بصعوبة قدرت نوقف باش نمشي للسرجم نشم شوية ديال الهواء وقفت وانا راسي كيدور فتحت السرجم واستقبلني القمر بابتسامة زوينة بزاف ونسيم رائع دغدغ قلبي ورجعو للحياة ابتسمت وقلت:
انا: كتضحك معايا ولا عليا؟ يالاه هدر متخلينيش داوية بوحدي.
مجاوبنيش القمر ولكن سمعت صوت المواج كانو مرات غاضبين ومرات خافتين يمكن كيقولي البحر بلي بقيت فيه بزاف ومتعاطف معايا وبلي مستعد ينتقم من أمين ويغرقو هو وديك البنت.
متخلعوش راني كنفهم لغة البحر من الصغر وانا كنهدر معاه وعاودلي بزاف ديال القصص ديال حورية البحر وديال بزاف ديال الصيادة هوما كيخويو قلبهوم عليه وحتى هو كيخوي قلبو عليا.
كانت دار الضيافة ديالنا كطل على البحر مبنية فوق واحد الجبل وكيبان من السراجم البحر والجنانات ديال الكرموس وبطبيعةالحال جردة حدا الدار فيها العنب والاعشاب العطرية والورد ومسك الليل اللي كيتفتح بالليل وكيعطي رائحة كتشفي جميع القلوب وكتجبرهوم تنفست بعمق وخليت الهوا يلعب بشعري ويدخل لصدري باش ينقيه من الطاقة السلبية. رجعت شفت فالقمر وقلتلو:
انا: سعداتك عايش الفوق بوحدك ومهني مكاينش اللي يصدعك ولا يخونك ولا يجرحك مهني مع راسك
الشخص: شكون خلاه اللي حفاتلو كيبدا يشكيلو على همو
انا: انت عاوتاني؟ شنو كدير هنا؟
انا: كنطل من بيتي وكنت كنهدر مع القمر قبل متقاطعينا.
انا: من الاحسن تدخل بحالك حيت هادي بلاصتي وانا اللي كنهدر مع القمر ميمكنش يجي شي واحد يشاركني فيه
هو: شنو هو؟ مالك شارياه القمر ديالنا كاملين.
انا: قلت ليك دخل فحالك
هو: هانا داخل غير متعصبيش تصدقي مغيبة عاوتاني
انا: شنو قلتي؟
هو: تصبحي على خير
عصبني ودخلت بحالي حتى انا جاني الجوع ونزلت ناكل مالقيت حتى واحد كان كولشي ناعس امكن هزيت البلاطو وانا طالعة لبيتي طليت على بيت ماما وبابا ملقيتهومش حطيت البلاطو فالارض ورجعت بغيت ننزل نقلب عليهوم ولكن لقيت داك المرشد السياحي خارج من البيت وقالي
هو: يلاه بغيت نقوليك بلي مكاينينش.
انا: فين مشاو؟
هو: للسبيطار يلاه نديك
انا: شنو وقع ليهوم
هو: والو
ولكن الام ديال داك السيد اللي جا قبيلة جاتها وعكة صحية ونقلوها للمستشفى فالوقت اللي كنتي مغيبة
أنت تقرأ
أحببتك مرتين
Romansaقصة فيها الحب ❤❤ و التشويق و فيها أيضا الحزن لعادة كيجي من بعد الحب لي كيكون من طرف واحد . هاذي قصة حب نهيلة لكتبغي أمين حب من طرف واحد حيت امين كيبغي بنت منذ الصغار ومنذ الصغار عمرو شافها رغم ذالك عمرو نساها وقال عمرو غيتزوج من شي بنت خرى من غيرها...
