بقايا حلم

الجزء7

رجعت وكلي امل اغير من حياتي لان ردت شي جديد انساهم بي قررت اسوي رجيم لان سمموني بلحجي ناس تكول كبرانة صايرة حتى اكبر من امج  انتي بعد محد يباوع عليج وحتى اذا تزوجتي حتى خلفة متشوفيها بعينج عبالك اجتمعت العشيرة كلها ونست الفاتحة حتى يتناقشون بوزني كل شوية وحدة تكول ياااا خطية هاي شلون صايرة ...
كلت كافي عاد لازم اسوي لنفسي جارة خلصت الفاتحة ورجعوا امي وقيصر شهد هي ورجلها رجعوا ورانا بيوم امي انتبهت عليه داقلل اكلي والعب رياضة وبس اتذكرهم انسى الرجيم واكابل الثلاجة واكعد نفسيتي تدمرت مداكدر انساه زيدون حلمي وانسرق مني احلامي بي حطمتني مدتفاركني جانت احلام يقظة بس هسة لا واني نايمة افز ع صورته مع العلم اني متيقنة انو  هو راح وميرجع صارت عنده عائلة وأطفال ومن عاشر المستحيلات يضحي بأي شي علمودي تحطمت حتى صحتي بلنازل لان وصل وزني 120 يعني 29 سنة قيصر انتبه عليه اسوي رجيم وارجع اعوفه...
قيصر...وردايتي شبيها ضايجة اليوم ...
وردة...ها حبيبي مابيه شي بس ضايجة اسوي رجيم ومالتزم بي وارجع اكل ويزيد وزني إضعاف تعبت ...
قيصر...شوفي وردة صار فترة اشتغل ع هذا الموضوع عندي صديقي هم وزنه عالي راح لبنان سووة عملية واجة وهسة شوفي شكله صغر وحتى احنة معرفناه وانتي دافنة نفسك بهذا المرض شتكولين اسالج ع الموضوع ونبلش بي. ..
وردة..بكيفك ...
قيصر...والله حتى نفسيتج تتغير داشوفج كئيبة النهار كله نايمة حجيج قليل طلعاتج معدومة انتي صغيرة حبيبتي عيشي بعدج صغيرة. ..
وردة...هههه ميعرف اني كلبي مشيب ومكسور وكاسرني وياه ...عادي قيصر حبيبي عادي بكيفك ...
مرت فترة واني بالي مو وياية بكل مرة اقرر انسى وترجع صورته كدامي لحد ما مرة اندكت الباب قيصر طالع وامي بلحمام اضطريت البس شال واطلع أفتحها واشوفه كدامي صفنت اني ليش كل ماكول نسيته حتى بهاي ماعندي إرادة افشل وارجع. ...ياربي امحي من ذاكرتي ...
زيدون...ها وردايتي شلونج ...
وردة...الحمدلله تفضل...
زيدون...عمتي شلونها قيصر .....
وردة...الحمدلله زينين دخلته للخطار وداطلع ...
زيدون...وردة ...
وردة...نعم ....
زيدون...اكعدي شوية ....
وردة...اسفة عندي شغل عفته وطلعت استعجلت امي طلعت وراحت يمه اني طبه بعد مطبيت يمهم اجة قيصر والتهى وياهم اسويلهم اكل جاي ادك ع قيصر  ياخذهم انتبه عليه ...
قيصر...هاي شبيج وردة ليش مدتدخلين...
وردة... والله قيصر داستحي اطلع للعالم من ورة جسمي مردت ابينله غير شي ...
قيصر..خلي ثقتج بنفسج وبيه عاليه وظلي وراية حبيبتي ولتستحين من شي اني وراج ..
وردة...تسلملي يابعد اختك اخذ الصينية وراح ...
اجة وياريته مااجة ولا شفته بحياتي بيوم زيدون سبب تعاستي زيدون دمر كلبي وخنكه بايده اني كلش ضعيفة وهشة بحبه .مكفاه الي صار لا جاي وجايبلي عريس ههههه ماعرف اضحك لو ابجي ع حضي هو متقصد هيجي يسوي بيه الدنيا كلها شايلة همي لان عنست عمري صار 29 سنة طبيت بلعمرين واني مادري طلعت امي مكيفة عبالك ربحت مليون دينار ...
ام وردة..ولج يمة قسمةواكيد وردة لان من طرف زيدون ...
وردة..وليش اكيد ...
ام وردة..صديقه يمه صديقه ...
وردة..لا يمة انسي اني اريد ابقى هيج ماريد زواج...
ام وردة..ليش ابوية كبرتي شمنتظرة لادراسة لابيت لازواج شعندج انتي واخوج كاسرين ظهري بلة اخوج ولد يدبر روحه بس انتي شيصير بيج وراية من الله ياخذ امانته ترة ميفيدج لا اخ ولا اخت عظم بنيادم ثكيل وراح يتعاجزون منج يوم....
ام وردة...اسم الله عليج يمة ينطيج صحة وعافية ترة ماعندي غيرج لا تحجين هيج يمة عفية عوفيني بحالي ماريد قيصر وشهد هم اخذولهم شوط وياية محد عافني بحالي يحجون واني سادة اذاني ولا كانما اسمع لأحد لان من طرفه ماريد منه اي شي بس يعوفني بحالي وبلكوة علما شلت الفكرة من راسهم والتهيت بسالفة وزني وقيصر فدوة لعينة مقصر ابد عبالك لروحه وفعلا جاب اسم الطبيب والمستشفى بلبنان مطولنا رأسن حجزنا وطلعنا وامي هم اجتي وياية ضلينا برة شهرين طلعت من الجو الي جنت بي ونسيتهم طلعتهم من بالي مخليتهم يأثرون عليه حتى بتفكيري وسويت العملية ونجحت الحمدلله وبدة وزني ينزل شوية شوية وقيصر جانت عطلة مال مدرسة مقبل نرجع كال خلينا نتونس شوية شعدنا راجعين من هسة وفعلا بقينا وتغيرت حياتي 180 درجة وين جنت وين صرت اني ليش هيج جنت محطمة روحي بلسمن الي دمرني وية الي دمروني وامي وقيصر مكيفين بيه ...
قيصر....ولج وردة شكلج يخبل جمالك جان ضايع بلشحوم عبالك طلعو منج بشر ولج نزلتي للنص...
وردة... وبقينا فحوصات ومراجعات خلصنا ورجعنا والكل تفاجأ محد عرفني وشهد تباوع عليه وتبجي ...
شهد...ولج وردة صدك وردة صرتي ليش هيج جنتي مسوية بروحج ومضيعة شبابج واحلى ايام عمرج بهلمرض ....
رغم كل التغيير الي صرت بس كلبي بعدة بي غصة معقولة الحب هيج يعني المفروض اكرهه بعد الي سواه بيه ليش مفكرت انساه واحب غيره واحب حياتي بلياه لازم هيج اسوي مثل ماغيرت شكلي لازم اغير حياتي بلكامل كأنما ممر بيها أحد اسمه زيدون لان ماكو أحد يستاهل .....
بدا وزني ينزل شهر عن شهر فرق مو طبيعي نزلت لل65 جسمي صار يخبل وشكلي كله تغير وبينت معالم انوثتي الي مجانت موجودةاصلا .مو بس سلوى وزيدون خربو حياتي ومخلوني افتهم منها شي لا السمن المرض الازلي الي جنت حاصرة روحي بي جنت ملتهية عن نفسي بحب دمر حياتي ودمرني جنت كلي أمراض وجنت اعالج روحي بالأكل إلى جان يأذيني اكثر ومجنت احس بي عبالك متخدرة عن العالم الخارجي هسة يلة اكتشفت اكو بلدنيا غير الي يغدرون والي ينافقون بس اني جنت محصورة بيهم زيدون بعد مفكرت بي كزوج لان مستحيل اخذه منها ومن اطفاله مثل ماهي اخذته مني اشتغلت ع نفسي وحاولت ارضي غروري بشكلي وبجمالي الي محد ميشوفني اذا ميضل يحجي شنو هاي وين جنتي ضامة روحج علينة واني صافنة عليهن هو صحيح المظهر مهم بس مو اهم شي واسوي مقياس لتعاملي وية الناس مع الأسف اكو هواية هيج نماذج ...
وفعلا صرت احلى مايمكن اني كلش بيضة وشعري اسسسسسسسود وطويل كلش وعيوني خضرة بدون مبالغة هذا كله قبل مجان مبين بس هسة صرت فاتنة ع كولة قيصر حبيبي الي اله فضل كلش جبير للتغيير الي اني بي ...
سالي جانت تروح وتجي من شافتني تخبلت لج وردة هاي شنو مو انتي ولج والله تخبلين صايرة شنو من جمال وين جنتي ضامة روحج غير وحدة غير وحدة ابد مو انتي. ..
هاي شكو يمعودة شصار شو انتي احلى مني دباعي روحج. ..
لا يولي انتي غير الغير هسة العرسان يلزمون سرة هههه وانتي اختاري ولج لتتنازلين عن هيثم يوسف يولي ولو تستاهلين احسن واحد بلدنيا مو تجيبيلنيا اجلح ...
وردة...ها يمعودة شكو انتي عينن امي شكد تلحون ع هاي السالفة فدوة سدي الموضوع انتي شخبارج حبي ملتهية عنج والله. ..
سالي...اسكتي غير عن قريب اصير عروسة يوم الج حبي ولد وياية بلكلية يريدني ...
وردة...وانتي تريدي ؟؟؟
سالي...عادي شعندي قابل اذا اهلي قبلو اني هلسنة اتخرج ومجنت حاطة ابالي بصراحة بس شفته صار 4 سنين زين وهو مجلب ...
وردة...الله يتمملج بخير حبي تستاهلين كل خير ....
سالي...تسلميلي وردايتي يوم الي أفرح بيج حبيبتي ....
مرت سنة او اقل زيدون يروح ويرجع بين فترة وفترة واني ابد ما أنزله شوفته تعبني مرة كاعدين بليل ومعمر ومرته يمنة وشهد هم جاية واني فرحانة بروحي كل شوية لابسة شي ونازلتلهم شوية ودك التليفون خابرت نور بت خالي فرحان اني طلعتلها سلمت وعزمتنا على خطوبتها صديق اخوها خطبها وتوسلت بيه اروح لان اني اعتذرت منها وفعلا ماريد اوصل لهناك لاي سبب بعد بس لحت كلش هواية وقررت اروح هو قابل شراح يصير اني لازم استمر بس من اشوفهم اموت كل مشاعري تهيج اتذكر وكلشي يرجع كدامي واتذكر ضعفي كدامهم وكل كفخة انكفختها منهم وشكد جنت مسطورة بحبي الهم بس كلبي اوووف ياكلبي اريد اكصه واذبه بلكي ينبتلي كلب بلا مشاعر ماريد احب ماريد اتعلق بعد كافي الي شفته ....
كلت لامي وقررنا نروح  .....

وتستمر الحكاية .......