نور : گعدت الفجر بالجمعه گمت توضيت وصليت واني ابجي وادعي الله يوفقني ويغفرلي
الحد ما رجعت غفيت على السجاده
گعدتني ماما بالتسعه
گالت من شوكت نايمه هيج گلتلها من صلاة الصبح
حضنتني وضلت تخفف عليه
نزلت اتريگت ويه اهلي
اباوع لخواني وبابا احسهم مقهورين وحته گوه ياكلون
گلتلهم لا تضوجون
اني استاهل لازم الشخص ياخذ عقابه
صارت الساعه بالثنتين الضهر
ماما خلتلي مكياج خفيف ولبستني فستان ابيض طويل وسرحت شعري ولبست فوگاهن شال كبير غطيت بي نفسي
واجني صديقاتي هديل واستبرق وخالاتي
وكلهم يبجون
واني ساكته مبجيت ولا حته حجيت
حيدر : طبعآ امي مجانت راضيه على هذا الزواج بس سكتت وطلبت مني اوديها يم خالي الكبير ابيته ترتاح يمهم متريد تشوف وجه نور
هي جانت متحجي بس بصعوبه فهمت هي شنو رايده
رحنا البيت نور الساعه بالاربعه العصر
دخلنا اخذناها واحنه دنطلع
طلعت امها ورانه وبيدها اربع جنط اكبار گالت هذني ملابس نور صعدناهن بالسيارة ورحنا البيتنه
وصلونا عمامي للبيت وراحو
دخلت نور للغرفه بدون متحجي ولا شي واني هم مگدرت احجي وياها مقهور عليها ملامحها طفوليه وبريئه وطالعه ايه من الجمال بس حرگة گلبي على اخويه وامي اكبر من تعاطفي وياها
اني طبيت اخذت ملابسي
ورحت للحمام
سبحت ونمت بالاستقبال على القنفه .
