نور : والله اليوم اجيكم بيها والمتصعد ويايه بعد ما احجي وياها 😒
وصلت للبيت والبنات كملو طريقهم گعدت اتغديت ويه علاوي واحمد
ماما بقت تنتضر بابا يجي من الدوام وياكلون
رحت اخذت غفوه وره الغده
گعدت وره نص ساعه لگيتها ب3 ونص
ركضت غسلت وبدلت ورحت على بابا
بابا انطيني السويچ
بابا باوعلي مصدوم
خير حبيبتي شلچ بي
نور :بابا عندي محاضرة كيمياء والطريق ما عليه سيارات حته تكسيات قليل والبنات ميقبلن ناخذ تكسي وحدنا يخافن
كلت نروح بسيارتك
ابو نور : بابا حبيبتي اخاف عليج والله من اني وياج بالسيارة مطمأن وانتي تسوقيها بس وحدج اخاف متدبريها مصارلج شهر من اتعلمتي
نور :ها بابا تعزها عليه انت مو واعدني من اداوم كليه تجيبلي سيارة لعد شنوهم تضل رايح وجاي وياي
ووكعن ادموعي بسرعه
بابا كام باسني وكال هذا السويج يا اميرة ابوج انتي
بس علي كيفج من تسوقين
طلعت فرحانه امي معلقت على الموقف لان تدري بابا ميرفضلي طلب
مريت على البنات صعدتهن ويايه
فرحنا كلش اخذنالنه فره بالسيارة
لان الساعه بالاربعه وباقي نص ساعه على المحاضره
واني اسوق ومنتبهة على هديل الكاعده بصفي
ما حسيت الا اثنين شباب ديعبرون الشارع طلعو بوجهي
لزمت بريك بس صدمتهم
ما اعرف شصار بيه بوقتها رجليه واديه بادت
والبنات هديل واستبرق ضلو يصرخون
والعالم التمو بسرعه اني مكدرت اسوي شي ضليت كوه اتنفس من الخوف اجتي عليه الدوريه مال شرطه اخذو مستمسكات السيارة البنات نزلن واني مخلوني اروح بس اتدنيت كعدت بالكرسي الثاني وصعد ولد بصفي هو الراد يسوق وحالته حاله وملابسه عليهم دم
وصعدو ولد ليوره كله دم وفاقد الوعي وشاب ثالث وياهم
اني مجنت احجي شي بس ابجي والولد اليسوق حته مباوع عليه
ع السريع طار بالسيارة للمستشفى
وصلنا دخلو الولد للردهة مال عمليات
جان يجي عليه الولد الجان يسوق عيونه حمر ويبجي ويكولي اذا صار على اخويه شي اقتلچ هنا اني بقيت ارجف والشرطه اجتي
وره شويه طلع الطبيب كال البقيه بحياتكم الولد اتوفى النزيف كان حاد مكدرنه نسوي شي
اني سمعت هيج وكعت واغمى عليه
هديل :احنه فرحانين لان بالسيارة دنفتر ونسولف ونتشاقه منحس الا سوينا حادث اثنين شباب واحد منهم عبر والثاني رجع ليوره مصار بي شي بس اللي ضربته السيارة كلت هذا مات لان منين منباوعله بس دم
ضلينا اني واستبرق نبجي ونور اباوعلها ساكته ومصدومة من اجت الدوريه كالو روحو انتو خبرو اهلكم والبنيه راح تروح ويه الشباب للمستشفي خلي يجون اهلكم وانطونا عنوان المستشفى
هو الشرطي عباله احنه اخوات
رحنا اني واستبرق اخذنا تكسي البيت نور
دكينا الجرس طلع اخو نور سولفتله الصار
هو طب يركض للبيت واحنه هم رجعنا لبيوتنه
