طـــعنات الأقربون *مكتملة*

الحلقه الأولـــــى

طعنات الأقربون
تأليف:وديان الخير

فراس م 94 شبوب محترم وخلوق يقرأ كليه الطب، اسنان
توفت امه وهو عمره 10 سنوات وطبعا امه المرأه التانيه وقعدت تربي فيه مرت بوه الاولى وعنده زوز خوات بس من بوه ،،ملاك م 95 ..حنين م 2000 واخ واحد حتي هو من بوه اسمه فؤاد م 86

مرت بوه سعاد ،، بوه أحمد

جنى م 97 بنت عم فراس وبنت اخت سعاد يعني بنت خالت فؤاد وحنين وملاك لكن ماتكونش لفراس غير من جيهت بوه ..بنيه طيبه وحليوه عندها اخت وحده اكبر منها ومتزوجه اسمها داليا م 93 واخين اسماعيل م 96 ومحمد م 2005
امها نعيمة ،، بوها جلال

احداث الروايه من يوم 3/8/2016 ..جنى وفراس من مدينة الزاويه

داليا:تعرفي بننتقم من حسن راجلي استاحشتكم ياوخيتي بنبات اسبوع خليه هو ف وسط الجبل عيت واني تقول مقطوعه من شجرة
جنى:هههه جو عليك ياداليا
داليا:الله غالب غر المهم احكيلي شن جوك انتي وفراس معاش بان ولد عمي
جنى:امورنا عسل وحلوه غر شاداته الخدمه اليومين هادم
داليا:كويس ربي يعاونه ..ماتشميش ف ريحة الكسكسي اللي مدايراته امي نوضي نوضي خلي نعولوا معاها نحس ف روحي جعانه المسافه تعرفيها
جنى:كولي انتي ياوخيتي اني دايره رجيم وغداي خيار بس
داليا:رجيم شني وانتي رايحه مسلوله زي العود
جنى:لالا زدت ونحس ف روحي سمنت وفراس مايبينيش نسمن
داليا:غر قداش وزنك
جنى:توا 59 كان 57 زدت زوز كيلو حتي نفسيتي تعبت
داليا:هههه ياحليلي انتي جماعة النفسيات قصدك ع زوز كيلو هادم هكي تقولي
جنى:اكيد ياداليا كل شيئ الا فراس اللي يبيه اني فيه
داليا:بالله نوضي سلم وخيتي اضربيلك كسيكسي قنين وطويسة مشروب وكولي ماتنفعك كان صحتم توا درتيلي جو وفراس وفراس
جنى:هو عيوني وكبيدتي امالا شني
داليا:ياناري علينا رحنا خسارة

.......

فراس:تعرف اليوم ياحمزة تعبت خلاص
-حمزة صديق فراس المقرب
حمزة :اي والله صدقت ياخوي خدمت الزواق اتعب
فراس:الحمد الله اهم شيئ بالحلال وعرق جبين بالله كان مانخدموش من بيصرف علينا وانت تعرف مصاريف الجامعه ومرت بوي سعاد اخخ ياخوي
حمزة:قاعد انت وياها شحنات
فراس :فوت وخلاص ماقاهرني الا عزوتي ف خوتي اخطى حنين والباقي نسكت خير
حمزة:الله غالب مافيش حل
فراس:يقدر الله الخير

.........
ملاك :حنين حنين
حنين:خيرك شن في
ملاك:وين سرحانه يابنت غر ماتكونيش مدايرتلك عمله
حنين:لا مافي شيئ اخطيني بس
ملاك:تفكري ف حبيب القلب وله
حنين:ع شن تحكي اسكتي تو تسمعنا امي
ملاك:اسماعيل من غيره
حنين:تبي الحق اي
ملاك:ياعازتك وقهرتك ياوخيتي الناس تحط عينها ع الحاجه الباهيه وانتي مالقيتي غير اسماعيل السكار والحشاش ولا خو جنى
حنين:القلب ومايريد وبعدين مافيش بيني وبينه شيء لكن مش عارفه هكي نشوف فيه من بعيد لبعيد وحبيته شن ندير
ملاك:دبري راسك اني قتلك والله مايستاهلك
حنين :حبيته وفات

.........
فراس:نوصلك لحوشك حمزة ولا تكسد معاي
حمزة :لالا لحوشي طول بندوش وبنرتاح اليوم خدمنا هلبا
فراس:تمام ...تعرف امس ماكلمتش جنى بكل
حمزة:علاش
فراس:مافضيتش من حاجه لحاجه وانت عارف ياولد امي
حمزة:ترا اتصل وشوفها
فراس:نزيد شوية ونشوفها حتي بعدين خل نحطك ونفضالها
حمزة:دير رايك

......
جنى شاده التلفون وتتفرج ع صور فراس ورسايله ومستاحشاته
ع خشت داليا
داليا:ياناري ع العشق والحب والغرام والشوق اااه ياحسرتي اني
جنى:هههه خيرك عليا اليوم خليني ف حالي
داليا:حييي ع منضرك ياجنى ههههه كان تشوفي عيونك كيف يلمعوا من كثر الشوق وجهك كيف مولي والدموع ف عيونك ياناري عليك ياوخيتي غر اصبري بس وتو تتزوجيه وتعرفي روحك انك عايشه ف وهم هههه
جنى:لا مش وهم فراس وحبيبي ونعرفه يبيني ونبيه ومافيش احلى من حب ولد العم
داليا:ربي يحفظكم ويتمم ع خير
جنى:اميين يارب

ع اتصال فراس

جنى:اهو اتصل
داليا:هاتي بنرد عليه اني
جنى:علاش
داليا:غر هاتي
داليا:اهلين ولد عمي كيف حالك
فراس مستغرب؛ماتقوليليش داليا
داليا:اي داليا يافراس
فراس:الله عاش من سمع صوتك وينك من يوم اللي خديتي الجبالي معاش شفناك
داليا؛اي والله حتي اني مستاحشتكم هلبا شن جوك انا والبنات وعمي وخالتي وخوك
فراس:تمام الحمد الله كويسين شن جوك انتي وراجلك
داليا:كويسبن الحمد الله ..الا بنقولك يافراس
فراس:ان شاء الله خير
داليا:هالمتروشقة اللي جنبي
فراس:ههههه اي عرفتها شن دايره
داليا:اليوم متغديه خيار ومدايره رجيم شوفلنا معاها حل
فراس:لا عاد مش هكي
داليا:اهي معاك شوفلنا حل معاها.. بالسلامه مني امالا
فراس:هههه حاضر ..بالسلامه

جنى:الووو
فراس:هلا بيك
جنى:المفروض معاش تكلمني
فراس:وعلاش شن درت اني
جنى:حارمني يوم كامل من صوتك
فراس:اضرب ههههه كان حرمتك يوم تبي تحرميني منك العمر كله
جنى:ايوه باش معاش تعاودها
فراس:هههه حاضر ياابله اي حاجه تانيه المرة الجايه نكتبه الواجب كامل
جنى:هههه ايوه باش تاخد الدرجة كامله
فراس:هههه احكيلي شن قصة ريجيمك قالت داليا حارمه روحك هكي ع خاطري وكان تصير فيك حاجه معاش مسامح روحي
جنى:بعيد السو عليك ياقلبي
فراس:خلاص امالا الهي بصحتك اوعديني ..انتي الوحيده اللي من عيلتي واقفه معاي مانبيش يصيرلك اي شيء ارجوك
جنى :وعد خلاص حبيبي ماتفكرش ...لكن خيره صوتك مش عاجبني
فراس:تعبان شوية من السلوم مايساعدش ف الخدمه
جنى:رد بالك ع روحك
فراس:حاضر بإدن الله

وقعدوا يهدرزوا

.......
......
سعاد:شن يابنات خوكم وين
ملاك:هوني منطمر ف المربوعه
حنين:تكلمي بااسلوب
سعاد:اسكتي انتي يامتع المثاليه حصله عقاب العمر هالفراس ينوض ايسقي غداه بروحه
حنين:علاش خيره شن دارلكم بس هو حتي فلوس خدمته يجيبلكم فيهم ومع هدا مش عاجبكم
ملاك:هيه هيه شن نسيتي إن هذا خوك من بوك
حنين:وكان خوي من بوي مش نفس الدم ولا شن قصتكم انتم
سعاد:مهما صار الولد هدا مستحيل نحبه ولا يخشلي خاطر من مواقف امه اللي جابها بوك عليا ضرة وهي اللي كانت واخده قلبه وعقله حتي يوم اللي ماتت بكي عليها اكثر مابكي ع امه وتبيني توا نعامل ولدها بقلب ورب مستحيل بري فكيني ترا
حنين:حرام عليكم المرأه ماتت والله يرحمها شن مزال تبو وكان ع فراس اني نايضه نسقيله ف غداه الدنيا وليها الله وربي فوق

وناضت حنين
فراس كان واقف يسمع ومتأثر لن خلاص

يتبع ...اعطوني رايكم