طيش شباب (باللهجة العراقية ) مكتملة

النهاية (الجزء الثاني)

بعد شهر تقريباً اجته رسالة من شمس ونص الرسالة

شمس : حميد اني اسفه على الي صار كله اعرف اني غلطت بالشي السويته وبالكلام الي گلته كلش غلطانة اني بس انت تعرف چانت عليه ضغوطات كلش هواي اهلي والدراسة وانت تعرفهن كلهن وتعرف كلش زين اني بشنو چنت امر وحالتي النفسية چانت زفت وكلش تعبت واريد نرجع سوة نرجع مثل قبل واحسن

الفترة الي راحت على حميد يعني قبل لا شمس تدزله رسالة چانت فترة كلش طبيعية چان ملتهي بدراسته وملتهي يعيش حياته يطلع ويتونس ويغير جو وميفكر بالموضوع الي صار لأن هو على قناعة تامة انو هو مغلطان بشي وقدم كل الي يگدر عليه بين قوسين چان مقدملها گلبه على طبق من ذهب بس هي مقدرت هالتعب ومقدرت هالحب وعلى الاغلب چانت تشوفه ضعف رفم انو الحب عمره ما چان ضعف .. چان يسوي المستحيل بس حتى يسعدها

قرة حميد الرسالة وچان جوابه هو عدم الرد مجرد شاف الرسالة وطلع منها بعد وقت قصير ظلت تجيه رسايل وهو ميرد عليهن لأن عرف شنو السبب الي خلاها تتركه ونفسه حيل ممتقبله وجود شمس بحياته والسبب انو هي تركته لأن چانت معجبة بشخص موجود وياهم بالكلية بنفس الوقت .

وتمر الايام ومتوگف وحميد تجيه الرسائل وتعامله وية هالرسائل بالبرود التام لدرجة انو الموضوع انتهى بالنسبة لحميد يعني صار وجودها بحياته او عدم وجودها نفس الشي ودائماً يتذكر انو هو على گد ما چان زين وياها وقدملها التضحيات وتنازل الها على اغلب الامور بس هي موگف بعينها هذا التعب كله ولا قدرته ف لهذا السبب هذا البرود چان نتيجة لأفعال شمس .

اما بالنسبة لهمام الي واجهته صعوبات كلش هواي بس بعد فترة من الزمن رجع الاتصال من الشركة مرة ثانية وانقبل بيها بعد مقابلات كلش هواية ومشت حياته طبيعي وتحسنت بشكل تدريجي وصار شغلة ودراسته وحياته اهم شي عنده ويحاول ويطمح انو يوصل لمكانة كلش عالية ويفخرون بيها اهله واصدقائه وبنفس الوقت تكون حياته افضل وافضل .

بالنسبة لحميد وعلاقته بهمام ف صارت اقوى من قبل اغلب الاوقات يطلعون سوة ويحچون سوة وصارت علاقتهم اكثر من اخوة ونگدر نگول علاقتهم صارت مثل هذا المثل "رُب اخٍ لم تلده لك امك" هذا المثل حرفياً ينطبق عليهم وعلى علاقتهم ببعضهم

اما بالنسبة لحياتهم الشخصية ف اثنينهم خطبوا وصاار هدفهم هو تكوين حياة جديدة بعيد عن المشاكل والتعب ةتستقر حياتهم الى ان تواجههم صعوبات ثانية وهمة راح يگدرون يحلوها مثل ما خلوا مشاكلهم السابقة ورة ظهرهم وحلوها بشكل كلش حلو .

لا عبالكم القصة انتهت لأن اكو الاف الاشخاص مثل همام وحميد الي تعبوا بحياتهم وواجهوا الصعوبات فغايتي من هاي القصة هي انو مهما راح تشوفون بيها صعوبات ومهما راح تشوفوها انو لهنا الحياة قفلت وصارت مستحيلة فراح تمشي الحياة برضاتك او غصب عنك بس لازم تتعامل وياها بشكل صحيح حتى انت تغلب الصعوبات مو الصعوبات هي الي تتغلب عليك .. ولازم تصحح مسار حياتك وتراجع حساباتك لأن الي ديصير بحياتك عبارة عن طيش شباب ولازم هذا الطيش نهايته وعي ونهايته هدف لازم تحققه وتسعى اله .. ومو ضروري يكون عندك عدد چبير من الاصدقاء لأن بوقت الي راح تحتاجهم مراح تلاگي اي شخص يوگفلك منهم بس اختار الصديق الي قبل لا توگع تلاگيه هو بظهرك وهو سندك .. ناس هواي راح تختفي بحياتك بسبب الموت بسبب المشاكل بسبب الفراق بس ثق بالله انو الحياة مراح توگف عليهم بالنسبة للناس الي اختفوا بسبب الموت ف أدعيلهم بالرحمة وتذكرهم بكل خير والناس الي اختفوا بسبب الفراق سواء كان بتفاهم او بمشكلة فحاول تتجاوزهم وخليهم همة طريقك للنجاح حتى يشوفون نجاحك وتقدمك بالحياة وانت وين صرت بعد ما خسروا شخص مثلك ساعتها راح يتمنون لو ترجع لحظة وحدة وياهم بس وقتها راح يكون فات الاوان .. والي يحبك والي يكرهك مشتركين بنقطة وحدة يريدون يشوفون نهاية هدفك شنو راح تكون .. الي يحبك راح يفرح لنجاحك وتقدمك ويزعل وينقهر اذا صاب هذا الهدف فشل بسيط .. والي يكرهك راح يزعل وينقهر اذا يشوفك تنجح وراح يسوي المستحيل حتى بس يشوف هدفك يفشل واذا راح تفشل ف اول الشامتين بيك راح يكونون همة فلا تنطيهم هاي الفرصة ودائماً تغلب عليهم بنجاحك .

هذا ملخص بسيط للي مريت بيه بالحياة والتجارب الي صارتلي بيها والحمد لله تعلمت من اخطائي واتمنى انو الكل تتعلم من اخطائها حتى تكون الحياة بالنسبة الهم احلى .. وتذكروا دائماً ...

"عيش الحياة وكأنها اخر لحظة بعمرك .. عيش بالأمل .. عيش بالتسامح .. عيش الحياة بطبيعتها وارضى بكلشي يجيك لأن هو من رب العالمين "

اخوكم .. همام

البارت الجاي راح يكون تعليقاتكم الحلوة الي شجعتني انو كل فترة انسى بيها الرواية ارجعلها ف راح يتضمن البارت الجاي تعليقاتكم ووياها منشن الكم هم

نتلاگى بشي جديد .. استودعكم الله ⁦♥️⁩