طيش شباب (باللهجة العراقية ) مكتملة

النهاية (الجزء الاول)

بعد ما عرف همام القصة من حميد وبعد ما گال عوفهه على الله فكر همام اذا همة فرحانين ليش ما يكمل فرحتهم ؟! ليش ميجمعهم سوة وهمة واحد فرحان باللاخ ؟!

راح همام لحميد وگاله شلون يتصرف وفهمه شنو يكتب وبالفعل حميد سوة هذا الشي وسمع كلام همام ووراها بدقايق حميد يدز رسالة ( همام گالتلي احبك ) .. طبعاً هالكلمة معناها كلش حلو بس الحب مو بس كلمة شعور .. احساس .. جمال كل هذي الامور هي تعتبر حب مو شخص گال كلمة الحب و خلص .. على العموم حميد چان كلش سعيد بهذا الحب .. اقصد بداية هذا الحب وهمام حياته متركزة على الشغل والدراسة وبعدهه النوم .

بعد مرور شهرين

حميد : همام اني دا اتعب من هذا الوضع

همام : ليش ضلعي شنو صار وياك ؟؟

حميد : تتذكر من گلتلك همام امهه درت بالموضوع ؟

همام : اي اتذكر كلش زين بس انت ردة فعلك چانت كلش حلوة انو راح تخطبهه .. صار شي جديد ؟!

حميد : اي امهه متقبل لحد ما تخلص دراسة ومتقبل احجي وياها !

همام : گول يالله اكيد راح يجي اليوم الي بيه راح تنجمعون وتنحل كل هاي المشاكل !!

حميد : الله كريم حجي الله كريم .. انوب طالعتلي بشغلة صفح منگدر نحچي غير نص ساعة كل اسبوع
همام : هاي شنوو ! تحچي صدگ ؟!

حميد : اي والله داحچي صدگ هالشي حتى مو هي وصلتلياه اختهه وصلتلياه

همام : زين هو منتهين من هالشي انو امهه السبب بس سؤالي الك انت مالي ايدك من البنية يعني تعرفهه كلش زين ؟

حميد : مفهمت وضح اكثر

همام : يعني البنية مراح تطلع خاينة متدگ بيك الناقصة وتروح بين قوسين محترمة نفسهه ؟؟

حميد : هاي شبيك اگلك گرايبي اكيد مالي ايدي من عدهه

همام : لعد انطيهه للشغلة مجال ترة هالموضوع ابد مو هين وخصوصاً اذا الاهل دروا او عرفوا بنتهم تحب واحد او ابنهم يحب وحدة

حميد : والله حچيت وية اهلي ووصلت الفكرة لأمهه انو اني مستعد اخطبهه وگالت من يصير كلشي رسمي يلا هسة خلي البنية تلتهي بدراستهه وانت هم التهي بدراستك وازيدك من الشعر بيت من تباوع عليه امهه تريد تاكلني مو گاعدة گدامي ومبتسمة وبس تخزر بيه

همام : زين اخاف انو رايدة بنتهه لواحد ثاني من گرايبهه ؟؟

حميد : حتى اذبحهه واذبح امهه هو اني چنت اكرهه وادعي الله انو احبهه ومن حبيتهه هيچ يصير !!!!!

همام : حجي اني من گلت هيچ مدا اضوجك بكلامي بالعكس چنت رايد الگه حل وياك

حميد : عادي ضلعي عادي

والايام مواگفة .. تمر الايام وتمشي بسرعة ويوم عن يوم ديتغير كلشي بس بشكل تدريجي وحميد مقدم كلشي لشمس وشمس بعدهه على نظام كل اسبوع نص ساعة بسبب اهلهه وبسبب دراستهه "حسب ما تگول هي" ( شمس طالبة سادس وحميد طالب مرحلة ثانية وثنينهم دراستهم صعبة لهذا السبب محد چان يحس بتغيير لأن الظروف الدراسية الي همة بيهه متساعد ) الى ان تخرجت شمس من السادس ودخلت طب عام اكثر شخص چان فرحان بتقدمهه هو حميد لأن فعلاً حس انو هي چانت تعبانة وورة هذا التعب حصلت النتيجة الي تريدهه بس بنفس الوقت محد چان يدري انو راح تصير تغيير جذري لشمس ودخلت شمس الكلية وحميد طبعاً من ايام السادس چان كل اسبوع او شهر يجيب هدية صغيرة وبسيطة لشمس حتى يحسسهه بحبه الهه ف من دخلت للكلية گام تقريباً بين فترة وفترة يروح ويشوفهه .