هـاڤـانـا || HAVANA

١٠

🎶 I want you to breathe me, let me be your air. Let me roam your body freely, no inhibition, no fear. How deep is your love 🎶

____________________________

** شيرين **

عدى اول اسبوع في الدراسة تمام ، قربت من روڤان وكنزي والتوأم اكتر وبقوا صحابي جداا ، طارق معايا في كل كلاس ما عدا العربي والبيولوجي ، دة غير طبعا الأنشطة زي ال P.E والموسيقى والمسرح كان معايا فيهم بردو ..

مازن بقى مبقتش اشوفه غير بالصدف ، كل يوم بيخرج مع العيال صحابه دول .. اما لو بابا شافهم !! دة واحد منهم خارم ودنه ولابس حلق !!

النهاردة كنا الجمعة ، مدرستنا بما انها مصرية ، بتدينا الجمعة والسبت اجازة ، هادي هيرجع من لندن ومعاه ايلين اللي حكالي عنها دي ، انا كنت متحمسة اشوفها بس بردو خايفة ، خايفة احسن تاخده مني ومنبقاش قريبين من بعض تاني.

قعدت قدام البيانو بعزف اغنية لعبد الوهاب ، ماما كانت مع طنط نيكولا ، او زي ما قالتلنا نندهلها .. نِكي ؛ كانت عزماهم عندنا على الغدا ..

- ممكن تعلميني اعزف؟

بصيت جنبي لقيته بودي ابنها ، ابتسمت واتاخرت وقعدته جنبي ..

"هات ايدك"

مسكت ايده وخليته يكمل عزف اغنية يا مسافر وحدك ، ابتسم لما سمع الصوت بيطلع .. سيبت ايده وبقيت اقوله يضغط على ايه ..

"اضغط على دة ، ايوة شاطر !!"

بودي "ايدي وجعتني يا شيري ، اعزفي وغنيلي انتِ"

ابتسمت وافتكرت ان طارق قالي نفس الكلام دة بردو ؛ بدأت اعزف تاني ..

"على نار الشوق انا هستنى ، وهصبر قلبي واتمنى ، على نار الشوق انا هستنى ، وهصبر قلبي واتمنى ، على بال ما تجيني ، على بال ما تجيني واتهنى ، بس انت اياك تبقى فاكرني ، بس انت اياك تبقى فاكرني ، يا مسافر وحدك ، وفايتني ليه تبعد عني ، ليه تبعد عني وتشغلني"

بصيت على بودي لقيته مبتسم وانا كملت غُنى ..

"خايف للغُربة تحلالك ، والبُعد يغير احوالك ، خايف للغُربة تحلالك ؛ والبُعد يغير احوالك ، خليني دايمًا ؛ دايمًا على بالك ، خليني دايمًا ، دايمًا على بالك ؛ يا مسافر وحدك وفايتني ، ليه تبعد عني ، ليه تبعد عني وتشغلني"

سرحت في نص الاغنية وافتكرت كريم ، كريم !! انا مكلمتهوش من ساعة ما جيت أمريكا !! اكيد زعلان ..

خلصت وبعدها سمعت حد بيصقف ، رفعت راسي ولقيت ولدين واقفين جنب بعض كانوا تقريبا من سني ، فيهم شبه من بودي وطنط نِكي ..

بودي "سيف !! حُسام !! جيتوا امتى؟"

حُسام "لسة داخلين دلوقتي"