طيش شباب (باللهجة العراقية ) مكتملة

البداية

همام شاب يحب يجرب كلشي بالدنيا .. شاب غني بشكل ويكدر يسوي كلشي يريده وتقريباً عنده معرفة بكلشي .. لاعب كرة قدم كرة سلة سباح رسام وطباخ بين قوسين جوكر بكلشي يرهم .

من جان عمره 15 سنة جان حالة حال الولد الباقين بعمره يومية يلعب طوبة بالشارع وبيوم من الايام اجة شخص تقريبا نفس مواصفاته لهمام هم يحب هيج شغلات اسمه حميد .. وتعرف على همام وجانت علاقتهم سطحية بشكل يعني على كد السلام .

بيوم من الايام تعارك همام بالشارع فتعاركو ضده 3 يعني مية بالمية همام راح ينكتل لأن الكثرة تغلب الشجاعة .. اجة حميد طاير على همام وكلب السالفة كلهه بحيث طيحو حظهم .
ومن هاللحظة بدت صداقة همام وحميد وبدت علاقتهم اللي متنحزر هي شنو .. بيناتهم محد يحترم اللاخ بشكل يخرب ضحك .. وكدام العالم اللي يشوفهم يكول هذولة ماكو مثل صداقتهم بالعالم .

مرت الايام وهمام صار عمره 17 سنة .. ومرة جان يتمشى بالشارع حتى يروح لحميد فاتت من يمه بنية انعجب بيهه كلش بس ميعرف وين بيتهم ولا يعرف شي عنهه راح ركض على حميد ودك باب بيتهم وطلعله حميد
همام : لك يول اخوك انعجب بوحدة
حميد : طاح حظك عبالي فدشي مهم لك هستوني كعدت من النوم
همام : يا نذل اكلك انعجبت بوحدة لك شكلهه حلو كلش واخلاقهه هم نفس الشي
حميد : وين بيتهم ؟
همام : لو اندله اني جان باوعت بجهرتك الزفرة لك ما اندله غير حظ هذا !!!!
حميد : لتخاف راح نندله بس شوية انطيني صبر خلي اغسل وجهي واكل بسرعة واطلعلك
همام : روح تزقنب من يوم اللي عرفتك انتة جوعي ولي روح اكل
حميد : خلصت ؟
همام : لا بعدني
حميد : من تخلص انجب وانتظرني اكمل واجيك
همام : يلا ولي بسرعة كمل وتعال
حميد : اوك

ظل همام ينتظر بباب بيتهم ربع ساعة وطلعله حميد وبيدة كلاصين جاي حتى يشربون ويكعدون يفكرون بالسالفة ومنية هي البنية .. ورة مدة كاله حميد
حميد : يمكن عرفتهه منية هي لأن الوصف اللي وصفتلياه احس روحي شايفة قبل
همام : اذا الطمك هسة بالكلاص اللي بيدي احد يكلي ليش ؟
حميد : ليش ؟
همام : لك صارلي ساعة اريد اطلع منك بجملة مفيدة ماكو سطرتني سطر اخر شي تطلع تعرفهه ؟
حميد : مو اكيد اعرفهه بس اتوقع عرفت وين بيتهم
همام : عندي فكرة
حميد : كول يا بروفيسور
همام : نكعد ننتظر بباب بيتنة لحد ما هي تطلع من بيتهم ونعرفهه منو
حميد : عادي ماعندي اي شي امشي خلي نروح ببابكم
راحو همام وحميد يكعدون بباب بيت همام وكعدو يسولفون ويمشون وكت لحد ما تطلع هي من بيتهم

حميد : اكلك خلي نجمع الولد ونلعب طوبة بينما تجي هي ماشي ؟
همام : اي يلا مو مشكلة .

اجوي الولد وتجمعو وكالعادة الاهداف لازم طابوكتين ويقيسون المسافة بيناتهم حتى يصير شي رسمي .. وبنص اللعبة اجتي هي وهمام مجان منتبه عليهه نهائيا لأن بيده الطوبة ويريد يكول .. وضرب الطوبة اجتي ببطنهه !!!! همام وجهه كام ينطي الوان وحميد صافن على همام شسوة من سالفة .. البنية لزمت بطنهه من الالم وراح همام عليهه يركض

همام : اسف والله العظيم مو قصدي والله مجنت منتبه عليج كلش اسف .. خوما تأذيتي
زهراء : لا عادي مابيه شي بس شوية بطني كامت تأذيني
همام : امشي خلي ارجعج للبيت ( يريد يصير لوتي حضرة جنابه )
زهراء : لا تسلم مابيه شي لتخاف راح اروح للماركت وارجع ( طلعت الوت منه :) )
همام : خليج اني هسة اجيبلج شتريدين
زهراء : لا والله هسة اني اروح وارجع ميحتاج تروح انته .. شكراً
همام : العفو بس اذا تريدين اجي وياج .
زهراء : كلتلك ميحتاج
همام : اوكي اوكي !!!

كملو الولد لعب وراحت واجتي همام وكف اللعب حتى تفوت هي وفاتت من يمه هي مبتسمه وهو وجهه صاير بنفسجي من الخوفة .. مجان خايف على نفسه بس خايف لا تاخذ من عنده موقف وبعد متباوع بوجهه اصلا بس من ابتسمتله عرف انو هي مضايجه من عنده ..

يتبع ...

لهنا خلص البارت اتمنى يعجبكم
تصويتكم وتعليقكم يهمني .. لا تبخلون عليه بيهن