تجار المخدرات

تجار المخدرات19

تجار المخدرات

الحلقة :
     ¥التاسعة عشر ¥

صبحي فات لمستشفي عبدالعال الادريسي وعملو ليهو فحوصات اوليه عشان يحددو ليهو درجه الادمان والنسبة الخشت الجسم وحجزوهو معاهم في المستشفي ودخلوهو العنبر وبداء في العلاج التدريجي وبإشراف الاخصائي وناس المستشفي خفضو ليهو الرسوم والعلاجات لانو هو جا بذات نفسو وطلب العلاج .

الكوفير :
صاحبه الكوافير بتوصية من سوسو رفضت تشغل خالت ريم ووافقت انو تخليها تبيع شاي جمب الكوافير وسكنوها في غرفه فوق في السطوح وقالت لريم انتي ممكن تشغلي معانا في الفترة المسائية لانو عندنا اعمار معينة في الشغل والشكل ليهو اثر .
وريم استلمت الشغل وبتطلع من الجامعه للكوافير طوالي وبترجع مع سوسو وبتوصلها لحدي الداخلية وبقت طالعه ونازله مع سوسو ولدرجه انو مرات لو اتأخرو في الشغل بتبيت مع سوسو في بيتها وبقو اصحاب شديد .

الداخلية :
حسنية لمن حست بعلاقه سوسو وريم في زيادة شالت التلفون واتصلت علي ريم ولقتها قاعدة مع سوسو في بيتها وقالت ليها دايراك في موضوع ضروري وتعالي لي في الداخلية :
ريم : انا اسع طالعه مع سوسن عندنا مشوار وبجي عليك بكرة ...
حسنية : لكين ياريم الموضوع مهم شديد وفي مصلحتك .
ريم : انا مصلحتي بعرفا كويس وقفلت الخط...
سوسو : دي منو يا ريم ؟؟؟
ريم:دي حسنية
سوسو : والملعونه دي دايرة بيك شنو كمان دي بتاعت اولاد وجنها خلط ومتزوجه عرفي وابعدي منها بتدخلك في متاهات وانا بقيت ماشغاله بيها وحتي عملت لي مشاكل كتيرة ماليها حدود .
ريم : معقوله دا كلو يطلع من حسنية!!!!
واثناء ماهم بجهزو للطلعه ريم وقعت ليها وقيعه في عينا وبقت حمرا شديد وطوالي سوسو ماصدقت شالت القطرة المخدرة وعملتها لريم وقالت ليها دي بتودر ليك الوقيعه في ثواني مع انو القطرة ماادتها ليها في العين
وفي لحظتها ريم بقت كويسة ولمن طلعو في الشارع ريم قالت لي سوسو انتي الناس في الشارع ديل مالهم بقو صغار كدا  .
سوسو : ههههههه صغار كيف دا بس من القطرة اصلها بتعمل كدا ....
وكملو برنامجهم ورجعو البيت قريب الدغش وريم لسع مدورة من مفعول القطرة وبقت تضحك براها وبدون سبب وفي البيت سألت سوسو وقالت ليها انتي الاولاد الكانو معانا ديل منن ؟؟؟
سوسو : ههههه يعني ماعرفتيهم كدي انتي تعبانه نومي والصباح رباح.

هيثم :
سافر السعودية عشان يقضى الاجازة مع امو واختو واولاد امو ...
*معلومه (هيثم متربي مع امو وزوجها في السعودية يعني شهادة عربية وزوجها مرتطب شديد وشغال اخصائي  كبير نفساني  وامو برضو عندها وراثة وامورها دسيسة ومشكلتو الكبيرة كانت مع زوج امو نظام غيرة وطوالي متشاكلين وجايطين ومابترايدو نهائي وهيثم معجن شديد وامو مهتمه  بيهو اكتر من اخوانو اولاد امو )
لمن زوج امو شاف هيثم وعاين ليهو شديد قام نادا امو وقال ليها ولدك دا ماطبيعي وبتعاطى حاجه وظاهر عليهو من عيونو دي ، وام هيثم كوركت فيهو وزعلت منو وقالت ليهو هيثم ولدي وانا مربياهو تمام ومابعمل حاجه غلط وانا واثقة شديد ،وزوجها قال ليها نحيا ونشوف وانا دا شغلي وبعرف الزول المدمن واحسن نلحقو من اسع قبل ماتندمي عليو وبجي يوم وبزكرك كلامي دا واكيد الولد طالع شبه ابوهو .
المهم هيثم عدا فترة الاجازة وكان كل يوم بتسطل ،ورجع السودان وكان عايز يجيب معاهو حبوب من برة بس في اخر لحظه لاوز وخاف وخلاها في كيس في الشقة القاعدين فيها في السعودية..

المحكمه :
طبعا محكمه ام ريم شغاله وريم نزلت محامي لامها وشغالين جلسات وحاج ميرغني واهل سعاد المرحومه بجو يحضرو الجلسات والمحكمه قربت تحكم الحكم النهائي وحددو مواعيد الجلسة الاخيرة (النطق بالحكم) وام ريم في المحكمه برضو رفضت تدلي باقوالها والمحامي الجايباهو ريم قبل الجلسة الختامية اتصل علي ريم وقال ليها موقف امك صعب وانا اعفوني وماداير منك باقي الاتعاب وربتما يخفف عليكم .
ريم شاكلت المحامي ونبزتو نبز عدوك  وهي كانت مدينه قروش كتيرة من سوسو عشان تدي المحامي اتعابو وفي الاخير اتخارج منهم ،وريم حالتها ادهورت اكتر وبقت مدمنه بالفطرة وقدر ماتزهج سوسو بتديها قطرة واول مرة كانت بتديها ليها مجان وبعد القطرة انتهت قالت ليها القطرة غالية وبتكلف خمس امتار وانا بديك ليها لحدي ماتلقي قروش وتصرفي المرتب ..

في الجلسة الاخيرة جلسة النطق بالحكم اهل سعاد جو من البلد كلهم عشان يحضرو ولمن شافو ريم وخالتها قربو يضاربوها لحدي ما اتدخل ابوها ميرغني وساق ريم بعيد واتكلم معاها وقال ليها اصبري وانا عملت العلي والغلط من امك وانا ماعندي زنب في الموضوع دا ومهما كان قرار المحكمه لازم تبقي قوية وتتقبلي الحكم وانا اشتريت لي بيت هنا في الخرطوم وسجلتو ليك باسمك ودا كلو عشان تعرفي انا ماظلمتكم في حاجه....
والجلسة بعد داك بدت والقاضي رفع الجلسة بعد الاستراحه للنطق بالحكم..

يلا للحلقة الجاية نشوف حكمو علي ام ريم بشنو....

الراوية شارفت علي الانتهاء....

ابقو معا ولاتذهبو بعيدا.....

بقلم : عوض ابوعلامه
يتبع.....