أحببتك مرتين

جزء 4

بقيت غادية فالطريق وانا ساهية بحال الحمقة حتى سمعت شي سيارة كتكلاكصوني عليا درت لقيتهوم شي سياح نازلين عندنا ركبوني واحترمو حالتي وماسولونيش مالي.
وصلت للدار ودخلت لبيتي وسديت الباب وجلست فالأرض كنتفكر شنو وقع وكيفاش عاملني والنظرة باش شاف فيا وخلاني نحس براسي بحال شي حشرة تمنيت يحس بيا ويعيش حتى هو القهر اللي حاسة بيه وبغيتو يلقى ديك البنت وتعذبو وتجرجرو وتخليه يعرف قيمتي ويعطي حتى هو الغالي والنفيس من أجلها وفالاخير تقولو طز فيك وففلوسك وانا نكون واقفة كنتفرج فيه ونضحك نضحك نضحك حتى يبردلي قلبي تفكرت كلمات اغنية كنت سمعتها من مدة كتشبه لقصتي كتقول ولما بدا لي أنها لا تحبني وأن هواها ليس عني بمنجلي تمنيت أن تهوى سواي لعلهاتذوق صبابات الهوى فترق كيفما كان الا عن قليل فأشغفت بحب غزال أهيف الطرف الكحلي فعذبها حتى أذاب فؤادها وذوقها طعم الهوى والتذلل يفقلت هذا بهذا فأطرقت حياءا وقالت كل ظالم مبتليا
انا (مع راسي): ياريت يا أمين تلقى ديك البنت اووه علاش غنبقا مخشية فهاد البيت بوحدي؟ غنخرج نشوف الدار واش خصاها شي حاجة اما أمين خليتو لديك الفكرة اللي فراسو
خرجت لقيت كل واحد داير خدمتو بقيت كنتمشى فالجنان حتى لحق عليا واحد من الدراري اللي وصلوني.
هو: مالكي غضبانة؟
انا: مماليش ممكن تخليني بوحدي
هو:  اش بكاك أنوارة اش خلى دمعتك تسيل
انا: شكون انت؟
هو: انا جيت جديد لهنا مرشد سياحي تعرفت على الخدامة كاملين اللي فالدار ولكن انتي عمرني شفتك
انا: انا ماشي خدامة هنا انا بنت مول الدار
هو: اه سمحيلي
انا: او دبا ايلا سمحتي ممكن تخليني
هو: واش قلقتك
درت رجعتك بحالي للدار وهو تابعني كيقولي بلي راني راجعة والطريق ديال الجنانات من الجهة الاخرى. عصبني داير بحال شي كلون مكيعرفش حدودو.
وصلت لحدا الباب سمعت شي غوات لقيت أمين لايح شي حاجات قدام الباب وكيقولي هاكي الهدايا باش شريتيني ايوا نسايني عليك اه وحتى فلوسك غدا تلقايهوم فالحساب ديالك وكليانك غنلغي الشراكة ديالي معاهوم مابقيتي كتسالي والو ايوا نسايني بعدي عليا.
بقيت مصدومة كنشوف كيفاش كيعاملني بحال ايلا انا اللي مشيت خطبتو ولا انا اللي بززت عليه الزواج كانو الخدامة كيشوفو فيا وبابا وماما مفاهمينش شنو واقع ويمكن كيفكرو بلي اللي قالو صحيح متحملتش نشوف الخدامات كيهدرو فودنين بعضياتهوم وكيتغامزو عليا تعصبت وجمدلي الدم فعروقي وطحت حليت عيني شفت غير الظلام وشوية ديال الضوء كيجي من برا بغيت نوض ولكن حسيت براسي ثقيل وكيضرني بقيت متكية درت بلاصتي وبديت كنبكي رجعت بذاكرتي للماضي وشفت شحال من حاجة دبا عاد عرفت التفسير ديالها تصرفاتو معايا وكلامو وتلميحاتو تفكرت نهار الخطبة شحال كنت غبية كنت فرحانة وقلبي كان غيسكت بالفرحة وتفكرت راسي وانا حشمانة منو وكنفكر شنو رأيو فيا وبلي عجبتو.
شحال كنت غبية رسمت أوهام لراسي وهو عمرو حس بيا لا وزاد عايرني وشوهني قدام الخدامة هادشي كيعني بلي مكنسوا عندو والو وحتى خالتي اللي اعتبرتها بحال ماما وكنت كنعاودلها كولشي خيبات ظني فيها وفضحاتني واعداتني بلي مغتدخلش بيناتنا ولكن غير شافتو قالت كولشي اه شحال كنت غبية مكانش خاسني نقول اسراري لشي واحد حيت السر غير كيخرج من فمك مكيبقاش سر كنت غبية داك النهار قبل ميسافر كنت كنضن بلي ايلا عرف بحبي غادي يلغي السفر ويبقا معايا هههه كنت مبلية بالافلام على اي حال الحمد لله اللي محكيتش اما كون شوهني قدام أمة محمد كاملة وحتى الاجانب