كملت النهار وانا مخشية ففراشي كنموت بالغيرة وكنبكي كنبكي على زهري او قلبي فيمن طيحني وخلاني نبغي انسان محاسش بيا ومكيشوفنيش فمرة عايش فالخيال ومن أجل داك الخيال كيحطم شحال من واقع كيبغي وحدة اللي تكون عايشة حياتها وعمرها رداتلو البال ولا عرفاتو.
الغيرة صعيبة ولكن حالتي أصعب حيت انا كينافسني سراب كون غير كانت حقيقة معليش.كنت غنقدر نتعامل معاها ولكن انا كتنافسني فكرة فالعقل ديال الراجل اللي كنبغي ماعنديش كيفاش نحايدها من طريقي ولكن من بعد هادشي اللي وقع صافي بانت ليا الحقيقة.
انسان بحالو ماعندي مندير بيه فحياتي وقفت مسحت وجهي وانا كلي عزم بلي مغانتراجعش وبلي غنوقف كولشي.
خرجت من البيت ونزلت عند ماما عاودتليها كولشي قلت كولشي اللي فقلبي شحال تعذبت حيت كان بعيد عليا وشحال تسنيتو وشحال حلمت بيه وشحال من لحظة عطيتهالو من حياتي وشحال من نهار قدمت مصلحتو على مصلحتي وشحال من فرصة ضيعت باش نبقا معاه وفالاخير صدمني وقالي بلي كيبغي بنت مكيعرفهاش وطلب مني نلغي العرس.
مع اخر كلمة سمعت شي حاجة تهرسات درت لقيت خالتي مامات أمين واقفة كتشوف فينا وهي مصدومة كان وجها صفر وكانت غطيح جريت عندها انا وماما عاوناها توقف وجلسناها.
هي: عمرني ضنيت بلي ولدي غيدير بحال هاد التصرف كيفاش قدر يقوليك هاد الكلام كامل؟
انا: عافاك اخالتي غير بشوية عليك
هي: لا كيفاش قدر؟ واش معندوش العقل؟ شنو هاد التخربيق؟ كيفاش كيبغي شي وحدة شافها فاش كان صغير
انا: اخالتي القلب ميقدر حتى واحد يتحكم بيه.
هي: لاواه الزمر انتي السبب كون من الاول قلتيلو بلي كتبغيه متدخلش ليه ديك البنت لراسو داك النهار قبل ميسافر شحال حاولت نقنعك تقوليلو بلي كتبغيه ولكن بقيتي ساكتة انتي السبب وهاداك الحمق حسابي معاه هو الاخير
انا: خالتي فين غادية؟ تسناي نوصلك متمشيش هكذا.
طلعت هزيت وراقي وخرجت كنجري تبعتها ماخليتهاش تسوق السيارة وهي فديك الحالة. الطريق كاملة وهي ساكتة وكتفكر ولكن باين بلي مقلقة كنت خايفاها تفضحني وتقول لأمين بلي كنبغيه.
انا: خالتي عافاك متقوليش لأمين بلي..
هي: بلي كتبغيه؟ متخافيش هداك أمر خاص بيك وخا خاطئ ولكن ماعنديش الحق نتدخل.
انا: حتى أمين عافاك خليه على خاطرو
هي: أبدا غادي يتزوجك بالسيف ولا بالخاطر وخا نعرف منعرف شنو ندير باش نجمعكوم.
انا: خليه على خاطرو حتى انا مبقيتش باغياه
هي: كتفلاي عليا ولا على راسك؟ انا اللي عارفاك اكثر من راسك وأمين كيما كان ميمكنش تنسايه
انا: ماقلتش بلي غننساه ربما نقدر نعيش مع الذكرى ديالو ولكن معاه أبدا
هي: متاخديش قرار وانتي معارفاش شنو فعقلو وباش حاس انا اللي عارفاكوم بجوج كيفاش دايرين وداكشي علاش بغيت نزوجكوم حيت نتوما مخلوقين لبعضياتكوم وقلب الأم عمرو مكيغلط وصلتها للدار
طلبات مني ندخل معاها حتى يرجع عاد نمشي فاش دخلنا للدار لقيناه وغير شافتو نسات بلي قالتلي بلي مغتفضحنيش قالتلو بلي انا كنبغيه وعاتباتو علاش مكيبادلنيش الشعور وانا اللي ضحيت من أجلو وغدقت عليه بالحب والمساندة والعطف.
غير سمع كلامها ثار فوجها وبدا كيغوت وكيستهزء بحبي وقالها بلي ميمكنش نشريه بالعطف والمساندة ديالي وبلي قلبو ديالها هي بوحدها.
هربت من حداهوم وخرجت كنجري بحال الحمقة حتى تأكدت بلي بعدت منهوم ومغيسمعوش الصوت ديال البكا ديالي وبديت كنبكي ونغوت بحال الحمقة. مكفاهش جرحني وزاد دبا استهزئ بيا وعايرني عايرني حيت اهتميت بيه وساندتو وقدمت ليه يد العون فالعمل ديالو وسهرت معاه وفكرت معاه عطيتو وقتي وصداقتس وكلياني وفلوسي وفضلتو على نفسي وفالاخير مقدرش يشوف الحب بين هادشي كامل واتهمني بلي حاولت نشريه
______________________________________
البنات تفاعلوا شوية راه بداية القصة حطيتها من شحال هادي ويالاه وصلنا ل 1 vote
أنت تقرأ
أحببتك مرتين
Romanceقصة فيها الحب ❤❤ و التشويق و فيها أيضا الحزن لعادة كيجي من بعد الحب لي كيكون من طرف واحد . هاذي قصة حب نهيلة لكتبغي أمين حب من طرف واحد حيت امين كيبغي بنت منذ الصغار ومنذ الصغار عمرو شافها رغم ذالك عمرو نساها وقال عمرو غيتزوج من شي بنت خرى من غيرها...
