طيش شباب (باللهجة العراقية ) مكتملة

"خسارة" الجزء الثاني

مريم : همام انت سني لو شيعي ؟

همام : اني .....

مريم : عبالي انت .....

همام : ماكو فرق كلنة مسلمين .. ليش انتي شنو ؟

مريم : اني .....

همام : اتشرف بيج گلتلچ ماكو اي فرق بيناتنة كلنة مسلمين .

مريم : لا همام اكو فرق وهواي فرق هم

همام : شقصدچ ؟

مريم : احنة منرهم واحد للثاني انت مو من طائفتي

همام : ههههههه شهالتخلف الي انتي بي دتتشاقين اكيد لأن ادري بيج انتي شنو وعقليتچ شنو .. وبعدين من شوكت انتي الچ علاقة بالدين

مريم : خليهه للوكت

همام : بمعنى ؟!

مريم : كلشي بوكته حلو

همام : الله كريم

وراها بساعة همام ظل يفكر بالموضوع "ليش صارت التفرقة هاي ليش هالكلام وليش هالتصرفات يعني ماكو اي فرق بيناتنة احنة ثنيناتنة مسلمين ونگول اشهد ان لا اله الا الله وان محمد رسول الله الفرق بيناتنة همة يكملون واحنة نوگف لهنا معقولة .. اذا احنة ثنيناتنة مسلمين وكلهه نفس الديانة راح اگلهه اصير من طائفتچ واحل الموضوع .. لحظة خلي لا استعجل خلي تجيني منهه الضربة يلا اگوللهه بهالكلام " .

وظل همام يتمشى بغرفته الى ان داخ من الفرة وراها لزم تلفونه وفتح الانستگرام وفتح المحادثة وياها "زين هسة شأگوللهه ! شهالسالفة التعبانة الطلعتلي بيهه صفح يعني يا ربي الا تصير هاي الفتنة .. الحمد لله "

همام : hey whats up girl "هلو شلونچ"

ماكو رد وظل همام ينتظر وينتظر عبر يوم كامل وهي مموجودة وظل همام يسولف وية نفسه " يمكن مشغولة شوية يعني يمكن مو اكيد بس اتوقع الموضوع الفتحته وياية اله تأثير "

ورة النقاش الصار بيناتهم بيوم اجت لهمام رسالة كلش طويلة

مريم : هلو همام شلونك ان شاء الله بخير .. شوف همام انت خوش ولد وابن ناس بس احنة ممتوالمين حيل ممتوالمين اعرف اني عندي هواي اغلاط بس لازم هالمرة اختار شي صحيح لأن هالشي يعتمد عليه مستقبلي ولازم اظل احاول الگة الصح لحد ما الگاه واختاره .. ما انكر اني حبيتك حيل وچنت الية صديق واخ واب اعتبرتك كلشي بحياتي رغم اني مشايفتك ولا مرة بس وجودك ويايه غيرلي حياتي بهواي شغلات وظليت تدليني ع الصح هواي واني عدلت نفسي وياك ووياك شفت هواي شغلات شفت الحنية والحب والاخلاق واني ببالي كل الولد تعبانين بس انت استثناء عن هالشي وانت تستاهل احسن مني بهواي واتمنى انو مترد على هاي الرسالة وتكتفي بس بقرايتهه "

صح هاي الرسالة چانت صدمة كلش قوية على همام وخلت حياته بالمگلوب لأن مريم بالنسبة لهمام شي كلش چبير لدرجة انو همام ميمشي يومه بدونهه وفكر همام انو لازم يردلهه هذا الرد

همام : شوفي مريم اذا من ناحية انو انتي لازم تختارين الصح بحياتج ترة انتي ممختارة شي غلط واذا اني غلط بسبب مذهبي ف مستعد اصير مثل مذهبچ لأن ماكو فرق نهائياً ماكو فرق .. هاي شغلة والشغلة الثانية صح اني استاهل احسن منچ بس الاحسن منچ ماريده اريدچ انتي اني رايدچ الچ مو الاحسن منچ واذا اني استثناء ف استاهل حيل انو تنطين فرصة لهاي العلاقة .

ما اچذب عليكم همام من كتب هاي الرسالة الدمعه طفرت من عينه لأن چان الشخص الوحيد الي فاهمه هو مريم وخسرهه بسبب هالشي صح بالرغم انو همام كلش صعب تنزل دمعته بس نزلهه ل٣ اشخاص (زهراء ومريم وقصي )

نرجع شوية ليورة حتى نعرف منو هو "قصي"

قصي يصير ابن عم همام بس متربيين سوة وقصي اكبر من همام ب٩ سنوات بس چان همام متعلق بيه حيل مو شلون ماچان لدرجة انو همام مرات يفضل يختار قصي على اخوه الچبير (بلال) لدرجة انو يصعد على چتفه ويگعد يلعب بشعره .. اكو كارتون من چنة صغار نشوفه اسمه انا واخي الصورة الي تمثل علاقة همام بقصي هي نفس الصورة الي بالكارتون بين الاخوان چانت ايام حيل حلوة .. بيوم من الايام وبالتحديد يوم ١١/٣/٢٠٠٥ هذا واحد من اسوء الايام الي مرت على همام كالعادة چان ينتظر همام رجعة قصي من الشغل حتى يسلم عليهم ويرجع لبيت اهله بس قصي ما رجع وهمام گعد الگعدة الطفولية بباب الشارع دينتظر رجعته بس للأسف ما رجع .. دگ التلفون على والد همام وماچان الرد من والد همام غير لا اله الا الله وگام يبچي سألوه عائلة همام شصار مچان الرد غير انو قصي "انكتل" .. مصدگ همام هذا الشي رغم انو هو صغير بالعمر بس ظل ممصدگ هالشي صديق عمره واخوه الچبير والي دينتظره مات ؟ بعد ميشوفه؟ ميسمع صوته ؟ ميصعد على چتفه ويلعب بشعره ؟ ماچان من والد همام غير انو يلبس هدومه وياخذ سيارته وبعد عركة قوية اخذ همام وجابو جثته .. الحلو بالموضوع انو هو الوحيد الي چان صغير بالعمر وخلوه يشوفه و لآخر مرة بحياته طلقتين وحده براسه والثانية بصدره .. صدمة كارثية خلت همام يشيب وهو طفل .. ودموعه الطفوليه على خدوده ويصيح باچر راح تجينة للبيت مو ؟ الله يرحمه .

نرجع لموضوعنه صح همام تأثر حيل بالرسالة الي دزهه لأن مثل ما گلنه مريم غالية حيل على همام بس هالكلام بعد ميفيد لأن چان الرد من مريم بس

مريم : اعتذر على الي راح يصير .

ضربت همام بلوك من الانستگرام . ظل همام يحچي وية نفسه " صدگ يعني ضربتني بلوك علمود هالشي وگلتلهه راح اصير من طائفتچ !! يلا هي خربت حيل بس خليهه ترچية بأذنك ولا تنسة هذا الدرس الي صارلك اليوم .. انت اقوى بهواي من هالشي .. لا تهتم لشي محد يستاهلك " .

يتبع
-----------------
طبعاً اعتذر على نمط هاي القصة او الرواية مهما يكون اسمهه بس الي احسه انو اني گاعد گدام الي ديقرة واحچيله الي صار ف اتمنى ما تستغربون هالشي لأن دا احس انو اني داسولف وياكم
وشكراً من كل گلبي على التعليقات الحلوة الي تجيني منكم .
لا تنسون التصويت والتعليق اذا عجبكم البارت ❤️