انثى في معتقل الخطيئه

7

#انثى_في_معتقل_الخطيئه 7

الجزء السابع ..
بقلمي نورا ..

زمن ...

كمية الخوف والوجع الي حسيتها البارحه كانت كفيله بان تخليني قويه واواجه مصيري وقدري .. كلمات الولد الي نسيت اسمه كانت مسامير وجع نبتت بقلبي من يگولي انت عاهر لااني مو عاهر .. اني زمن وراح اواجه هذا الزمن .. دااطلع من البيت صار بوجهي سيف .. لحظتها خفت بس هو شافني متنكره لابسه بنطرون جينز وقميص رصاصي وبي اسود وشال لافته ع وجهي بس عيوني وجزء من شعري وضفيرتي طالعه ..وبيدي جنطه للملابس حجمها متوسط مو كبيره يادوب تكفي كم قطعه امشي بيها حالي .. هو افتهم انه اني  راح انهزم .. گال روحي زمن ولاتبقين هنانه .. وانطاني فلوس خلاهم بايدي ونضراته مااكدر افسرها .. فزيت ع صوت جاي من البيت ..سييييف .. باجي نوال ..سيف دفعني كال روحي ورقمي عندج اذا تردين شي خابري .. مالحكت ارد عليه .. اشرت اله بيدي .. وطلعت .. سيف عمره 18سنه هو الوحيد النوال شخصيته ضعيفه بسبب امه وتعاملها اله مره تحبه وتنطي حنان ومره تضربه وتعاقبه وتاذي .. بس هو تعامله ويايه غير شكل كلش حباب .. طلعت رئسا اخذت تكسي وكتله للمستشفى مدام نوال بالبيت اروح لامي اشبع منها ..
وصلت للمستشفى ورحت لامي .. بوستها وكتلها امي شون حعوفج .. گالت مباقيلي شي واودع ياامي نقذي نفسج لاتستسلمين .. كتلها وين اروح كالت عندي صديقتي هنا ببغداد .. عدهه منضمه اجتماعيه تحتوي النساء .. بس ديري بالج لان تعرفها نوال وخاف توكعين بيدها مراح ترحمج وهسه يلا روحي قبل لتجي .. واني اطلع لازمه ايدها مااريد اعوفها كانت مثال الحنان والحمايه الي لزمت ايدها للحد الي بعد خلص لازم اروح .. طلعت واتلفت خاف احد يشوفني .. مرت الدقائق والساعات واني حايره .. وامشي بالشوارع .جعت كلش مدااكدر اتحمل البارحه بدون عشه واليوم بلا ريوگ. شفت  كشك يبيع لفات فلافل وكفت يمه .. كتله انطيني لفتين دااسد جوعي اباوعله يرتب اللفه ويخلي العنبه عليها اممم اخذتها انطيته فلوس. . وين راح اكلها .. باوعت اكو فرع بدايته مدرسه رحت امشي طبيت بي وكعدت وره المدرسه اكلته واتلذذ ميته جوع .. اكل واتذكرت الولد اريد اتذكر اسمه ماكو ق د تؤ إف .اسمه غريب وثگيل . بقه الكرت بجيب البجامه .. مالتي وغسلتها .. بس اتذكر المنطقه الي بيها المعرض مال السيارات ...

كملت اكل صارت الظهريه .. مددت رجليه  ع التراب وره المدرسه وكبالي بيوت .. الرايح والجاي يباع عليه بس محد گلي شبيج شرايده بنيه بعمر زغير محد اله علاقه .. ردت اغفي بمكاني الشمس حركتني .. واني اسمع اصوات الطلاب بالمدرسه انقهرت حييل .. ياريت مكمله دراسه .. صار العصر كمت .. امشي محتاره وين اروح .. كل جوارحي تكولي روحي اله تصرفه ويايه تصرف نبيل .. يمكن يساعدني .. المغربيه صارت واني امشي .. اذا اروح للمراه الي انطتني امي عنوانها اخاف تلزمني نوال .. وشون بيه
..اشرت لسياره بالشارع وكتله ع المنطقه .. الي بيها معرض السيارات .. وصلني نزلت هوايه معارض صارت كبالي .. صرت اباوع عليهم اسم اسم الا ان شفت اسم معرض مو بعيد عليه .. اي هو نفسه الي قريته .. بالكارت معرض صباح .. مقدمته كانت من جام .. ويمه بايات كعدت عليها منتظرته يطلع بلكي يساعدني .. يوديني لاي مكان .. ماعندي غيره بعد اذا ماقبل هي هيه اروح لصديقة امي اخر امل عندي .كعدت ربع ساعه .صارت ساعه 10ونص بالليل .. طلع شفته وظل يباوعلي ..