ارواح خائفة 🔞

جانت اكو طالبه اسمهه أمال تدرس صيدله مرحله ثالثه نفس قسم و مرحلة جمانه أمال جانت شخصيتهه حيل قويه مائله للرجوله قليلا مجانت تحب تبين انو هي بنيه جانت دائما تحب تبين انو هي قويه و ميكسرهه شي . من سمعت أمال كلام جمانه فزت من مكانه و حجت
أمال : خلص كافي تضمون ع كول مرحله اولى تجي و تضلون تضحكون عليهن بالحجي لحد ميوكع الفاس بالراس و تنعاد مأسات السنه الي فاتت .
عاطت جمانه و باقي البنات بأمال و كللهه انو تسكت
أسراء : أمال اسكتي و كافي تخربطين بالحجي .
جمانه : أمال اذا سمعتج المسؤله حتوصلهه للعماده و راح يعاقبج العميد اسكتي أمال .
أمال : جمانه انتي وحده من الناس الي تخافين حتى تطلعين للحمام او تطلعين بره غرفتج بالليل وحدج دائما لو زينب لو منى وياج هاي و انتي الي عايشه هنا و تعرفين كولش زين شنو ديصير هنا .
بقينا نسمع حديثهن و خايفين اني جنت ممصدكي الي دا اسمعه يعني هذي مو تهيئات يعني الاشياء الي دتصير حقيقه مو من تهيئاتنه حاولت افهم و استوعب الي ديصير حسيت نفسي بعد ما اتحمل صرخت بصوت
رفل : خلللللص ممكن تسكتون شوي ، جمانه انتو مو لوحدكم عايشين هنا و اذا تعرفون شي مو من حقكم تخفونه عنه لازم نعرف شكو و شنو الي ديصير حتى مثل ما انتو دتاخذون حذركم احنه همات ناخذ حذرنه و الي صار البارحه لزهراء مو بعيده يرجع يصير لاي وحده منه ، فأهدن رجائن و كعدن احجن شنو الي تعرفنه ؟؟
أمال باوعت لجمانه و للبنات صديقاتهه و كالت
أمال : أني أحجيلجن بس ملازم المسؤله تعرف انو حجيتلجن
كان الارتبارك و الخوف و الرعب ياكلنه و احنه نسمع حجي أمال
أمال : الموضوع بلش قبل 3 سنوات اول مداومنه مرحله اولى جنه مثلجن جديدات ع القسم و الي قبلنه جان ممنوع عليهن يحجن بأمر من العماده مثل ما ممنوع علينه نحجيلجن هسه ، جنه جايين و فرحانين بكلياتنا و متحمسين لعيشة القسم و متخيلين انو راح تكون حياتنا بيه احلى من حياتنا ويه اهلنه الا ان بيوم من الايام جانت صديقتنا رهف بالحمامات طبعا رهف جانت طالبة صيدله مثلنا و المفروض هسه هي مرحله ثالثه ويانه رهف جانت حيييييل حلوه تملك من الجمال و الحسن الي يخلي الناس ميكدرون يشيلون عيونهم عنهه و طبعا اول مأجينه للقسم كولنه صارت ويانه شغلات غريبه أشياء تنفقد أصوات تنسمع خيالات تمر من يمنه بس جنه مثلكم نعتقد انو تهيئات و مهتمينه و بهذاك اليوم جانت رهف بالحمامات دتسبح و جانت مشغله الاغاني و هي دتسبح الحمام الي بصفهه جان الدوش همات مفتوح بي و اكو بنيه دتسبح بي رهف جانت تسمع صوت الدوش كولش واضح بالحمام الي بصفهه و جانت متاكده اكو بنيه بالحمام دتسبح و من كملت و طلعت من الحمام تفاجئة انو باب الحمام الي بصفهه جان مفتوح ع النص استغربت لانو منتبهت شوكت البنيه خلصت سبح و سدت الدوش و من جاي تمشي لاحظت شي غريب لاحظت أنو أرضية الحمام جانت ناشفه مبيهه ولا قطرة مي مصدكت الي شافته دفعت باب الحمام و فتحته كوله و تأكدت أنو الحمام ناشف من اي قطرة مي كأنو صارله يومين محد سابح بي خافت رهف و من خوفهه بدت تفتح كول الحمامات الي قريبه من الحمام الي سبحت بي و كولهن جانن ناشفات يعني رهف بس الي جانت تسبح محد غيرهه موجود طلعت رهف تركض من الحمامات و جان الخوف ياكلهه و من حجتلنه ع الي صار وياهه ضحكنا و كلنالهه تهيئات بس بداخلنا جنه نعرف انو اكو شي خطأ و مر يومين ع حادثة رهف و حاولنا نتناسا الي صار وياهه الى ان بيوم جنه سهرانين كولنه بالصاله مال الطابق و سمعنا صوت صراخ حيل قوي الخوف تملك كلوبنا طلعنا للمرات نركض ندور ع مصدر الصوت و المسؤاله طلعت من غرفتهه تركض و تسألنه ع الي ديصرخ و احنه معدنا جواب ، الصوت جان صوت غريب مخيف مفزع كأنو صوت صراخ جاي من الجحيم كأنو صوت أحد ديتعذب المشكله مكدرنه نعرف من اي مكان ديجي الصوت لانو جان يطلع من كول مكان بالطابق احنه جنه بهذا الطابق الي هو الثالث صرنه لازكين وحده باللاخ من الخوف و المسؤله بقت تركض بكول مكان بالطابق و تفتح كول الغرف حتى تشوف مصدر الصوت و فجأه سكت الصوت و اختفه صرنه نباوع ع بعض و وره 30 ثانية ضبط سمعنا صوت صرخه بس هالمره تختلف جانت صرخه لبنيه و جانت صرخه مخنوكه بس هالمره عرفنا مصدر الصرخه جان مصدرهه غرفت رهف ركضت المسؤله و احنا وراهه نركض دفعت باب رهف رادت تفتحه لكته مقفول حاولت ادفعه منفتح جان عدهه نسخه من كول مفتاح من مفاتيح الغرف ركضت ع غرفتهه و جابت المفاتيح و طلعت مفتاح غرفة رهف خلت المفتاح بالباب و فتحت بس منفتح الباب يعني مفتاح باب الغرفه مفتحه استغربت المسؤله و وجهه صارت تعابيره متتفسر و احنه الخوف ماكلنه نزلت المسؤله ركض و صعدت وياهه حارس من حرس القسم و كلتله يكسر الباب ضرب الباب بكول قوته دفعه بجسمه اكثر من مره الا ان كسر الباب و انفتحت الغرفه و شفنه المنظر المرعب الي كدامنا
قاطعت جمانه حديث أمال و كالت
جمانه : بما انو حجيتي و مبقى شي نضمه بعد خليني اني اكمل ، اول مكسر الحارس الباب و انفتح كدامنا شفنه منظر مخيف بحياتنا مراح نكدر ننسا جانت حيطان الغرفه كولهه دم و بعبارت نصهه بلغه غريبه و منعرفهه و نصهه اللاخ عباره عن جمل مخيفه بس اكثر عباره جانت متكرره هي (عروس الجن) اما المنظر الاكثر رعبا هو منظر لجسم مخيف كأنو جسم وحش جان معلك بالبنكه مال الغرفه بحبل جان جسم مشوه او بالاصح جان جسم رهف المشوه جان شعرهه مالي الغرفه و جانت كرعه و لا شعره باقيه ع راسهه و جسمهه جان عريان و مشوه كوله الدوم ينقط منه و مكان عيونهه جان فارغ كأنو احد مستأصل عيونهه من مكانهن خفنه من الي شفنا و صرنا نصرخ المسؤله كامت تدفع بينه و بعدتنا من الغرفه و نزلتنا للطابق الثاني كولنه و اتصلت ع العماده و صارت ضجه حيل جبيره طبعا بعد الحادثه اكتشفنا انو الطابق الرابع و الثاني و الاول مسمعوا اي صوت غريب او اي صراخ غير الصرخه الاخيره الي هي جانت صرخة رهف لكن الصراخ الجحيمي الي جان بالبدايه محد سمعه غير طابقنا مع انو جان عالي لدرجه طبلت اذنه جانت حتنزرف بعد هالحادثه كثير من البنات انقلن و من العميد شافنه كولنه انريد ننقل قفل باب النقل و مسمح لوحده تنقل بعد علمود لتطلع السمعه ع القسم و المسؤله طلبت نقل و من موافق العميد ع نقلهه تركت الشغل و صارت اكو تعليمات جديده بالقسم و هي انو الي تروج لاي شي مخيف او خارق للمألوف حتنفصل لذلك صارلنا 3 سنوات و بعضنا سنتين متحملين
كول الاشياء المخيفه الي دتصير و كول فتره يضحكون علينه و يجيبون مره تفتر بالقسم و ترش مي و تقره قرآن شوي و تروح طالبن اكثر من مره ينقلون القسم لغير بنايه بس بدون جدوى محد جان يسمعلنا و الموضوع متوقف بس عند رهف صارت كثير شغلات بعد رهف و اكو بنات صار عدهن صرع و بنات تخبلن و تركن الدراسه و لذلك غرفة رهف لليوم مسدوده و هي غرفه 111 الي كولنه نعرف انو هي مقفوله و ممنوع اي احد يوصللهه .
الرعب الي تملك كلبي و كلب البنات الجدد الي وياي جان رعب مينوصف و احنه نسمع حجي أمال و جمانه بين الي جنت مصدكه و ممصدكه و من كالت جمانه رقم غرفة رهف 111 نشف دمي و بان و ريم صار وجهن اصفر من الخوف
رفل : يعني بينه و بين غرفة رهف غرفه وحده و الغرفه الي بينه الي هي 112 فارغه مبيهه طالبات .
ردت عليه منى
منى : غرفة 112 همات قفلوهه لانو حايط ع حايط ويه غرفة رهف طبعا قفلوهه بعد ما احنه طالبنا بهالشي خوفا ع الطالبات الي حتكعد بيهه .
ركزت بكلام جمانه و أمال و كلت
رفل : يعني قصدجن احنه دنتعامل ويه جن ؟؟
جمانه : مو بس جن .
بقينه نباوع وحده بوجه اللاخ و رديت عليهه
رفل : شنو قصدج مو بس جن ؟؟
جمانه : دنتعامل ويه رهف همات .
الرعب الي دخل لكلبنا بذيج اللحظه مينوصف باوعت ع جمانه برعب و كلتلهه
رفل : بس جمانه رهف ماتت !!
جمانه : رفل ، رهف انسحبت و تشوه جسمهه عقاب الهه بس مماتت بعدهه ويانه بالقسم .
خليت ايدي ع حلكي و حسيت بنص بنات المرحله الاولى ديبجن اي نصهن اصلا كلهن ديبجن
باوعت لجمانه و أمال و كلتلهن
رفل : شنو يعني جسمهه تشوه عقاب الهه ؟؟ و شنو يعني بعدهه ويانه ؟؟ و شنو الفرق بين الجن و رهف ؟؟ فهمني .
و قبل لتجاوبني جمانه ع سؤالي سمعنا صرخه من الطابق الثاني كمنا كولنا و ركضنا بره الصاله للممر و نزلنا للطابق الثاني و ........

👇👇يتبع 👇👇