#السراب

Part1

#السراب

البارت الاول

كنت دائما اكول النفسي خاصة وره مامرت بيه السنين انه اكو صنف من النساء مايصير حتى يحلمن ولاتتجاوز امالهن عتبة البيت ..
اني الوحيده وعندي 5 اخوه..اهلي كانت حالتهم ضعيفه بس ابويه كان يشتغل عامل باحدى الدوائر... وامي كانت عدها مكينه تعبانه تخيط وتطلع هالقاسمه الله..
بديت احس بالفرق بيني وبين البنات من صرت بالخامس ابتدائي... اباوع على نفسي بالمرايه وانقهر .... اني مو حلوه... اعرف نفسي محلوه...بيبيتي ونسوان عمومتي يصيحولي العوبه...امي جانت تنقهر بس ماتكدر تحجي...كاعدين كلنا ابيت واحد وتخاف من المشاكل...
وكل مااكبر تزيد عندي هذي العقده.... كانت امي تكعد يمي وتسولف ويايه تكولي انت حلوة روح وضحكتج تخبل...وهسه تكبرين وتخلين مكياج وتصيرين ملكة جمال...واهم شي تهتمين بدراستج وتحافظين على سمعتج واخلاقج...
مرت الايام والسنين واحنا عايشين ابيت جدي 3 عوائل وبيبي وعماتي اثنين متزوجات يجونا خطار بين مده ومده ...الى ان فد يوم رجعت من المدرسه جنت بالاول متوسط شفت الناس ملتمه يم بيتنا وعرفت انه بيبيتي ماتت...
اني كلش احبها ومتعلقه بيها...وكلش انقهرت وظليت ابجي...
خلصت الفاتحه او وره ماطلعت الاربعين اتفقو عمامي وابويه يقسمون البيت...
البيت مجاب سعر زين احنا وكعلنا منه مبلغ قليل...بس امي كالتله الابويه ناخذ قطعة ارض لان الفلوس من تبقى تنصرف..
اخذنا قطعه صغيره وخليناها لان ماعدنا فلوس نبني...واجرنا بيت صغير غرفتين وهول ومطبخ وكعدنا بي وانقلت من المدرسه مالتي...
عندي 3 اخوه اكبر مني واثنين اصغر...اخويه الجبير ترك دراسته لان وضعنا المادي موزين...وكام يساعد بالمصرف واشتغل ويه واحد فيتر..
امي جانت بين المكينه وشغل البيت...وكمت اساعدها بالخياطه .... من تتعب تكولي تعالي زينه كملي هذي ... وسوي هذي...
صرت بصف ثاني متوسط...اني جنت ماالتقي هوايه بالمدرسه ويه البنات ومااكعد وياهن... احس اني اختلف عنهن... وهمه هم محد يتقرب مني... عقده كبرت عندي كل يوم ... اني قبيحه...محلوه...حتى من امشي بالشارع ماشيل راسي..احس اللي يشوفني راح يظل يعيب عليه...
امي الوحيده اللي جانت تنطيني ثقه بنفسي وابويه هم حنين عليه ويحبني هوايه...
فد يوم كعدت الصبح شفت امي بعدها نايمه ... مو عوايدها... رحت لكيتها نايمه كعدتها شبيج يمه... فتحت عينها ..يمه اشو تعبانه اليوم مابيه حيل...سوي ريوك الابوج واخوتج...كلتلها ابقى يمج اليوم ماروح...كالتلي لايوم روحي عندج امتحان..
اجا عبد الله اخويه بالسادس ابتدائي كللي اني ابقى يمها..
سويت ريوك الابويه واخوتي...وكلاص حليب الامي كوه شربته ورحت للمدرسه...بس الوقت كله بالي يم امي... انتظرت يخلص الدوام ...وطلعت امشي بسرعه بس اريد اوصل...
طبيت صحت على امي ها يمه وينج شلون صرتي...؟؟ طبيت الغرفتها امي ماكو
اجاني اخويه عبد الله كال امي تخربطت واجا ابويه واخويه الجبير علي وجيرانا ودوها للمستشفى ....
اني راسا شمرت الجنطه وكعدت بالكاع....امي شبيها...شنو الصار بيها...وظليت بمكاني عبالك رجلي انشلت... وعيوني تصب دموع... خفت لاامي تعوفني والدنيا بلياها ماتسوه فلس...
واني بمكاني غفيت...واشوف حلم.. داامشي ويه امي بشارع طويل...وايدي بيدها...بس امي تعبت...كلتلها يمه كعدي هنا هسه اجيبلج مي واجي... شفت محل طبيت اشتريت بطل مي وطلعت بس مالكيت امي ظليت اتلفت...اصيح يمه يمه...وينج...سمعت صوتها بعيد... اني رايحه يمه رايحه...لا لا يمه لاتروحين...لاتعوفيني...وسمعت صوت صياح وناس تبجي...فتحت عيني...شنو شنو هذا الصياح...هذا ابيتنا...كمت اركض...البيت مليان ناس وكلهم يبجون و اخوتي يلطمون ويعيطون...
لا .... لا....لاتكولون ماتت
لاتكولو ماتت
#قصه حقيقه منقوله...