*حُب ومذهب *

البارت -8
(للكاتبھ زهراء السلامي)
رجعو من السفر والاحوال عال العال واستقبلوهم بالفرح وسوو عزيمة عدت .........
عدت ثلاث سنوات خلال هذه السنوات ماكو اشياء ضرورية تذكر لكن الي يذكر انُ ليث وهناء صار عدهم طفل اسمة شعيب عمره سنتين ويوسف صار ثالث مرحلة كلية ورنا رابع مرحلة وريم رابع اعدادي ولين هم رابع ابراهيم وجميلة نفسهم بس عمرهم كبر وكذلك كامل وزوجتة غير انُ رنا حبت ولد من الجامعة من غير محافظتها ولين هم حبت ابن عمتها احجيلكم عن رنا حبت ولد من جامعتها لمن كانت بالمرحلة الثانية وهو مرحلة ثالثة عمره 25 سنة اسمة حارث  ( اسمر متوسط الطول عيونة كبار معاني وجهة كلها حلوع جسمة رياضي يعني حلو الولد ) هو كان مرحلة ثالثة دام حبهم تقريباً سنة ونص تخرج الولد ورنا مرحلة رابعة قرر يخطبها واتفقو على الخطوبة وطبعاً حارث مثل اي ولد فتح موضوعة مع ام حارث ( حارث الولد الوحيد وعنده 2 اخوات وحده مزوجة والثانية اكبر من رنا بسنة يعني هم خريجة وابوه متوفي وعلى فكره ام حارث تريد تزوج ابنها من بنت اختها اسمها  عليا لان متفقين من الطفولة حارث لعليا الي اصغر من حارث بسنة وعليا تحب حارث )
حارث رجع من الشغل دخل البيت سلم على امة واختة ودخل غرفتة على ما بدل غسل  وصلى ونزل يتغده يم امة واختة خلصو غده
حارث : يمه اريد احاجيج بموضوع
ام حارث : يي يمه احجي
حارث : يمه اريد ازوج
ام حارث : صلوات على النبي من باجر اخطبلك بنت خالتك
حارث : لا يمه ما اريد عليا اني احب بنية كانت بالجامعة وياي واريدها
ام حارث : ما تستحي مو عيب عليك رايح تدرس لو تتمعشك
حارث : يمه اعصابج ما كتلج شي كتلج اريد البنية خطبيها الي شنو العيب اني راح اخطبها يعني ما ضاحك عليها
ام حارث : على جثتي يصير هذا الزواج لو بنت خالتك لو ما تاخذ غيرها
حارث : لو اموت ما اخذ بنت اختج
وراح لغرفتة معصب اختة جنى كانت تستمع من طلع اخوها راحت لامها تهديها
جنى: ماما على كيفج ضغطج لا يرتفع
ام حارث : سمعتي اخوج العيبة يريد يزوج وحده ما نعرفها
جنى : يمه شنو يزوج ما نعرفها مو بكيفة بس انتي استفسري عن البنية يجوز نعرفها
ام حارث : هسه ما احجي بالكي يتراجع عن قراره
جنى : كيفج وراحت لغرفتها تحاجي اختها المزوجة أمل
جنى: الوو شونج امل
امل : هلوو حبيبتي جناوي الحمد لله تمام وانتي شلونج
جنى : تمام عندي الج خبر
امل :شنو ولج خوفتيني احجي
جنى: اخوج يريد يزوج
امل: يي الحمد لله خطية هسه تفرح عليا
جنى: هنا المصيبة
امل : اي مصيبة
جنى: ما يريد عليا ويكول احب وحده من الجامعة
امل ويدها على حلكها : لا تكوليها عزه وامي شكلتله
جنى: امي عصبت وكلتله على جثتي تزوج غير عليا
امل : بعد ما اتحمل هسه اجيكم بس كملي شكال حارث
جنى: هلا بيج حارث عصب ودخل غرفتة
امل : عزه حصير مشكلة
جنى: يي وكبيره يلة تعالي
امل : اوك مع السلامة
جنى : باي
نروح لبيت ابو ابراهيم
كالعاده الكل بغرفتة قيلولة الظهر بس رنا وريم كاعدات
رنا : ريم ابشرج
ريم : بشنو
رنا : حارث حيحاجي امه على الزواج ويتقدمولي
ريم : يي خوش الحمد لله بس اخاف ما تقبل انتي من غير محافظة
رنا : ما معقولة تكف بوجه سعاده ابنها
ريم : يي ما معقولة تعالي نفكر شسوين من تنخطبين
رنا : ههههه يله فكري
ريم : اني بعقد القران فستان قصير وبالعرس فستان طويل ونسويلج عرس ما صاير ابد وانتي تطلعين احلى عروسة واركص بعرسج ركص ما صاير
تحجي ريم ورنا تتخيل وتضحك واختها تحجي ولا يخلص خيالها الواسع ......
بيت ابو كامل ايضاً كل واحد بغرفتة ويوسف هم بغرفتة وكالعاده يفكر بريم الي ما تروح من عقلة وگلبة وفرحان ما بقى ويتخرج ويخطبها وعده اليوم والكل بخياله والايام تتقدم وحارث يحجي مع امه بالزواج وامه رافضه الفكره وعرفت عليا وتخبلت وصاحت اذبح نفسي اذا تزوج غيري وصل الخبر لام حارث وتخبلت لان تحب بنت اختها هي مربيتها وكل ما تسأل رنا على هذا الموضوع حارث يكولها ان شاء الله افاتح امي حاليا ما اكدر لان مريضة ويتحجج شيحجي خوما يكوللها امي متريدج وداصير مشاكل بسبب هذا الموضوع فديوم مجتمعين حارث امه وخواته ثنينهن
حارث : يمه شصار على موضوع زواجي
ام حارث : ماكو زواج الا من عليا
حارث : يمه ليش تظلميني ما احبها  فتهمي لا تحبيني لا ظلميني امل ساعديني
امل: احجينه عن البنية احنه حتى اسمها ما نعرفة
حارث: اسمها رنا بكد جنى وياي بالجامعة الي جنت ادرس بيها
ام حارث : انوب من غير محافظة ماكو زواج
حارث ضرب يديه : اني ما ازوج غيرها وطلع
امل : ماما اخطبيها وبعدين فلشي الزواج ( جنى وامل مأيدات امهن ما يريدن يزوج اخوهن غير عليا خايفات على مشاعر عليا وما خايفات على اخوهن )
جنى : اخاف صير صدك ويصير الزواج
ام حارث : لا اخطب ولا شي ماكو زواج
عليا اجت لبيت خالتها ام حارث بيتهم قريب كولش دكت الباب حارث جان طالع فتح الباب
عليا : سلام شونك حارث وتباوعله
حارث وهو طالع : هلا
عليا : حارث
حارث : نعم
عليا سمعت تريد تزوج صدك
حارث : يي ان شاء الله وخطيبتي اسمها رنا
عليا والغضب مبين عليها : بس بعدك ما خاطب حتى تكول خطيبتي
حارث : قريب تصير خطيبتي
عليا : واني شنو
حارث : انتي شبيج
عليا : اني احبك انت ما تفهم ليش خليتني اتعلق بيك واحبك وتعوفني
حارث : اني ما علقتج بيه وما فد يوم كتلج احبج خوش ولا ترفعين صوتج ودموع التماسيح ما يمشن عليه
وطلع وسد الباب حيل طلعت جنى شافت عليا تبجي ودموعها اربعة اربعة
جنى : ماما ماما تعالي
اجت ام حارث : شكو وشافت بنت اختها تبجي
ام حارث : عليا حبيبتي شبيج ليش تبجين وحضنت بنت اختها
امل : عليا حبيبتي تعالي ادخلي
كعدن عليا وجابولها مي على ما هدأت شوي سألنها حجتلهن الي صار بدون اي مستحة من خالتها
ام حارث : لو يموت ما ياخذ هاي المدري منين واليوم يجي واني اعلمه
اجه اليل ودخل حارث البيت اتوقع اهله نايمين وهو يحجي مع رنا بالموبايل بس من دخل صار يججي بلغة ولد شافته امه هاا هسه شرفت هو على الخط مع رنا
حارث : يي يمه
ويريد يصعد
ام حارث : تعال وين صاعد يا ما تستحي ما تاخذ غير عليا
حارث بسرعة سد الموبايل بدون ما يحجي مع رنا
هنا رنا من سمعت ماتت قهر وهم خوف هي تعرف عليا بس مبين من صوت امه انها معصبة اجتها ريم حجت لريم الي سمعته ريم : عزه العزاج يا رنا شون بيج ياا منيه عليا
رنا حجت لختها منيه عليا وانوب رنا تبجي ريم بقت حايره شون اسكت اختها حضنتها : حبيبتي حارث الج ما دام يحبج بعد شكو معليج بأمه تقبل بالنهاية ويصير الج
رنا : ما اتوقع ابد ...
بهذه الوقت حارث يجادل مع امه
حارث : يمه شنو هل حجي وشبيها عليا ما اخلص منها مو بزعت من سالفتها ما تخلص
ام حارث : تنجب وماكو غير عليا
حارث : تغلطين عليه هاي اخرتها اني طالع من البيت ومن اخلص من عليا وتزوجوني رنا بوكتها ارجع
ام حارث : روح ولي وماكو غير عليا اطلع يله
حارث وهو معصب وعيونه حمر طلع وبقه حاير وين يروح بس كان لازم يطلع من البيت صحيح ما عدهن رجال غيره بس اذا يبقه معناها يموت مع رنا فكر يروح بيت صديقة حازم
حارث يتصل : الوو حازم شونك شخبارك
حازم : هلا هلا بحارث حبيبي الحمد لله تمام وانت شونك
حارث : الحمد لله حازم اليوم اريد انام يمكم
حازم : هلا بيك تعال يله وحدي بالبيت
حارث : جاي مع السلامة
حازم : مع السلامة 
وراح حارث لبيت حازم ورنا ما تصلت عليه
وصل حارث بيت حازم سلم على صديقة وتصافحو دخل لداخل البيت
حازم : حارث صاير وياك شي تسوفك مو على بعضك بيك شي
حارث تنهد وحجة لصديقة الي صار وشلون رنا سمعت
حازم : كول يا الله يخوي وهسه اكيد ما متعشي خابر بنت الناس على ما اسويلك عشة
حارث : صدكني ما اشتهي وخايف اتصل خايف يا حازم
حازم : اكول اتصل يله واني اسوي اكل اني هم ما متعشي
حارث : حازم اني مثكل عليك باجر ان شاء الله ادبر مكان واروحله
حازم : اكول اسكت لا هسه طراك شنو مثكل اصلا وحدي بالبيت اهلي مسافرين واني شغل ما اكدر اسافر وياهم وليش ابقه وحدي بالبيت انت تبقه وياي وكافي لغوه واتصل على البنية
حارث : ماشي