهه يكولون صلت تدور اشهر لحد ما لكت ساحر و راحت عليه و طلبت منه يساعدهه تنتقم وافق يساعدهه بشرط تنطي نفسهه بالاول و لان هي مجانت تملك غير هالثمن اتدفعه وافقت و وره مخلص كلهه راح ازوجج لجن و هذا الجن هو الي ياخذ حقج و ينتقملج سألته شلون ينتقملهه كلهه انو من راح تصيرين زوجته اي واحد يأذيج راح يأذي هو الج و راح يحميج من الكول بس من تخوني و تحبين غيره و تنطين نفسج لغيره راح يموتج و يموته قبلت البنيه و زوجهه للجن بطقوس حيل مخيفه و اول شي سوته راحت لاهلهه و دكت الباب و اول مشافهه ابوهه و اخوهه طلعو و شبعوهه كتل و كلولهه احنه مو كلنالج رجعه ع هالبيت ما الج تردين تخزينه بعارج و من ضربوهه زوجهه الجن ثار و الجن اذا جانت الادميه
الي متزوجهه حلوه يحرك الدنيا علمودهه و الجن الي زوجه الساحر هالبنيه يكون عشكهه و عشك جمالهه و من عشكه الهه حرك بيت اهلهه و هم بيه لانو ضربوهه و من خلصت من انتقامهه من اهلهه اجت لهنا لقصر هالطاغيه و دخلت عليه و وهمته انو هي جايته برضاتهه و تريد تنام وياه و هو ما جان مصدك الخسيس و من اقترب عليهه حتى ياخذهه احترك بمكانه حرك و البنيه قتلهه و شوه جسمهه تشويه و من ذاك اليوم الجن بقى بهالمكان يبجي ع روح هالبنيه لانو عشكهه و مقبل يعوف المكان الي بي روحهه .
بقيت مصدومه و اني اسمع حجيهه و احس جسمي من فوك ليجوه يرجف و يصب عرك باوعت عليهه و الذهول بعيني و سألتهه
رفل : زين و رهف ؟

👇👇👇يتبع 👇👇👇