حياتي صارت عبارة عن شغل بالبيت وبس حته محد اكو يحجي ويايه
ام حيدر احسها مرات تنقهر عليه من اخدمها
ومرات احسها تكرهني وتشوف دم اسنونها ولا اتشوفني
ضليت اسويلها تمارين وعلاج طبيعي يوميه
ضلت شويه تحرك ايدها
حيدر مرات يفوت يشوفني ادلك رجليها واحرك بيهم
يباوع عليه ويطلع
مر شهر على زواجي حيدر خلص امتحاناته
واتخرج واخذ الشهاده
مره من المرات هو گاعد گعدت اگباله
حيدر اريد اشوف اهلي
حيدر باوعلي گال روحي شوفيهم منو لازمج
گلتله ما اعرف اروح وحدي
گال خلي هم يجون يشوفونج لعد
اني ما اروح ولا اوديج
رحت خابرت امي گلتلها يوم تعالو مشتاقتلكم والله
اليوم غداكم يمنا
امي كيفت لان راح تجينا
گمت طبخت احلى اكل واني الجنت بيضه ما اعرف اطگ
صارت بالوحده اجو امي وابويه واخواني
سلمو على حيدر طبعآ وجه حيدر ويه اهلي مبتسم
وگعد يمهم واكل وياهم ويسولف ويه ابويه
اتمنيت لو يعاملني يوم واحد مثل ما يعاملهم
من كملنا غده رحت اني وماما الغرفتي وحيدر بقه گاعد يم اخواني وابويه
ماما خطيه طلعتلي كومة شغلات واشياء نسائيه جايبتهن الي گالتلي ماما ادري بيج ما تحجين وياه ومتگدرين اتطلبين منه شي
دنگت اني وعيوني غورگت بالدموع
ام نور : ها بنتي حبيبتي خوما يضربج لو يغلط عليج ويهينج
نور : ماما اتمنه يهيني ويأذيني ولا يبقه هيج ساكت
ماما تعبت سكوته وغضبه المكبوت موتني
حضنتني امي وگالت ماما اتحملي هذا المكتوب بعد شتسوين الحمد لله .
