لهفه
همس القوارير
البارت الثاني
من بعد ما صار عمري ١٣ سنه اجتي جيرانا قبل كانوا ساكنين يمنا وبعدها انتقلوا لغير منطقه خطبتني لابنها كانت حالتهم الماديه كولش زينه وامورهم تمام وهمين هم خوش ناس يمدحون بيهم وباخلاقهم ابنها عمره ١٧ سنه يعني همين صغير واني كنت بعدني دالعب واتشاقى ويه اخواني بيبتي كانت عاجبتها الفكره صاحتني
بيبي : لولو بيبي تعالي اگولج
لهفه : لحضه بيبي اجيتج
اجيت وكعدت يم بيبي
بيبي : يمه سدي الباب وتعالي كعدي يمي
سديته للباب وكعدت يمها
بيبي : سمعيني يمه انتي كبرتي وصرتي مره وحلوه عين البارده عليج وكل بنيه يا بيبي لازم تتزوج وتشوف حياتها ميصير تبقى كاعده بيه اهلها وهسه اجولج خطابه وخوش ناس ولازم تتزوجين يا بيبي
لهفه : بيبي بس اني بعدني صغيره وما اريد اتزوج ويعني شنو اتزوج بيبي ما اريد اروح من يمكم عفيه
بيبي : لا بيبي انتي كبيره وحلوه ومرتبه وكل العالم تتمناج متكليلي عليمن باقيه يمنا كوله مشاكل وهوسه لا طلعه ولا مشيه ولا عندج مكان خاص بيج ولا فالحه بدراسه وانتي نادره وحبابه وهذول الي خاطبينج خوش ناس راح تطلعين وتسافرين وتخلين مكياج وشنو بنفسج راح يجيبون وتصير عندج غرفه لوحدج ويجيبولج ملابس وذهب راح تكون حياتج حلوه بيبي لان الناس عدهم فلوس هوايه وراح تصيرلج حصه منهن وتكدرين تساعدين ابوج وامج وتخلينهم يفرحون بيج
لهفه : الله بيبي صودك هيج يصير عندي غرفه لوحدي وشنو اريد اشتري واخلي بيها واشتري لخواني العاب وحلويات وحاجات
بيبي : اي بيبي صودك هذا الحجي اذا تخلينهم يحبونج كولشي تكدرين تسوين وتشترين بيبي كم دوب تبقين يمنا انتي اول وتالي تتزوجين وهذه خوش قسمه هسه انتي موافقه حبيبتي
لهفه : اي بيبي قابله اذا انتم قابلين اني ما اعرف مصلحتي انتم اهلي
بيبي : خلاص امج وابوج خليهم عليه اني اعرف شلون اقنعهم واخذ بخاطرهم اهم شي انتي تتونسين بيبي حبيبتي
لهفه : اي بيبي انتي گوليلهم لان اني استحي احجي وياهم
وفعلا بدت بيبي تقنع بابا وماما امي مكانت قابله وبدت تقنع بأمي مو تقنع وانما تبلغ امي بقرارها
ام لهفه : لا عمه مستحيل بنتي صغيره وطفله مو مال مسئوليه وبيت وجهال باعيها بعدها تلعب ويه اخوانها يعني شلون راح اخليها برگبة رجال هي شعرفها بالزواج خليها تشبع من بيت ابوها
بيبي : ترديها تصير مثلج لا شغله ولا عمله وانتي ياهو مالتج وما تدخلين اني بكيفي ازوج منو واطلك منو البنت بتنا وبكيفنا اهم شي رأيي ورأي ابوها انتي ما الج رأي اني الي اقرر هنا وكلكم مسئوليتي
ام لهفه : بس هي بنتي واني هم الي حق بنتي مو انتي الج حق بأبنج لو اني غير والله بعدها ليش تضلمينها خليها تعيش حياتها وبعدين زوجيها على كيفج
بنتي اعرفها مو مال زواج وكلشي متعرف ليش تدمرون حياتها
بيبي : اشو طالت وتشمخت ما بقى غيرج يحاسبني ابني وبنت ابني مسئوليتي افتهمتي لو لا اني اتخذت القرار وبعد اي شخص ماله حق يتدخل قبلتي او ما قبلتي ميهمني اني خلاص وافقت
ام لهفه : وهو اني منيلي قرار من اخذتكم لحد الان واني المصگعه مالتكم
بيبي : ميعجبج هذولاك اهلج الله وياج
بعد امي سكتت وما حجت وضلت بس تبجي وطبعا بيبي قنعت بابا
بيبي : عيني ابو لهفه جايتها شلون قسمه لهفه كولش زينه والقسمه الزينه تجي مره بالعمر ولا تضيعها وخلي البنيه تعيش مرتاحه احسن من حالنا عدهم خير من الله وفلوس وعائله مو كبيره هم ولد اثنين وبنيه
بابا : يمه مو بعدها صغيره خطيه مو مال زواج
بيبي : لا يمه وينها صغيره ما شاءالله اني اخذت ابوك اصغر منها وربيتكم احسن تربيه وهي شبابها عالي معود البنات مسئوليه خليها برگبة رجال وتفتح عينها على رجلها احسن ليش نخليها تطلع عينها منا ومنا وتالي ما يلوحنا غير الفشله بنات هالوكت ما ينگدرن يلا صغيره احسن يا يمه
طبعا بابا ما اعترض اعتقد هذا الشي لمصلحتي
بابا : الي تشوفينه سويه يا يمه مثل ما زوجتي خواتي وكل وحده مرتاحه همين زوجي بناتي القرار الج واهم شي انتي مقتنعه بهالشي ادري بيج تفكرين بمصلحتي ومصلحة جهالي براحتج يالغاليه
بيبي : الله يرضى عليك يا يمه هو هذا الحجي الي يبرد الگلب مو مثل مرتك متعرف حتى تفكر
وفعلا
وبعد كم يوم دزوا موافقه لهل الولد وامي رتبتني وعدلتني وخلتلي مكياج خفيف ولبست تنوره وقميص جدد جابهم الي بابا وهمين جابلنا كيك وعصاير نقدم للناس الجايه ورتبنا البيت وصار يلمع لمع واجه الولد شافني وشفته واقتنع واحد بالخ بس محجينا سوه واجت وياه امه وخالته وكلش نعجبوا بيه وفرحوا وتفقنا ورى اربع ايام يسوولي حفله مهر ونكطع مهر وفعلا رحت للصالون سوولي تسريحه ومكياج حلو واشترولي بدله تخبل لونها فستقي وبيها تله كبيره ولبستها طلعت كولش حلوه وكنت كولش فرحانه بروحي بدله ومكياج وتسريحه والناس تكولي حلوه عجبتني السالفه وطكيت هواي صور خطيبي اسمه قصي وهو ابنهم الكبير لعيالي يعني كانت الفرحه فرحتين بالنسبه لعيالي لان الجنه الاولى الي راح تدخل للبيت وفعلا صارت الحفله كولش حلوه ولبسوني ذهب گلاده وسوارات سته ومحبسين وحلقه وتراجي كانوا كولش متمكنين والناس ضلت فاكه حلگها عليه وعلى القسمه الزينه الي اجتني وبعد الخطوبه قصي جابلي موبايل حديث وجديد وكنت طايره بيه يمه هيج الزواج حلو همزين قنعتيهم يا بيبي والله ما اعرف امي على شنو معترضه اصلا شغله حلوه وناسه
