السراب #💗😻
الجزء الثالث
مرت الايام...اني نجحت من الثالث...واخويه عمار نجح من السادس وطلع معدل عالي...واخوتي كلهم نجحو...البيت دخلت بي فرحه وشغلي تحسن واخويه علي هم شغله زين...اتفقت ويااا اساعده ويفتح محل وحده ...
بس كتله اذب نفسي عالخياطه بالعطله ونشد حيلنا اني وياك ...
مكينة امي القديمه خالتها يمي ...من افرح ومن احزن اكعد احاجيها..
يمه اليوم اني نجحت...يمه اخوتي نجحو...يمه اعاهدج ماعوف اخوتي... يمه روحج ويانا احس بنفسج بالبيت...
وشديت حيلي بالعطله عالخياطه...وناس طابه وطالعه عليه...المنطقه...وبنات المدرسه هن وامهاتهن...وكرايبنا...وطورت خياطتي...كمت اتعلم موديلات...واعرف الاقمشه...ومن احتاج شي اخذ خالتي واطلع للسوك...
نسيت نفسي ويه المكينه ونسيت عمري...احس نفسي عمري فوك الاربعين سنه...
كمت اجمع من الفلوس واشتري الاخوتي ملابس...
ومن خلصت العطله ...طلعت من الفلوس وانطيت الاخويه...وفتح محل وحده...فرحتنا جانت جبيره بالمحل...وتحسنت اوضاعنا الحمد لله..
صرت بالرابع ...اخويه عمار صار بالهندسه.... بيوم الطلع قبوله ابويه ظل يبجي ويكول وينج ام علاوي شوفي ابنج صار مهندس...
من جنت اشوف ابويه شكد يبجي على امي جنت اكول سبحان الله هو هذا الوفه بعينه...لافكر بزواج ولامره بعد امي..
اخويه علي وره مافتح المحل صار شغله زين...وراد يتزوج عجبته وحده من جوارينا بس البيت صغير...قررنا اناجر بيت اكبر...
وطلعنا اجرن
ونتقلنا بالبيت الجديد ورتبنا امورنا وزوجنا علاوي ...جانت تمر الايام بسرعه ومشغولين بتحضيرات ولحمد الله مر كل شي ع خير لحد مازفينا علاوي...
وبعد فتره
سمعت جايني خطابه وطبعا لأول مره من فتره طويله جنت كلش خايفه وماعرف شسوي
وصار اليوم الي متفقين يجون بيه كمت بدلت وحضرت نفسي ورحت ع مكينه امي متعوده احجي لها كل شي بستها وكتلها يمه دشوفيني وتسمعيني مو يمه... بست المكينه...شويه
وجتي شهد كالت يله جيبي العصير واني اشيل المعجنات...
كلتلها جسمي كله يرجف...وايدي مثلجه.. كالت يله اني وياج...طلعت خايفه وخجلانه...شايله الصينيه وسلمت..وبديت اقدم ...وصارت عيني بعينه...شاب وسيم وكشخه هو دنك راسا...وامه واخته ظلو يباوعون ماعلقو .... كعدت مدنكه راسي...
بقو يسولفون... بعدين استاذنو وطلعو...
علاوي كال همه جوي يتعرفون علينا وشافو زينه وبعدين يرجعون خبر...
اني حسيت كلبي انقبض...وطارت الفرحه من كلبي ماادري ليش.. متاكده مراح يقبلون عليه...
صار الليل...دمعتي بعيني...وغمضت وشفت نفسي بنفس الطريق اللي جنت امشي بي ويه امي قبل ماتموت... بس وحدي...واشوف مي كدامي...واني عطشانه واركض عليه اركض.. بس من وصلت يمه... طلع سراب...
كعدت من النوم تعبانه وعطشانه ...ديأذن الفجر..كمت توضيت وصليت...
مكدرت انام بعد...كمت سويت ريوك...وابويه كعد واجا يمي للمطبخ ... باسني من راسي كلي كاعده من الصبح اليوم كتله طارت نومتي...
سويتله ريوك...وبدلت وطلعت مثل وقت كل يوم رحت للدوام...بس اليوم تعبانه وفكري مشغول...اعرف اني ماعندي حظ... بالكوه خلص الدوام ورجعت للبيت..وبديت انتظر علي شوكت يرجعلي خبر...كملت الغده واجه ابويه والولد تغدو...وبديت بالشغل بس بالي مو يمي...
ساعه 5 ونص اجا علاوي وكعد يم ابويه بالهول...اني جنت مسويه جاي وصبيتلهم...طلعت سلمت عليه وانطيتهم الجاي وكعدت...وعلاوي يسولف ويه ابويه...ظليت انتظر بلكي عنده خبر...بس كلشي ماحجه...
كمت كلت افتح الغساله...علاوي صاحني تعالي زينه...اني كلبي كام يدك...ها علاوي... كلي اليوم خابرني شاكر...اي هو شاكر...كتله اي...كال اعتذر مني وكال راح ااجل الموضوع لان يمكن راح اسافر...
اني صفنت على علاوي بس احس بداخلي صارت نار ...حزن والم بكد الفرح الفرحته البارحه...وصدك طلع سراب... كتله كلشي بالقسمه الحمد لله...
طلعت من الهول وعيوني تجري .. مخنوكه...جنت اعرف اني محد يريدني...هو منو يباوع عليه... ليش اقشمر نفسي... لازم الغي هذا الموضوع من بالي...مافكر بي ...اي خلص ... لافكر بالزواج ولاالي شغله باحد...
ذبيت نفسي اكثر عالدراسه...كلنا بالبيت نشتغل وندرس...والامور تتغير نحو الاحسن...عمار تخرج ومحمد ورا...واني اخر سنه..وعبودي هم صار بالقانون بس مصطفى بعده بالاعداديه...ابويه بده يتعب يوم يروح للمحل ويوم مايروح... مكابل التلفزيون وكاعد...وعلي وشهد دائما يمنا...
فجأه قرر عمار يسافر...كال اكمل دراستي خارج العراق...وفعلا كمل اوراقه وخلال فتره قصيره سافر..
بقيت اسابيع ابجي .... اني متعلقه باخوتي هوايه...
بس ادعيله الله يوفقه...
وره كم شهر تخربط ابويه على غفله..وطلع عنده ذبحه...وظلينا نداري واطباء بس ماطول...وتوفى ...انكلبت حياتي وره ابويه .... ليل ونهار ابجي .... امي وابويه عايشه جنت بفضل دعائكم هسه شلون...
فرغ البيت...
تخرجت من الكليه ومحمد لزم الاسواق...وحياتنا صارت بارده وكئيبه....وره اشهر من وفاة ابويه محمد كلي اريد اتزوج...وحده مانعرفها...كلي روحي شوفيها...
اخذت خالتي وشهد ورحنالهم بيتهم بغير منطقه...ومااعرف شلون تعرف عليها..
من طبينا كعدنا وطلعت علينه موكلش عجبتنا...ولاامها عجبتنا...مومن طينتنا...لهجتهم غريبه وشايفين نفسهم..
رجعت كتله ماعجبونا...كال بس اني عجبتني... اني كتله العلاوي... اخذ عنوانهم وراح سال عليه ورجع كال مايفيدونا جان كلش ضايج...والظاهر هي رايحه عليه للاسواق ومتعرف عليها واكو علاقه بينهم...اجا علاوي حجا ويا مفاد...صارت مشاجره ....حاولنا نتفاهم ويا..بس هو قافل ..واخوتي واني هم قفلنا كلناله هيج وحده ماتطب البيتنا ..هو كال حتى نحل الموضوع كلمن ياخذ حصته...علاوي تخبل...واني هم تخبلت
يااااااا....ياحصه محمد....انت تعرف هذا البيت تعب منو...منو سوا...كال كلشي باسم ابويه.... كله علاوي بس هذا تعبنا اني وزينه...
كال شنو تعيروني...وصارت مشكله وتعاركو...ورادو يتضاربون..
هو عاف البيت وطلع...
عرفنا بعدين انه رايح البيت عمتي...
كلت خلي يهدأ واروح عليه احجي ويا ونخطبله البنيه..
فات كم يوم..وفد يوم الصبح شفت واحد يدك بالباب طلعت عليه ...كلي هذا تبليغ...البيت راح ينذب بازالة الشيوع...
شنو....شنو ....لك محمد تبيعنا البيت....
اني فقدت اعصابي...اخوتي كسرت ظهري عليكم وهاي تاليهه...كعدت بالطرمه كمت ادك والطم وابجي...جتي شهد تركض...والجيران ....كلتلهم ياناس محمد راح يذبنا بالشارع تقبلون..
صدمه جبيره .... علاوي واخوتي التمو بالبيت...وكالو الا نروح نكتله...واني اتوسل بيهم كلتلهم اني اروح احجي ويااا..
رحتله البيت عمتي...اول مشافني...كلي لاتحاولين مااتنازل عن الدعوه...كتله نخطبلك البنيه وشتريد يجرالك...كلي ماريد منيتكم...ليش حمودي...ماغزر تعبنا بيك ليش.. كال واللي يمسني اشتكي بالشرطه...كتله اسحب الدعوه ونبيع بره حتى لاينكسر سعره...ننطيك حصتك...
كان الله في عون من يُعاني
مِن فرط التفكير والشُعور الصامت .
أنت تقرأ
#السراب
General Fictionقصه حقيقه تتحدث عن معاناه فتاه قبيحه بنضر مجتمعها...صبرت وانتضرت ونالت ثمار الصبر...?
