هـاڤـانـا || HAVANA

١١

🎶 كل ثانية ولا ثانيتين ، قلبي يسأل غبت عني فين واما اقابلك بنسى ببقى مين ، طول منا وياك ، مالي ليه اتغير حالي ، هو انا ايه اللي جرالي ، هو انا ايه حبيت 🎶

______________________

** شيرين **

"انجز يا مازن يلا !!"

زعقت وانا بلبس الجزمة بتاعتي علشان اروح المدرسة ، لقيته نازل وبيلبس التيشرت على السلم ..

بابا "هو انا ياض انت مش قولتلك متنزلش بالمنظر القذر دة قدام اختك ؟! وبعدين بتبين ايه اصلا انت عندك حاجة !! ما انت املس ومفيش ولا عضلة في جسمك"

حاولت اكتم ضحكتي بس للاسف طلعت مني ، عملت نفسي كأني بكُح وشيلت الشنطة ..

"يلا هنمشي بقى ، سلام يا بابا ، سلام يا ماما"

بوست بابا من خده على ما مازن قلب ماما في فلوس ، خرجنا واتمشينا شوية ولقيت طارق لسة نازل من بيته ، انشكحت لا اراديًا وندهت عليه ..

"طارق !!"

لف واول ما شافني ابتسم ، وجري عليا ؛ سلم على مازن وبعدين مشي جنبي ..