أحببتك مرتين

جزء 7

بدا كيدندنلي فودني وكيغني
كان صوتو زوين وهادئ كيخليك تعيش معاه ومتسخاهش يبقى يغني حتى يطلع النهار كان كيقول: شي ماينسيني فاللي راح شي مايخفف عليا لجراحو كان غير الماضي يولي وكرهت الليل وكرهت الصباح للي بنيتو داتو لرياح لوكان غير الماضي يوليو نكره القلب اللي يحبك اللي مابقالو مقام في قلبك اللي بعتو وهو شاريكو نكره القلب اللي يحبك اللي مابقالو مقام في قلبك اللي بعتو وهو شاريكتيرارارارا را راراتيرارارارا را رارا
هو: بنت بحالك مخاسش الحزن يلقى طريق لعندها وجهك مخلوق باش يبتسم وقلبك باش يفرح وعينيك باش يلمعو وتقولي بايباي للجراح.
انا: ياليت المشاعر ترى كي يعرف كل ذي حق حقه...
هو: لا ترى العين عيبا إذا أحب القلب قلبا
انا: على أي شكرا...بزاف
هو: العفو..
متسناش ضميري نحط راسي على الوسادة باش يبدا الخدمة غير ركبت فالسيارة وهو يبدا يولول ويضرب فحناكو ويعاير فيا على شنو درت.
دارلي واحد التصبينة فاعلة تاركة (كنهضر على الضمير ديالها هو لي دار ليها هاد الحالة)
غير وصلت للدار دخلت بالزربة للبيت وسديت عليا وجلست شديت فراسي وبديت كنعاير فراسي شنو درت كيفاش قدرت ندير داكشي؟ علاش ضعفت قدام الجرح ديالي وخليتو يدير ما بغا فين مشات الحشمة
والاستقامة شنو غيكون كيفكر دبا غيقول بلي انا ماعندي كرامة،.......
فالصباح فقت بكري على الدقان فبيتي، مامولفاش كيدق عليا شي واحد، تخلعت ونضت كنجري فتحت الباب وانا مزالة كنشوف جوج من الحاجة، لقيت شي واحد واقف قدام الباب بديت كنعوج فوجهي باش نركز مزيان فيه، بدات الصورة كتوضاح ولقيتو كيشير وهو مبتسم
انا : شنو كاين على الصباح
هو: يالاه راه كنتسناوك تمشي معانا
انا: شكون نتوما؟ وفين؟
هو: غتخرجي معانا دوري شوية....يالاه راحنا كانساينو فيك
مشا وخلاني مزالة مصدومة دخلت تصحصحت او وجدت راسي ونزلت عندهوم مقدرتش نعاود نشوف ليه فوجهو ولكن هو كان طبيعي وماعلابالوش بلي وقعات شي حاجة البارح، ابتسم لي بطريقة عادية وكمل شغالاتو، كان كيشوف السيارة واش واجدة، طلعت مع نفس الناس اللي وصلوني فالطريق. تعرفت عليهوم كانو ضريفين بزاف ومطلوقين جاو من بدينا الرحلة معرفتهومش فين ماشيين وقف المرشد السيارة فجنب الطريق وخرجنا هزو صيكانهوم ودرنا صف تابعين المرشد طلعنا فواحد الجبل وحنا كنهدرو حتى وصلنا للقمة بدات كتبان لينا السما قريبة والارض كروية بقينا جالسين كنرتاحو  عاد كملنا الطريق دخلنا بين شي شجر حتى خرجنا فواحد الشلال كان شلال صغير ولكن رائع وخلاب بقينا غير حالين فمنا فيه.
دوزنا نهار زوين فالجبل وفالعشية رجعنا هبطنا للشاطئ مشينا لواحد المخيم كانو دايرين سهرة تماك فساحة المخيم كانو دايرين منصة ولكن حادرة معالياش ودايرين بيها زرابي ووسايد جلسنا حدا الناس وتسنينا يوصل الوقت باش تبدا الفرق الغنا. فالاول تفرجنا فشي دراري دايرين مجموعات وكيتنافسو شكون اللي يفك الالغاز وعاودولينا النكات وغناو بدا الليل كيطيح تشعلو الضواوات وبرد الحال طلعات الفرقة للمنصة.
كانت المغنية الرئيسية لابسة الاسود وشعرها بني طويل ومخرص كانت بحال شي غجرية كانت لابسة أساور فيديها فاش كتحركهوم كتخليك تتبع يديها وتتمايل معاهو أما صوتها فكان بحال ايلا غادي فشي غابة وكتسمع صوت الما من بعيد ماحدك كتقرب وهو كيجهاد كان صوت عذب كيوصل للقلب ديالك ويشعل فيه جميع الاحاسيس وكيخليك باغي تبكي كانت كتغني بألم على شي واحد كانت كتقولو بلي كان فرحان وكان ديما ضاحك وناشط وكانت الدنيا كدور عليه ومن بعد بشوية بشوية بدا كيبعد وبقا وحيد قالتلو بلي هي فاهماه وبلي احزانو وصلوها وبلي دموعو غرقوها وكتقولو صافي صافي باركة عليه مداتلو يديها باش يرجع للحياة ولكن رفض وبقا عايش فالقفص اللي بناه ليه.