لهفه
همس القوارير
البارت الثالث
خلصنا الحفله وغيرت ملابسي وغسلت وسبحت حتى ازيل المكياج والتسريحه وكعدت بغرفة بيبي وضليت اگلب بموبايلي واني فرحانه واتفرج عالصور مالتي وشلون طلعت حلوه وجميله وبده يراسلني قصي وضل يسولفلي انو هو مشتاقلي وان هو من شافني انبهر بيه وحباني ومن هالحجي ضلينا اني وقصي يوميه نتراسل كوله حب وغرام كنت ما اعرف حتى اجاوبه ومرات اسكت وما احجي ومرات من يكولي اني احبج اگوله اني هم واسكت ومرات يگولي متطلعين اذا متگوليلي وضلينا نطلع ونروح لهله ونروح نشتري ملابس وشغلات حلوه للعرس وفعلا كانت الحياة حلوه بالنسبه الي طلعه وطبه ومشتريات ومكياج وذهب كنت اعيش يومي بحلوه وبمره وما كنت افكر شنو راح يصير باجر لان كان عقلي طفولي وافرح بأي شي يتقدم الي وما اعارض ولا احجي لان استحي وحاولت امي باكثر من طريقه تحجي ويه بابا بس بابا مكان يسمعها وكان يگولها خليها تشوف حياتها يمكن ترتاح اول وتالي مصيرها الزواج
وفعلا قررنا نتزوج بعد شهرين خطوبه وگالوا مستعجلين لان ما عدنا شي يأخرنا كولشي محضرين ونريد نفرح بأبنا ونشوف اطفاله وبدينا نتجهز للعرس واشترولي غرفه تركيه حلوه ومرتبه وبيها اشكال جابولي ملابس وعطورات ومكياج واحذيه وجنط من دخلتها تفاجئت هذه غرفتي الله تخبل واخيرا راح اسكن بغرفه خاصه الي بس انه وقصي واخيرا راح ارتاح من بيت اهلي والهوسه مالت اخواني كولش فرحانه بحالي وبدينا نجهز للعرس
صاحتني امي قبل العرس بيومين
ام لهفه : ماما حبيبتي انتي صرتي هسه زوجه وكبرتي وصرتي مره اهم شي تكسبين زوجج وتشوفين طلباته وتعاملين اهل زوجج كأنما اهلج وتدارينهم وتكسبيهم حتى يحبونج وتكونين انتي الكل بالكل عدهم ولا يكدرون بلياج
لهفه : ان شاءالله ماما اسوي كولشي الي تردينه بس بطلي بجي عليه اني اكيد اجيكم
ام لهفه : ان شاءالله يا عمري ربي يسعدج ويريحج وشوفي ماما هذا محبس من امي الله يرحمها خليه بأيدج مو تضيعيه ماما لان عزيز عليه واني ما عندي اعز منج انطيها اله
لهفه : لا ماما خليه بأيدج حلو عليج اني عندي هوايه محابس
ام لهفه : لا ماما حبيبتي انتي خليه بأيدج هديه مني الج تستاهلين يا عمري
وبدت امي تشرحلي على الزواج وشلون راح يتقربلي قصي وشلون اقوي نفسي واتحمل وما اتأذى ومن هالحجي ضليت فاكه حلگي
لهفه : يمه هيج الزواج ليش ما گلتولي من الاول ليش هسه حجيتي وضليت ابجي وخفت وامي تصبر عليه وتقنع بيه
ام لهفه : لا ماما لا تخافين هي هذه مسيرة الحياة وكل مره متزوجه هيج حياتها اني وخالاتج وعماتج كل مره هيج يصير بيها وكلشي طبيعي يا عمري
ضليت بس صافنه وابجي وحيل خفت من الزواج مكنت متوقعه هالشكل عبالي بس بدله وعرس وفرحه واشتياق وحضن وبوس ما اعرف بيه هالشكل هو اني شمعرفني اصلا طفله بعدها اقتنعت وضليت ساكته
المهم سوولي حنه قبل العرس واجني صديقاتي واقاربنا واهلنا وكوله رگص وفرح ودك وتونسنا حيل وبليل خابرني قصي وضلينا نسولف ونضحك وبعدها بيوم سوينا العرس وطبعا رحت صالون وبدله بيضه جميله كولش وكان العرس بقاعه وهواي ناس اجتي وكان عشاهم فاخر والناس كولها تونسوا بالعرس مالتي وزفونا لبيت عيالي وكان بيتهم كبير وواسع مثل بيوت الخليجين كولش راقي صالات اثنين عدهم بالبيت كولش كبار وبيها قنفات راقيه وتحف ثمينه ودخلت البيت وبدوا يهووسون ويركصون وفرحانين بعدها اهلي ترخصوا مني ودعوني وراحوا ووصوني على نفسي وزوجي وعيالي وكلش انقهرت وضجت لان راحوا وبقيت لوحدي بس بقوا عيالي دك ورگص وبعدها زفونا للغرفه
