لهفه
همس القوارير
البارت السادس
علي : صدكيني مو صعبه بس جربي والله مو كل شخص راح يكون مثل زوجج السابق اكو هواي ناس طيبه وراح تشوفين ان شاءالله
لهفه : علي ما اكدر اتخيل الموقف صدكني لحد الان الغصه بيه وحالتي كولش تعبت وضليت اعاني هوايه لحد ما وصلت هالمرحله واخاف اجازف
علي : خلاص عوفج من الزواج خلينا اصدقاء نتراسل ونتخابر ونعرف اخبار بعض صداقه مو اكثر وكلما صحتلج الفرصه خابريني او راسلي وراح تلگيني بانتضارج حتى لو بالاسبوع مره هم ميخالف
لهفه : ماشي موافقه بس ما تراسل ولا تدك عليه لحد ما اني اراسلك اخاف اهلي موجودين يمي
علي : ماشي موافق
وبقينا نسولف تقريبا ساعه حجيتله عن ضروفي وشلون كنت طفله وما اعرف شي لحد ما صاحت عليه ماما ونزلت ركض وسديته للموبايل بقت علاقتي بعلي سطحيه وما بيها اي شي وكل ما صحتلي الفرصه يومين او ثلاثه اخابر عليه وبقت حياتي مثل ما هي لحد ما فد يوم كعدنا على عياط عمتي الي كانت عدنا وكانت بيبي متخربطه حيل وكان مغمي عليها اخذها بابا للمستشفى وبقت يومين وتوفت الله يرحمها اثناء الفاتحه كان علي موجود وواكف ويانا خطيه وكل ما يفوت ويطلع اشوف عيونه تدور عليه ويريد يشوفني
مره اني داطلع وشفته گبالي خطيه هو ضل صافن عليه ولا دارت عيونه وبقى يباوعلي بنضرات كولها حب وحنيه وخوف اني خجلت ودنگت وهو بقى صافن عليه رجعت للبيت كان يدك عليه
لهفه : الووو
علي : لج انتي شنو راح تموتيني بس گولي طالبتني بثار لو ناويه تخلصين عليه لو شنو فلمج
لهفه : شكو علي شبيك شنو هالحجي شنو سويت اني
علي : اولا طلعه من البيت ما طلعين بدون علمي افتهمتي لو لا لهفه كافي دخيلج كافي قبلي بعد ما اتحمل صدكيني راح تغيرين فكرتج كولها عني راح اصيرلج خوف الاب وحنان الام وغيرة الاخ واذا شفتي غير شي عوفيني والله احبج تفتهمين لو لا ما اگدر اعيش من غيرج
لهفه بصراحه كولش انقهرت على علي وهو يحاول يقنعني وكلامه كان كولش حلو وراقي حسيت حرك مشاعري شوي وحسيت بالامان وهو يحجي وياي وقررت اقبل بيه گولت خليني اتوكل على الله
لهفه : اوكي علي اني موافقه بس شرط
علي : كولي والله لهفه خاف تضحكين عليه قابل بكل شروطج حتى لو اكتل ابوي
لهفه : هههههه لا مو لهلدرجه تصبر عليه وتخليني على راحتي وما تجبرني على اي شي وما تمل مني اريدك تساعدني اتخطى الازمه
علي : موافق والله موافق ومراح تتندمين على قرارج صدگيني يالله گولي شوكت اخطبج
لهفه : معود شنو تخطبني هسه بيبيتي توفت انتضر خلي تعدي فتره وبعدين نفكر
علي : اوكي ماشي بس انتي ألي وما تصيرين لغيري وراح نبقى نتواصل لحد ما الله يفرجها واجي اخطبج احبج والله احبج
لهفه : اوكي ماشي الحال اتفقنا واني اموت عليك
علي : يالله حبي روحي ارتاحي وبوسيلي روحج
لهفه : ههههه ماشي مع السلامه
وخلصت الفاتحه كانت ايام عصيبه علينا لان راحت من بيتنا وكنا متعودين عليها وكولش انقهرنا عليها وخلت فراغ كولش كبير عدنا لان هي كانت الامره والناهيه بالبيت وكانوا ابوي وعمامي يسمعون كلامها ويرجعولها بكلشي يردونه من توفت بيبي ضيعتهم خطيه عمامي كولش انقهروا بس بابا حبيبي كولش تعبت نفسيته اكثر الاوقات اشوفه يبجي بفراشها واروح احضنه وابجي وياه بموتت بيبي تغيرت حياتنا وصارت الاوضاع مختلفه وهواي امور صارت ما متوقعه
