السراب
الجزء الثاني
شمعة البيت انطفت... العزيزه اللي عشنا جوه ظل جناحها فاركتنا وراحت...وخلتنا ضايعين...
ليش امي عفتينا؟؟ المن عفتينا؟؟ شو بسرعه رحتي بعدج صغيره عالموت ياامي وبعدنا صغار ومحتاجيلج...
امي جان بيومها ضغطها صاعد وماندري بيها...وتخربطت وبين ماوصلوها للمستشفى سلمتها صارت عدها جلطه...
البيت فرغ وره ماخلصت ايام الفاتحه...الناس ساعدو ابويه بالفاتحه والدفنه لان ماعنده...بس اني بقيت مصدومه ومامصدكه امي تروح بغمضة عين...هذي الملاك ام كلب الطيب.. عمري ماشفت ابويه يبجي... بس على فراك امي جان يكعد وحده واسمعه يبجي ويكول انهد حيلي هسه...رغم ضعف حال ابويه بس امي بحياتها مااشتكت ولاطلبت وجانت تهون عليه وتكوله تفرج...هادئه وصوتها دافي وكلبها جبير... الكل يحبوها...لان ماتعرف تقهر احد..
البيت صار اظلم...والحمل صار ثكيل...واني وحدي لازم الزم اخوتي وابويه...لازم اصير مثل امي جبل من حنيه وصبر... ماخلي اخوتي يتفرقون...قررت ويه نفسي اشيل الحمل رغم اني صغيره...
اول ايام وره الفاتحه جانت خالتي تجي للبيت تسويلنا اكل...وتشتغل بالبيت...بس هي هم جانت مريضه وتعبانه كلتله
ا خاله انت تعبانه...تره اني اعرف كلشي اسوي وراح اعوف المدرسه...
هي ماقبلت ابطل من المدرسه...كالت اني اسويلكم الاكل والباقي عليج بس لاتعوفين المدرسه...
بقيت اداوم بس مالي واهس بعد اقره وارجع للبيت اشوف مكان امي فارغ...اكابل المكينه واكعد ابجي واظل ابوس مكان ايدها ورجلها.... احس كلبي بي نار...
اخوتي هم جانو يكعدون يبجون والحزن تارس البيت...ابويه بعد مايقبل ينام بغرفته..كام ينام بالهول...واني واخواني الصغار انام بغرفة امي...جان اهتمامي باخوتي الصغار اكثر لان جان اخويه مصطفى بالثالث ابتدائي هوايه يبجي ويتنحس على امي....
وبديت اتعود عالمسؤوليه الجديده...ارجع من الدوام تجي خالتي تجيب الاكل جانت قريبه علينا...اغدي اخوتي واغسل المواعين وانظف ...ومن يجون كلهم افتح الغساله اغسل هدومهم...عبد الله جان اكثر واحد يعاوني بالبيت خطيه...والبقيه هم يحبوني ويحاولون يساعدوني وابويه جان يوصيهم عليه هوايه انه يهتمون بيه...
مرت الايام وجتي امتحانات اخير السنه...اني طلعت مكمله بدرسين ومصطفى وعبودي نجحو...وعمار جان بالخامس علمي وكلش شاطر طلع مكمل بدرس بسبب ظروفنا ذيج السنه ... ومحمد بالثالث متوسط هم مكمل...
رغم ظروفنا بس كلنا جنا شطار ومعتمدين على نفسنا ونقره...اخوتي مو من النوع اللي يسوون علاقات هوايه ويطلعون ويطبون...ولهذا ماعدنا مشاكل ولامصاريف هوايه...
فكرت من جتي العطله اكعد عالمكينه واخيط...جنت اعرف خياطه من اكعد يم امي الله يرحمها...بديت اجرب...خالتي جابتلي قطعه قماش كالتلي سويها دشداشه الي...وكعدت عليها بيوم واحد خيطتها...هي تعجبت عليها كالتلي تخبل ...كامت تشجعني وتساعدني...واني ويه شغل البيت اتعلم بالملابس القديمه الى ان ضبطت الخياطه بالعطله...كتله الابويه اني اريد ابطل من المدرسه واكعد عالمكينه...وابويه ماقبل كلي هذا مستقبلج بنتي...
امتحنت دور ثاني... ونجحت واخوتي نجحو....والحمد لله...سيطرت على شغل البيت والخياطه... وداومت صف ثالث..بدت علاقتي تتغير بالبنات وصادقت بنيه كلش حبابه... فد يوم جان عيد ميلادها... بس انحرجت شاوديلها...طلبت من خالتي فلوس واشتريتلها قطعه مال قمصان وخيطتلها قميص بس صار كلش حلو...من وديته الها لبسته ثاني يوم كالتلي هذا منين جبتي...كلتلها هذا خياطتي...ماصدكت كالتلي مستحيل... هذا يجنن...وكامت منين ماتمشي تكوللهم هذي خياطة زينه شوفو شكد حلوه...
حتى للمدرسات هم كالتلهم...
اني كلش فرحت لان شفتهم معجبين بخياطتي...
وشويه شويه بدت اموري تتغير... البنات بالمدرسه كامو يتقربون مني ويطلبون مني اخيطلهم .... بدو يعرفوني حتى المدرسات... قسم كامو يجيبولي مجلات برده بيها باترونات واني تغيرت نفسيتي اشوفهم يحبوني ...
بس كمت مالحك على شغل البيت والدراسه والخياطه.. ومع هذا اجبر نفسي انه اسوي كلشي وقسمت وقتي... خليت ساعتين للقرايه...وساعتين الشغل البيت والباقي اخيط وشويه اراجع الاخوتي...وطلبت من اخوتي يكون العشا عليهم وقبلو خطيه...
الحليب الطاهر مال امي خلانا ملتمين واحد يحب الثاني وكلبنا واحد عاللاخ...
المكينه مال امي تعبت ...واني جمعت كم فلس وكتله الاخويه علي الجبير اريدك تشتريلي مكينه زينه...هو هم ساعدني بكم فلس وجابلي مكينه جديده وحتى تطريز بيها...كلش فرحت لان هذي الشغله حبيتها...وساعدتنا بالبيت ... ابويه جان يوميه يجي يكعد يمي يكولي انت مثل امج الله
يرحمها حنيتها وهدوئها وكلبها الطيب...ويدعيلي الله يوفقج يابنيتي الغاليه..
اضمهن بـلگلب بَس عيني تحچيهن💔
اليلچمني العصر بـ الليل أغنيهن✋!!
#عصفوره
أنت تقرأ
#السراب
General Fictionقصه حقيقه تتحدث عن معاناه فتاه قبيحه بنضر مجتمعها...صبرت وانتضرت ونالت ثمار الصبر...?
