يِرُقُونِي حُبُكَ مَهْمَا كَاَن ( بلهجة الجزائرية)ْ

بارت 7

بصح بقالي في راسي مرة مرة ندور نشوف فيه من بعد دخلنا نعومو حتى جا حدانا يعوم كان حاب يحكي معايا مي مالقاش لوكازيو كمال خويا كان حدايا حتى جا بابا عيطلنا خرجنا رحنا اتعشينا و كي رجعت مالقيتهش جمعنا شوية و طلعنا انا و ماما و خليناهم مزال يعومو و الصباح نضت انا و عمتي درنا قهوة وجدنا كلش و انا مالفرحة قتلهم انا نطيب فطور اليوم و طيبت فطرنا البنات غسلو الماعن وانا و ماما و بابا رحنا لحومتنا القديمة يااااه واحد الاحساس قلبي يخبط و كنت فرحانة كل مانفوت على شارع من شارعها نتفكر فتنا على المدرسة و السيام حتى الدمعة طاحتلي وصلنا لحومتنا و اول بيت كان نتع عمي حميد اللي هو اب حمزة و لولو كي فتحو الباب ماصدقوش بقاو يبكو و انا و لولو بقينا متعانقين و نبكو كنت بزاف متوحشتهم و سقسيت على حمزة قاتلي طاطا حمزة فالصيف مايقعدش فالدار تلقيه غي مع العشية قتلها وينه قاتلي مع جماعته سفيان و حكيم و فتحي و بدرو .....انا كي سمعت كلمة بدرو فرحت انه راه فالبلاد وقلت للولو خلينا نروحو نشوفوهم اتوحشتهم و رحنا لدار سعاد سلمت عليها و على امها و باباها و فرحو بينا بزاف و رحنا لدار بدرو  و ميمي غير فتحت الباب بقات تشوف قتلها ماتقوليليش برك نسيتيني قاتلي فرااااااح و بدات تعنق و تسلم ياه داك اليوم شعال شباب والله مكانش كيما الصحبة نتع الطفولة اروع صحبة و اصدقاء سلمت على عمي محمد و طاطا خديجة جمعت عندهم حتى جاو ماما و بابا منبعد فتنا على الجيران كلهم و ماحبوش يخلونا نروحو كامل قالونا لازم نعاودو لمة زمان و بابا قالهم اليوم نروحو و غدوة ان شاءالله رانا نجو دينا ارقام بعض و جا الوقت نروحو و كانو الاولاد مجاوش زعفت كي ماشفتهمش خاصة بدرو بصح قالونا الغدوة نتلاقو كلنا و نديرو فيها لمة فالحومة فرحت قلت غدوة نشوف بدرو و روحنا كي وصلنا للبينڨالو لقيت عمتي و يما يديرو فالعشا عاونتهم سقسيت على الاولاد و البنات قالولي نزلو يعومو نزلت عندهم كي قربت للبحر جا عندي واحد كان مع هذاك الشباب اللي خمست معاهم ديك الليلة انا فرحت قلت باينة بعثهلي هو حتى قالي الله يخليك ماعليش نيمرو قتله علاه قالي والو عجبتيني بغيت نتعرف عليك اكثر قتله ماعنديش تلفون سمحلي و بابا راه جاي باي دخلت نعوم قاتلي نسيمة بنت عمي علاش كان يحكي معاك قتلها بغا رقمي قاتلي شباااب يا فرح قتلها باين خلاط مالكبار مايراطيش قاتلي تجي عليه يسحر يافرح اقتلني بزينه