ارواح خائفة 🔞

بارت 5.   👉👇👇👇👇

نزلنا للطابق الثاني ركض و قسم من البنات خافن و بقن فوك منزلن ، نزلنا نركض و اول موصلنا للممر شفنا بنات الطابق كولهن طلعن من غرفهن ع الصرخه مثلنه و كولهه تسأل شكو و شكو ثواني و سمعنا صوت الصرخه جاي من المطبخ ركضنا ع المطبخ حتى نشوف الي صار و قبل منوصل طلعت بنيه من المطبخ تركض طبعا جانت مرحله أولى أسمهه زهره طلعت زهره تركض و هي مرعوبه و انصدمت بينه و وكعت بالكاع و صارت تبجي بخوف كمشته منى و باوعتلهه و سألتهه
منى : شبيج حبيبتي شكو شفتي شي احد سوالج شي انت بخير .
جانت منى مرعوبه حيل كأنو شافت شبح كدامهه مجانت تكدر تحجي بس تبجي و تصرخ باوعنا لبعض و اتقدمت اني اول وحده و ركضت للمطبخ حتى اشوف شكو طبعا المطبخ جان عباره عن غرفه حيل جبيره بيهه شباكين بصف بعض يطلون ع الحديقه الخارجيه للقسم و جانت الشبابيك كبار بحيث يكدر انسان انو يفوت منهن ، اول مدخلت المطبخ اقشعر بدني من الي شفته جان واحد من شبابيك المطبخ مفتوح و الجامه مالته جانت غركانه بالدم و الطباخ و الكدوره العليه جانت غركانه دم و بالكاع جان مصدر الدم جانت قط جبير لونه اسود الي انسمي بلهجتنا ( عتوي ) بس جان جسمه مقطع لاجزاء و مشمور بالكاع اشمأزيت من المنظر و دفعت البنات و طلعت اركض وكفت بنص الممر و صرت اصرخ و ابجي و بهالوقت نزلت المسؤله من فوك باوعتلهه و صحت
رفل : كافي لهنا و بس هذي المهزله ملازم تستمر اكثر احنه مو لعبه بيدكم حتى تخلونه هنا تحت رحمة المجهول .
أجتي زينب و جمانه كمشوني من ايديه و حاولو يسكتوني
المسؤله : شكو شصاير هنا شنو هالتجمع و الصياح شبيهن زميلاتجن .
رديت عليهه بحده و عصبيه
رفل : لويش حضرتج وين جنت اول مصار كول هالصراخ هسه اتذكرتي تجين و وين جنت البارحه من زهراء اجتي تموت دائما مواعيدج متأخره
المسؤله : اولا جنت بالطابق الرابع و مسمعت اي صياح ثانيا البارحه صار عند ضرف و طلعت ثالثا و الاهم شلون تسمحين لنفسج تحاسبيني و تعلين صوتج راح تعاقبين بشده ع هالشي تعرفين لو لا .
جمانه : العفو ست ارجوج لتهتمين لحجيهه بس هي خايفه من الي شافه و غمزتلهه ع المطبخ . فهمت المسؤله غمزت جمانه و عرفت انو شي جديد صاير اول مدخلت المطبخ طلعت مشمأزه بس محاولت تبين كدامنا و نزلت صاحت واحد من الحرس يشيل القط و يطلعه بره و لانو الطالبات مستحيل يمسحن الدم من المطبخ قررت تنتظر لباجر حتى المنظفات ينظفن المطبخ و طلبت من الكل ترجع لغرفهه ، اول مصعدنه وكفت كدام جمانه و امال و كلتلهن ممكن افهم اهلجن شلون قابلين تبقن هنا و شلون الشرطه سكتت عن موضوع جريمه بهالمكان و شنو موقف اهلكم من عرفو بالي صار برهف ، ضلن وحده تباوع للاخ و ردت عليه جمانه
جمانه : رفل الشرطه من اجت و شافت رهف و شافت غرفتهه و الحاله الي جانت بيهه رهف طلبت منهم العماده انو يأيدون الحادثه ع انو هي حالة انتحار و طلبت منهم انو مينطون اي تفاصيل عن وضع جثة رهف و الي صاير بيهه و الشرطه استجابت لهذا الشي لانو برأيهم و برأي العماده تجنب للمشاكل و الاقاويل و اهل رهف مخلو شي مسووه حتى يسدون القسم و افترو ع اهالينا واحد واحد اتخيلي اجوي لكول بيت من بيوتنه و لكل محافظه في سبيل اهلنه ي.كفون وياهم و فعلا اهلنه وكفو وياهم بس بعدين العماده فهمت اهلنه انو اهل رهف يدعون و انو رهف جانت تحب طالب وياهه و تركهه و انتحرت علموده و بهالكلام اهلنه تراجعو و نسو الموضوع بالرغم من كولشي سويناه حتى نقنعهم كول تفكيرهم انو انريد نسد القسم تعاطف مع صديقتنا الي انتحرت في سبيل الحب هه ميعرفون انو الشي الوحيد الي يفتقده هالقسم هو الحب .
باوعت لجمانه و جنت منذهله معقوله اكو هيج شي
رفل : زين جاوبيني شنو الفرق بين رهف و الجن و شمعنا هي الي صار بيهه هيج ؟؟
باوعت جمانه للبنات رادت ترد بس سبقتهه منى
منى : منى روح يعني اكو طرق ممكن نحرر روحهه من هالمكان هي روحهه باقيه هنا حتى تعذبنا بس هالطرق مو اي احد يكدر يسويهه روح منا انسحبت بواسطة جن يعني صعب جدا تطلع منا مو مثل الارواح الي تنقتل بمكان بواسطة انسان عادي الي اخذ روح رهف هو جن ، اما الجن فمستحيل يطلع منا مهما حاولنا لانو الجن من يترك عالمه و يقرر يدخل عالمنا و يختار  المكان مراح يغيره ابد ، اما سبب اختيار الجن لرهف لانو هو يعتقد انو هي غوته و بهالشي صارت ملكه و من حقة
رفل : شنووو غوته شنو يعني اكو بشر يغوي جن ؟!!
منى : رهف جانت حلوه و جانت تحب تدلع و تركص شوكت متجيهه و شوكت متجيهه تركص كدام المرايه و تدلع و بمره جانت مشتريه ملابس نوم و قاستهه بالغرفه و كعدت تركص كدام المرايه و تبوس بروحهه جان وقت دخول المغرب و جانت مخليه الاغاني و مندمجه مجانت تعرف انو هو موجود وياهه بالغرفه و يشوفهه و ديتمتع و هو يباوع لمفاتنهه انغرم بيهه و صار يدخل وياهه الحمام و ينتظرهه تنزع حتى يباوعلهه و اتخذهه
زوجه اله .
حسيت رعشه غريبه جدا بجسمي و اني اسمع كلام منى
رفل : شلون عرفتو كول هالشغلات و اذا صدك مثل متكولين حبهه و سواهه زوجه اله لويش قتلهه !!
منى : بعد الي صار كولنه مرينا بحاله نفسيه حيل صعبه و كولنه تحلمنا احلام بشعه قررنه نترك المشعوذين و هالخرابيط و نسأل شخص يعرف بهذي الشغلات بس يكون صادق و راحت جمانه لكربلاء و راحت لقسم الاستفسارات الدينيه و حجت كول الي صار للمسؤل هناك و طلب منهه توصف الحاله الي لكينه بيهه رهف و من خلال وصف جمانه للجثه عرف كول هالشغلات و كال انو سبب قتله و تشويهه الهه انو اكتشف انو عدهه علاقه بشخص ادمي يعني بشر لذلك اعتبرهه خاينه و قتلهه و شوه جسمهه .
للحظه حسيت انو راح اوكع من كولي شنو كم هالخوف ركضت ع غرفتي جان الوقت متاخر ما اكدر اتصل بماما لانو راح اخوفهه كول كافي اني خايفه ، اتوضيت بمي بالغرفه لانو مجنت حابه اطلع من غرفتي فرشت السجاده و بديت اصلي صلاة الليل دخلت مريم و بان و ريم و لكمني اصلي اتوضن و كامن يصلن مثلي بقينه الليل كوله نقرأ قرآن و نسبح و نستغفر ، قررت انو اول شي اسوي من يطلع الصبح انو اتصل باهلي و اخليهم يجون يرجعوني للبيت لانو بعد ما اكدر ابقى هنا دقيقه زياده

👇👇يتبع 👇👇