أحببتك مرتين

جزء 1

هاد القصة هي هدية مني ليكوم بمناسبة عيد اﻷضحى المبارك، تعيدو وتعاودو إن شاء الله 🙏🙏
______________________________________

كنا واقفين فواحد الجبل كيطل على البحر الابيض المتوسط كان متكي على السيارة وانا بعيدة عليه شوية كنشوف فالبحر وكنحاول نستمتع بكل مكون من مكونات ديك اللحظة، اللحظة اللي تسنيتها عمري كامل وكتبت ليها شحال من سيناريو وتخيلت ليها شحال من مشهد الشمس والطيور ونسيم البحر الزروقية ديال السماء والبحر ودقات قلبي وهو كيرقص وكيتمايل مع كل نسمة كنتنشقها من
العطر ديالو.
انا وياه بوحدنا واقفين على حافة شمال أفريقيا والبحر كيشوف فينا كيتسناه يهدر وانا نجاوبو بخجل باش يصفق لينا جهان! كتبغيني؟ انا بعدا كنبغيك. تزوجي بيا!
سمعتو عيطلي وقبل مندور حاولت نخبي الفرحة ديالي درت لقيت وجهو زاد تبدل او ولا حزين أكثر تقدمت عندو وانا مركزة فعينيه ومكنسمع والو من غير الحجر اللي كيتحرك تحت رجليا بغيت نقرب عندو ونلمس وجهو ونقولو بلي كنبغيه بزاف وبلي مستعدة ندير اللي كان باش نمسح الحزن من عينيه ومستعدة نبذل حياتي فسبيل ابتسامة وحدة على وجهو. بغيت نضمو ليا ونهمس فودنو بلي مادام معايا عمر القلق ميوصل لقلبو ونواعدو بلي انا غنكون الملاك الحارس ديالو خاسو فقط يقول كلمة وحدة يقول بلي حتى هو كيبغيني كيما كنبغيه وبلي فليالي الغربة الباردة كانت صورتي هي اللي كتدفيه وبلي تركيب اسمي مع اسمو هي اللعبة اللي كانت كتسليه وبلي نهار على نهار كيزيد شوقو يكون معايا وبلي رجع طاير لبلادو باش يكمل حياتو معايا بقيت واقفة كنشوف فيه وكنحاول نختار ردة الفعل المناسبة لطلب الزواج او ربما غير الاعتراف بالحب ديالو تكلم وقال
امين: طلبت نهدر معاك بوحدنا حيت بغيت نقوليك واحد الحاجة
انا (نهيلة) : اللي هي؟!
هو: انا عارفك مكتبغينيش.
انا: مزيان!
هو: حيت حتى انا مكنبغيكش، انا غير ضغطو عليا باش نتزوجك حيت عزيزة على الدار وعائلتك مناسبة لعائلتنا انا كنبغي واحد البنت أخرى وباغي نتزوجها عافاك انا فاش تعرفت عليك حسيت بلي انتي بنت قارية او واعية وعقلك وقلبك كبير بزاف وبغيتك تساعديني عافاك رفضي هاد الزواج انا منقدرش نرفض حيت والديا ممتفهمينش بحال والديك عافاك نقديني من هاد الوحلة.
وهو كيهدر كان راسي كيدور كنت حاسة بلي صدري كيضياق وكنتخنق وليت باغية غير نهرب من حداه وميعاودش يشوف وجهي.
كيفاش قدر يقولي فوجهي بلي هو فوحلة واش الحياة معايا وحلة ومشكل كبير؟ كيفاش قدر يقول بلي مكنبغيهش ومشاعري وكلامي وتصرفاتي وعيني اللي كينطقو بكلشي دقات قلبي وارتعاشي فاش كنكون معاه وجهي اللي كيولي مضوي حيت مقابل معاه. وابتسامتي اللي فضحاتني قدام جميع الناس. هو الوحيد اللي مافهم والو من هادشي وكيفاش قدر يقولي بلي مكيبغينيش قالها بالزربة زعما باش ميجرحنيش؟ باش منردش ليها البال؟ مضا الموس مزيان باش يدبحني ومنحسش. كيبغي بنت أخرى؟ واختارها هي عليا وقرر يضحي بيا انا وعائلتي وعائلتو على قبلها هي شكون تكون باش تدمر حياتنا كاملين.
دورت وجهي للبحر باش نخبي دموعي وميشوفهومش فاش درت لقا الفرصة باش يهدر على راحتو ساهل الكلام فالظهر بزاف ولكن فالوجه مباشرة فعينين الانسان صعيب بزاف تقولو الحقيقة. بدا كيعاودلي على البنت اللي كيبغي وهو كيهدر كنت كنشوف التحت فالحافة مع كل كلمة كيطيح جزء مني وكيتكسر فوق الصخور الحادة كيما كيتكسرو المواج. كيقولي نفس الكلام اللي تمنيت نسمعو ولكن ماشي نفس السمية.
هو: فاش تسمعي قصتي ربما غنجيك غبي ومعندي عقل حيت البنت اللي كنبغي شفتها غير فالصغر ومن داك النهار عمرني شفتها ولكن عمرني نسيتها. تقدري تسمي هادشي حماق ولكن انا بعقلي وعارف شنو كنقول.
هذا هو الحب بالنسبة ليا حياتي تبنات ومشات فالمسار اللي يوصلني عندها انا سمحت فحياتي برا غير باش نرجع لهنا باش نتلاقاها وميمكنش دبا نتخلى عليها ونبني حياتي مع وحدة أخرى تلاقيتها اول مرة وانا صغير مقدرتش نعرف سميتها لعبت معاها بعض المرات فالجردة كانت زوينة ودغيا دخلات لقلبي ههه خلات قلبي يضرب وانا صغير ومزال مكنعرفش شنو هو الحب هدرت معاها مرة وحدة ههه اه انا حمق حيت من داك النهار وانا كنمشي لديك الجردة وعمرها رجعات لتماك من بعد كبرت وتبدلت وعرفت بلي حتى هي غتكون تبدلات. نسيتها ولكن فالغربة رجع الطيف ديالها كيزورني فالمنام ديالي. رجعت تفكرتها وبدات شوية شوية كدير بلاصتها فقلبي نهار وليل خيالها مكيفارقنيش ودبا جيت نقلب عليها حيت أكيد قلبي غادي يتعرف عليها.
تلفت ولقيتو واقف حدايا كيشوف فالبحر كيهدر عليها وهو مبتسم وفرحان بحال ايلا ماشي عاد دبا بشوية قتل مشاعري وكسر قلبي ولكن فقلبي فرحت حيت شفت الابتسامة اللي كنعشق عاد دبا قتلني وبهاد الابتسامة رجع احياني وخا ماشي ليا شنو غندير نخليه يمشي نخليه ليها ولا نتمسك بيه؟