تجار المخدرات

تجار المخدرات 5

الحلقة :
      ¥الخامسة¥

طبعا بعد مها قفلت التلفون ريم سألتها دي منو وقالت ليها دي واحده قالت اسمها سوسو ودايرة حسنية ودخلت فيني شريحه ندمتني علي اني رديت علي التلفون ..
راوية : انتي بالصح الشلاقة ليك شنو انا غايتو اصلو مابرد علي تلفون ماحقي لانو قبل كدا دخلت في مشاكل بي سبب التلفون واتسببت في قطع علاقة زميلي في الجامعه مع خطيبتو بس عشان رديت علي تلفونو وهي كانت المتصله ومن اليوم داك وتاني حلفت ما ارد علي تلفون ماحقي وحتي لو حق اخوي او اختي .
ريم : انا بتفق معاك بس التلفون لمن يضرب كتير لازم تردي واحتمال يكون في امر مهم .
مها : احتمال يكونو ديل ناس النيل الازرق وعندهم جائزة .
المهم في الموضوع انو حسنية بعد صحت مها قالت ليها في بت اسمها سوسو كوفير اتصلت عليك وقالت ليك ارجعي لي ضروري .
حسنية : وانتي القال ليك ردي عليها منو .
مها : معليش انا متأسفه وكنت مفتكره الحاله واحده
حسنية ماردت عليها وقامت صارة وشها وماده قدوما  زي المرة لمن تقابل او تشوف ضرتها .
طلعت برة واتصلت بالتلفون وجات راجعه ولبست هدوما وطلعت سريع من الداخلية وخلت ريم ومها وراوية في حيرة من امرهم .
مها: انتو يابنات البت دي جنت والا شنو؟
راوية : الجن بتداوه كعبه الاندراوة....
(انتو الاندراوة معناها شنو ؟؟؟)

نمشي منهم شوية ونرجع ليهم تاني ونشوف اخبار ابوالهول ونبله شنو.
ابوالهول ونبله وشكروتا قاعدين مركلسين مع بخيتة ست الشاي وشغالين معاها كبي جبنه كبي شيرية وعبي حجر شيشةو...و.... وماعندهم موضوع لانو زي ما انتو عارفين اليومين ديل الشغل مافي وقاعدين بدون بضاعه والتلفونات بتتضارب وابوالهول زهج شديد وقال لي نبله :
ياخي الزمن جرة ونحنا فلسنا والزباين كرهونا التلفونات كدي شوف لينا الرآس خبرو شنو ؟
نبله: انا قبيل اتصلت عليهو وقال لي اصبر لحدي بكرة وبتفرج عشان كدا نعدي يوم الليله دا خنق وبكرة المدد بجي ...
شكروتا : ياجماعه دحدوح اتصل علي وقال يجهزو ليهو خمسين كرتونه فراوله (دي نوع من حبوب المخدرات ) ولحدي يوم بكرة يكونو جاهزات اها اسع الفهم شنو ؟
نبله: خليهو يصبر لي بكرة لو الامور اتسهلت المدد بجي وانا بتصل عليهو وبوريهو ....

نرجع لي صاحبتنا حسنية ونشوفا عملت شنو .
طبعا حسنية وكت مرقت بره واتصلت علي سوسو قالت ليها تعالي لي في الكوفير سريع وشاكلتها لانو ماردت علي التلفون ومارجعت ليها سريع وقالت ليها انتي بنومك الكتير دا ما بتنفعي معانا وبنغيرك طوالي بس حسنية عندها اسلوب مقنع وفي الاخير اقنعت سوسو وقالت ليها دي اخر فرصه وتاني لو مارديتي علي سريع او رد زول تاني بتفصلك من الشغل .
وحسنية طلعت طوالي مشت لي سوسو في الكوفير ولقتها قاعدة في الاستقبال ودخلت معاها جوة عندها محل خاص لاستقبال الزباين  ودار الحوار التالي بيناتهم :
حسنية: سلام يا سوسو
سوسو: اهلين مع انو انا زعلانه منك بس المسامح كريم بس ختي في بالك انتي رضيتي تشتغلي معاي وشغلنا بتطلب سرية كبيرة ولامخلوق في الدنيا يعرف حاجه واعملي حسابك من اقرب الناس ليك وانا الردت علي قبيل لو ماكانت صاحبتك في الداخلية ما كان سامحتك واحتمال نحتاج ليها  قدام في الشغل وندخلها معانا .
حسنية : اسمعيني انا وافقت اشتغل معاك برغبتي بس اي واحدة من صاحباتي انا ما موافقة يخشو معانا في الشغل دا وديل بنات ناس وانا لو ما الحوجه ماكان اشتغلت معاكي .
سوسو: خلاص يعني دايرة تقنعيني انك خايفه علي صحباتك اسمعي انتي قصبا عنك حاتوافقي ولا علي كيفك .
حسنية : كدا اسع جبتي لي حصتي .
سوسو: جبت الحبوب بس والمعلم قال اليومين ديل الشغل واقف وناس المكافحه لافين واسع عندي عشرة شريط بس ومشي بيهم لحدي ماتجي البدرة واحتمال بكرة بالكتير تجي .
حسنية : عشرة بس مابتكفي بسيطه شديد والطلب في الجامعه كتر والايام ديل البرامله جو الجامعه ودي فرصتنا عشان نكسب الزباين  ...
سوسو: انا ماوريتك انتي مالك شفقانه كدا الضيق ماسمح.
حسنية : مامشكله بكرة قريبة،اها ديل بي كم .؟
سوسو: الشريط بي 200 وكلام نهائي.
حسنية : انتي جادة اصلو ماممكن متين الشريط بقي بي متين اخر مرة ماكان بي 100 بس .
سوسو: هههه انتي عارفة السوق ذاد والدولار ارتفع واي حاجه بقت غالية ...
حسنية : مامشكله اسع انا عندي الف بس وبكمل لي الباقي لمن ابيع البضاعة ...
سوسو: وين !!!مافي طريقة الا تدفعي كاش انا مابتعامل بالدين ..
حسنية : خلاص بشيل منك خمسة ولمن اكملن بجيك للتانيات وخلي لي الخمسة التانيات في الحفظ والصون.
سوسو : مامشكله علي حسب السوق ولو لقيت زبون ببيع طوالى انتي عارفاني بياعه وشراية ....
حسنية : هههه يعني اعمل حسابي شديد منك !!!
سوسو : ههههه تتخيلي انا مرات كتير بعمل حسابي من نفسي ذاتو ...!!!محن عجيبة .
واثناء ماهم بتناقشو سوسو جاها تلفون من ابو الهول .
وقامت استأزنت وطلعت من حسنية عشان تشوف ابو الهول مالو ؟ومامن عوايدو يتصل عليها كتير وفي الزمن بالتحديد  الا يكون في موضوع مهم .
ولمن ردت عليهو كان نفسو قايم ومخلوع .

يلا للحلقة  الجاية انشاء الله نشوف ابو الهول مالو  مخلوع كدا .....

يتبع ....
بقلم : عوض ابوعلامه