بقايا حلم

الجزء 1

وردة وردة تعالي حبيبتي تعالي حضري وياية غراضنا دنروح لبيت جدو مو تريدين تلعبين وية سلوى. ..
وردة..يييه يمة شوكت نروح ..
ام وردة...باجر يمة باجر نطلع من الصبح نخلص العطلة هناك ونجي بس تصيرين عاقلة مو تخليني بس وردة اكعدي وردة كافي. ..
وردة...اي والله يمة اصير عاقلة بس خلي نروح عفية...
جان عمري 12 سنة بس اني شوية خشنة مبينة أكبر من عمري ابوية استشهد واحنة صغار اني جان عمري سنة ونص يعني مواعية عليه ولا اتذكر شكله ولا اعرف شي اسمه اب جانت امي حبيبتي معوضتنا واخوتي ربي يحفظهم ممقصرين علية بأي شي خصوصا لان اني الصغيرة بس تبقى أمنية شوفة ابوية الي عرفته بالصور بس يمكن جنت اعوض النقص انو مشفت ابوية بعصبيتي وعنادي جانت هاي السمة الطاغية على شخصيتي الي براسي براسي واعاند لحد ما اسوي الي اريده امي جانت تحاول تغير من هاي الصفة الي عندي بس بلا فايدة رغم هذا جنت طيبة بشكل وهادئة حسي ميطلع بس من اشوف سلوى صديقتي وأختي بعمري هي بت خالتي جنة اني وياها متواصلين ولا فد يوم مسمعت صوتها جنة نتخابر ع الأرضي قبل ماكو موبايلات بيت جدي لخوالي وخالاتي كلهم بلبصرة بس عندي خالة وحدة متزوجة وساكنة بلديوانية جنة ننجمع كلنا بلعطلة ونكضي احلى أيام احنة كاعدين ابغداد يم اهل ابوية عمامي وعماتي كلهم عايشين ابغداد علاقتنا بعمامي وعماتي كلش زينة لكن لاتخلو من بعض المشاكل وعندي عمة وحدة شادة وية الكل مو بس وية امي جانت أرملة وماعدها اطفال و كاعدة وية بيت عمي الجبير جدي وبيبتي لابوية متوفيين من زمان عمامي الله يخليهم حنان إلى درجة وعماتي همين لان جانو متعلقين بابوية وراح ومشبعو منه فجانو يشوفون ابوية بينا قيصر أخوية الجبير يشبه ابوية إلى درجة شهد اختي الجبيرة خريجة إدارة واقتصاد ومتعينة بدائرة قريبة على بيتنا ومخطوبة لابن عمي وبعدين قيصر حبيبي حنية الدنيا بي جان معلم وبعده ممتزوج وراها معمر أخوية مهندس ومتعين بشركة أهلية ويحب بنية وياه وناوي يخطبها واني بزر الكعدة خلصت ثالث متوسط وطخ ابالي ابطل امي واخوتي شكد حاولو رادو يقنعوني ماكو قفلت ومحد جبرني ابد لان جنت المدللة بجال اهلي ويحبوني يموتون عليه الله يحفظهم ويخليهم آلية ....
المهم حضرنا من الليل واني الليل كله كاعدة من اكو طلعة اتخبل ماكدر انام كعدنا الصبح امي شافتني ضحكت..
ام وردة... ولج ها...
وردة...مكدرت انام يمة مو تدرين بيه ..
ام وردة...ديلة روحي صلي وكعدي اخوتج وشهوده حتى نتوكل ...
وردة...رحت اكمز على رأسهم لحد ماكعدو كملنا وطلعنا واني الطريق كله مكيفة نمت شوية ووصلنا وبقينا نفتر من بيت لبيت الكل يتلكانا وميقبل نطلع رحنا لبيت جدي تلكانا جدي جان كاعد بلطرمة ...
جدي...هلة بوردة... طبيت اول وحدة بوسته وخالتي رقية أم سلوى جانت جاية لبيت جدي علمودنا همة كلهم قريبين وخوالي همين بينهم شارعين جان عمري تقريبا 12 سنة بس جان عندي مشاعر لزيدون ابن خالي ماعرف جنت طفلة وشنو هذا الإحساس الي احس بي من اشوفه جنت كلش احب اشوفه واحب سوالفه جان أكبر مني ب10 سنوات او اكثر جان طالب كلية ترك سنتين بلمتوسطة لان جان وية خالي بشغله بس بعدين كمل جان كلش شاطر ويحب الدراسة هو المفروض متخرج طالب طب أسنان جامعة الموصل طعلتله فجان قسم داخلي ويروح ويرجع وبلعطلة وية جيتنا يجي كضينا العطلة كلها عزايم يومية يم احد من خوالي واني وسلوى نكمز خلصت العطلة وكلبناها مناحة لان راح نرجع وكل سنة هيج ...ورجعنا ومرت أيام مثل الي قبلها حتى اني وسلوى مكضيها تليفونات النهار كله ع الأرضي ونكعد نكتها سوالف سلوى اكثر من صديقتي وأختي وبنت خالتي الي الهمسة ماضمها عليها وابغداد جانت صديقتي سالي جيرانه وياية جنة للمدرسة قبل لا ابطل جنت اكضي وكتي وياها نوبات اروحلها اني وامي او هي تجيني ...المهم كعدنا دكيناها سوالف بلتليفون ع زيدون ولج سلوى تدرين من جنا يمكن هلمرة زيدون كام يباوع عليه ..
سلوى...شنووو يباوع عليج. .
وردة...ولج مادري اني انتبهت عليه ديحجي ولزكت هو هم انتبه عليه ومن رجعت إلى هسة هاي النظرة موتتني ليل نهار مسطورة بي حتى نوم مدانام ولج دخت بعيونه احسه كدام عيني...
سلوى....ولج مراهقة هسة أسبوع وتنسي ...
وردة.. لا والله سلوى هو بطل أحلامي ماخذ عقلي وبس افكر بي النهار كله الله عليج شديسوي ..
سلوى...ديحضر روحه للكلية مو تدرين يروح قسم داخلي ميرجع الا بلعطلة ..
وردة...اي ولج دسولفيلي عليه..
سلوى...شتريدين يعني شحجيلج ..
وردة...اي شي عنه شبيج ...
سلوى...يعني هو محبوب الكل يحبه ويحترمه وأخوته يسمعوله والكل يهابه حتى جدي وبيبي يتخبلون عليه اسكتي غير نور بن خالي فرحان ناصبة عليه...
وردة..لا الله عليج وهو ...
سلوى..سمعت سلوان اخوه يكله هاي حاطة عينها عليك وزيدون يكله يمعود عوفها اني ماحبذ هيج نماذج كلش خفيفة الله يستر عليها. .
وردة...الله عليج يعني مدارلها بال. ..
سلوى...اي وميقبل ع تصرفاتها اظاهر مسوية كدامه شغلات وضايج منها....
وردة..سلوى بداعتي حبي عينج عليه ....
سلوى....هههههههههه....
وردة...ليش دتضحكين ...
سلوى..اي مو ضمنتي الج حتى ادير بالي عليه ...
وردة...لا لج بس شوفي شتسوي هاي البومة مدري منين طلعت ...
سلوى...لج وردة بس حلوة ورشيقة وبعمره مو مراهقة وحتى دراسة بطلت منها ....
وردة..سلوى شبيج اشو كمتي تخربطين...
سلوى..لا بس هيج دنسولف شبيج ضجتي اي ومحجة شي وياج ...
وردة...لا بس من باوع عليه حياااني عبالك حجالي كلشي بهاي نظرته.... ظلينا نسولف بيومها وكل سوالفنا عليه يومية جنت نتخابر لو اني لو هي تخابرني ....

جانت تليفوناتنا وحجينا كله حجي مراهقين ومجرد نظرة نبني عليها احلام وقصص وحكايات .....
وتستمر الحكاية.......