#اختاريتج_انتي بارت ١٦
#البياتي
ليث...
بعد ما اخذت الموافقه من اخوها اخذت اهلي وعمامي ورحنا نخطبها..
وصلنالهم استقبلونه راحن النسوان يشوفنها ..
طبعاً راحت امي واختي ومرت عمي ،كعدنه اشويه وكال السيد صيحو العروس خل نعقد....
اني كلبي مااعرف شصارله من سمعت راح تجي واشوفها شعور غريب بكل معنى الكلمه
جابهة اخوها علي واجه .. بقت عيوني ع الباب مااعرف اشبيه، اول ما دخلت حسيت كلبي مثل الطير المذبوح يرجف !!
اتعوذت من بليس ..
هاي شبيك ليث شنوو نسيت شسوت بيك؟!! خدعتك وخلتك مضحكه لاهلها ..
بسرعه تذكرت اللي صار درت وجهي عنها!
طبعا هي مدنجه راسها ،راحت كعدت.
ابوها كاللها بابا كومي اكعدي يم ليث !!!!
اجتي كعدت بصفي .....
اشتميت عطرها ... دخت !! اتذكرت اول لقاء النا اول مره كعدت كبالي واشتميت عطرها 💔
حاولت اطلع هاي الافكار من عقلي ، واركز على انتقامي منها واشلون اذلها.
عقدنا وراحت يم النسوان.. اشويه وامي صاحتني باركتلي وكالتلي..
الام .. يمه اتخبل عروستك ما اتوقعتها هالكد حلوه .. حقك تعشكها.
اني .. حجيت ويا نفسي .. اي يمه حلوه وحقيره ليغرج الجمال والمظهر هاي حيه سامه وبلا ضمير ضحكت عليه وذلتني بس اني اعلمها.
صفنت وبعدين جاوبت امي .. اي يمه اريد احفادج يطلعون حلوين غير 😅
الام .. هههه والله عليك سوالف يا ليث.. يلا يمه تعال لبس مريتك الحلقه والذهب ، اخذو صور وروح!!
اني .. يمه انتي لبسيها اني استحي ادخل بنص النسوان زحمه.
الام .. لا يمه ميصير لازم انت تلبسها وتكعد يمها اشويه .. يلا تعال ادخل صاحت اجه العريس يشوف البنيه لبسن حجاباتجن النسوان.. وجرتني يمها وكعدتني ...
دخلت عيوني وكعت عليها انصدمت!!!!!
شنوووو هالجماااااال ؟!!!
اني صح شافتها لندى هواي بس ولا مره شايفها بلا حجاب!!!
شعرها طوييل جوه خصرها اسود لييييل ، لابسه تاج ابو الورد ذهبي ناعم و نازك
طالعه اميره ..
واول مره اشوفها بالمكياج منطيها جمال سبحاااان الخالق يشل البشر!
كلبي ذاب وعقلي جمد من شفتها بس حاولت ماابين شي ..هي لما شافتني ابتسمت بوجهي بس اني بسرعه درت وجهي عنها!!
محجيت وياها ولا حرف.. لبستها الذهب وطلعت
مااريد كلبي يحن عليها .. المشكله مو بيدي لما اشوفها افقد كل سيطرتي ، انسى كلشي الكره والانتقام اللي بداخلي.
اخذت اهلي ورجعنا خبصوني بس يصفكون ويهلهلون 😒
ثاني يوم التحقت لدوامي .. الاوضاع كلش مو زينه والموصل انتهت بقيت بالدوام شهر ما نازل للبيت بس اخابرهم .
بالليل اجاني امر نزول نمت وطلعت من الصبح لبيتنه
وصلت لاهلي اتخبلو عليه شهر مشايفيني وامي بس تبجي
نمت وارتاحيت كعدت العصر خابرت اخوها محمد ..
كلتله هيج وهيج السالفه الاوضاع مو زينه واني داابقى بالدوام شهر يلا انزل ..
وبعد مااكدر اتزوج اذا صار تحرير الموصل لان مينطوني اجازه مستحيل..
كال اي والله يساعدك ومن هذا الكلام بس المطلوب شنو؟!!
كلتله المطلوب تخبر اختك واهلك هذا الاسبوع العرس!!!
