بعد ما دز همام هاي الرسالة كره روحه ويفكر دائماً بينه وبين نفسه انو هو اللي انطاها هذا المجال كله وخلاها تخونه خلاها تحجي وية واحد غيره وتفاجئ اكثر من قر الرد مال ميمونة
(مثل ما انت خنتني اني اخونك )
هاي الرسالة خلته يراجع نفسه ١٠٠ الف مرة ويشوف شوكت خانهه وهو اصلا ميباوع على بنية بالشارع يخاف لسخون بالنظرات انوب خيانة ظل يفكر بالسالفة وميلگة اي حل لهذا التفكير وعلى گد ما حاول يلگة خطأ واحد منه على گد ما يشوف روحهه شگد چان وفي وياها شگد چان يحبهه ويخاف عليهه حتى من عصبيته حتى من الهوى اللي تشتمه وما لگة نفسه مسوي اي شي .. الى ان رد عليهه
(تدرين بيه اني شلتچ من ع الگاع خليتج دنيتي كلهه وبالنظرات مگدرت اخونج فلتحطين هاي الچذبة هي الحل للخطأ اللي سويتيه تدرين بيه كلش زين ماخونج )
وراها بساعات يلا ردت عليه وگالتله
ميمونة : شوف حسابك بالفيس وشوف البنات اللي تحچي وياهن
همام : هذا حساب بالفيس دوري بيه اذا لگيتي شي الج حق بس گولي مليت وردت اشوفلي واحد بمكانه
ميمونة : تدري بيه كلش زين مو هذا طبعي
همام : للأسف مچنت ادري انتي وصلتي لهالمرحلة چنتي تحچين وياه من احچي وياج شهالنفسية اللي عندج واللي تخليچ تحچين وية اكثر من ولد هم اني الولد ومسويت هالشي
چان همام ينتظر الرد على احر من الجمر بس الصدمة الاقوى من شاف حسابهه ميگدر يفوتله !! حظرت همام من الفيسبوك ... ظل همام يحاچي نفسه (شنو هالگلب اللي عندچ شلون گدرتي تسوين هالشي وشلون قبلتي على نفسچ تسوينه هيچ تجازيني !؟ )
السالفة هاي تعبت همام حيل لأول مرة همام يتمنى الموت يتمنى انو ما انولد للدنيا ما حب اي بنية وتعلق بيهه مرتين المرة الاولى حب وحدة وماتت والمرة الثانية حب وحده وخانته ... شي صعب لا هي اللي ماتت مثل زهراء حتى ع الاقل يگدر ينساها بس هي قاعدة عامة (رب العالمين ما ياخذ بس الزينين اللي گلوبهم طيبة ).
مرت سنة وكم شهر همام تغير حاله وطب كلية الهندسة وكلهه بعد ٤ سنين ويصير مهندس و يصيرله صيت بالمجتمع وحميد دخل كلية الصيدلة ونفس حالة همام صارت الدنيا حلوة گدامهم .. اجتي رسالة الساعة ب ١٢ و ثلث رسالة لهمام من شخص ميعرفه وداز رسالة وكاتب بيهه ( مبروك حب ع الكلية ان شاء الله اشوفك بأعلى المراتب )
همام ما انطه اي اهتمام لهاي الرسالة ورد (الله يبارك بيك حبيبي ممنونك بس معرفت منو حضرتك ؟)
اجاه الرد (صديق قديم تگدر تسميني مثنى )
همام : ما اتذكر اني اعرف واحد بأسم مثنى !!!
مثنى : بمرور الأيام راح تعرفني
همام : ما اتصور .. لأن ماعندي ثقة بصديق لا جديد ولا قديم الا واحد
مثنى : ومنو هو ؟
همام : ميخصك هالشي حبيبي هسة مگلتلي شلون عرفتني وشنو اللي تعرفه عني ومنيلك الحساب هذا وليش مفتتلي من حسابك الحقيقي ؟
مثنى : گلتلك بمرور الايام تعرفني وراح تفرح من تعرفني .. واعرف كلشي عنك وحسابك موجود بكل مكان وهذا حسابي الحقيقي (M emanuil)
همام : اوكي زين شنو المطلوب مني ؟!!
مثنى : بس جيت اباركلك على الكلية لا اكثر ولا اقل
همام : الله يبارك بيك حبيبي .. ممحتاج شي ؟!
مثنى : سلامتك ياغالي .
ظل همام يبحث بهذا الحساب الى ان اخترقه بس !!! بدون فايدة ماكو بس المحادثة بين همام ومثنى ( معقولة شخص بحسابه الرئيسي بس يحچي وية شخص واحد ؟! شي يحير والله ع العموم اتركهه على رب العالمين ثقتي بيه چبيره ) همام بينه وبين نفسه ...
ظل مثنى يحچي وية همام وبلش يگلة نصايح ع الحب فادت همام فائدة چبيرة كلش وحچالة همام على سالفته وية ميمونة وشصار وياها وهو يواسيه وفهمه شيسوي حتى يتخلص من هذا القهر اللي هو بيه وهمام وياه ويسمع حچيه الى ان صارت ثقته عالية بمثنى وظلوا يومية يتحاچون وبعدهه بشهر ونص اجة اليوم اللي گال بيه مثنى
مثنى : همام اريد اگلك شي بس ماريدك ابد تضوج
همام : گول ضلعي
مثنى : اني مو ولد اني بنية
همام : ؟
مثنى : مثل مداكلك وراح اسمعك صوتي
ودزت البنية اللي مسمية نفسهه مثنى رسالة صوتية
همام : سامع هالصوت منو انتي ؟!!!!
مثنى : اني ميمونة
همام : والمطلوب ؟
ميمونة : همام اسفه والله لاحظت اني شگد متغيرة وحتى حاولت انسيك نفسي لأن ادري انت متعلق بيه والله اني هم متعلقة بيك وماگدر اعوفك وتبقى ببالي ٢٤ ساعة والله احبك
همام : بس اني ماحبج
ميمونة : لا تحبني وغصب عنك تحبني مثل ما اني احبك لا تتركني وحدي والله بدونك اموت
همام : الدنيا متوگف على احد وخليهه ببالج هاي اللعبة اللي سويتيهه حتى تحننين گلبي عليج مترهم مراح احبچ واذا صارت وحبيتج مرة ثانية مراح تصير عندي اي ثقة بيج
ميمونة : همام اني ميمونة حبيبتك
همام : واني همام اللي خنتيه
ميمونة : اسفة والله بس لأن انت خنتني اني هيج سويت حتى اشوفك شنو اللي يصير بالواحد من يخونه حبيبه
همام : هاي الچذبة انتي مخترعتهه حتى تقنعين عقلج انو اني السبب مو انتي
ميمونة : لا هذا اللي صار وعندي دليل
همام : شوفينياه وشوفيني شوكتاني خنتج اني اصلا ماباوع على اي شخص من وراج حتى ابقى بنظرچ الشخص المثالي وبالتالي هيج تسوين خافي الله شوية ......
-------------
انتهى البارت السادس
ان شاء الله ينال اعجابكم
لا تنسون التصويت وتعليقاتكم تهمني ❤️
أنت تقرأ
طيش شباب (باللهجة العراقية ) مكتملة
Humorالسلام عليكم الرواية هاي كوميدية - دراما - رومانسية كلشي موجود بيهه واللي ما يفتهم باللهجة العراقية يكتب بالتعليق شنو اللي مفهمة من الكلمات واني اشرحهه اله ❤❤
